Minsan kailangan ang mga sulat ng pagberipika kapag gumagawa ng mga kahilingan sa mga provider ng pabahay. Inilalarawan ng lathalaing ito kung ano ang mga sulat ng pagberipika at kung kailan kinakailangan ang mga ito. May halimbawang kahilingan at template ng sulat din dito.

Ano ang mga makatwirang akomodasyon sa pabahay?

Kung hindi madaling magka-access sa kanilang bahay, maaaring hilingin ng mga taong may kapansanan sa mga provider nila ng pabahay ang mga pagbabago sa mga patakaran, pamamaraan, o serbisyo para matugunan ang mga pangangailangan nilang nauugnay sa kapansanan. Tinatawag ang mga itong makatwirang akomodasyon. Pakibasa ng lathalaing ito na "Diskriminasyon sa Pabahay Batay sa Kapansanan - Iyong mga Karapatan at Opsyon" para sa dagdag na impormasyon.

Ano ang sulat ng pagberipika?

Ginagamit ang mga sulat ng pagberipika para suportahan ang makatwirang mga kahilingan ng residente para sa akomodasyon/pagbabago. Kinukumpirma ng sulat ng pagberipika na kailangan ng taong may kapansanan ang pagbabagong hinihiling sa patakaran, pamamaraan, serbisyo, o pisikal na istruktura ng kanilang bahay.

Sino ang maaaring magbigay ng sulat ng pagberipika?

Maaaring magbigay ng sulat ng pagberipika ang taong nakakaalam ng mga pangangailangan ng taong humihiling ng makatwirang akomodasyon o pagbabago.

Isang listahan ito ng mga taong maaaring magbigay ng mga sulat ng pagberipika ayon sa mga regulasyon ng Batas sa Patas na Pabahay at Pagtatrabaho sa California, 2 CCR § 12178(g):

1. Doktor
2. Provider sa pangangalaga ng kalusugan, kabilang ang tanggapan ng medikal na praktis
3. Grupo para sa suporta sa mga kasamahan
4. Mga ahensya o provider ng serbisyong hindi medikal, tulad ng Mga Serbisyo ng Suporta sa Bahay o mga provider ng Serbisyo ng Sinusuportahang Pamumuhay
5. Anumang ibang maaasahang ikatlong partido na nakakaalam ng kapansanan o pangangailangan sa akomodasyon o pagbabago na nauugnay sa kapansanan. Maaaring miyembro ito ng pamilya na nag-aalaga sa taong may kapansanan.

Kailan ka dapat magbigay ng sulat ng pagberipika?

Kapag humiling ang taong may kapansanan ng makatwirang akomodasyon o pagbabago mula sa provider ng pabahay nila, maaaring humiling ito ng sulat ng pagberipika mula sa taong may kapansanan kapag hindi obyus ang pangangailangan sa akomodasyon/pagbabago.

Hindi kinakailangan ang mga sulat ng pagberipika kung obyus ang pangangailangan sa akomodasyon o pagbabago. Narito ang halimbawa ng obyus na pangangailangan para sa makatwirang pagbabago: Hiniling ng nangungupahan na gumagamit ng wheelchair sa kanyang provider ng pabahay ang pahintulot na maglagay ng rampa para ma-access ang pinto niyang nakataas nang isang hakbang. Hindi kinakailangan ang sulat ng pagberipika para maunawaang kailangan ng nangungupahang ito ang rampa para ma-access ang bahay niya.

Para saan gagamitin ang sulat ng pagberipika?

Gumagamit ang provider ng pabahay ng sulat ng pagberipika para kumpirmahing (1) may kapansanan AT (2) kailangan ng taong may kapansanan ang makatwirang akomodasyon o pagbabago.

Kung may kapansanan ang isang tao na hindi nakikita o makikita, nakakatulong ang sulat ng pagberipika sa provider ng pabahay na maunawaang may kapansanan ang tao. Ang mga halimbawa ng mga kapansanang maaaring hindi maliwanag ay: kung may kapansanan sa kalusugan ng pag-iisip, neurodivergent, o immunocompromised ang tao.

Maaaring may iba't ibang pangangailangang nauugnay sa kapansanan ang mga taong may magkaparehong kapansanan. Dahil dito, nakakatulong ang sulat ng pagberipika sa provider ng pabahay na maunawaan kung ano ang mga pangangailangan ng indibidwal na dapat matugunan at kung anong mga pagbabago ang makakatugon sa mga pangangailangan ng indibidwal.

Kailangan bang punan ng provider na magbeberipika ang mga partikular na form, o direktang ipadala ang sulat ng pagberipika?

Hindi. Hindi hinihiling ng batas na gumamit ng mga partikular na form o na direktang manggagaling sa provider ang mga sulat ng pagberipika. Hinihiling ng ilang provider ng pabahay na gamitin ng mga nangungupahan ang partikular na mga form nila, at may opsyon ang nangungupahan kung gagamitin nila ang mga ito. Maaaring maging mas madali at mas mabilis ang paggamit ng mga form ng mga provider ng pabahay para sa pagproseso ng makatwirang mga kahilingan sa akomodasyon o pagbabago, dahil maaaring maisaad sa mga form ang impormasyong kailangan nila. Hinihiling din ng ilang provider ng pabahay na bigyan sila ng mga nangungupahan ng pahintulot na makipag-usap nang direkta sa taong nagbeberipika ng kapansanan.

Kung may mga alalahanin ka tungkol sa form ng provider ng pabahay na humihingi ng masyadong maraming impormasyon, maaari kang makipag-ugnayan sa Disability Rights California para sa libreng legal na payo tungkol sa mga karapatan at opsyon mo.

Ano ang dapat kong sabihin sa paghiling ng sulat ng pagberipika sa mga tanggapan ng provider sa pangangalaga ng kalusugan o iba pang pinagmumulan ng mga sulat ng pagberipika?

Dapat mong ipaalam sa provider sa pangangalaga ng kalusugan ang dahilang nauugnay sa kapansanan kung bakit hindi ka magka-access sa bahay mo, at na gumagawa/gumawa ka ng makatwirang kahilingan sa akomodasyon o pagbabago sa provider ng pabahay mo.

Dapat mong sabihin sa kanila kung anong mga akomodasyon o pagbabago ang hiniling mo at hilingin sa provider sa pangangalaga ng kalusugan na kumpirmahin ang mga pagbabagong iyon na kailangan para pangasiwaan ang mga sintomas mo. Para makatugon sa mga pangangailangan mong nauugnay sa kapansanan, maaari ding magbigay ng dagdag na mungkahi para sa mga pagbabago ang tanggapan ng provider sa pangangalaga ng kalusugan.

Maaari mong ibigay ang halimbawang sulat ng pagberipika sa ibaba at ang kopya ng iyong makatwirang akomodasyon o kahilingan sa pagbabago sa tanggapan ng provider sa pangangalaga ng kalusugan mo para masuri nila. Maaari mo ring hilingin sa tanggapan ng provider mo sa pangangalaga ng kalusugan na ipadala sa iyo at sa provider ng pabahay mo ang sulat ng pagberipika para magkaroon ka ng kopya nito para sa mga rekord mo.

Halimbawa ng kahilingan para sa sulat ng pagberipika sa tanggapan ng provider ng pangangalaga sa kalusugan:

Minamahal na [pangalan ng Provider ng Pangangalaga sa Kalusugan],

Gumawa ako ng makatwirang kahilingan para sa tirahan sa landlord ko. Hiniling kong ipinadala niya lang sa pamamagitan ng email sa halip na liham ang mga sulat kapag nakikipag-ugnayan siya sa akin. Hiniling ko ring ipadala niya ang lahat ng impormasyon sa laman ng email sa halip na ilakip ang mga ito bilang hindi ma-access na attachment. Pakitingnan ang kalakip na makatwirang kahilingan sa akomodasyong ginawa ko.

Ilang beses na nagkalat ang mahahalagang abiso sa pinto ko kapag hindi ako makalabas, at hindi ko naman mababasa ang mga papel na abisong iyon. Maaari ka bang magsulat sa provider ko ng pabahay sa {address} para ipaalam sa kanyang kailangan ko ang pagbabagong ito para magka-access sa bahay ko sa parehong paraan tulad ng mga taong wala ng kapansanan ko?

Bilang paalala, walang karapatan ang provider ko ng pabahay na malaman ang medikal na diagnosis sa akin o ang detalyadong impormasyon tungkol sa kapansanan ko, pero pinahihintulutan ko ang provider ko ng pabahay na humingi ng pagberipikang may pangangailangan akong nauugnay sa kapansanan para sa makatwirang akomodasyong hinihiling ko.

Maraming salamat sa pagtulong sa akin na alisin ang mga hadlang na nauugnay sa kapansanan at magka-access sa aking bahay!

Taos-puso,

Pangalan ng Pasyente

Halimbawang Sulat ng Pagberipika

[Petsa]

Para kay [Landlord, Awtoridad ng Pabahay, at Samahan ng mga May-ari ng Bahay]:

Ako ang [doktor/psychiatrist/sikolohista/therapist/social worker/occupational therapist] ni [pangalan ng pasyente/kliyente], at pamilyar ako sa kondisyon niya. [Siya/Sila] ay may kapansanan na nagdudulot ng ilang partikular na limitasyon sa pagkilos. Kabilang sa mga limitasyong ito ang [ilista ang mga limitasyon sa pagkilos na nangangailangan ng hinihiling na akomodasyon].

 

 

 

[Ang hiniling na akomodasyon] ay kinakailangan para makapamuhay si [pangalan ng pasyente/kliyente] sa komunidad at magamit at ma-enjoy ang [kanyang/kanilang] tirahan sa pamamagitan ng [ilarawan kung paano matutulungan o masusuportahan ng akomodasyon ang indibidwal].

 

 

 

Salamat sa pagbibigay ng makatwirang akomodasyong ito kay (pangalan ng pasyente/kliyente)

Taos-puso,

[Pangalan at Posisyon]

Paano kung may dagdag na tanong ako?

Nagbibigay ang Disability Rights California ng libreng legal na payo sa mga taga-California na may mga kapansanan sa mga usaping nauugnay sa batas sa pabahay. Pakitawagan ang 1-800-776-5746 sa mga oras ng tanggapan, https://www.disabilityrightsca.org/get-help