ការស្វែងរកផ្ទះជួលសមរម្យនៅក្នុងរដ្ឋ California មិនដែលមានបញ្ហាប្រឈម​ច្រើននោះទេ – ជាពិសេសសម្រាប់ប្រជាពលរដ្ឋ California ដែលកំពុងរស់​នៅ​ជាមួយពិការភាព។ សៀវភៅមគ្គទេសក៍នេះមានគោលបំណងផ្តល់ការប្រឹក្សា និងការណែនាំទូទៅ ដល់ប្រជាពលរដ្ឋ California ដែលមានពិការភាពកំពុងស្វែងរកលំនៅឋានសម​រម្យ​នៅលើទីផ្សារឯកជន។

សៀវភៅមគ្គទេសក៍នេះមិនមែនជាការជំនួសសម្រាប់ការប្រឹក្សាផ្នែកច្បាប់ ឬ​ផ្នែកហិរញ្ញវត្ថុនោះទេ ប៉ុន្តែផ្ទុយទៅវិញមានគោលបំណងជួយបុគ្គលណាដែលមិន​ធ្លាប់​ជួល​ផ្ទះដោយខ្លួនឯងពីមុនមក។ សម្រាប់ជំនួយក្នុងការឆ្លើយសំណួរជាក់លាក់ចំពោះកាលៈទេសៈពិសេសរបស់អ្នក អ្នកអាចទាក់ទង DRC តាមរយៈលេខ៖ 1-800-776-5746។

ការស្វែងរកផ្ទះមួយខ្នងសមរម្យ៖

1. របៀបស្វែងរកផ្ទះមួយខ្នង៖

1. កម្មវិធីស្វែងរក – កម្មវិធីស្វែងរកដូចជា Google និង Bing ជា​រឿយៗជាកន្លែងដ៏ល្អមួយដើម្បីចាប់ផ្តើមស្វែងរកផ្ទះជួល។
2. បញ្ជីឈ្មោះអាជ្ញាធរលំនៅឋានក្នុងមូលដ្ឋាន – អាជ្ញាធរលំនៅ​ដ្ឋាន​ក្នុងមូលដ្ឋានតែងតែរក្សាបញ្ជីអភិវឌ្ឍន៍លំនៅឋានដែលមានតម្លៃសមរម្យ ទោះបីជាទាំងនេះច្រើនតែមានបញ្ជីរង់ចាំក៏ដោយ។ ចុចទីនេះដើម្បីទាក់ទងព័ត៌មានសម្រាប់អាជ្ញាធរលំនៅឋានក្នុងមូលដ្ឋាន របស់អ្នក។
3. សេវាកម្មរុករកលំនៅឋាន/211 – អ្នកអាចទូរសព្ទទៅលេខ 211 ដើម្បីសួរអំពីសេវាកម្មរុករកលំនៅឋានដែលអាចមាននៅក្នុងតំបន់របស់អ្នក។ សេវាកម្មរុករកលំនៅឋានប្រហែលជាអាចជួយអ្នកក្នុងការស្វែងរកផ្ទះមួយខ្នងសមរម្យ។
4. ការយល់ដឹងពីការក្លែងបន្លំ – ការបោកប្រាស់ថ្លៃជួលផ្ទះ ជា​អ កុ​សលឃើញកើតមានទូទៅក្នុងពេលថ្មីៗនេះ ដូច្នេះអ្នកគួរតែចាត់វិធានការដើ​ម្បីការ​ពារខ្លួនអ្នក​ ដូចជា៖ ត្រូវប្រាកដថាមិនបង់ប្រាក់អ្វីមុនពេលឃើញផ្ទះ មិ​ន​ត្រូវ​ចុះហត្ថលេខាលើកិច្ចសន្យាជួល ឬពាក្យសុំណាមួយដោយមិន​ឃើញផ្ទះ​ជា​មុ​ន មិ​នបង់ថ្លៃពាក្យសុំថ្លៃហួសហេតុ (សូមមើលផ្នែកទី 2b ខាងក្រោម) និង​មាន​ការ​សង្ស័យតម្លៃល្អពេកមិនគួរឲ្យជឿ។

2. សំណួរដំបូងដែលត្រូវសួរ

1. តើការរស់នៅក្នុងសហគមន៍នេះយ៉ាងម៉េចដែរ? ជំហានដំបូងដ៏ល្អមួយដើម្បីស្វែងយល់ពីបញ្ហានេះ គឺត្រូវស្វែងរកការវាយតម្លៃ​តា​មអនឡាញអំពីទីបរិវេណផ្ទះនេះ ប្រសិនបើមាន ដើម្បីរកមើលការត្អូញត្អែរ​ទូ​ទៅ ដូច្នេះអ្នកអាចសួរម្ចាស់ផ្ទះអំពីកង្វល់ទាំងនេះបាន។ តើការត្អូញត្អែរទាំងនេះបានដោះស្រាយហើយឬនៅ? តើវាហាក់ដូចជាថាម្ចាស់ផ្ទះឆ្លើយតបនឹងការត្អូញត្អែរដែរឬទេ? តើមានការត្អូញត្អែរទូទៅដែលគេបន្តនិយាយដែរឬទេ?

2. ថ្លៃសេវាដែលត្រូវសួរ – ថ្លៃពាក្យសុំគឺជារឿងធម្មតាណាស់ ហើយ​មានបំណងសងសំណងម្ចាស់ផ្ទះវិញសម្រាប់ការចំណាយពាក់ព័ន្ធនឹងការដំណើរការការឆែកសាវតារ និងការឆែកឥណទាន។ ថ្លៃសេវាទាំងនេះត្រូវបានដាក់កំណត់ដោយច្បាប់រដ្ឋ ហើយមិនគួរលើសពី​ការចំ​ណា​យ​ជាក់ស្តែងចំពោះម្ចាស់ផ្ទះដែលដំណើរការពាក្យសុំ និងដំណើរការឆែកសាវ​តារ និងឆែកឥណទានឡើយ។ ក្នុងករណីណាក៏ដោយ ថ្លៃពាក្យសុំអាចលើសពីកម្រិតអតិបរមារបស់រដ្ឋ ដែល​ប​ច្ចុ​ប្បន្នកំណត់ត្រឹម $65.37 គិតត្រឹមឆ្នាំ 2024 និងកើនឡើងជារៀងរាល់ឆ្នាំ។

3. លក្ខខណ្ឌតម្រូវនៃឥណទាន និងប្រាក់ចំណូល – ជាធម្មតា​ម្ចា​ស់ផ្ទះតម្រូវឱ្យប្រាក់ចំណូលរបស់អ្នកដាក់ពាក្យសុំមានយ៉ាងហោចណាស់ 2-3 ដ​ង​នៃថ្លៃជួលប្រចាំខែ ហើយអ្នកដាក់ពាក្យសុំត្រូវតែបំពេញបាន​តាមលក្ខ​ខណ្ឌ​តម្រូវនៃការឆែកឥណទាន ដូចជាមិនជំពាក់លុយម្ចាស់ផ្ទះមុន និងមិន​មាន​ការ​បណ្តេញចេញក្នុងកំណត់ត្រារបស់អ្នកណាម្នាក់។ វាមានសារៈសំខាន់ដែលត្រូវសួរម្ចាស់ផ្ទះជាមុនថាតើពួកគេមានលក្ខខណ្ឌតម្រូវអ្វីខ្លះ ដើម្បីចៀសវាងការខ្ជះខ្ជាយលុយថ្លៃពាក្យសុំ។ ទោះជាយ៉ាងណា ម្ចាស់ផ្ទះមិនអាចប្រើប្រាស់លក្ខខណ្ឌតម្រូវទាំងនេះ​ដោយ​ស្រប​ច្បាប់ដើម្បីរើសអើងអ្នកដោយហេតុផលខុសច្បាប់នោះទេ ដូចជាដោយដាក់​ល​ក្ខខណ្ឌតម្រូវឆែកឥណទានខុសៗគ្នាសម្រាប់អ្នកដាក់ពាក្យដែលមានសញ្ជាតិផ្សេងៗគ្នា។ ម្ចាស់ផ្ទះក៏មិនអាចប្រើលក្ខខណ្ឌតម្រូវនៃប្រាក់ចំណូលដើម្បីហាមឃាត់អ្នកដាក់ពាក្យដែលមានប្រាក់ចំណូលទាបដោយប្រើកម្មវិធីលំនៅឋានឧបត្ថម្ភធនដូចជាផ្នែកទី 8 ផងដែរ។ ក្នុងករណីទាំងនេះ ការគណនាថ្លៃជួលនិងប្រាក់ចំណូលរបស់អ្នកជួល​ត្រូវតែ​ផ្អែ​ក​លើមួយចំណែកនៃថ្លៃជួលរបស់អ្នកជួល ហើយមិនមែនផ្អែកលើចំនួនទឹក​ប្រា​ក់ទាំងមូលនៃថ្លៃជួលក្នុងកិច្ចសន្យាឡើយ។ ម្ចាស់ផ្ទះនៅរដ្ឋ California មិនអាចបដិសេធដោយស្របច្បាប់មិនជួលឱ្យអ្នក​ចូល​រួម​ផ្នែកទី 8 ដោយគ្រាន់តែពួកគេស្ថិតនៅផ្នែកទី 8 ប៉ុណ្ណោះបានឡើយ។

4. ការឆែកសាវតារ – ម្ចាស់ផ្ទះភាគច្រើនតម្រូវឱ្យអ្នកដាក់​ពាក្យ​ដាក់​ស្នើសុំការឆែកសាវតារ។ ការឆែកទាំងនេះច្រើនតែរកមើលបំណុលដែលអ្នកអាចជំពាក់ សំណុំរឿងបណ្តេ​ញ​អ្នកចេញពីមុន និងប្រវត្តិបទល្មើសណាមួយ។

5. គោលនយោបាយស្តីពីសត្វចិញ្ចឹម – ម្ចាស់សត្វចិញ្ចឹម ឬម្ចាស់​ស​ត្វ​​ចិញ្ចឹមនាពេលអនាគត គួរតែប្រាកដថាត្រូវសួរថាតើគោលនយោបាយរបស់​ម្ចាស់ផ្ទះអំពីសត្វចិញ្ចឹមចែងអំពីអ្វីខ្លះ។ ម្ចាស់ផ្ទះជាច្រើនដាក់កំហិតលើសត្វចិញ្ចឹម ដូចជាដោយអនុញ្ញាតតែពូជខ្លះ ដោ​យដាក់កំហិតលើទម្ងន់ ឬដោយហាមឃាត់ប្រភេទសត្វចិញ្ចឹម និងឧបករណ៍​សត្វ​ចិញ្ចឹមមួយចំនួន ដូចជាទូរចិញ្ចឹមត្រីជាដើម។ ប្រសិនបើអ្នកមានតម្រូវការទាក់ទងនឹងពិការភាពសម្រាប់ដៃគូ ឬសត្វបម្រើ​សេ​វាកម្ម អ្នកអាចមានលក្ខណៈសម្បត្តិគ្រប់គ្រាន់ក្នុងការទទួលបាន​ការលើក​លែងចំពោះច្បាប់ទាំងនេះជាការសម្របសម្រួលសមរម្យ។ អ្នកអាចស្វែងរកព័ត៌មានបន្ថែមអំពីការសម្របសម្រួលសមរម្យនៅក្នុងផ្នែកទី 5 ខាងក្រោម។

3. ទៅមើលផ្ទះដែលត្រូវជួល

1. ផ្ទះគំរូធៀបនឹងផ្ទះជាក់ស្តែង – អចលនទ្រព្យធំៗជាច្រើនមាន "ផ្ទះគំរូ" ដែលមានបំណងបង្ហាញដល់អ្នកមានបំណងជួល។ ផ្ទះទាំងនេះជាទូទៅមានបំពាក់គ្រឿងសង្ហារិម ហើយមិនចាំបាច់ជាប្លង់​ជាន់ដូ​ចគ្នាទៅនឹងផ្ទះផ្សេងទៀតដែលនៅទំនេរមិនមានអ្នកជួលនោះឡើយ។ ត្រូវប្រាកដថាត្រូវសួរម្ចាស់ផ្ទះថាតើផ្ទះដែលអ្នកកំពុងមើលនោះជាផ្ទះពិតប្រាកដដែលត្រូវជួល ឬក៏ជាផ្ទះគំរូ។ ប្រសិនបើវាជាផ្ទះគំរូ ក៏ត្រូវទទូចសុំមើលផ្ទះដែលត្រូវជួលមុននឹងបង់លុយ ឬចុះ​កិច្ចសន្យាជួល។ នេះមានសារៈសំខាន់ណាស់ ដើម្បីឱ្យអ្នកអាចស្វែងរកបញ្ហាដែលអាចកើតមាន​ជា​មួយ​ផ្ទះពិតប្រាកដដែលអ្នកនឹងជួល។

2. មើលផ្ទះនៅម៉ោងផ្សេងគ្នានៅពេលថ្ងៃ – បើអាចធ្វើបាន ទៅ​មើលទីបរិវេណផ្ទះនេះនៅម៉ោងផ្សេងៗគ្នានៅពេលថ្ងៃ ដូចជាពេលព្រឹកព្រលឹម រ​សៀល និង​ល្ងាច។ នេះអាចជួយអ្នកស្វែងរកបញ្ហាដែលអាចកើតមាន មុនពេលសន្យាជួលផ្ទះនេះ ដូចជាអ្នកជិតខាងដែលបង្កសំឡេងរំខាន កង្វល់អំពីការចេញចូលផ្ទះ ឬបញ្ហា​ចំណតជាដើម។

3. បញ្ហាចំណត – តើកន្លែងចតរថយន្តជាកន្លែងចត​ដែលត្រូវ​បា​ន​កំណត់ ឬមកមុនចតមុន? តើមានកន្លែងចតរថយន្តគ្រប់គ្រាន់សម្រាប់ចំនួនអ្នករស់នៅទីនោះដែរឬទេ? តើមានកន្លែងចតរថយន្តដែលអាចចូលបានដែរឬទេ បើចាំបាច់?

4. ការព្រួយបារម្ភអំពីសុវត្ថិភាព – តើការចេញចូល​ទីបរិវេណផ្ទះ​​នេះ​មាន​ដាក់​កំ​ហិតដែរឬទេ? បើមានច្រកទ្វារ តើអ្នករស់ទីនោះ និងភ្ញៀវចេញចូលដោយរបៀបណា?

5. ការចេញចូល – ប្រសិនបើអគារមានជណ្តើរជើងដែលនឹង​ពិ​បា​កសម្រាប់អ្នកឡើងចុះ តើអគារមានជណ្តើរយន្តដែលប្រើការកើតដែរឬទេ? តើមានចំណតអាចចូលបាននៅទីបរិវេណផ្ទះនេះដែរឬទេ?

6. ការបោកគក់ – តើទីបរិវេណផ្ទះនេះមានបន្ទប់បោកគក់ ម៉ា​ស៊ី​នបោកគក់/ម៉ាស៊ីនសម្ងួតនៅក្នុងផ្ទះ ឬក៏មិនមានទាំងអស់នេះ? តើបន្ទប់បោកគក់អាចចូលបានសម្រាប់អ្នក ហើយបន្ទប់នេះទំនេរដែរ​ឬទេ​នៅ​ក្នុងអំឡុងពេលម៉ោងដែលអ្នកត្រូវការបន្ទប់នេះ? ប្រសិនបើគ្មានកន្លែងបោកគក់ទាល់តែសោះក្នុងទីបរិវេណផ្ទះ តើមានហាង​បោ​ក​អ៊ុតស្វ័យប្រវត្តិនៅក្បែរដែលអ្នកអាចប្រើបានដែរឬទេ?

7. នីតិវិធីផ្ញើតាមប្រៃសណីយ៍ និងការដឹកជញ្ជូន – តើអ្នករស់​នៅ​ក្នុងអាផាតមិនទទួលបានអីវ៉ាន់ប្រៃសណីយ៍ដោយរបៀបណា ហើយតើមាន​កង្វ​ល់​អំពីលទ្ធភាពទៅ និងមកពីបន្ទប់អីវ៉ាន់ប្រៃសណីយ៍ ឬបន្ទប់ដាក់កញ្ចប់​អីវ៉ា​ន់​ដែរឬទេ? តើកញ្ចប់អីវ៉ាន់ត្រូវបានទុកនៅទីតាំងជាក់លាក់មួយ ឬត្រូវបានដឹកជញ្ជូនដល់​មាត់ទ្វារអ្នករស់នៅក្នុងអាផាតមិនម្នាក់ៗដែរឬទេ? តើបុគ្គលិកដឹកជញ្ជូនមានសិទ្ធិចូលទីបរិវេណផ្ទះក្រៅម៉ោងធ្វើការធម្មតាដែរទេ? ប្រសិនបើមានបន្ទប់ដាក់កញ្ចប់អីវ៉ាន់ តើបន្ទប់នេះទំនេរទេក្នុង​អំឡុង​ពេល​ម៉ោង​ដែលអ្នកត្រូវការ?

4. ដើរមើលតំបន់ជុំវិញ ដើម្បីឲ្យប្រាកដថាវាត្រូវនឹងតម្រូវការរបស់អ្នក។

1. សំឡេងរំខាន – តើមានសំឡេងរំខានកម្រិតណានៅក្នុងផ្ទះ និ​ងនៅក្នុងតំបន់ជុំវិញនោះ? ប្រសិនបើអ្នកអាចដើរមើលបាន សូមព្យាយាមទៅលេងតំបន់នេះនៅម៉ោង​ផ្សេ​ងៗគ្នានៅពេលថ្ងៃ ដើម្បីរកមើលថាតើវាមានសំឡេងរំខានខ្លាំងដែរឬទេ នៅ​ពេលដែលអ្នកត្រូវការភាពស្ងប់ស្ងាត់។

2. ចរាចរណ៍ – តើស្ថានភាពចរាចរណ៍នៅតំបន់នោះមាន​លក្ខ​ណៈ​ដូចម្តេច? បើអ្នកធ្វើដំណើរទៅធ្វើការ តើផ្លូវធ្វើចរាចរណ៍នៅតំបន់នោះពិបាកដែរឬទេ?

3. សុវត្ថិភាព – តើទីបរិវេណផ្ទះមានច្រកទ្វារឬអត់? តើអ្នករស់នៅ និងភ្ញៀវចូលអគារអាផាតមិនដោយរបៀបណា? តើនៅតំបន់ជុំវិញមានបទឧក្រិដ្ឋច្រើនដែរឬទេ? អ្នកប្រហែលជាចង់ប្រើឧបករណ៍អនឡាញដើម្បីស្វែងយល់អំពីប្រភេទនៃសកម្មភាពឧក្រិដ្ឋកម្មដែលអាចនឹងកំពុងកើតឡើងនៅក្នុងតំបន់នេះ។ អ្នកប្រហែលជាអាចស្វែងរកឧបករណ៍ទាំងនេះបានដោយធ្វើការស្វែងរកតាមអនឡាញអំពីពាក្យដូចជា "ផែនទីឧក្រិដ្ឋកម្ម [ឈ្មោះតំបន់]"។

4. សាលារៀន – ប្រសិនបើអ្នកមានកូន ឬមានគម្រោងចង់​មា​ន​កូនក្នុងពេលរស់នៅក្នុងផ្ទះនេះ តើសាលារៀននៅតំបន់នោះមាន​លក្ខណៈ​បែ​បណា? អ្នកអាចប្រើឧបករណ៍អនឡាញដើម្បីមើលថាតើមានសាលារៀនណាខ្លះនៅក្នុងតំបន់នេះ ហើយក៏អានការចាត់ចំណាត់ថ្នាក់ និង/ឬការវាយតម្លៃតាមអន​ឡា​ញ​បានផងដែរ។

5. ការសម្របសម្រួល

1. អ្នកមានសិទ្ធិរួចផុតពីការរើសអើងដោយផ្អែកលើ "វណ្ណៈការពារ" ណាមួយ ដូច​ជា​សាសន៍ ពណ៌សម្បុរ សាសនា ភេទ/យេនឌ័រ អត្តសញ្ញាណយេនឌ័រ ការមាន​ផ្ទៃ​ពោះ ទំនោរផ្លូវភេទ ស្ថានភាពអាពាហ៍ពិពាហ៍ ស្ថានភាពយោធា ឬអតីតយុទ្ធ​ជ​ន ស្ថានភាពវេជ្ជសាស្ត្រ និង/ឬពិការភាព ដើមកំណើតជាតិសាសន៍ ពូជពង្ស ឬ​ព័ត៌មានសេនេទិច។
2. ប្រសិនបើអ្នកត្រូវការការផ្លាស់ប្តូរវិធាន ឬនីតិវិធីក្នុងការជួលរបស់អ្នក​ដោយ​សា​រ​តែពិការភាពរបស់អ្នក (ដូចជាប្រសិនបើអ្នកមានសត្វគាំទ្រផ្លូវចិត្ត ហើយ​ម្ចាស់ផ្ទះមិនអនុញ្ញាត ឬគិតថ្លៃសត្វចិញ្ចឹម) អ្នកអាចស្នើសុំការ​សម្របសម្រួល​សមរ​ម្យពីម្ចាស់ផ្ទះបាន។ សូមមើល សិទ្ធិរបស់អ្នកក្នុងការទទួលបានការសម្របសម្រួលសមរម្យ សម្រាប់ព័ត៌មានបន្ថែមអំពីការសម្របសម្រួលសមរម្យ។
3. ប្រសិនបើអ្នកត្រូវការធ្វើការផ្លាស់ប្តូរផ្ទះនេះឯងដោយសារតែពិការភាពរបស់អ្នក (ដូចជាការដំឡើងបង្កាន់ដៃនៅក្នុងបន្ទប់ងូតទឹកផ្កាឈូក) អ្នកមាន​សិទ្ធិ​ក្នុងការស្នើសុំការកែប្រែសមរម្យបាន។ ទោះជាយ៉ាងណាក៏ដោយ ជាមួយនឹងការកែប្រែសមរម្យ ម្ចាស់ផ្ទះជាធម្មតា​មាន​សិទ្ធិតម្រូវឱ្យអ្នកជួលចេញចំណាយលើថ្លៃកែប្រែ ក៏ដូចជាបង់ប្រាក់ថ្លៃជួស​ជុល​ផ្ទះ​នេះឲ្យដូចស្ថានភាពដើមវិញនៅពេលអ្នករើចេញ។ សូមមើល ការរើសអើងលំនៅឋានដោយផ្អែកលើពិការភាព - សិទ្ធិ និងជម្រើសរបស់អ្នក​ សម្រាប់ព័ត៌មានបន្ថែមអំពីការកែប្រែសមរម្យ។

ការពិនិត្យមើលកិច្ចសន្យាជួល និងការរើចូលនៅ

ផ្នែកនេះនឹងផ្តោតលើការពិនិត្យមើលកិច្ចសន្យាជួល ដំណើរការដាក់ពាក្យ និង​រៀបចំឯកសារអំពីការខូចខាត នៅពេលអ្នករើចូលនៅ។

1. ការពិនិត្យមើលកិច្ចសន្យាជួល

1. ការយល់ដឹងពីការក្លែងបន្លំ៖ កុំចុះហត្ថលេខាលើកិច្ចសន្យាជួល ឬបង់លុយណាមួយមុនពេលឲ្យអ្នកមើលផ្ទះ​ដែល​ត្រូវជួល និងពិនិត្យមើលឯកសារកិច្ចសន្យាជួលដែលបានស្នើឡើងឲ្យសោះ។ អនាគតម្ចាស់ផ្ទះដែលទាមទារឱ្យអ្នកចុះកិច្ចសន្យាជួល ឬបង់ប្រាក់​កក់​មុន​ពេ​ល​មើលផ្ទះគឺជាទង់សញ្ញាគ្រោះថ្នាក់ – នេះច្រើនតែជាសញ្ញានៃករណី​បោកប្រាស់​ថ្លៃជួល។

2. កិច្ចសន្យាជួលគឺជាកិច្ចសន្យាស្របច្បាប់ ហើយផ្តល់សិទ្ធិ និងទំនួលខុសត្រូវ​មួយ​ចំនួន​ដល់អ្នកជួល និងម្ចាស់ផ្ទះ។

3. ពាក្យគន្លឹះដែលត្រូវរកមើលនៅក្នុងកិច្ចសន្យាជួលរួមមាន៖

   1. រយៈពេលជួល – កិច្ចសន្យាជួលអាចមានរយៈពេលណាមួយ ទោះយ៉ាងណារយៈពេលជួលទូទៅមួយចំនួនសម្រាប់អាផាតមិនគឺគិតចាប់ពីមួយខែទៅមួយខែរហូតដល់រយៈពេលជួលមួយឆ្នាំ ឬយូរជាងនេះ។ វាជារឿងសំខាន់ក្នុងការពិចារណាថាតើអ្នកនឹងអាចបន្តរស់នៅក្នុងផ្ទះនេះពេញមួយអាណត្តិជួលឬយ៉ាងណា ដោយសារអាចមានផលវិបាកផ្នែកហិរញ្ញវត្ថុ​ចំ​ពោះ​ការរើចេញពីផ្ទះមុនពេលផុតកំណត់នៃរយៈពេលជួល។ ប្រសិនបើអ្នកល្មើសកិច្ចសន្យាជួលរបស់អ្នកមុនកាលកំណត់ដោយមិនមានការយល់ព្រមផ្តល់ការសម្របសម្រួលសមរម្យសម្រាប់បំពេញតម្រូវការទាក់ទងនឹងពិការភាព អ្នកអាចនឹងទទួលខុសត្រូវក្នុងការបន្តបង់ថ្លៃជួលរហូត​ដល់​រក​ឃើញ​ផ្ទះជួលថ្មីសមស្រប។

      ចំនួនថ្លៃជួល និងកាលបរិច្ឆេទផុតកំណត់បង់ថ្លៃជួល – កិច្ច​ស​ន្យាជួលគួរតែបញ្ជាក់ពីចំនួនថ្លៃជួលដែលដល់ពេលកំណត់សង ហើយនៅពេល​ដែ​លដល់ពេលកំណត់បង់ថ្លៃជួលម្តងៗ។ កិច្ចសន្យាជួលក៏គួរតែរួមបញ្ចូលការណែនាំអំពីការទូទាត់ ក៏ដូចជាថ្លៃពិន័យ​យឺ​តយ៉ាវដែលអាចអនុវត្តបានណាមួយ និងការពិន័យសម្រាប់ការទូទាត់យឺត។

      ប្រាក់កក់ធានា – កិច្ចសន្យាជួលគួរតែបញ្ជាក់ពីចំនួនទឹក​ប្រា​ក់​កក់ដែលត្រូវការណាមួយ ក៏ដូចជាលក្ខខណ្ឌដែលម្ចាស់ផ្ទះអាចរក្សាទុកប្រាក់​កក់​បន្ទាប់ពីអ្នករើចេញ។ ប្រាក់កក់ធានាគឺជាចំនួនទឹកប្រាក់ដែលអ្នកបានបង់ទៅឱ្យម្ចាស់ផ្ទះ នៅពេល​អ្នករើចូលនៅក្នុងផ្ទះជួលនេះ ដែលត្រូវបានប្រគល់ជូនអ្នកវិញនៅពេល​អ្នករើ​ចេញ បន្ទាប់ពីដកការចំណាយដើម្បីជួសជុលការខូចខាតផ្ទះ និងការ​កាត់​កង​ដែលអាចអនុញ្ញាតផ្សេងទៀត។ ក្រោមច្បាប់រដ្ឋ California គិតត្រឹម 1/1/2024 ម្ចាស់ផ្ទះជាច្រើន (ប៉ុន្តែមិន​មែន​ទាំងអស់) ត្រូវបានហាមឃាត់មិនឱ្យគិតថ្លៃជួលលើសពីមួយខែជាប្រាក់ក​ក់​ធា​នាឡើយ។ ប្រសិនបើអ្នកជឿថាម្ចាស់ផ្ទះរបស់អ្នកកំពុងព្យាយាមគិតប្រាក់កក់លើស សូម​ស្វែងរកជំនួយផ្នែកច្បាប់ ដើម្បីអាចពិនិត្យសើរើកាលៈទេសៈពិសេសរបស់អ្នក។

      ការជួលបន្ត – ម្ចាស់ផ្ទះជាច្រើនហាមឃាត់ការជួលបន្ត – ឬ​ជួ​ល​បន្ទប់ក្នុងផ្ទះ ទៅឲ្យអ្នកផ្សេងរស់នៅជាមួយ – ដោយគ្មានការយល់ព្រម​ពី​ម្ចា​ស់​ផ្ទះ។ ប្រសិនបើអ្នកមានបំណងចង់មានអ្នករស់នៅបន្ទប់ជាមួយ ត្រូវប្រាកដថា អ្ន​កបានដឹងពីគោលនយោបាយរបស់ម្ចាស់ផ្ទះរបស់អ្នកអំពីរឿងនេះដូចមានចែងក្នុងកិច្ចសន្យាជួល។

      ច្បាប់អចលនទ្រព្យ – កិច្ចសន្យាជួលក៏ទំនងជារួមបញ្ចូលផង​ដែរ​នូវច្បាប់មួយចំនួនសម្រាប់ការស្នាក់នៅក្នុងផ្ទះអាផាមិននេះ ដូចជា​ម៉ោ​ង​ស្ងប់ស្ងាត់ គោលនយោបាយស្តីពីសត្វចិញ្ចឹម និងច្បាប់សម្រាប់ការប្រើ​ប្រាស់​គ្រឿ​ងបរិក្ខារ។ ទាំងនេះជាការសំខាន់ក្នុងការត្រួតពិនិត្យ និងស្វែងយល់ ពីព្រោះការបំពាន​ម្ត​ង​ហើយម្តងទៀត ឬធ្ងន់ធ្ងរលើច្បាប់ទាំងនេះអាចជាហេតុផលសម្រាប់​ការប​ណ្តេ​ញចេញ។ ប្រសិនបើអ្នកត្រូវការការសម្របសម្រួលសមរម្យ ដោយសារតែពិការភាពរបស់​អ្ន​កសម្រាប់ការលើកលែងចំពោះច្បាប់ណាមួយក្នុងចំណោមច្បាប់ទាំងនេះ សូម​មើ​លការបោះពុម្ពផ្សាយអំពីការសម្របសម្រួលសមរម្យរបស់ DRC ដែលមាន​នៅ​លើវេបសាយរបស់យើងផងដែរនៅក្រោមធនធាន > លំនៅឋាន/ភាព​គ្មាន​ផ្ទះសម្បែង > ការរើសអើងលំនៅឋានដោយផ្អែកលើពិការភាព – សិទ្ធិ និង​ជម្រើ​សរបស់អ្នក

4. ប្រសិនបើអ្នកមានសំណួរអំពីលក្ខខណ្ឌនៃកិច្ចសន្យាជួល សូមស្វែងរកការប្រឹក្សា​ផ្នែក​ច្បាប់មុនពេលចុះហត្ថលេខា។ ប្រសិនបើអ្នកចុះហត្ថលេខាលើកិច្ចសន្យាជួល អ្នកនឹងត្រូវបានតម្រូវឱ្យគោរព​តាមលក្ខខណ្ឌណាមួយដែលមិនលើ្មសច្បាប់ ទោះបីជាអ្នកមិនយល់លក្ខខណ្ឌ​ទាំ​ង​នេះ​នៅពេលអ្នកចុះហត្ថលេខាក៏ដោយ។ សូមស្វែងរកការប្រឹក្សាផ្នែកច្បាប់អំពីសំណួរណាមួយដែលអ្នកមានទាក់ទងនឹងកិច្ចសន្យាជួល​មុនពេលចុះហត្ថលេខា។ ម្ចាស់ផ្ទះដែលព្យាយាមដាក់សម្ពាធឱ្យអ្នកចុះហត្ថលេខាមុនពេលអ្នកទទួលបានការប្រឹក្សាបែបនេះគឺជាទង់សញ្ញាគ្រោះថ្នាក់ – ម្ចាស់ផ្ទះគួរតែចង់ឱ្យភាគីទាំង​អ​ស់យល់ពីអ្វីដែលពួកគេកំពុងចុះហត្ថលេខាដើម្បីចៀសវាងបញ្ហា និងការ​យល់​ច្រ​ឡំនាពេលអនាគត។

ដំណើរការដាក់ពាក្យ

1. ជាទូទៅ ម្ចាស់ផ្ទះនឹងតម្រូវឱ្យមានការដាក់ពាក្យ និងការបង់ថ្លៃពាក្យសុំ​សម្រា​ប់​អនាគតអ្នករស់នៅជាមនុស្សពេញវ័យទាំងអស់នៅក្នុងផ្ទះនេះ។ នៅក្រោមច្បាប់រដ្ឋ California ថ្លៃសេវានេះគួរតែសងម្ចាស់ផ្ទះវិញសម្រាប់តែការ​ចំណាយជាក់ស្តែងរបស់ពួកគេក្នុងការឆែកឥណទាន និងសាវតារបស់អ្នកជួល​ប៉ុណ្ណោះ – ម្ចាស់ផ្ទះមិនគួរកេងចំណេញពីថ្លៃពាក្យសុំនោះទេ។ ក្នុងករណីណាក៏ដោយ ថ្លៃពាក្យសុំអាចលើសពីកម្រិតអតិបរមារបស់រដ្ឋ ដែល​ប​ច្ចុប្បន្នកំណត់ត្រឹម $65.37 គិតត្រឹមឆ្នាំ 2024 និងកើនឡើងជារៀងរាល់ឆ្នាំ​ទៅ​តាមអតិផរណា។ ប្រសិនបើអ្នកជឿថា ម្ចាស់ផ្ទះកំពុងព្យាយាមគិតថ្លៃពាក្យសុំលើសពីនេះ សូម​ស្វែ​ងរកជំនួយផ្នែកច្បាប់មុនពេលបង់ប្រាក់ ឬយល់ព្រមលើថ្លៃសេវាបែបនេះ។

3. ការរើចូលនៅ/ការរៀបចំឯកសារអំពីការខូចខាត

1. នៅថ្ងៃចាប់ផ្តើមអនុវត្តកិច្ចសន្យាជួល បន្ទាប់ពីចុះហត្ថលេខា ម្ចាស់ផ្ទះនឹង​ប្រ​គ​ល់កូនសោផ្ទះឲ្យអ្នក។ ពេលដែលវាកើតឡើង វាជារឿងសំខាន់ដែលអ្នកត្រូវរៀបចំឯកសារអំពីការ​ខូច​ខាត ឬបញ្ហាណាមួយជាមួយផ្ទះនេះភ្លាម។ បញ្ហាទាំងឡាយដែលអ្នកកំណត់ឃើញជាមួយផ្ទះនេះ ដូចជាប្រហោងជញ្ជាំង ការ​រហែកកម្រាលព្រំ ស្នាមប្រឡាក់ សម្ភារៈប្រើប្រាស់ដែលខូច ឬបែក​បាក់​ជាដើម គួ​រតែរាយការណ៍ភ្លាមៗទៅកាន់ម្ចាស់ផ្ទះជាលាយលក្ខណ៍អក្សរ។ អ្នកក៏គួរតែថតរូបផ្ទះនេះដែលមានបង្ហាញកាលបរិច្ឆេទ និងម៉ោងដែល​បាន​ថត ព្រមទាំងការខូចខាតដែលបានរាយការណ៍ទាំងអស់​សម្រាប់ទុកជា​កំណត់​ត្រា​របស់អ្នក។ អ្នកក៏ប្រហែលជាចង់ថតវីដេអូដែលបង្ហាញពីការដើរពិនិត្យមើលផ្ទះនេះដំបូងផងដែរ ដើម្បីរក្សាទុកជាកំណត់ត្រារបស់អ្នក។

2. នៅពេលដែលវាដល់ពេលដែលត្រូវរើចេញពីអាផាតមិនរបស់អ្នកនៅថ្ងៃកំណត់ខាងមុខ ម្ចាស់ផ្ទះរបស់អ្នកមិនត្រូវបានអនុញ្ញាតឱ្យកាត់ទុកប្រាក់ពីប្រាក់កក់​របស់អ្នកដើម្បីជួសជុលការខូចខាតដែលមានមុនពេលកិច្ចជួលរបស់អ្នកចាប់ផ្តើមអនុវត្តនោះឡើយ។ ការមានរូបភាព និងឯកសារអំពីការខូចខាតមុនជួលផ្ទះនេះនឹងអនុញ្ញាតឱ្យ​អ្នកបញ្ជាក់ថាលក្ខខណ្ឌទាំងនេះមានរួចហើយ មុនពេលអ្នករើចូលនៅ។