Kev nrhiav xauj ib lub tsev nyob uas tsim nyog hauv California yeej tsis muaj qhov nyuaj li - tshwj xeeb tshaj yog rau cov neeg nyob hauv California uas muaj kev xiam oob qhab.Phau ntawv qhia no yog npaj los muab cov lus qhia ib txwm muaj thiab cov lus taw qhia rau California cov neeg uas muaj kev xiam oob qhab nrhiav vaj tsev uas tsim nyog ntawm kev lag luam ntiag tug.

Phau ntawv qhia no tsis yog los hloov pauv rau cov lus qhia txog fab kev cai lij choj los sis fab nyiaj txiag, tab sis yog npaj los pab cov tib neeg uas ib txwm tsis tau xauj tsev rau lawv tus kheej los dua li.Yog xav paub ntxiv txog koj lus nug tshwj xeeb, koj tuaj yeem tiv tauj rau DRC ntawm 1-800-776-5746.

Nrhiav ib Chav Nyob Uas Tsim Nyog:

1.Txoj hau kev nrhiav ib lub tsev nyob:

1. Cov tshuab tshawb nrhiav – Cov tshuab nrhiav xws li Google thiab Bing ib txwm yog qhov chaw zoo los pib tshawb nrhiav rau kev xauj tsev nyob.
2. Daim ntawv teev npe cov chaw tswj hwm vaj tsev nyob hauv cheeb tsam – Cov chaw tswj hwm vaj tse nyob hauv zej zog feem ntau khaws cov npe ntawm cov kev txhim kho vaj tsev pheej yig, txawm hais tias feem ntau cov tsev no muaj cov npe tos los xij. Nias rau ntawm no los txais txais cov ntaub ntawv tiv tauj rau koj lub chaw tswj xyuas vaj tsev hauv cheeb tsam.
3. Cov kev pab cuam Taw Qhia Vaj Tsev/211 – koj hu tau rau 211 mus nug txog cov kev pab cuam taw qhia vaj tse uas tej zaum yuav muaj nyob rau hauv koj cheeb tsam.Cov kev pab cuam taw qhia vaj tsev yuav tuaj yeem pab koj nrhiav ib chav tsev uas tsim nyog tau.
4. Cov kev paub txog kev dag ntxias – Cov kev dag ntxias xauj vaj tse yog ib qho tshwm sim tas li nyob rau lub sij hawm tsis ntev los no yog li ntawd koj yuav tsum ua cov kauj ruam los tiv thaiv koj tus kheej xws li: xyuas kom paub meej tias tsis txhob them nyiaj ua ntej pom chav tsev, tsis txhob kos npe rau daim ntawv xauj tsev los sis daim ntawv thov yam tsis pom chav tsev ua ntej, tsis txhob them tus nqi daim ntawv thov tshaj siab heev (saib nqe 2b hauv qab no), thiab tsis ntseeg rau tus nqi zoo dhau qhov muaj tseeb.

2.Thawj cov lus nug uas yuav nug

1. Nws zoo li cas rau kev ua neej nyob hauv zej zog? Ib kauj ruam thawj uas zoo los nrhiav qhov no yog tshawb nrhiav cov kev tshuaj xyuas hauv oos lais ntawm cov cuab yeej, yog tias muaj, nrhiav cov kev tsis txaus siab uas koj tuaj yeem nug tus tswv tsev tau txog cov kev txhawj xeeb no.Daws puas tau cov kev tsis txaus siab? Puas pom tau tias tus tswv tsev teb rau cov lus tsis txaus siab? Puas muaj ib qho kev tsis txaus siab uas tib neeg pheej tham txog tas li?

2. Cov nqis uas yuav tau nug txog – Cov nqi daim ntawv thov yog qhov ib txwm muaj thiab yog npaj los them rov qab rau tus tswv tsev rau cov nqi cuam tshuam nrog kev tshuaj xyuas keeb kwm yav dhau los thiab kev tshuaj xyuas cov nyiaj qiv.Cov nqi no yog txwv los ntawm Lub Xeev txoj cai lij choj thiab yuav tsum tsis pub ntau tshaj tus nqi tiag-tiag rau tus tswv tsev rau kev ua daim ntawv thov thiab khiav ntaub ntawv tshuaj xyuas keeb kwm yav dhau los thiab cov nyiaj qiv.Nyob txhua qhov xwm txheej tus nqi thov tsis tuaj yeem siab tshaj lub xeev qhov siab tshaj plaws, uas tam sim no tau teeb li ntawm $65.37 txij li xyoo 2024 thiab yuav nce txhua xyoo.

3. Cov cai tseev kom muaj rau cov nyiaj qiv thiab cov nyiaj tau los – cov tswv tsev feem ntau xav kom cov neeg thov cov nyiaj tau los tsawg kawg yog 2-3 npaug ntawm tus nqi xauj tsev txhua hli, thiab cov neeg thov ntawd yuav tau ua raws li kev tshuaj xyuas cov nyiaj qiv xws li tsis tshuav nuj nqis rau cov tswv tsev yav dhau los, thiab tsis muaj kev ntiab tawm ntawm ib tus neeg twg cov ntaub ntawv teev tseg.Nws yog ib qho tseem ceeb kom nug cov tswv tsev ua ntej seb lawv yuav tsum tau ua li cas kom tsis txhob nkim cov nqi daim ntawv thov mus dawb-dawb.Cov tswv tsev tsis tuaj yeem siv cov kev tseev kom muaj no los tsim kev ntxub ntxaug koj rau qhov laj thawj tsis raug cai, txawm li cas los xij, xws li qhov kev teeb cov cai tseev kom muaj rau kev qiv nyiaj sib txawv rau cov neeg thov uas muaj keeb kwm tuaj txawv teb chaws tuaj.Tsis tas li ntawd, cov tswv tsev kuj tseem yuav tsis siv cov nyiaj khwv tau los txwv tsis pub cov neeg khwv tau nyiaj tsawg uas siv lub khoos kas pab cuam vaj tse xws li Tshooj 8.Nyob hauv cov xwm txheej no, qhov kev xam tus nqi xauj rau tus neeg xauj cov nyiaj tau los yuav tsum yog nyob ntawm tus neeg xauj tsev ib feem ntawm tus nqi xauj tsev thiab tsis yog rau tag nrho cov nqi xauj tsev.Cov tswv tsev nyob hauv California tsis tuaj yeem tsis kam xauj rau cov neeg koom hauv Tshooj 8 vim lawv nyob ntawm Tshooj 8 xwb.

4. Cov kev txheeb xyuas keeb kwm yav dhau los – feem ntau cov tswv tsev xav kom cov neeg thov xa cov keeb kwm mus kuaj xyuas.Feem ntau cov kev kuaj no yog tshawb nrhiav cov nuj nqis uas koj yuav tshuav nqi, qee cov xwm txheej kev raug ntiab tawm ua ntej ntawm koj, thiab keeb kwm kev ua txhaum cai.

5. Cov cai tswj hwm tsiaj yug – Cov tswv tsiaj yug los sis cov tswv tsev uas yav muaj tsiaj yu tom ntej yuav tsum nco ntsoov nug seb tus tswv tsev txoj cai hais txog cov tsiaj yug yog li cas.Muaj ntau tus tswv tsev txwv tsis pub yug tsiaj, xws li tsuas yog tso cai rau yug qee yam tsiaj xwb, los ntawm kev txwv qhov hnyav, los sis txwv tsis pub qee hom tsiaj thiab khoom siv tsiaj xws li cov tub dej yug ntses.Yog tias koj muaj qhov kev xav uas ntsig txog kev xiam oob qhab rau ib tus khub los sis tus tsiaj txoj pab cuam, koj muaj cai tsim nyog tau txais kev zam rau cov cai no raws li Qhov Chaw Nyob Uas Tsim Nyog.Koj tuaj yeem nrhiav pom cov ntaub ntawv ntau ntxiv hais txog Qhov Chaw Nyob Uas Tsim Nyog hauv tshooj 5 hauv qab no.

3.Ncig saib chav tsev uas yuav xav xauj

1. Chav nyob ua qauv saib thiab chav nyob tiag – Cov tsev loj dua muaj “chav nyob ua qauv saib” uas yog npaj los muab rau cov neeg yuav nyob saib.Cov chav tsev no feem ntau yog cov rooj tog zaum thiab tsis tas yuav tsum yog tib tshooj tsev raws li lwm cov chav nyob uas tseem muaj.Nco ntsoov nug tus tswv tsev seb lub tsev koj tab tom saib puas yog chav tsev tiag-tiag uas yuav tsum tau xauj, los sis seb nws puas yog chav tsev ua qauv saib.Yog tias nws yog chav tsev ua qauv saib xwb, hais kom saib lub chav tsev uas yuav xauj ua ntej them nyiaj los sis kos npe rau daim ntawv xauj tsev.Qhov no yog qhov tseem ceeb kom koj tuaj yeem pom cov teeb meem uas yuav muaj tau nrog chav tsev tiag-tiag uas koj yuav xauj.

2. Saib rau ntawm lub sij hawm sib txawv rau hnub ntawd – Yog tias ua tau, mus saib lub tsev ntawm lub sij hawm sib txawv hnub ntawd, xws li thaum sawv ntxov, thaum tav su, thiab yav tsaus ntuj.Qhov no yuav tuaj yeem pab koj nrhiav tau cov teeb meem uas yuav tshwm sim ua ntej mus rau ib chav tsev, xws li cov neeg nyob ze muab suab nrov, cov kev txhawj xeeb txog kev nkag mus tau, los sis teeb meem nres tsheb.

3. Cov teeb meem chaw nres tsheb – Puas muaj chaw nres tsheb muab rau nres los sis leej twg ua ntej-tus ntawv tau nres? Puas muaj chaw nres tsheb txaus rau cov neeg nyob hauv? Puas muaj chaw nres tsheb uas siv tau yog tias xav tau?

4. Cov kev txhawj xeeb txog kev ruaj ntseg – Puas muaj kev txawv rau kev nkag mus rau lub tsev tau? Yog tias muaj rooj vag, cov neeg nyob hauv thiab cov qhua tuaj yeem nkag tau li cas?

5. Kev Nkag Tau – Yog tias lub tsev muaj ntaiv uas yuav nyuaj rau koj siv, lub tsev puas muaj lub tshuab nqa uas tseem ua hauj lwm tau? Puas muaj chaw nres tsheb rau ntawm lub tsev?

6. Ntxhua Khaub Ncaws – Lub tsev puas muaj chav ntxhua khaub ncaws, tshuab ntxhua khaub ncaws/tshuab ziab khaub ncaws hauv chav tsev, los sis tsis muaj cov no? Lub chav ntxhua khaub ncaws puas siv tau rau koj thiab puas khoom nyob rau lub sij hawm koj xav tau? Yog tias tsis muaj tshuab ntxhua khaub ncaws ntawm lub tsev, puas muaj lub tshuab ntxhua khaub ncaws nyob ze uas koj siv tau?

7. Cov txheej txheem xa ntawv thiab kev xa khoom  – Cov neeg nyob hauv tau txais cov ntawv xa tuaj li cas thiab puas muaj kev txhawj xeeb txog kev nkag mus thiab los ntawm chav xa ntawv los sis chav xa khoom? Puas yog chaw ntim khoom nyob ntawm ib qho chaw twg tshwj xeeb, los sis cov khoom puas raug xa mus rau cov neeg nyob hauv lub qhov rooj? Cov neeg ua hauj lwm xa khoom puas tuaj yeem nkag mus rau lub tsev tau thaum dhau cov sij hawm ua hauj lwm ib txwm lawm? Yog tias muaj chav ntim khoom, nws puas qhib nyob rau lub sij hawm koj xav tau?

4.Ncig saib thaj chaw ib puag ncig kom paub tseeb tias nws tau raws li koj xav tau

1. Suab nrov – Puas muaj lub suab nrov li cas sab hauv chav tsev thiab nyob ib puag ncig? Yog tias koj tuaj yeem ua tau, sim mus xyuas thaj chaw ntawm lub sij hawm sib txawv hnub ntawd kom paub tias nws puas nrov heev thaum koj xav nyob ntsiag to.

   Tsheb khiav mus los – Qhov xwm txheej tsheb khiav mus los nyob hauv cheeb tsam zoo li cas? Yog tias koj mus ua hauj lwm lawm, cov tsheb khiav hauv cheeb tsam puas yuav muaj kev nyuaj?

   Kev nyab xeeb – Lub tsev puas muaj rooj vag kaw? Cov neeg nyob hauv thiab cov qhua tuaj saib nkag mus rau hauv lub tsev tau li cas? Puas muaj kev ua phem ntau nyob rau ib puag ncig ntawd? Tej zaum koj xav siv cov cuab yeej oos lais kom tau txais lub tswv yim ntawm hom kev ua txhaum cai dab tsi uas yuav tshwm sim hauv cheeb tsam.Tej zaum koj tuaj yeem nrhiav tau cov cuab yeej no los ntawm kev tshawb nrhiav hauv oos lais rau cov nqe lus xws li “daim ntawv qhia chaw kev ua phem [npe ntawm cheeb tsam]”.

   Cov tsev kawm ntawv – Yog tias koj muaj me nyuam yaus los sis npaj yuav muaj me nyuam thaum nyob hauv chav tsev, muaj cov tsev kawm ntawv zoo li cas hauv cheeb tsam? Koj tuaj yeem siv cov cuab yeej oos lais kom pom cov tsev kawm ntawv twg nyob hauv cheeb tsam thiab kev ntaus nqi thiab/los sis kuj tseem muaj cov kev tshuaj xyuas los nyeem hauv oos lais tau thiab.

5.Cov Kev Pab

1. Koj muaj txoj cai kom tsis txhob pub muaj kev ntxub ntxaug raws li “cov chav kawm uas tau txais kev tiv thaiv” xws li haiv neeg, xim tawv nqaij, kev ntseeg, poj niam los txiv neej/tub los ntxhais, kev txheeb tias poj niam txiv neej, cev xeeb tub, kev nyiam poj niam txiv neej, kev txij nkawm, xwm txheej tub rog los sis qub tub rog, kev mob nkeeg thiab/los sis kev xiam oob qhab, lub teb chaws tuaj, caj ces, los sis cov ntaub ntawv qhia txog caj ces.
2. Yog tias koj xav tau kev hloov pauv hauv txoj cai los sis cov txheej txheem hauv koj qhov kev xauj tsev vim koj qhov kev xiam oob qhab (xws li yog tias koj muaj ib Tus Tsiaj Txhawb Fab Kev Xav thiab tus tswv tsev tsis tso cai los sis tsub nqi rau cov tsiaj), koj tuaj yeem thov Cov Chaw Nyob Uas Tsim Nyog los ntawm tus tswv tsev.Mus saib Koj Txoj Cai Kom Tau Txais Vaj Tse Chaw Nyob Tsim Nyog kom paub ntxiv hais txog Cov Chaw Nyob Uas Tsim Nyog.
3. Yog tias koj xav tau kev hloov pauv rau chav tsev nws tus kheej vim yog koj qhov kev xiam oob qhab (xws li kev teeb ntawm tus pas tuav hauv da dej), koj muaj cai thov Cov Kev Hloov Kho Uas Tsim Nyog.Txawm li cas los xij, rnog Cov Kev Hloov Kho Uas Tsim Nyog, feem ntau cov tswv tsev muaj txoj cai kom tus neeg xauj tsev them nyiaj rau qhov kev hloov kho thiab them xa lub tsev rov qab kom nws zoo li qub thaum koj tsiv tawm.Mus saib Kev Ntxub Ntxaug Rau Vaj Tsev Nyob raws li Kev Xiam Oob Qhab - Koj Cov Cai thiab Cov Kev Xaiv kom paub ntau ntxiv txog Cov Kev Hloov Kho Uas Tsim Nyog.

Kev Tshab Xyuas Daim Ntawv Xauj thiab Tsiv Nkag

Tshooj lus no yuav tsom mus rau kev tshab xyuas daim ntawv xauj tsev, cov txheej txheem ua daim ntawv thov, thiab cov ntaub ntawv qhia txog kev puas tsuaj thaum koj tsiv nkag.

1.Kev Tshab Xyuas Daim Ntawv Xauj

1. Cov kev paub txog kev dag ntxias: Tsis txhob kos npe rau daim ntawv xauj tsev los sis them nyiaj ua ntej muab lub sij hawm los tshab xyuas lub tsev uas yuav tsum xauj thiab tshuaj xyuas cov ntaub ntawv xauj tsev uas tau muab.Tus tswv tsev yav tom ntej xav kom koj kos npe rau daim ntawv xauj tsev los sis them cov nyiaj tso cia ua ntej txawm tuas pom chav tsev yog tus chij liab lawm - feem ntau qhov no yog ib qho kos npe ntawm kev dag ntxias xauj.

2. Daim ntawv xauj tsev yog ib daim ntawv cog lus raws cai thiab muab kev tso cai rau tag nrho tus neeg xauj tsev thiab tus tswv tsev qee cov cai thiab cov kev lav ris.

3. Cov ntsiab lus tseem ceeb uas yuav tau saib xyuas hauv daim ntawv xauj tsev muaj xws li:

   1. Ncua sij hawm daim ntawv xauj – qhov kev xauj tuaj yeem yog tau txhua sij hawm twg, txawm hais tias qee ncua sij hawm xauj rau cov tsev nyob sib txawv li ntawm ib hlis rau ib hlis mus rau ib xyoos los sis ntev dua ntawd.Nws yog ib qho tseem ceeb uas yuav tau txiav txim siab seb koj puas tuaj yeem nyob tswj kom hauv chav nyob kom tag ncua sij hawm xauj tsev, vim tias tej zaum yuav muaj teeb meem rau fab nyiaj txiag los ntawm kev tsiv tawm ntawm chav tsev ua ntej tag sij hawm xauj tsev.Yog tias koj ua txhaum koj daim ntawv xauj tsev thaum ntxov yam tsis tau txais kev tso cai tsim nyog rau cov kev xav tau cuam tshuam txog kev xiam oob qhab, koj yuav tau them tus nqi xauj tsev txuas ntxiv kom txog thaum ntsib tus neeg xauj tsev tsim nyog tom ntej.

      Tus nqi xauj tsev thiab hnub tag sij hawm – daim ntawv xauj tsev yuav tsum hais tus nqi xauj tsev, thiab thaum twg txog sij hawm yuav tau ua txhua qhov kev them nyiaj.Tsis tas li ntawd, daim ntawv xauj tsev yuav tsum muaj cov lus qhia txog kev them nqi nrog rau cov nqi them lig thiab cov kev nplua rau cov nyiaj them lig.

      Cov nyiaj tso rau kev ruaj ntseg – daim ntawv xauj tsev yuav tsum tau hais txog qhov nyiaj yuav tsum tau muab tso nyiaj rau kev ruaj ntseg, nrog rau cov xwm txheej hauv qab uas tej zaum nws yuav raug txiav los ntawm tus tswv tsev tom qab koj tsiv tawm mus.Kev tso nyiaj tso rau kev ruaj ntseg yog ib qho nyiaj uas koj them rau tus tswv tsev thaum koj tsiv nkag rau hauv ib chav tsev, uas yuav thim nyiaj rov qab rau koj thaum koj tsiv tawm tom qab rho tawm cov nqi los kho cov puas tsuaj ua rau lub tsev thiab lwm yam kev txiav tawm.Raws li California txoj cai lij choj, txij li 1/1/2024 ntau tus (tab sis tsis yog tag nrho) cov tswv tsev raug txwv tsis pub tsub nqi ntau tshaj cov nqi xauj tsev ib lub hlis raws li kev tso nyiaj rau kev ruaj ntseg.Yog koj ntseeg tias koj tus tswv tsev tab tom sim tsub nqi ntau dua rau qhov tso nyiaj, thov nrhiav kev pab cuam kev cai lij choj kom koj tuaj yeem tshuaj xyuas tau koj qhov xwm txheej tshwj xeeb.

      Kev faib cais nyob –Muaj ntau tus tswv tsev txwv tsis pub faib cais nyob - los sis xauj ib chav hauv koj tus kheej chav mus rau ib tus neeg nyob hauv chav ua ke - yam tsis tau txais tus tswv tsev qhov kev pom zoo.Yog tias koj xav tau ib tus neeg nyob hauv chav koom ua ke, xyuas kom koj paub meej txog koj tus tswv tsev txoj cai ntawm qhov no raws li tau teev tseg hauv daim ntawv xauj tsev.

      Lub tsev cov cai tswj – daim ntawv xauj tsev kuj tseem yuav suav nrog qee cov cai rau kev nyob hauv lub tsev, xws li cov sij hawm kom nyob ntsiag to, cov cai tswj hwm tsiaj, thiab cov cai rau kev siv cov khoom siv.Cov no yog ib qho tseem ceeb uas yuav tsum tau tshab xyuas thiab nkag siab, vim hais tias qhov rov ua txhaum dua los sis ua txhaum loj ntawm cov cai no tuaj yeem ua rau raug ntiab tawm.Yog tias koj xav cov chaw nyob uas tsim nyog vim koj qhov kev xiam oob qhab rau kev zam rau ib qho ntawm cov cai no, thov mus saib DRC daim ntawv tshaj tawm txog Cov Chaw Nyob Uas Tsim Nyog, kuj muaj nyob rau ntawm peb lub vev xaib nyob rau hauv Cov Chaw Muab Kev Pab Cuam> Vaj Tsev Nyob/Kev Tsis Muaj Vaj Tsev Nyob> Kev Ntxub Ntxaug Rau Vaj Tsev Nyob raws li Kev Xiam Oob Qhab - Koj Cov Cai thiab Cov Kev Xaiv

4. Yog tias koj muaj lus nug txog cov cov nqe lus ntawm daim ntawv xauj tsev, nrhiav kev qhia rau fab kev cai lij choj ua ntej kos npe.Yog tias koj kos npe rau daim ntawv xauj tsev koj yuav tsum tau ua raws li cov nqe lus uas tsis raug cai, txawm tias koj tsis nkag siab txog nws thaum koj kos npe los xij.Thov nrhiav cov lus pab tswv yim txog fab kev cai lij choj rau cov lus nug uas koj muaj hais txog daim ntawv xauj tsev ua ntej kos npe.Tus tswv tsev uas xav yuam kom koj kos npe ua ntej koj tau txais cov lus qhia no yog tus chij liab - tus tswv tsev yuav xav kom txhua tog nkag siab txog qhov lawv tab tom kos npe kom tsis txhob muaj teeb meem yav tom ntej thiab kev nkag siab tsis yuam kev.

2.Cov txheej txheem ua ntawv thov

1. Feem ntau cov tswv tsev yuav xav tau daim ntawv thov thiab them tus nqi daim ntawv thov rau txhua tus neeg laus nyob hauv chav tsev.Raws li xeev California txoj cai lij choj, tus nqi no tsuas yog them rov qab rau tus tswv tsev rau lawv cov nuj nqis tiag-tiag hauv kev kuaj xyuas cov nyiaj qiv thiab keeb kwm yav dhau los ntawm cov neeg xauj tsev xwb - cov tswv tsev yuav tsum tsis txhob khaws kom tau paj ntsig ntawm cov nqi daim ntawv thov.Nyob txhua qhov xwm txheej tus nqi thov tsis tuaj yeem siab tshaj lub xeev qhov siab tshaj plaws, uas tam sim no tau teeb li ntawm $65.37 txij li xyoo 2024 thiab yuav nce txhua xyoo raws cov nyiaj poob nqi.Yog koj ntseeg tias tus tswv tsev tab tom sim tsub cov nqi daim ntawv thov ntau dhau lawm, thov nrhiav kev pab cuam fab kev cai lij choj ua ntej them los sis pom zoo rau cov nqi ntawd.

3.Tsiv mus rau hauv/sau qhov kev puas tsuaj

1. Hnub pib daim ntawv xauj tsev, tom qab kos npe, tus tswv tsev yuav muab cov yuam sij chav tsev rau koj.Thaum qhov no tshwm sim, nws yog ib qho tseem ceeb uas koj yuav tau sau tej kev puas tsuaj los sis cov teeb meem nrog lub chav tsev tam sim ntawd.Txhua yam teeb meem uas koj txheeb pom nrog lub tsev, xws li muaj qhov nyob rau hauv cov phab ntsa, cov ntaub pua plag ntuag, tsuas, cov khoom siv puas los sis tawg, thiab lwm yam, yuav tsum tau qhia tam sim ntawd rau tus tswv tsev ua ntawv sau.Tsis tas li ntawd, koj yuav tsum tau yees duab hnub tim- thiab lub sij hawm ntawm chav tsev uas qhia tag nrho cov kev puas tsuaj rau koj cov ntaub ntawv teev tseg.Koj kuj tseem yuav tau yees vis dis aus thaum koj nkagmus rau lub tsev thawj zaug khaws cia ua koj cov ntaub ntawv thiab.

2. Thaum nws txog rau lub sij hawm tsiv tawm ntawm koj lub tsev thaum txog sij hawm, koj tus tswv tsev yuav tsis tau txais kev tso cai los txiav koj cov nyiaj tso cia ruaj kev ruaj ntseg los kho qhov kev puas tsuaj uas muaj ua ntej koj daim ntawv cog lus pib.Muaj cov duab thiab cov ntaub ntawv txog ntawm kev puas tsuaj uas twb muaj lawm yuav tso cai rau koj los ua pov thawj cov xwm txheej no twb muaj ua ntej koj tsiv nkag mus lawm.