អនុបាលភាពមានដែនកំណត់ និងជម្រើសផ្សេងទៀត
អនុបាលភាពមានដែនកំណត់ និងជម្រើសផ្សេងទៀត
ការអភិរក្សគឺជាដំណើរការតុលាការដែលចៅក្រមសម្រេចថាតើអ្នកអាចថែទាំសុខភាព អាហារ សំលៀកបំពាក់ ទីជម្រក ហិរញ្ញវត្ថុ ឬតម្រូវការផ្ទាល់ខ្លួនរបស់អ្នក។ ចៅក្រមអាចដកសិទ្ធិសំខាន់ៗទាំងនេះចេញពីអ្នក។
ការបដិសេធ៖ ការបោះពុម្ភផ្សាយនេះគឺជាព័ត៌មានផ្លូវច្បាប់តែប៉ុណ្ណោះ ហើយមិនមែនជាការណែនាំផ្លូវច្បាប់អំពីស្ថានភាពបុគ្គលរបស់អ្នកទេ។ វាគឺជាបច្ចុប្បន្នកាលបរិច្ឆេទបានប្រកាស។ យើងព្យាយាមធ្វើបច្ចុប្បន្នភាពសម្ភារៈរបស់យើងឱ្យបានទៀងទាត់។ ទោះជាយ៉ាងណាក៏ដោយច្បាប់កំពុងផ្លាស់ប្តូរជាទៀងទាត់។ ប្រសិនបើអ្នកចង់ធ្វើឱ្យប្រាកដថាច្បាប់មិនបានផ្លាស់ប្តូរ សូមទាក់ទង DRC ឬការិយាល័យច្បាប់ផ្សេងទៀត។
តើអ្វីទៅជាអនុបាលភាព?
អនុបាលភាព គឺជាដំណើរការតុលាការមួយដែលចៅក្រមសម្រេចថាតើអ្នកអាចមើលថែទាំសុខភាពខ្លួនអ្នក ចំណីអាហារ សម្លៀកបំពាក់ ទីជម្រក ហិរញ្ញវត្ថុ ឬតម្រូវការផ្ទាល់ខ្លួនបានដែរឬអត់។ ចៅក្រមអាចដកហូតសិទ្ធិសំខាន់ៗទាំងអស់នេះពីអ្នកបាន។ ចៅក្រមជ្រើសរើសបុគ្គលម្នាក់ទៀតដើម្បីធ្វើការសម្រេចចិត្តជំនួសអ្នក។ តុលាការហៅបុគ្គលម្នាក់នោះថា “អនុបាល”។ តុលាការហៅអ្នកថា “បុគ្គលស្ថិតក្រោមអនុបាលភាព”។
អនុបាលភាព សម្រាប់តែអ្នកដែលមានអាយុ 18 ឆ្នាំ ឬចាស់ជាងនេះប៉ុណ្ណោះ។
តើអនុបាលភាពមានប្រភេទអ្វីខ្លះ?
នៅក្នុងរដ្ឋកាលីហ្វ័រញ៉ា មានអនុបាលភាពក្នុងប្រភេទខុសៗគ្នា៖
- អនុបាលភាពមត៌កសាសន៍ទូទៅ
- អនុបាលភាពស្ថិតក្រោមច្បាប់ LPS (Lanterman-Petris-Short Act)
- អនុបាលភាពក្រោមជំងឺភ្លេចភ្លាំង
- អនុបាលមានដែនកំណត់
តើអ្វីទៅជាអនុបាលភាពមានដែនកំណត់?
អនុបាលមានដែនកំណត់ គឺសម្រាប់អ្នកដែលមានពិការភាពផ្នែកប្រាជ្ញា និងការលូតលាស់។ គោលដៅរបស់អនុបាលភាពមានដែនកំណត់ គឺដើម្បីឱ្យក្លាយជាបុគ្គលដែលអាចពឹងលើខ្លួនឯង និងមានឯករាជ្យភាពឱ្យបានច្រើនតាមដែលអាចធ្វើទៅបាន។ វាអនុញ្ញាតឱ្យអ្នករក្សាសិទ្ធិមួយចំនួន ដើម្បីឱ្យអ្នកអាចធ្វើសេចក្ដីសម្រេចចិត្តអំពីជីវិតរបស់អ្នកបាន។ ចៅក្រមនឹងធ្វើការសម្រេចថាតើអនុបាលនឹងធ្វើសេចក្ដីសម្រេចចិត្តអ្វីខ្លះសម្រាប់អ្នក។
តើនរណាអាចតែងតាំងធ្វើជាអនុបាលមានកំណត់របស់អ្នក?
អនុបាលមានដែនកំណត់ ត្រូវមានអាយុ 18 ឆ្នាំឡើងទៅ។ អ្នកអាចណែនាំបុគ្គលម្នាក់ដែលអ្នកស្គាល់ ដូចជាសមាជិកគ្រួសារ ឬមិត្តភ័ក្តិណាម្នាក់បាន។ ចៅក្រមត្រូវធ្វើការពិចារណាអំពីសំណើរបស់អ្នកជាមុនសិន។ ប៉ុន្តែចៅក្រមមានសិទ្ធិសម្រេចជាចុងក្រោយ ហើយពួកគេអាចជ្រើសរើសអ្នកផ្សេងទៀតបាន។ ចៅក្រមក៏អាចជ្រើសរើសអនុបាលច្រើនជាងម្នាក់បានផងដែរ (“សហអនុបាល”)។ ពេលខ្លះ អនុបាលវិជ្ជាជីវៈឯកជនណាម្នាក់ត្រូវបានជ្រើសរើស។ ប្រសិនបើរកពុំបាននរណាម្នាក់ទេ នោះអាចនឹងមានការតែងតាំងអាណាព្យាបាលសាធារណៈរបស់ខោនធី មជ្ឈមណ្ឌលក្នុងតំបន់ ឬនាយកដ្ឋានសេវាបញ្ហាការអភិវឌ្ឍលូតលាស់ (Department of Developmental Services, DDS)។
ប្រសិនបើនាយកដ្ឋានសេវាបញ្ហាការអភិវឌ្ឍលូតលាស់ត្រូវបានតែងតាំងធ្វើជាអនុបាលរបស់អ្នក នាយកដ្ឋាននេះត្រូវចែងពីទំនួលខុសត្រូវប្រចាំថ្ងៃរបស់មជ្ឈមណ្ឌលក្នុងតំបន់របស់អ្នក និងគ្រប់គ្រងតាមដានពីស្ថានភាពរបស់អ្នកនិងមជ្ឈមណ្ឌលក្នុងតំបន់។ ចាប់ពីថ្ងៃទី1 ខែមករា ឆ្នាំ2023 តទៅ មជ្ឈមណ្ឌលក្នុងតំបន់មិនអាចធ្វើជាអនុបាលរបស់បុគ្គលណាម្នាក់ដោយខ្លួនឯងបានទៀតឡើយ។
តើអនុបាលភាពមានដែនកំណត់ត្រូវបានបង្កើតឡើងដោយរបៀបណា?
- អនុបាលដែលបានស្នើ ត្រូវដាក់ញត្តិមួយទៅតុលាការ។ សំណៅថតចម្លងមួយច្បាប់នៃញត្តិនោះ ត្រូវប្រគល់ទៅឱ្យអ្នក។
- សំណៅថតចម្លងផ្សេងទៀត ត្រូវផ្ញើទៅសាច់ញាតិ ឬទីភ្នាក់ងាររបស់អ្នកខ្លះ ដូចជាមជ្ឈមណ្ឌលក្នុងតំបន់ជាដើម។
- អ្នកស៊ើបអង្កេតម្នាក់ពីខាងតុលាការ ត្រូវបានចាត់សម្រាប់ករណីរបស់អ្នក។
- អ្នកត្រូវតែចូលរួមក្នុងសវនាការ លើកលែងតែចៅក្រមអនុម័តយល់ព្រមលើការលើកលែងណាមួយ។ ចៅក្រោមនឹងតែងតាំងមេធាវីម្នាក់ដើម្បីធ្វើជាតំណាងរបស់អ្នក។
តើអ្នកស៊ើបអង្កេតរបស់តុលាការមានតួនាទីអ្វីនៅក្នុងដំណើរការនៃអនុបាលភាពមានដែនកំណត់?
អ្នកស៊ើបអង្កេតពីខាងតុលាការត្រូវតែ៖
- ពន្យល់ និងត្រួតពិនិត្យញត្តិនោះជាមួយអ្នក។
- ធ្វើការសម្ភាស និងប្រាប់អ្នកអំពីដំណើរការអនុបាលភាពនេះ។ កំណត់ថាតើអ្នក៖
- អាចចូលរួមក្នុងសវនាការបានឬអត់
- ចង់តវ៉ាជំទាស់នឹងអនុបាលភាពនេះឬអត់
- បដិសេធអនុបាលដែលបានស្នើ ឬចង់បានបុគ្គលម្នាក់ផ្សេងទៀតឬអត់។
- ជួបប្រជុំគ្នាជាមួយអ្នករៀងរាល់ឆ្នាំដើម្បីជជែកថាតើអ្នកចង់បញ្ចប់អនុបាលភាពមានដែនកំណត់ឬអត់ និងថាតើមានជម្រើសដទៃផ្សេងទៀតឬអត់ (ហើយបន្ទាប់ ប្រាប់រឿងនេះទៅចៅក្រម)។
តើមជ្ឈមណ្ឌលក្នុងតំបន់មានតួនាទីអ្វីនៅក្នុងដំណើរការនៃអនុបាលភាពមានដែនកំណត់?
មជ្ឈមណ្ឌលក្នុងតំបន់នឹងធ្វើការវាយតម្លៃអ្នក ដោយមានការយល់ព្រមពីអ្នក រួចប្រគល់របាយការណ៍មួយច្បាប់ជូនទៅតុលាការ។ របាយការណ៍នោះត្រូវរួមបញ្ចូល៖
- លក្ខណៈ/កម្រិតនៃពិការភាពរបស់អ្នក។
- ជំនួយអ្វីខ្លះដែលអ្នកត្រូវការ។
- ស្ថានភាពរាងកាយរបស់អ្នក។
- ស្ថានភាពផ្លូវចិត្ត និងសុខុមាលភាពសង្គមរបស់អ្នក។
- អនុសាសន៍អំពីសិទ្ធិជាក់លាក់មួយចំនួនដែលបានស្នើសុំនៅក្នុងញត្តិនោះ។
ប្រសិនបើអនុបាលដែលបានស្នើនោះ ជាអ្នកផ្ដល់សេវា នោះរបាយការណ៍ត្រូវរួមបញ្ចូលមតិយោបល់ថា តើអ្នកផ្ដល់សេវានោះ នឹងស័ក្តិសមបំពេញតាមតម្រូវការរបស់អ្នកឬអត់។
សំណៅថតចម្លងមួយច្បាប់នៃរបាយការណ៍នោះ ត្រូវផ្ញើទៅអ្នក និងមេធាវីរបស់អ្នក យ៉ាងហោចណាស់ 5 ថ្ងៃ មុនសវនាការដែរ។
តើខ្ញុំមានសិទ្ធិអ្វីខ្លះនៅក្នុងដំណើរការនៃអនុបាលភាពមានដែនកំណត់នេះ?
អ្នកមានសិទ្ធិ៖
- ទទួលបានការជូនដំណឹងថាតើមានសិទ្ធិអ្វីខ្លះដែលនឹងត្រូវដកហូត ហើយថាតើអនុបាលភាពនេះ នឹងប៉ះពាល់ដល់សិទ្ធិរបស់អ្នកយ៉ាងដូចម្ដេច។
- ទទួលបានការជូនដំណឹង និងសំណៅថតចម្លងមួយច្បាប់ពីញត្តិអនុបាលភាពនេះ យ៉ាងតិច 15 ថ្ងៃ មុនសវនាការតុលាការ។
- ឱ្យមេធាវីម្នាក់ធ្វើជាតំណាងរបស់អ្នក។ ប្រសិនបើអ្នកគ្មានមេធាវីទេ ចៅក្រមអាចតែងតាំងមេធាវីម្នាក់សម្រាប់អ្នកបាន។
- ទទួលបានសំណៅថតចម្លងមួយច្បាប់នៃរបាយការណ៍ណាមួយដែលប្រគល់ទៅឱ្យចៅក្រមដោយគ្រួសាររបស់អ្នក មិត្តភ័ក្តិ មជ្ឈមណ្ឌលក្នុងតំបន់ និងបុគ្គលដទៃទៀត។
- មានវត្តមាននៅក្នុងសវនាការស្ដីពីអនុបាលភាព។
- ធ្វើការតវ៉ាជំទាស់នឹងអនុបាលភាព។
- ស្នើឱ្យមានការជំនុំជម្រះដោយមានគណៈវិនិច្ឆ័យ ប្រសិនបើអ្នកស្នើសុំ។
- ទទួលព័ត៌មានអំពីសិទ្ធិរបស់អ្នក អនុបាលភាពរបស់អ្នក ដំណើរការតុលាការ និងការបញ្ចប់ ឬការផ្លាស់ប្ដូរអនុបាលភាពរបស់អ្នក ជាភាសាសាមញ្ញងាយស្រួលយល់។
- ចៅក្រមត្រូវប្រគល់ព័ត៌មាននេះទៅឱ្យអ្នកក្នុងរយៈពេល 30 ថ្ងៃ បន្ទាប់ពីគេបានដាក់បញ្ចូលអ្នកទៅក្នុងអនុបាលភាព និងជារៀងរាល់ឆ្នាំបន្ទាប់ពីនោះទៅ។
តើចៅក្រមអាចដកសិទ្ធិអ្វីខ្លះពីខ្ញុំបាន នៅក្នុងអនុបាលភាពមានដែនកំណត់?
ចៅក្រមអាចដកហូតសិទ្ធិទាំងនេះខ្លះ ឬទាំងអស់ចេញពីអ្នកបាន៖
- សិទ្ធិកំណត់ទីលំនៅ។
- សិទ្ធិទទួលបានកំណត់ត្រាសម្ងាត់។
- សិទ្ធិរៀបអាពាហ៍ពិពាហ៍។
- សិទ្ធិចុះកិច្ចសន្យា។
- សិទ្ធិផ្ដល់ការយល់ព្រមសម្រាប់ការព្យាបាលវេជ្ជសាស្រ្ត។
- សិទ្ធិក្នុងការគ្រប់គ្រងទំនាក់ទំនងសង្គម និងផ្លូវភេទ។
- សិទ្ធិក្នុងការធ្វើសេចក្ដីសម្រេចចិត្តការអប់រំ។
តើខ្ញុំអាចបង្ហាញថា ខ្ញុំមិនត្រូវការអនុបាលណាម្នាក់តាមរបៀបណា?
អ្នកអាចបង្ហាញថា អ្នកអាចមើលថែទាំសុខភាពខ្លួនឯង ចំណីអាហារ សម្លៀកបំពាក់ ទីជម្រក ហិរញ្ញវត្ថុ ឬតម្រូវការផ្ទាល់ខ្លួនបាន។ អ្នកអាចប្រើប្រាស់ការគាំទ្រ និងសេវាកម្មផ្សេងៗ ដូចជាជម្រើសផ្សេងក្រៅពីអនុបាលភាព រួមបញ្ចូលទាំងការធ្វើសេចក្ដីសម្រេចចិត្តដែលមានការគាំទ្រ ដើម្បីជួយអ្នកបាន។
ប្រសិនបើតុលាការកំណត់ថា ខ្ញុំត្រូវការអនុបាលមានដែនកំណត់ តើអនុបាលនោះមានភារកិច្ច និងទំនួលខុសត្រូវអ្វីខ្លះ?
អនុបាលមានភារកិច្ចខ្ពស់ក្នុងការអនុវត្តអ្វីដែលចៅក្រមបានចាត់តាំងឱ្យពួកគេធ្វើ ដែលជាការធ្វើសេចក្ដីសម្រេចចិត្តសម្រាប់អ្នក។ ចំណុចនេះអាចរួមបញ្ចូល៖
- ការជួយអ្នកទទួលបានសេវាគាំទ្រ ការអប់រំ សេវាវេជ្ជសាស្រ្ត និងសេវាកម្មដទៃទៀត ដែលនឹងជួយអ្នកឱ្យក្លាយជាមនុស្សឯករាជ្យឱ្យបានច្រើនដែលអាចធ្វើទៅបាន។
- ឆ្លើយតបនឹងវិបត្តិនៅពេលត្រូវការ។
- ជួយអ្នកក្នុងការគ្រប់គ្រងតម្រូវការផ្ទាល់ខ្លួន ឬតម្រូវការហិរញ្ញវត្ថុ។
គ្រប់ពេលវេលាទាំងអស់ អនុបាលរបស់អ្នកត្រូវជួយអ្នកធ្វើការសម្រេចចិត្តផ្ទាល់ខ្លួន ជូនដំណឹងដល់អ្នកអំពីសេចក្ដីសម្រេចដែលពួកគេបានសម្រេច និងគាំទ្រដល់អ្នកក្នុងការធ្វើជាមនុស្សឯករាជ្យឱ្យបានច្រើនតាមដែលអាចធ្វើទៅបាន។
ចៅក្រមក៏ត្រូវផ្ដល់ជូនដល់អនុបាលរបស់អ្នកនូវព័ត៌មានអំពីអនុបាលភាពមានដែនកំណត់ផងដែរ រួមបញ្ចូលទាំងរបៀបជួយអ្នកធ្វើសេចក្ដីសម្រេចចិត្តផ្ទាល់ខ្លួន របៀបបញ្ចប់ឬផ្លាស់ប្ដូរអនុបាលភាព និងទំនួលខុសត្រូវអ្វីខ្លះដែលពួកគេមាន ក្នុងនាមជាអនុបាលរបស់អ្នក។
តើអនុបាលភាពមានដែនកំណត់មានជម្រើសមិនសូវតឹងរឹងអ្វីខ្លះ?
មុនពេលបុគ្គលម្នាក់/DDS អាចសុំតុលាការធ្វើជាអនុបាលរបស់អ្នកបាន ពួកគេត្រូវតម្រូវដោយច្បាប់ក្នុងការគិតពិចារណាអំពីជម្រើសដទៃផ្សេងទៀត។ ចំណុចនេះហៅថា “ជម្រើសមានការរឹតត្បិតតិចតួច” ហើយពួកគេអាចពន្យារពេល ឬបោះបង់តម្រូវការអនុបាលភាពបាន។ អនុបាលដែលអ្នកស្នើសុំ ត្រូវប្រាប់ទៅចៅក្រមថាតើបានសាកល្បងជម្រើសផ្សេងមួយណា ហើយហេតុអ្វីបានជាជម្រើសផ្សេងទៀតមិនបានផល។ ចៅក្រមត្រូវពិចារណាថាតើជម្រើសផ្សេងអាចបានផលឬអត់ ប្រសិនបើអ្នកមានសេវាកម្មនិងការគាំទ្រត្រឹមត្រូវនោះ។
ជម្រើសទូទៅ
ការធ្វើសេចក្ដីសម្រេចចិត្តដែលមានការគាំទ្រ៖
ការធ្វើសេចក្ដីសម្រេចចិត្តដែលមានការគាំទ្រ (SDM) គឺនៅពេលដែលអ្នកពឹងពាក់មិត្តភ័ក្តិដែលអ្នកទុកចិត្ត គ្រួសារ និងអ្នកជំនាញ ដើម្បីជួយអ្នកក្នុងការស្វែងយល់ពីស្ថានភាព និងជម្រើសផ្សេងៗនៅក្នុងជីវិតរបស់អ្នក។ វាជាវិធីមួយក្នុងការបង្កើនឯករាជ្យភាពរបស់អ្នក។ វាលើកទឹកចិត្តអ្នក និងផ្ដល់ដល់អ្នកនូវអំណាចក្នុងការធ្វើសេចក្ដីសម្រេចចិត្តអំពីជីវិតរបស់អ្នកឱ្យបានច្រើនតាមដែលអាចធ្វើទៅបាន។ SDM គឺជារបៀបដែលមនុស្សពេញវ័យភាគច្រើនបំផុតធ្វើសេចក្ដីសម្រេចចិត្តជារៀងរាល់ថ្ងៃ។ SDM ក៏៖
- ជួយអ្នកក្នុងការធ្វើឱ្យរឿងរ៉ាវកើតឡើងនៅក្នុងជីវិតរបស់អ្នក។
- ជួយអ្នកក្នុងការធ្វើការជ្រើសរើសទីកន្លែង របៀបរស់នៅ និងមនុស្សដែលអ្នកត្រូវស្នាក់នៅជាមួយ។
- ជួយអ្នកក្នុងការជ្រើសរើសទីកន្លែងដែលអ្នកចង់ធ្វើការ។
- ជួយអ្នកក្នុងការបំពេញសកម្មភាពក្នុងជីវិតរបស់អ្នក ជាជាងឱ្យនរណាម្នាក់ធ្វើសកម្មភាពជំនួយអ្នក។
- អនុញ្ញាតឱ្យអ្នកមានគុណភាពជីវិតបែបវិជ្ជមានកាន់តែច្រើន។
- បង្កើនឱកាសការងារ ឯករាជ្យភាពក្នុងជីវិតប្រចាំថ្ងៃ និងការរួមបញ្ចូលនៅក្នុងសហគមន៍។
អ្នកអាចជ្រើសរើសអនុវត្ត SDM ដោយមាន ឬគ្មានកិច្ចសន្យាជាលាយលក្ខណ៍អក្សរបាន។
ប្រសិនបើអ្នកជ្រើសរើសកិច្ចសន្យាជាលាយលក្ខណ៍អក្សរ អ្នកអាចធ្វើកិច្ចសន្យា SDM ជាលាយលក្ខណ៍អក្សរមួយ ដែលអ្នកអាចជ្រើសរើសអ្នកគាំទ្ររបស់អ្នកបាន។ ឧទាហរណ៍ អ្នកអាចជ្រើសរើសបងប្អូនដើម្បីជួយអ្នកក្នុងការធ្វើសេចក្ដីសម្រេចចិត្តអំពីប្រាក់កាស ឬអ្នកអាចជ្រើសរើសមិត្តភ័ក្តិណាម្នាក់ជួយដល់អ្នកក្នុងការធ្វើសេចក្ដីសម្រេចចិត្តអំពីជីវិត។ អ្នកក៏អាចជ្រើសរើសធ្វើសេចក្ដីសម្រេចចិត្តដោយខ្លួនឯងបានផងដែរ។ ឧទាហរណ៍ អ្នកអាចជ្រើសរើសធ្វើសេចក្ដីសម្រេចចិត្តអំពីលំនៅដ្ឋានរបស់អ្នកដោយខ្លួនអ្នក។ ការមានកិច្ចសន្យា SDM ពុំបានរារាំងអ្នកមិនឱ្យធ្វើសកម្មភាពដោយឯករាជ្យដោយសារកិច្ចសន្យានោះទេ ហើយមិនអាចប្រើវាធ្វើជាភស្តុតាងថា អ្នកមិនអាចធ្វើសេចក្ដីសម្រេចចិត្តសម្រាប់ខ្លួនអ្នកឡើយ។ អ្នកអាចបញ្ចប់កិច្ចសន្យា SDM របស់អ្នកបានគ្រប់ពេលទាំងអស់។
កិច្ចសន្យាជាលាយលក្ខណ៍អក្សរមានវិធានផ្សេងៗ ដែលអ្នកនិងអ្នកគាំទ្ររបស់អ្នកត្រូវអនុវត្តតាម ប្រសិនបើអ្នកចង់ឱ្យអ្នកដទៃទទួលស្គាល់កិច្ចសន្យាទាំងនោះ។ កិច្ចសន្យា SDM ជាលាយលក្ខណ៍អក្សរ ត្រូវតែ៖
- សរសេរជាភាសាដែលងាយស្រួលយល់
- ចុះហត្ថលេខាដោយអ្នកគាំទ្ររបស់អ្នក នៅចំពោះមុខសាក្សី
- ធ្វើការត្រួតពិនិត្យឡើងវិញរៀងរាល់ពីរឆ្នាំម្ដង និង
- រួមបញ្ចូល ...
- អ្វីដែលអ្នកចង់ឱ្យមានការគាំទ្រ
- អ្វីដែលអ្នកគាំទ្ររបស់អ្នកយល់ព្រមជួយអ្នក
- ការយល់ព្រមរបស់អ្នកគាំទ្ររបស់អ្នកទៅនឹងទំនួលខុសត្រូវរបស់ពួកគេក្នុងនាមជាអ្នកគាំទ្រ
- ព័ត៌មានអំពីសិទ្ធិរបស់អ្នកក្នុងការរាយការណ៍អំពីការប្រើប្រាស់មិនត្រឹមត្រូវ និង
- ឯកសារពាក់ព័ន្ធដទៃផ្សេងទៀតអំពីការធ្វើសេចក្ដីសម្រេចចិត្ត (ដូចជាជម្រើសផ្សេងក្រៅពីអនុបាលភាព ដែលបានពិភាក្សាផ្នែកខាងក្រោម)
អ្នកអាចស្វែងរកប្រភពបន្ថែមអំពី SDM រួមទាំងគំរូកិច្ចសន្យា SDM បានផងដែរនៅទីនេះ៖ https://supportwithoutcourts.org/sdm-resources/
លិខិតប្រគល់សិទ្ធិមានប្រសិទ្ធភាពឋិតថេរ៖
នេះគឺជាឯកសារផ្លូវច្បាប់មួយដែលអ្នកអាចប្រគល់ជូនទៅនរណាម្នាក់ដែលអ្នកទុកចិត្ត នូវសិទ្ធិក្នុងការធ្វើសេចក្ដីសម្រេចចិត្តជំនួសអ្នក។ វាជាវិធីមួយសម្រាប់ឱ្យអ្នកទទួលបានជំនួយការគាំទ្រ និងសេវាកម្មផ្សេងៗ ដែលអ្នកត្រូវការក្នុងការរស់នៅដោយឯករាជ្យ។ អ្នកអាចផ្ដល់សិទ្ធិឱ្យនរណាម្នាក់ក្នុងការធ្វើសេចក្ដីសម្រេចចិត្តមួយប្រភេទ ដូចជា ខាងវេជ្ជសាស្រ្ត ឬហិរញ្ញវត្ថុ ឬផ្ដល់សិទ្ធិដល់ពួកគេក្នុងការធ្វើសេចក្ដីសម្រេចចិត្តទាំងពីរនេះ។
ជម្រើសទូទៅដទៃទៀត៖
- អ្នកអាចចូលរួមជាមួយក្រុមស្វ័យតស៊ូមតិ ដូចជា People First ជាដើម ឬទទួលបានការបណ្ដុះបណ្ដាលស្វ័យតស៊ូមតិដើម្បីជួយដល់អ្នកក្នុងការសិក្សារៀនសូត្រអំពីរបៀបប្រាស្រ័យទាក់ទង និងតស៊ូមតិសម្រាប់អ្វីដែលអ្នកត្រូវការ។
- អ្នកអាចឱ្យគេសរសេរជម្រើសជាលាយលក្ខណ៍អក្សរទៅក្នុង IEP ឬ IPP របស់អ្នកបាន។
- អ្នកអាចរៀបចំសម្រាប់ IEP ឬ IPP របស់អ្នក ដោយអនុវត្តការដើរតួ និងការជជែកអំពីអ្វីដែលអ្នកត្រូវការ និងចំណង់ចំណូលចិត្តរបស់អ្នកជាមួយនរណាម្នាក់ដែលអ្នកទុកចិត្ត។
- អ្នកអាចស្វែងរកអ្នកសម្របសម្រួលដើម្បីជួយអ្នកក្នុងការធ្វើសេចក្ដីសម្រេចចិត្តបាន។
ជម្រើសជាក់លាក់
ជម្រើសសម្រាប់ការទទួលបានសេវាកម្មនៅក្នុង IEP ឬ IPP របស់អ្នក៖
អ្នកមានសិទ្ធិក្នុងការអញ្ជើញមនុស្សឱ្យចូលរួមក្នុងកិច្ចប្រជុំ IEP ឬ IPP របស់អ្នក ដែលនឹងជួយគាំទ្រអ្នកក្នុងការតស៊ូមតិសម្រាប់សេវាកម្មដែលអ្នកត្រូវការដើម្បីក្លាយជាមនុស្សឯករាជ្យ។ អ្នកតស៊ូមតិអាចជា៖
- អ្នកសម្របសម្រួលសេវាកម្មរបស់អ្នក។
- គ្រួសាររបស់អ្នក និងមនុស្សនៅក្នុងរង្វង់នៃការគាំទ្ររបស់អ្នក។
- អ្នកតស៊ូមតិដែលទទួលបានការបណ្ដុះបណ្ដាល។
ជម្រើសផ្សេងៗសម្រាប់ការសម្រេចចិត្តពីទីកន្លែង និងបុគ្គលដែលអ្នកស្នាក់នៅជាមួយ៖
ពិភាក្សាបំណង និងជម្រើស/ការសម្រេចចិត្តរបស់អ្នកជាមួយនរណាម្នាក់ដែលអ្នកទុកចិត្ត ដូចជា៖
- រង្វង់នៃអ្នកគាំទ្រដល់អ្នក (មនុស្សដែលអ្នកទុកចិត្ត និងមនុស្សគាំទ្រអ្នក)។
- អ្នកផ្ដល់សេវាជំនួយសម្រាប់ការរស់នៅដោយឯករាជ្យ (ILS)។
- អ្នកផ្ដល់សេវាគាំទ្រសម្រាប់ការរស់នៅដោយឯករាជ្យ (SLS)។
- បុគ្គលិកមន្ទីរថែទាំក្នុងសហគមន៍ ឬមន្ទីរថែទាំមធ្យម។
សាកសួរមនុស្សដែលអ្នកទុកចិត្តពីរបៀបដែលអ្នកទទួលបានជំនួយសម្រាប់ការជួលផ្ទះ ឬការដាក់ពាក្យសុំជំនួយលំនៅដ្ឋានសាធារណៈ។
តស៊ូមតិនៅ IPP របស់អ្នក ហើយឱ្យគេសរសេរជម្រើសរបស់អ្នកចូលក្នុង IPP របស់អ្នក។
ជម្រើសផ្សេងៗសម្រាប់ការទទួលបានព័ត៌មានសម្ងាត់របស់អ្នក៖
ប្រសិនបើអ្នកចង់ឱ្យនរណាម្នាក់ដែលអ្នកជឿទុកចិត្តទទួលបានព័ត៌មានសម្ងាត់របស់អ្នក អ្នកអាចផ្ដល់ការអនុញ្ញាតបានដោយប្រើប្រាស់ជម្រើសណាមួយខាងក្រោមនេះ៖
- ចុះហត្ថលេខាលើទម្រង់បែបបទបញ្ចេញព័ត៌មានវេជ្ជសាស្រ្ត HIPAA។
- ចុះហត្ថលេខាយល់ព្រមលើទម្រង់បែបបទបញ្ចេញព័ត៌មាន ឬកំណត់ត្រា។
- អ្នក និងបុគ្គលផ្សេងទៀតអាចទូរសព្ទទៅភ្នាក់ងាររួមគ្នា ហើយអ្នកអាចអនុញ្ញាតតាមទូរសព្ទបាន។
ជម្រើសផ្សេងៗដើម្បីជួយអ្នកគ្រប់គ្រងប្រាក់កាសរបស់អ្នក៖
- អ្នកអាចចុះហត្ថលេខាលើលិខិតប្រគល់សិទ្ធិខាងហិរញ្ញវត្ថុបាន។ លិខិតនេះអនុញ្ញាតឱ្យនរណាម្នាក់ដែលអ្នកជឿទុកចិត្តក្នុងការធ្វើសេចក្ដីសម្រេចចិត្តអំពីហិរញ្ញវត្ថុ និងប្រាក់កាសរបស់អ្នក។ លិខិតប្រគល់សិទ្ធិខាងហិរញ្ញវត្ថុនេះ ត្រូវមានហត្ថលេខាបញ្ជាក់ដោយសារការី។ អ្នកអាចបញ្ចប់លិខិតនេះ នៅពេលណាក៏បាន តាមចិត្តរបស់អ្នក។
- អ្នកអាចជ្រើសរើសនរណាម្នាក់ធ្វើជាអ្នកទទួលប្រាក់ជំនួសនៃអត្ថប្រយោជន៍ SSI/របបសន្តិសុខសង្គមបាន។
- មានច្បាប់មួយចំនួនដែលជួយការពារអត្ថប្រយោជន៍ SSI/របបសន្តិសុខសង្គមរបស់អ្នក។
- អ្នកអាចឱ្យគេសរសេរសេវាកម្មរបស់អ្នកជាលាយលក្ខណ៍អក្សរនៅក្នុង IPP របស់អ្នកបាន ដើម្បីជួយអ្នកក្នុងការគ្រប់គ្រងប្រាក់កាសរបស់អ្នក ដូចជាបុគ្គលិកសេវាកម្មជំនួយសម្រាប់ការរស់នៅដោយឯករាជ្យរបស់អ្នកជាដើម។
- តំណាងខាងតម្រូវការពិសេស អាចបង្កើតសម្រាប់អ្នកបាន។ ពេលនោះ អ្នកតំណាងម្នាក់នឹងអាចគ្រប់គ្រងប្រាក់កាសរបស់អ្នកបាន។
- គណនីធនាគាររួមគ្នា៖ អ្នកអាចបង្កើតគណនីធនាគាររួមគ្នាមួយជាមួយមនុស្សណាម្នាក់ដែលអ្នកទុកចិត្ត ដើម្បីជួយដល់អ្នកក្នុងការសរសេរមូលប្បទានបត្រ ធ្វើការដាក់ប្រាក់ឬដកប្រាក់ជាដើម។
ជម្រើសផ្សេងៗដើម្បីជួយអ្នកពាក់ព័ន្ធនឹងតម្រូវការថែទាំសុខភាពរបស់អ្នក៖
- អ្នកអាចចុះហត្ថលេខាលើសេចក្ដីណែនាំស្ដីពីការថែទាំសុខភាពជាមុន ដើម្បីឱ្យគេអាចបំពេញតាមបំណងរបស់អ្នកបាន។ វាត្រូវការហត្ថលេខាពីសាក្សីពីរនាក់ ឬត្រូវការឱ្យមានហត្ថលេខាបញ្ជាក់ពីសារការី ហើយអាចធ្វើការផ្លាស់ប្ដូរ ឬបញ្ចប់នៅពេលណាក៏បាន តាមចិត្តអ្នកចង់។
- ដោយសារតែអ្នកជាអ្នកជំងឺ ដូច្នេះវេជ្ជបណ្ឌិតរបស់អ្នកត្រូវប្រាប់អ្នកអំពីហានិភ័យ និងអត្ថប្រយោជន៍នៃការព្យាបាលណាមួយ ជម្រើសព្យាបាលដទៃផ្សេងទៀតដែលមាន និងអ្វីដែលនឹងកើតមាន ប្រសិនបើគ្មានការព្យាបាល។
- ប្រសិនបើអ្នកមិនអាចធ្វើសេចក្ដីសម្រេចបានទេ៖
- សាច់ញាតិជិតស្និទ្ធបំផុតរបស់អ្នកដែលមាន (ដូចជាឪពុក/ម្ដាយ) អាចផ្ដល់ការអនុញ្ញាតសម្រាប់ការថែទាំសុខភាពបាន។
- នៅក្នុងស្ថានភាពមួយចំនួន មជ្ឈមណ្ឌលក្នុងតំបន់របស់អ្នក អាចផ្ដល់ការអនុញ្ញាតដល់ការថែទាំវេជ្ជសាស្រ្ត វះកាត់ ឬទន្តសាស្រ្តបាន។ វេជ្ជបណ្ឌិត ឬទន្តបណ្ឌិត អាចធ្វើសេចក្ដីសម្រេចចិត្តក្នុងករណីបន្ទាន់។
- ការអនុញ្ញាតពីតុលាការត្រូវការជាចាំបាច់សម្រាប់ការវះកាត់វេជ្ជសាស្រ្តជាក់លាក់មួយចំនួន។
- ប្រសិនបើអ្នកជាពលរដ្ឋស្នាក់នៅ ICF/SNF ក្រុមអន្តរវិស័យអាចអនុម័តការព្យាបាលវេជ្ជសាស្រ្តបាន ប្រសិនបើគ្មាននរណាម្នាក់ដែលមានសិទ្ធិស្របច្បាប់ក្នុងការធ្វើសេចក្ដីសម្រេចចិត្តខាងវេជ្ជសាស្រ្តនេះ។
ជម្រើសផ្សេងៗដើម្បីជួយអ្នកពាក់ព័ន្ធនឹងបញ្ហាទំនាក់ទំនងសង្គម/ផ្លូវភេទ៖
សេវាកម្មនៅក្នុង IEP ឬ IPP របស់អ្នកអាចរួមបញ្ចូលការគាំទ្រដើម្បីជួយអ្នកជាមួយនឹងសាច់ញាតិរបស់អ្នក ដូចជា ការប្រឹក្សាយោបល់ សេវាជំនួយសម្រាប់ការរស់នៅដោយឯករាជ្យ និងសេវាគាំទ្រសម្រាប់ការរស់នៅដោយឯករាជ្យ។ អ្នកក៏អាចទទួលបានការអប់រំនៅក្នុងផ្នែកបំណិនសង្គម ការលើកកម្ពស់សុវត្ថិភាព និងរបៀបបង្កើតទំនាក់ទំនងល្អជាមួយអ្នកដទៃផងដែរ។ ចំណុចនេះអាចរួមបញ្ចូលនូវទំនាក់ទំនងមិត្តប្រុស និងមិត្តស្រីផងដែរ។
ជម្រើសផ្សេងៗដើម្បីជួយអ្នកពាក់ព័ន្ធនឹងការធ្វើសេចក្ដីសម្រេចចិត្តផ្នែកអប់រំ៖
អ្នកអាចផ្ដល់សិទ្ធិដល់មនុស្សណាម្នាក់ដែលអ្នកទុកចិត្តក្នុងការធ្វើសេចក្ដីសម្រេចចិត្តពីការអប់រំរបស់អ្នក។ អ្នកអាចធ្វើលិខិតប្រគល់សិទ្ធិមានប្រសិទ្ធភាពឋិតថេរ ឬការប្រគល់សិទ្ធិក្នុងការធ្វើសេចក្ដីសម្រេចចិត្តអំពីការអប់រំបាន។
ជម្រើសផ្សេងៗដើម្បីជួយអ្នកក្នុងការដាក់ពាក្យបណ្ដឹងករណីណាមួយទៅកាន់តុលាការ៖
ប្រសិនបើអ្នកត្រូវការដាក់បណ្ដឹងសំណុំរឿងណាមួយទៅតុលាការ តុលាការអាចចាត់តាំងនរណាម្នាក់ដើម្បីជួយដល់អ្នកក្នុងការជជែកជាមួយមេធាវី និងដោះស្រាយជាមួយតុលាការ។ បុគ្គលនេះហៅថា អាណាព្យាបាលមិនអចិន្រ្តៃយ៍។ អាណាព្យាបាលមិនអចិន្រ្តៃយ៍ នឹងតំណាងឱ្យអ្នកនៅក្នុងតុលាការ ប្រសិនបើអ្នកទៅតុលាការមិនកើត ឬមិនយល់។
តើខ្ញុំត្រូវបង់ប្រាក់ថ្លៃសេវា និងប្រាក់ប្រដាប់ក្ដីក្នុងករណីអនុបាលភាពរបស់ខ្ញុំដែរឬទេ?
តុលាការ នឹងកំណត់ថាតើអ្នកត្រូវបង់ថ្លៃដាក់ពាក្យប្ដឹង ថ្លៃសេវាផ្លូវច្បាប់ និងប្រាក់ប្រដាប់ក្ដីឬអត់។
នៅក្នុងអនុបាលភាពមានដែនកំណត់ តើអំណាចអ្វីដែលគ្មានក្នុងនោះ?
អនុបាលមិនអាច៖
- គ្រប់គ្រងប្រាក់ឈ្នួលរបស់អ្នកទទួលបានពីការងារ ឬប្រាក់ខែ
- អនុញ្ញាតការព្យាបាលវេជ្ជសាស្រ្តគ្រោះថ្នាក់
- ការព្យាបាលដោយថ្នាំទាំងបង្ខំលើអ្នក
- ធ្វើការគ្រាវដើម្បីកុំឱ្យអ្នកមានកូន
- ឱ្យគេដាក់អ្នកចូលក្នុងមណ្ឌល
- យល់ព្រមចំពោះការព្យាបាលដោយការឆក់ចរន្តអគ្គិសនី (ECT)
- យល់ព្រមចំពោះការព្យាបាលចិត្តសាស្រ្ត
- មានអំណាចផ្សេងទៀត ដែលតុលាការមិនបានបង្គាប់ជាពិសេស។
នៅក្នុងអនុបាលភាពមានដែនកំណត់ តើខ្ញុំរក្សាសិទ្ធិអ្វីខ្លះ?
អ្នករក្សាសិទ្ធិក្នុងការ៖
- គ្រប់គ្រងប្រាក់ឈ្នួល ឬប្រាក់ខែផ្ទាល់ខ្លួន
- បង្កើតបណ្ដាំមរតក ឬផ្លាស់ប្ដូរបណ្ដាំមរតក ថាតើនរណានឹងទទួលរបស់របរផ្ទាល់ខ្លួនរបស់អ្នក នៅពេលអ្នកស្លាប់
- រៀបអាពាហ៍ពិពាហ៍ លើកលែងតែចៅក្រមបានដកហូតសិទ្ធិនេះចេញ
- ទទួលសំបុត្រផ្ទាល់ខ្លួន
- ធ្វើការបោះឆ្នោត លើកលែងចៅក្រមដកហូតសិទ្ធិនោះចេញ ត្រូវបានតំណាងដោយមេធាវី
- ស្នើសុំអនុបាលថ្មីណាម្នាក់
- ស្នើសុំឱ្យបញ្ចប់អនុបាលភាព។
ប្រសិនបើខ្ញុំមិនយល់ស្របនឹងអនុបាលរបស់ខ្ញុំ ឬចង់បញ្ចប់អនុបាលភាពមានដែនកំណត់ តើខ្ញុំអាចធ្វើបែបណាខ្លះ?
- ទាក់ទងទៅកាន់មេធាវីរបស់អ្នក អ្នកស៊ើបអង្កេតតុលាការមត៌ក មជ្ឈមណ្ឌលក្នុងតំបន់ កម្មវិធីពេលថ្មី ឬបុគ្គលិកគាំទ្រ។ អ្នកក៏អាចទាក់ទងទៅ Disability Rights California និង/ឬការិយាល័យតស៊ូមតិសិទ្ធិអតិថិជនបានផងដែរ។ ព័ត៌មានទំនាក់ទំនងរបស់យើង មាននៅខាងចុងនៃឯកសារនេះ។
- ស្នើសុំសវនាការតុលាការ។ គិតត្រឹមថ្ងៃទី1 ខែមករា ឆ្នាំ2023 ច្បាប់ថ្មីមួយនៅក្នុងរដ្ឋកាលីហ្វ័រញ៉ា តម្រូវឱ្យតុលាការផ្ដល់ឱ្យអ្នក និងមេធាវីនូវកាលបរិច្ឆេទសវនាការ និងកំណត់ពីកាលបរិច្ឆេទសវនាការ ប្រសិនបើអ្នកប្រាប់ពួកគេថា អ្នកចង់បញ្ចប់អនុបាលភាពរបស់អ្នក។
- ប្រសិនបើអនុបាលរបស់អ្នកយល់ព្រមបញ្ចប់អនុបាលភាព និងជម្រើសដែលមានការរឹតត្បិតតិចតួចដែលមាន នោះតុលាការអាចបញ្ចប់អនុបាលភាពដោយពុំចាំបាច់ត្រូវការមានសវនាការឡើយ។
តើអនុបាលភាពមានដែនកំណត់បញ្ចប់នៅពេលណា?
- នៅពេលដែលចៅក្រមបញ្ចប់។
- នៅពេលមរណភាពនៃអនុបាល ឬបុគ្គលស្ថិតក្រោមអនុបាលភាព។
- ដីកាតុលាការដែលចែងថា អនុបាលមានដែនកំណត់លែងមានត្រូវការទៀត។
- អនុបាលដាក់ញត្តិទៅតុលាការដើម្បីលាលែង។
តើខ្ញុំនឹងដឹងថា ចៅក្រមបង្គាប់ឱ្យមានអនុបាលភាពមានដែនកំណត់ដោយរបៀបណា?
- អ្នកនឹងទទួលបានសំណៅថតចម្លងមួយច្បាប់នៃដីការបស់ចៅក្រម។
- ដីការបស់ចៅក្រម នឹងប្រាប់អ្នកថាតើមានសិទ្ធិអ្វីខ្លះដែលបានប្រគល់ជូនទៅអនុបាល។
តើអ្នកដទៃនឹងដឹងថាខ្ញុំមានអនុបាលដោយរបៀបណា?
អនុបាលត្រូវផ្ដល់សំណៅថតចម្លងផ្លូវការនៃ លិខិតបញ្ជាក់អនុបាលភាព ទៅអ្នកផ្សេងទៀត។ សំណៅថតចម្លងផ្លូវការ ត្រូវរួមបញ្ចូលផ្នែកបញ្ជាក់ពេញលេញនៃ លិខិតបញ្ជាក់អនុបាលភាព មុនពេលអាចចាត់ទុកពួកគេថាជាអនុបាលបាន។
ប្រសិនបើខ្ញុំត្រូវការជំនួយបន្ថែម តើខ្ញុំត្រូវធ្វើដូចម្ដេច?
សម្រាប់ព័ត៌មានបន្ថែម សូមទូរសព្ទទៅ៖
Disability Rights California
1-800-776-5746 (សំឡេង)
1-800-719-5798 (TTY)
Office of Clients’ Rights Advocacy
រដ្ឋកាលីហ្វ័រញ៉ាភាគខាងជើង៖ 1-800-390-7032 (TTY 877-669-6023)
រដ្ឋកាលីហ្វ័រញ៉ាភាគខាងត្បូង៖ 1-866-833-6712 (TTY 877-669-6023)
យើងអាចជួយបានដោយ៖
- ប្រាប់អ្នកពីសិទ្ធិរបស់អ្នក
- ប្រាប់អ្នកពីជម្រើសផ្សេងក្រៅពីអនុបាលភាព
- ជជែកជាមួយអ្នក ឬជួយអ្នកពិភាក្សាជាមួយមេធាវីរបស់អ្នក អ្នកស៊ើបអង្កេតនៃតុលាការមត៌ក ឬអ្នកដទៃផ្សេងទៀតដែលអាចជួយអ្នកបាន។