សេចក្ដីសង្ខេប

អ្នកជំងឺ ឬអតីតអ្នកជំងឺមានសិទ្ធិ៖

• ត្រួតពិនិត្យ ឬចម្លងកំណត់ត្រាអ្នកជំងឺរបស់ពួកគេ លើកលែងតែបានពិភាក្សាដូចខាងក្រោម។
• ស្នើសុំកែតម្រូវកំណត់ត្រាអ្នកជំងឺរបស់ពួកគេ។
• ដាក់ពាក្យបណ្ដឹង ប្រសិនបើមានការបដិសេធមិនឱ្យពួកគេចូលប្រើកំណត់ត្រាអ្នកជំងឺរបស់ពួកគេ។

តើខ្ញុំអាចត្រួតពិនិត្យសេចក្ដីចម្លងនៃកំណត់ត្រាអ្នកជំងឺរបស់ខ្ញុំបានទេ?

បាន។ អ្នកជំងឺមានសិទ្ធិពិនិត្យឡើងវិញ ឬទទួលសេចក្ដីចម្លងនៃកំណត់ត្រារបស់ពួកគេ។1 នៅរដ្ឋកាលីហ្វ័រញ៉ា អ្នកជំងឺពេញវ័យ អនីតិជនដែលត្រូវបានអនុញ្ញាតឱ្យយល់ព្រមចំពោះការព្យាបាលវេជ្ជសាស្ត្រផ្ទាល់ខ្លួនរបស់ពួកគេ2 ឬតំណាងផ្ទាល់ខ្លួនរបស់អ្នកជំងឺមានសិទ្ធិពិនិត្យឡើងវិញ ឬទទួលសេចក្ដីចម្លងនៃកំណត់ត្រាអ្នកជំងឺរបស់ពួកគេ។3

1. “អ្នកជំងឺ” មានន័យថាអ្នកជំងឺបច្ចុប្បន្ន ឬអតីតអ្នកជំងឺ។4
2. “តំណាងផ្ទាល់ខ្លួន” មានន័យថាអ្នកថែរក្សា ភ្នាក់ងារថែទាំសុខភាព ឬមាតាបិតា ឬអាណាព្យាបាលរបស់អ្នកជំងឺជាអនីតិជន។5
3. “កំណត់ត្រាអ្នកជំងឺ” មានន័យថាកំណត់ត្រាអំពីប្រវត្តិសុខភាព រោគវិនិច្ឆ័យ ស្ថានភាព ឬការព្យាបាលរបស់អ្នកជំងឺ ដែលបង្កើតឡើងដោយអ្នកផ្ដល់សេវាថែទាំសុខភាព។ កំណត់ត្រាទាំងនេះមិនរួមបញ្ចូលព័ត៌មានដែលផ្ដល់ជាការសម្ងាត់ដល់អ្នកផ្ដល់សេវាថែទាំសុខភាព ដោយនរណាម្នាក់ក្រៅពីអ្នកជំងឺ ឬដោយអ្នកផ្ដល់សេវាថែទាំសុខភាពផ្សេងទៀតទេ។6

លើសពីនេះ បើអ្នកជំងឺចុះហត្ថលេខាឱ្យមានការបញ្ចេញព័ត៌មាន នោះកំណត់ត្រាអ្នកជំងឺត្រូវតែបញ្ចេញទៅឱ្យមេធាវីរបស់អ្នកជំងឺ។7

តើធ្វើដូចម្ដេចទើបខ្ញុំចូលប្រើកំណត់ត្រាអ្នកជំងឺរបស់ខ្ញុំបាន?

អ្នកជំងឺ ឬតំណាងផ្ទាល់ខ្លួនរបស់ពួកគេត្រូវតែដាក់សំណើសុំពិនិត្យមើល ឬទទួលសេចក្ដីចម្លងនៃកំណត់ត្រាអ្នកជំងឺ។8 បើសាម៉ីខ្លួនស្នើសុំសេចក្ដីចម្លងនៃកំណត់ត្រាអ្នកជំងឺបែបអេឡិចត្រូនិក ឬជាក្រដាស ពួកគេត្រូវបញ្ជាក់ពីកំណត់ត្រាដែលត្រូវចម្លងដែលពួកគេចង់បាន។9 អ្នកផ្ដល់សេវាថែទាំសុខភាពអាចតម្រូវឱ្យអ្នកជំងឺដាក់សំណើពួកគេជាលាយលក្ខណ៍អក្សរ។10

តើវានឹងចំណាយពេលប៉ុន្មានទើបខ្ញុំទទួលសេចក្ដីចម្លងនៃកំណត់ត្រាអ្នកជំងឺរបស់ខ្ញុំបាន?

អ្នកផ្ដល់សេវាថែទាំសុខភាពត្រូវតែអនុញ្ញាតឱ្យសាម៉ីខ្លួនពិនិត្យមើលកំណត់ត្រាក្នុងពេល 5 ថ្ងៃធ្វើការគិតចាប់ពីពេលទទួលបានសំណើ។11
បើសាម៉ីខ្លួនស្នើសុំសេចក្ដីចម្លងផ្នែកណាមួយឬទាំងអស់នៃឯកសារ អ្នកផ្ដល់សេវាត្រូវផ្ញើសេចក្ដីចម្លងឱ្យពួកគេក្នុងពេល 15 ថ្ងៃគិតចាប់ពីពេលទទួលបានសំណើ។12

តើអ្នកផ្ដល់សេវាថែទាំសុខភាពអាចផ្ដល់សេចក្ដីសង្ខេបនៃកំណត់ត្រាអ្នកជំងឺរបស់ខ្ញុំជំនួសឱ្យ ឬបន្ថែមពីលើការផ្ដល់សេចក្ដីចម្លងនៃកំណត់ត្រាជាក់ស្ដែងរបស់ខ្ញុំបានឬទេ?

បាន ប៉ុន្តែទាល់តែអ្នកជំងឺយល់ព្រមជាមុនចំពោះសេចក្ដីសង្ខេបនៃកំណត់ត្រារបស់ពួកគេ និងបង់ថ្លៃសេវាសម្រាប់ការរៀបចំសេចក្ដីសង្ខេប។13 សេចក្ដីសង្ខេបត្រូវតែមានព័ត៌មានអំពីការរងរបួស ជំងឺ ឬដំណាក់កាលជំងឺដែលមាននៅក្នុងកំណត់ត្រា រួមមានដូចខាងក្រោម៖

1. ការត្អូញត្អែរចម្បងរបស់អ្នកជំងឺ រួមទាំងប្រវត្តិដែលពាក់ព័ន្ធ
2. លទ្ធផលពីការពិគ្រោះយោបល់ និងការបញ្ជូនទៅអ្នកផ្ដល់សេវាថែទាំសុខភាពផ្សេងទៀត
3. រោគវិនិច្ឆ័យ បើធ្លាប់ធ្វើកន្លងមក
4. ផែនការ និងរបបព្យាបាល រួមទាំងថ្នាំមានវេជ្ជបញ្ជា
5. វឌ្ឍនភាពនៃការព្យាបាល
6. ការព្យាករណ៍ជំងឺ រួមទាំងបញ្ហា ឬស្ថានភាពបន្តមានសំខាន់ៗ
7. របាយការណ៍ពាក់ព័ន្ធអំពីនីតិវិធី និងការធ្វើតេស្តរោគវិនិច្ឆ័យ និងសេចក្ដីសង្ខេបទាំងអស់អំពីការឱ្យចេញពីពេទ្យ និង
8. លទ្ធផលពីការពិនិត្យរាងកាយនាពេលថ្មីបំផុតរបស់អ្នកជំងឺ ដូចជាសម្ពាធឈាម ទម្ងន់ និងលទ្ធផលពីតេស្តនៅមន្ទីរពិសោធន៍តាមទម្លាប់។

បើអ្នកផ្ដល់សេវារៀបចំសេចក្ដីសង្ខេប ពួកគេត្រូវតែផ្ដល់ជូនអ្នកជំងឺក្នុងពេល 10 ថ្ងៃធ្វើការ។14 អ្នកផ្ដល់សេវាអាចជូនដំណឹងដល់អ្នកជំងឺថា ពួកគេត្រូវការពេលវេលាបន្ថែមដើម្បីរៀបចំសេចក្ដីសង្ខេប ប៉ុន្តែត្រូវតែផ្ដល់សេចក្ដីសង្ខេបក្នុងពេល 30 ថ្ងៃ។15

អ្នកផ្ដល់សេវាក៏អាចសុំជួបអ្នកជំងឺដើម្បីបញ្ជាក់ពីគោលបំណងនៃការស្នើសុំផងដែរ។16បើអ្នកជំងឺគ្រាន់តែចាប់អារម្មណ៍លើកំណត់ត្រាអំពីការរងរបួស ជំងឺ ឬដំណាក់កាលជំងឺជាក់លាក់ណាមួយទេ អ្នកផ្ដល់សេវាអាចផ្ដល់សេចក្ដីសង្ខេបតែអំពីកំណត់ត្រាទាំងនោះបាន។17

តើចំណាយប្រាក់ប៉ុន្មានដើម្បីទទួលបានសេចក្ដីចម្លងនៃកំណត់ត្រារបស់ខ្ញុំ?

អ្នកផ្ដល់សេវាថែទាំសុខភាពមិនអាចគិតប្រាក់លើសពី 25 សេន ($0.25) ក្នុងមួយទំព័រសម្រាប់សេចក្ដីចម្លងជាក្រដាស ឬ 50 សេន ($0.50) ក្នុងមួយទំព័រសម្រាប់សេចក្ដីចម្លងពីមីក្រូហ្វីលបានទេ។18 អ្នកផ្ដល់សេវាក៏អាចគិត “ថ្លៃផ្អែកលើថ្លៃដើមសមរម្យ” សម្រាប់ការផ្ដល់សេចក្ដីចម្លងកំណត់ត្រាអ្នកជំងឺរបស់ពួកគេ។19 ថ្លៃសេវានេះអាចរួមបញ្ចូលតែថ្លៃដើមនៃ (A) ពលកម្មសម្រាប់ការចម្លងកំណត់ត្រា
(B) សម្ភារៈសម្រាប់បង្កើតសេចក្ដីចម្លង (C) ថ្លៃផ្ញើ និង
(D) ការរៀបចំសេចក្ដីសង្ខេបនៃកំណត់ត្រាសុខភាពប៉ុណ្ណោះ។20

ក្រៅពីនេះ អ្នកផ្ដល់សេវាមិនអាចគិតប្រាក់ពីអ្នកជំងឺ តំណាងផ្ទាល់ខ្លួនរបស់អ្នកជំងឺ ឬនិយោជិតមកពីអង្គការសេវាកម្មស្របច្បាប់មិនរកប្រាក់ចំណេញដែលតំណាងឱ្យអ្នកជំងឺឡើយ បើពួកគេដាក់សំណើជាលាយលក្ខណ៍អក្សរសុំកំណត់ត្រាដើម្បីគាំទ្រការទាមទារសំណង ឬបណ្ដឹងតវ៉ាអំពី៖

1. សិទ្ធិទទួលបានអត្ថប្រយោជន៍សាធារណៈ រួមទាំង Medi-Cal សេវាគាំទ្រតាមគេហដ្ឋាន CalWORKs ការធានារ៉ាប់រងពិការភាពរបបសន្តិសុខសង្គម (SSDI, Social Security Disability Insurance) កម្មវិធីបន្ថែមរបស់រដ្ឋ/ប្រាក់ចំណូលរបបសន្តិសុខបន្ថែមសម្រាប់មនុស្សចាស់ ជនពិការភ្នែក និងជនមានពិការភាព (SSI, Supplemental Security Income/SSP, State Supplementary Program) CalFresh ជំនួយសាច់ប្រាក់សម្រាប់ជនអន្តោប្រវេសន៍ស្របច្បាប់មានពិការភាព ពិការភ្នែក និងចាស់ជរា ប្រាក់សំណងទាក់ទងនឹងការបម្រើការងារនៃអតីតយុទ្ធជនរបស់សហព័ន្ធ និងប្រាក់សោធននិវត្តន៍ពិការភាពទាក់ទងនឹងការមិនបម្រើការងារ ឬឧបត្ថម្ភធនលំនៅដ្ឋានផ្ដល់ដោយរដ្ឋាភិបាល ឬកម្មវិធីជំនួយលំនៅដ្ឋានផ្ដោតលើអ្នកជួល
2. បណ្ដឹងទាមទារឋានៈមិនមែនអន្តោប្រវេសន៍ប្រភេទ U ក្រោមច្បាប់ការពារជនរងគ្រោះនៃការតាមដាន ឬអំពើហិង្សា ឬ
3. បណ្ដឹងផ្ទាល់ខ្លួនទាមទារសិទ្ធិស្នាក់នៅអចិន្ត្រៃយ៍ស្របច្បាប់ ក្រោមច្បាប់ស្ដីពីអំពើហិង្សាលើស្ត្រី។21

បើអ្នកជំងឺស្នើសុំកំណត់ត្រាទាក់ទងនឹងការទាមទារសំណងដែលបានលើកឡើងខាងលើ អ្នកផ្ដល់សេវាត្រូវតែផ្ដល់សេចក្ដីចម្លងនៃកំណត់ត្រាក្នុងពេល 30 ថ្ងៃចាប់ពីថ្ងៃនៃសំណើជាលាយលក្ខណ៍អក្សរនោះ។22 ទោះយ៉ាងនេះក្ដី អ្នកផ្ដល់សេវាមិនចាំបាច់ផ្ដល់កំណត់ត្រាដោយឥតគិតថ្លៃទេ បើអ្នកជំងឺត្រូវបានតំណាងដោយមេធាវីឯកជន (មេធាវីដែលមិនធ្វើការឱ្យអង្គភាពសេវាកម្មស្របច្បាប់មិនរកប្រាក់ចំណេញ។)23

តើខ្ញុំអាចចូលប្រើកំណត់ត្រាសុខភាពផ្លូវចិត្តរបស់ខ្ញុំបានទេ?

បាន ប៉ុន្តែមានករណីលើកលែងមួយចំនួន។

ទីមួយ អ្នកជំងឺគ្មានសិទ្ធិចូលប្រើកំណត់សម្គាល់ការព្យាបាលរោគផ្លូវចិត្តទេ24 ដែលមានន័យថាជា កំណត់សម្គាល់ដែលធ្វើដោយអ្នកជំនាញសុខភាពផ្លូវចិត្តក្នុងអំឡុងពេលប្រជុំពិគ្រោះយោបល់បែបផ្ទាល់ខ្លួន បែបក្រុម បែបរួមគ្នា ឬបែបគ្រួសារ និងវាដាច់ដោយឡែកពីកំណត់ត្រាវេជ្ជសាស្ត្រផ្សេងទៀតរបស់អ្នកជំងឺ។25

ទីពីរ បើអ្នកផ្ដល់សេវាថែទាំសុខភាពជឿថា ការឱ្យអ្នកជំងឺចូលប្រើកំណត់ត្រាសុខភាពផ្លូវចិត្តរបស់ពួកគេ នឹងមានហានិភ័យខ្លាំងអាចមានផលវិបាកជាគ្រោះថ្នាក់ធ្ងន់ធ្ងរដល់អ្នកជំងឺ អ្នកផ្ដល់សេវាអាចបដិសេធមិនឱ្យពួកគេចូលប្រើកំណត់ត្រាបាន។26 បើអ្នកផ្ដល់សេវាបដិសេធមិនឱ្យអ្នកជំងឺចូលប្រើកំណត់ត្រាសុខភាពផ្លូវចិត្តរបស់ពួកគេទេ អ្នកផ្ដល់សេវាក៏ត្រូវតែ៖

1. បញ្ចូលការបកស្រាយនៅក្នុងកំណត់ត្រាសុខភាពផ្លូវចិត្តរបស់អ្នកជំងឺដែរ អំពីហេតុផលដែលពួកគេបដិសេធមិនផ្ដល់ការចូលប្រើកំណត់ត្រា រួមទាំងការរៀបរាប់អំពីផលវិបាកជាគ្រោះថ្នាក់ជាក់លាក់ ដែលពួកគេគិតថានឹងកើតឡើង បើពួកគេអនុញ្ញាតឱ្យអ្នកជំងឺចូលប្រើ
2. អនុញ្ញាតឱ្យអ្នកជំងឺជ្រើសរើសគ្រូពេទ្យ គ្រូពេទ្យវះកាត់ ចិត្តវិទូ អ្នកព្យាបាលសម្រាប់គ្រួសារនិងអាពាហ៍ពិពាហ៍ បុគ្គលិកសង្គមកិច្ចគ្លីនិក ឬអ្នកប្រឹក្សាគ្លីនិកដែលមានអាជ្ញាបណ្ណ ដើម្បីពិនិត្យមើល ឬទទួលសេចក្ដីចម្លងនៃកំណត់ត្រាសុខភាពផ្លូវចិត្តរបស់ខ្លួន
3. ជូនដំណឹងដល់អ្នកជំងឺថា ពួកគេបដិសេធមិនឱ្យអ្នកជំងឺចូលប្រើកំណត់ត្រាសុខភាពផ្លូវចិត្តរបស់ពួកគេទេ
4. ជូនដំណឹងដល់អ្នកជំងឺថា ពួកគេមានសិទ្ធិទាមទារឱ្យអ្នកផ្ដល់សេវាអនុញ្ញាតឱ្យពួកគេជ្រើសរើសអ្នកជំនាញសុខភាពដែលរាយបញ្ជីនៅក្នុង b) ចូលប្រើកំណត់ត្រារបស់ពួកគេបាន និង
5. កត់ត្រាជាឯកសារនៅក្នុងកំណត់ត្រាសុខភាពផ្លូវចិត្តរបស់អ្នកជំងឺថា តើអ្នកជំងឺបានស្នើសុំអ្នកជំនាញសុខភាពនៅក្នុងបញ្ជី b) ដើម្បីពិនិត្យមើល ឬទទួលសេចក្ដីចម្លងនៃកំណត់ត្រារបស់ពួកគេដែរឬទេ។27

តើខ្ញុំអាចចូលប្រើកំណត់ត្រាអ្នកជំងឺរបស់កូនខ្ញុំបានដែរទេ?

បាន ប៉ុន្តែមានករណីលើកលែង។

ទីមួយ មាតាបិតាឬអាណាព្យាបាលគ្មានសិទ្ធិពិនិត្យមើល ឬទទួលសេចក្ដីចម្លងនៃកំណត់ត្រាអ្នកជំងឺជាអនីតិជនទេ បើអនីតិជនត្រូវបានអនុញ្ញាតដោយស្របច្បាប់ឱ្យយល់ព្រមចំពោះការថែទាំវេជ្ជសាស្ត្រផ្ទាល់ខ្លួនរបស់ពួកគេ។28 ឧទាហរណ៍ បើអនីតិជនមានអាយុយ៉ាងតិច 12 ឆ្នាំ និងបំពេញតាមលក្ខខណ្ឌទាំងអស់ដែលច្បាប់តម្រូវ នោះពួកគេអាចយល់ព្រមចំពោះសេវាកម្មខាងក្រោមបាន៖

1. ការប្រឹក្សាយោបល់ ឬការព្យាបាលសុខភាពផ្លូវចិត្តមិនសម្រាកពេទ្យ29
2. ការព្យាបាលវេជ្ជសាស្ត្រទាក់ទងនឹងជំងឺឆ្លង30
3. ការថែទាំវេជ្ជសាស្ត្រទាក់ទងនឹងការបង្ការជំងឺកាមរោគ31
4. ការថែទាំវេជ្ជសាស្ត្រទាក់ទងនឹងការព្យាបាល ឬការប្រមូលភស្តុតាងពាក់ព័ន្ធនឹងការរំលោភសេពសន្ថវៈដែលជាប់ចោទ32 ឬការបៀតបៀនផ្លូវភេទ33
5. ការថែទាំវេជ្ជសាស្ត្រ និងការពិគ្រោះយោបល់ទាក់ទងនឹងគ្រឿងញៀន ឬគ្រឿងស្រវឹង34
6. ការធ្វើតេស្តរកមេរោគអេដស៍។35

ទីពីរ មាតាបិតាគ្មានសិទ្ធិពិនិត្យមើល ឬទទួលសេចក្ដីចម្លងនៃកំណត់ត្រាអ្នកជំងឺជាអនីតិជនទេ បើអ្នកផ្ដល់សេវាកំណត់ថា ការចូលប្រើនោះនឹងមានផលប៉ះពាល់ជាគ្រោះថ្នាក់ដល់ (1) ទំនាក់ទំនងវិជ្ជាជីវៈរវាងអ្នកផ្ដល់សេវា និងអនីតិជននោះ ឬ (2) សុវត្ថិភាពរាងកាយ ឬសុខុមាលភាពផ្លូវចិត្តរបស់អនីតិជននោះ។ក្រម សុខភាព និងសុវត្ថិភាពរដ្ឋកាលីហ្វ័រញ៉ា § 123115(a)(2)។36

ទីបី មាតាបិតាគ្មានសិទ្ធិពិនិត្យមើល ឬទទួលសេចក្ដីចម្លងនៃកំណត់ត្រាអ្នកជំងឺជាអនីតិជនទេ បើអ្នកព្យាបាលរោគផ្លូវចិត្តដឹងថា អនីតិជននោះត្រូវបានដកចេញពីការឃុំគ្រងរក្សាផ្លូវកាយពីមាតាបិតា ឬអាណាព្យាបាលរបស់ពួកគេ លើកលែងតែតុលាការអនីតិជនចេញដីកាផ្សេងពីនេះ។37

តើមានកាលៈទេសៈផ្សេងទៀតដែលអ្នកផ្ដល់សេវាអាចបដិសេធមិនឱ្យខ្ញុំចូលប្រើកំណត់ត្រារបស់ខ្ញុំដែរឬទេ?

មាន។ តាមច្បាប់សហព័ន្ធ (HIPAA) អ្នកជំនាញថែទាំសុខភាពដែលមានអាជ្ញាបណ្ណ អាចបដិសេធសាម៉ីខ្លួនមិនឱ្យចូលប្រើកំណត់ត្រាសុខភាពរបស់ពួកគេក្រោមកាលៈទេសៈមួយចំនួនបាន។ ការបដិសេធទាំងនេះមួយចំនួនអាចពិនិត្យឡើងវិញបាន ប៉ុន្តែខ្លះទៀតមិនបានទេ។38

1. ពិនិត្យឡើងវិញពុំបាន។39 អ្នកផ្ដល់សេវាអាចបដិសេធមិនឲ្យបុគ្គលនោះចូលប្រើកំណត់ត្រារបស់ពួកគេបាន ដោយគ្មានឱកាសពិនិត្យឡើងវិញទេ បើកំណត់ត្រានោះគឺ៖
   1. ជាកំណត់សម្គាល់ការព្យាបាលរោគផ្លូវចិត្ត
   2. ត្រូវបានចងក្រងនៅក្នុងការគិតទុកមុនអំពីនីតិវិធីរដ្ឋបាល ព្រហ្មទណ្ឌ ឬរដ្ឋប្បវេណី
   3. ត្រូវបានរក្សាដោយស្ថាប័នអប់រំកែប្រែ ឬអ្នកផ្តល់សេវាថែទាំសុខភាពក្រោមការដឹកនាំរបស់ស្ថាប័នអប់រំកែប្រែ ហើយការចូលប្រើកំណត់ត្រានោះនឹងបង្កគ្រោះថ្នាក់ដល់សុខភាព សុវត្ថិភាព សន្តិសុខ ការឃុំគ្រងរក្សា ឬការស្តារនីតិសម្បទារបស់សាម៉ីខ្លួន ឬមនុស្សផ្សេងទៀតដែលជាប់គុក ឬនិយោជិតនៃស្ថាប័នអប់រំកែប្រែ
   4. ជាផ្នែកនៃការស្រាវជ្រាវដែលធ្វើឡើងដោយអ្នកផ្តល់សេវាថែទាំសុខភាព ឱ្យតែសាម៉ីខ្លួនបានយល់ព្រមចំពោះការបដិសេធការចូលប្រើ នៅពេលពួកគេយល់ព្រមចូលរួមក្នុងការស្រាវជ្រាវ
   5. ត្រូវបានការពារដោយច្បាប់ឯកជនភាព (5 U.S.C. § 552a) (ច្បាប់នេះអនុវត្តចំពោះព័ត៌មានដែលប្រមូលដោយរដ្ឋាភិបាលសហព័ន្ធ) ឬ
   6. ត្រូវបានទទួលពីអ្នកផ្សេងក្រៅពីអ្នកផ្ដល់សេវាថែទាំសុខភាពក្រោមការសន្យារក្សាការសម្ងាត់។
2. ពិនិត្យឡើងវិញបាន។40 អ្នកផ្ដល់សេវាអាចបដិសេធមិនឲ្យអ្នកជំងឺចូលប្រើកំណត់ត្រារបស់ពួកគេបាន
   1. អ្នកជំនាញថែទាំសុខភាពបានកំណត់ថា ការចូលប្រើនោះទំនងជាធ្វើឱ្យគ្រោះថ្នាក់ដល់អាយុជីវិត ឬសុវត្ថិភាពរាងកាយរបស់អ្នកជំងឺ ឬអ្នកផ្សេង
   2. កំណត់ត្រានោះសំដៅលើបុគ្គលផ្សេងទៀត (លើកលែងតែអ្នកផ្ដល់សេវាថែទាំសុខភាព) ហើយអ្នកផ្ដល់សេវាថែទាំសុខភាពដែលមានអាជ្ញាបណ្ណបានកំណត់ថា ការចូលប្រើនោះទំនងជាបង្កឱ្យមានគ្រោះថ្នាក់ធ្ងន់ធ្ងរដល់បុគ្គលផ្សេងទៀត ឬ
   3. សំណើសុំចូលប្រើនោះធ្វើឡើងដោយតំណាងផ្ទាល់ខ្លួនរបស់អ្នកជំងឺ ហើយអ្នកជំនាញថែទាំសុខភាពដែលមានអាជ្ញាបណ្ណបានកំណត់ថា ការផ្ដល់សិទ្ធិចូលប្រើដល់តំណាងផ្ទាល់ខ្លួននេះទំនងជាបង្កឱ្យមានគ្រោះថ្នាក់ធ្ងន់ធ្ងរដល់អ្នកជំងឺ ឬអ្នកផ្សេងទៀត។

ពិនិត្យឡើងវិញ។ បើសាម៉ីខ្លួនស្នើសុំឱ្យពិនិត្យឡើងវិញនូវការបដិសេធការចូលប្រើកំណត់ត្រា អ្នកផ្ដល់សេវាថែទាំសុខភាពត្រូវតែចាត់តាំងអ្នកជំនាញថែទាំសុខភាពណាមួយដែលមិនបានពាក់ព័ន្ធនឹងការបដិសេធនេះឱ្យពិនិត្យឡើងវិញនូវការសម្រេចចិត្តបដិសេធ។ អ្នកជំនាញថែទាំសុខភាពដែលត្រូវបានចាត់តាំង ត្រូវតែសម្រេចចិត្តក្នុងរយៈពេលសមស្របមួយ ថាតើការបដិសេធនោះសមស្របតាមច្បាប់ឬទេ ហើយត្រូវតែផ្តល់សេចក្ដីជូនដំណឹងជាលាយលក្ខណ៍អក្សរដល់អ្នកស្នើសុំអំពីការសម្រេចចិត្តរបស់ខ្លួន។

តាមច្បាប់កាលីហ្វ័រញ៉ា អ្នកជំនាញថែទាំសុខភាពក៏អាចបដិសេធការចូលប្រើ៖

1. សេចក្ដីចម្លងនៃកំណត់ត្រាអំពីកាំរស្មីអ៊ិចឬការផ្ដាន ការថតអគ្គីសនីបេះដូង ការថតអគ្គីសនីខួរក្បាល ឬការថតអគ្គីសនីសាច់ដុំ បើកំណត់ត្រាទាំងនេះត្រូវគេបញ្ជូនទៅអ្នកផ្តល់សេវាថែទាំសុខភាពមួយទៀតក្នុងពេល 15 ថ្ងៃគិតចាប់ពីថ្ងៃស្នើសុំកំណត់ត្រា ហើយអ្នកស្នើសុំត្រូវបានជូនដំណឹងអំពីឈ្មោះ និងអាសយដ្ឋាននៃអ្នកផ្ដល់សេវាថែទាំសុខភាពមួយទៀតនោះ41
2. កំណត់ត្រាអំពីការប្រើប្រាស់គ្រឿងស្រវឹងនិងគ្រឿងញៀន បើការបង្ហាញត្រូវបានហាមឃាត់ដោយការិយាល័យស្ដីពីការប្រើប្រាស់គ្រឿងញៀននៃសហព័ន្ធ និងច្បាប់ស្តីពីការព្យាបាលឆ្នាំ 1972 ឬច្បាប់ស្តីពីការស្ដារនីតិសម្បទា ការព្យាបាល និងការទប់ស្កាត់ការញៀនគ្រឿងស្រវឹង និងការប្រើគ្រឿងស្រវឹងទូលំទូលាយនៃសហព័ន្ធឆ្នាំ 1970។ កំណត់ត្រាអំពីការប្រើប្រាស់គ្រឿងស្រវឹងនិងគ្រឿងញៀនផ្សេងទៀតទាំងអស់ ជាកម្មវត្ថុនៃការបង្ហាញដល់អ្នកជំងឺ42
3. កំណត់ត្រាអំពីអ្នកផ្ទុកជំងឺឆ្លង បើការបង្ហាញត្រូវបានហាមឃាត់ដោយច្បាប់។43

ចំណាំ៖ ក្រោមច្បាប់កាលីហ្វ័រញ៉ា អ្នកផ្ដល់សេវាថែទាំសុខភាពមិនអាចលាក់ទុកកំណត់ត្រារបស់អ្នកជំងឺ ដោយសារតែការមិនបង់វិក្កយបត្រសេវាកម្មនោះទេ។44 បើអ្នកផ្ដល់សេវាថែទាំសុខភាពមានចេតនាលាក់ទុកកំណត់ត្រា ដោយសារតែការមិនបង់វិក្កយបត្រ នោះពួកគេអាចនឹងរងទណ្ឌកម្ម។

តើខ្ញុំមានសិទ្ធិអ្វីខ្លះ ប្រសិនបើអ្នកផ្តល់សេវាបដិសេធមិនឱ្យខ្ញុំចូលប្រើកំណត់ត្រារបស់ខ្ញុំ?

ការបដិសេធជាលាយលក្ខណ៍អក្សរ។ បើអ្នកផ្តល់សេវាបដិសេធការចូលប្រើកំណត់ត្រាអ្នកជំងឺ អ្នកផ្តល់សេវាត្រូវតែផ្តល់ការបដិសេធជាលាយលក្ខណ៍អក្សរឱ្យទាន់ពេលដល់សាម៉ីខ្លួន។ ការបដិសេធត្រូវតែប្រើភាសាងាយយល់ និងមាន៖

1. មូលដ្ឋាននៃការបដិសេធ
2. សេចក្តីថ្លែងអំពីសិទ្ធិរបស់សាម៉ីខ្លួនក្នុងការស្នើសុំឱ្យពិនិត្យឡើងវិញដោយអ្នកជំនាញថែទាំសុខភាពផ្សេងទៀត និងការពិពណ៌នាអំពីរបៀបស្នើសុំការពិនិត្យឡើងវិញ និង
3. ការពិពណ៌នាអំពីរបៀបដែលសាម៉ីខ្លួនអាចដាក់ពាក្យបណ្តឹងជាមួយអ្នកផ្តល់សេវា ឬជាមួយលេខាធិការនៃ ក្រសួងសុខាភិបាល និងសេវាមនុស្សសហរដ្ឋអាមេរិក។ ការពិពណ៌នាត្រូវតែបញ្ចូលឈ្មោះ ឬមុខតំណែង និងលេខទូរសព្ទរបស់អ្នកទំនាក់ទំនងដែលទទួលពាក្យបណ្តឹង។45

ពាក្យបណ្ដឹង HIPAA។
អ្នកជំងឺអាចដាក់ពាក្យបណ្តឹងអំពីការរំលោភបទប្បញ្ញត្តិឯកជនភាព HIPAA របស់សហព័ន្ធតាមរយៈ ជំនួយការផតថលបណ្ដឹងនៃក្រសួងសុខាភិបាល និងសេវាមនុស្សសហរដ្ឋអាមេរិក ដែលមាននៅទីនេះ៖
https://ocrportal.hhs.gov/ocr/smartscreen/main.jsf.

បើអ្នកមានសំណួរអំពីរបៀបដាក់ពាក្យបណ្ដឹង អ្នកអាចអ៊ីមែលទៅការិយាល័យសិទ្ធិពលរដ្ឋ (OCR, Office for Civil Rights) តាម OCRMail@hhs.gov ឬហៅទូរសព្ទឥតគិតថ្លៃលេខ 1-800-368-1019, TDD 1-800-537-7697។ OCR ផ្ដល់ទ្រង់ទ្រាយផ្សេងៗ (ដូចជាអក្សរស្ទាប និងអក្សរបោះពុម្ពធំៗ) ជំនួយ និងសេវាកម្មបន្ថែម (ដូចជាសេវាកម្មបញ្ជូនបន្ត) និងជំនួយភាសា។46

បណ្ដឹងត្រូវតែដាក់ជាលាយលក្ខណ៍អក្សរក្នុងពេល 180 ថ្ងៃគិតចាប់ពីកាលបរិច្ឆេទដែលអ្នកជំងឺបានដឹង ឬគួរតែបានដឹងអំពីការរំលោភបំពាន លើកលែងតែអ្នកជំងឺអាចបង្ហាញអំពីបុព្វហេតុល្អចំពោះការមិនដាក់បណ្ដឹងក្នុងពេល 180 ថ្ងៃ។47 បណ្ដឹងត្រូវតែដាក់ឈ្មោះអ្នកផ្ដល់សេវាដែលជាកម្មវត្ថុនៃបណ្ដឹង ហើយរៀបរាប់ពីទង្វើ ឬការភ្លេចបញ្ចូលដែលរំលោភបំពាន HIPAA។48 អ្នកផ្ដល់សេវាមិនអាចសងសឹកនឹងអ្នកជំងឺដែលប្រើប្រាស់សិទ្ធិរបស់ខ្លួនក្រោម HIPAA នោះទេ។49

ព័ត៌មានបន្ថែមអំពី HIPAA អាចរកឃើញនៅ http://www.hhs.gov/ocr/hipaa/.

ពាក្យបណ្តឹងរដ្ឋ។ អ្នកជំងឺ ឬតំណាងអ្នកជំងឺអាចប្ដឹងអ្នកផ្ដល់សេវាថែទាំសុខភាព ដើម្បីឱ្យអនុវត្តច្បាប់កំណត់ត្រាសុខភាពនៅក្នុងក្រមសុខភាព និងសុវត្ថិភាពរដ្ឋកាលីហ្វ័រញ៉ា។50 ចៅក្រមអាចនឹងផ្ដល់រង្វាន់ជាថ្លៃចំណាយ និងថ្លៃមេធាវីដល់ភាគីឈ្នះក្ដី។

អ្នកជំងឺក៏អាចប្ដឹងអំពីការខូចខាត (ប្រាក់កាក់) បើអ្នកផ្ដល់សេវាបានឈប់ធ្វើអាជីវកម្ម និងបោះបង់កំណត់ត្រាអ្នកជំងឺ។51 អ្នកផ្ដល់សេវាដែលឈប់ធ្វើអាជីវកម្មត្រូវតែរក្សាកំណត់ត្រាយ៉ាងតិច 7 ឆ្នាំ ហើយយ៉ាងហោចណាស់រហូតដល់សាម៉ីខ្លួនមានអាយុ 19 ឆ្នាំ។52

អ្នកមានពេលកំណត់ក្នុងការដាក់ពាក្យបណ្ដឹងរដ្ឋ ព្រោះមានលក្ខន្តិកៈដែនកំណត់របស់រដ្ឋកាលីហ្វ័រញ៉ា។ ពិគ្រោះជាមួយមេធាវីភ្លាម បើអ្នកកំពុងពិចារណាដាក់ពាក្យបណ្តឹងរដ្ឋ។

តើខ្ញុំកែកំណត់ត្រាសុខភាពរបស់ខ្ញុំដោយរបៀបណា?

អ្នកជំងឺមានសិទ្ធិស្នើសុំឱ្យអ្នកផ្ដល់សេវាថែទាំសុខភាពកែកំណត់ត្រាសុខភាពរបស់ខ្លួនបានឱ្យតែកំណត់ត្រានៅមាន។53 អ្នកផ្ដល់សេវាថែទាំសុខភាពអាចតម្រូវឱ្យអ្នកជំងឺធ្វើសំណើសុំកែប្រែជាលាយលក្ខណ៍អក្សរ ហើយផ្ដល់ហេតុផលអំពីការកែប្រែនោះ។54

ក្នុងពេល 60 ថ្ងៃគិតចាប់ពីពេលស្នើសុំការកែតម្រូវ អ្នកផ្ដល់សេវាត្រូវតែ៖

1. ផ្ដល់តាមសំណើ ឬ
2. បដិសេធសំណើ និងផ្តល់ឱ្យសាម៉ីខ្លួននូវការបដិសេធជាលាយលក្ខណ៍អក្សរ ឬ
3. ផ្ដល់សេចក្ដីថ្លែងជាលាយលក្ខណ៍អក្សរដល់សាម៉ីខ្លួនអំពីការពន្យារពេលឆ្លើយតបចំពោះសំណើមិនលើសពី 30 ថ្ងៃ ដោយមានហេតុផលអំពីការពន្យារពេល និងកាលបរិច្ឆេទដែលអ្នកផ្ដល់សេវានឹងសម្រេចចំណាត់ការចំពោះសំណើ។55

អ្នកផ្ដល់សេវាអាចបដិសេធសំណើសុំកែប្រែបាន បើអ្នកផ្ដល់សេវាកំណត់ថា៖

1. កំណត់ត្រាគឺត្រឹមត្រូវ និងពេញលេញ
2. កំណត់ត្រាមិនបានបង្កើតដោយអ្នកផ្ដល់សេវា លើកលែងតែអ្នកជំងឺបង្ហាញថា អ្នកបង្កើតកំណត់ត្រា គឺលែងមាន មិនអាចចាត់ការចំពោះសំណើកែប្រែបានទេ
3. អ្នកផ្ដល់សេវាមិនមានកំណត់ត្រា ឬ
4. អ្នកជំងឺមិនមានសិទ្ធិចូលប្រើកំណត់ត្រា។56

បើអ្នកផ្ដល់សេវាយល់ព្រមកែកំណត់ត្រារបស់អ្នកជំងឺ អ្នកផ្ដល់សេវាត្រូវតែ៖

1. បន្ថែមការកែប្រែនៅខាងចុង ឬផ្ដល់តំណទៅកាន់ចំណុចកែប្រែ
2. ជូនដំណឹងដល់សាម៉ីខ្លួនថា ការកែប្រែបានទទួលការយល់ព្រម
3. ទទួលការព្រមព្រៀងពីសាម៉ីខ្លួនក្នុងការឱ្យអ្នកផ្តល់សេវាជូនដំណឹងដល់អ្នកដែលត្រូវដឹងអំពីការកែប្រែនេះ និង
4. ជូនដំណឹងដល់អ្នកដែលត្រូវដឹងអំពីការកែប្រែនេះ។57 អ្នកផ្ដល់សេវាផ្សេងទៀតដែលទទួលដំណឹងអំពីការកែប្រែនេះ ក៏ត្រូវតែកែកំណត់ត្រាអ្នកជំងឺដែលខ្លួនកាន់កាប់ដែរ។58

បើអ្នកផ្ដល់សេវាបដិសេធសំណើសុំកែប្រែរបស់សាម៉ីខ្លួន អ្នកផ្ដល់សេវាត្រូវតែផ្ដល់ឱ្យសាម៉ីខ្លួននូវការបដិសេធជាលាយលក្ខណ៍អក្សរជាភាសាងាយយល់ឱ្យទាន់ពេលដោយរួមមាន៖

1. មូលដ្ឋាននៃការបដិសេធ
2. សិទ្ធិរបស់សាម៉ីខ្លួនក្នុងការដាក់សេចក្តីថ្លែងជាលាយលក្ខណ៍អក្សរមិនយល់ស្របនឹងការបដិសេធ និងរបៀបដែលសាម៉ីខ្លួនអាចដាក់សេចក្តីថ្លែងបាន
3. ការជូនដំណឹងដែលថា ទោះបីជាសាម៉ីខ្លួនមិនដាក់សេចក្តីថ្លែងមិនយល់ស្របនឹងការបដិសេធក៏ដោយ ក៏ពួកគេអាចស្នើសុំឱ្យអ្នកផ្ដល់សេវាបញ្ចូលសំណើសុំកែប្រែ និងការបដិសេធនៅក្នុងការបង្ហាញអំពីកំណត់ត្រានាពេលអនាគតបានដែរ និង
4. ការពិពណ៌នាអំពីរបៀបដែលសាម៉ីខ្លួនអាចដាក់ពាក្យបណ្តឹងជាមួយអ្នកផ្តល់សេវា ឬជាមួយលេខាធិការនៃ ក្រសួងសុខាភិបាល និងសេវាមនុស្សសហរដ្ឋអាមេរិក។59

បើអ្នកជំងឺចង់ដាក់សេចក្ដីថ្លែងជាលាយលក្ខណ៍អក្សរអំពីការមិនយល់ស្រប អ្នកផ្ដល់សេវាអាច "កំណត់ចំនួនពាក្យតាមសមហេតុផល" នៅក្នុងសេចក្ដីថ្លែងនោះ។60 បន្ទាប់មក សេចក្ដីថ្លែងនោះត្រូវតែដាក់បញ្ចូលនៅក្នុងការបង្ហាញអំពីកំណត់ត្រារបស់អ្នកជំងឺនាពេលអនាគត។61 អ្នកផ្ដល់សេវាក៏អាចរៀបចំសេចក្ដីដោះសាចំពោះសេចក្ដីថ្លែងរបស់អ្នកជំងឺបានដែរ ប៉ុន្តែអ្នកផ្ដល់សេវាត្រូវតែផ្ដល់ឱ្យអ្នកជំងឺនូវសេចក្ដីចម្លងអំពីកាដោះសានោះ។62

អ្នកជំងឺក៏មានសិទ្ធិផ្ដល់សេចក្ដីបន្ថែមជាលាយលក្ខណ៍អក្សរ ទាក់ទងនឹងចំណុច ឬសេចក្ដីថ្លែងណាមួយនៅក្នុងកំណត់ត្រារបស់ខ្លួន ដែលខ្លួនជឿថា មិនពេញលេញ ឬមិនត្រឹមត្រូវ។ សេចក្តីបន្ថែមត្រូវបានកំណត់ត្រឹម 250 ពាក្យក្នុងមួយចំណុចដែលចោទថាមិនពេញលេញ ឬមិនត្រឹមត្រូវ នៅក្នុងកំណត់ត្រារបស់អ្នកជំងឺ។ សេចក្ដីបន្ថែមត្រូវតែចង្អុលឱ្យច្បាស់ជាលាយលក្ខណ៍អក្សរថា អ្នកជំងឺចង់ឱ្យដាក់សេចក្ដីបន្ថែមធ្វើជាផ្នែកមួយនៃកំណត់ត្រារបស់ខ្លួន។ បើអ្នកផ្តល់សេវាបង្ហាញកំណត់ត្រាវេជ្ជសាស្ត្ររបស់អ្នកជំងឺ ពួកគេត្រូវតែបញ្ចូលសេចក្ដីបន្ថែមជាលាយលក្ខណ៍អក្សរនោះនៅក្នុងការបង្ហាញ។63

• 1. ច្បាប់ស្ដីពីសិទ្ធិចូលប្រើកំណត់ត្រាសុខភាពរបស់អ្នកជំងឺរដ្ឋកាលីហ្វ័រញ៉ា ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123110(a) សូមមើលផងដែរច្បាប់ស្ដីពីការចល័ត និងគណនេយ្យភាពនៃការធានារ៉ាប់រងសុខភាព (HIPAA, Health Insurance Portability and Accountability Act), 45 C.F.R. § 164.524(a)(1)។
• 2. 45 C.F.R. § 164.502(g)(3)(i)។
• 3. ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123110(a) 45 C.F.R. § 164.502(g)។
• 4. ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123105(c)។
• 5. ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123105(d)។
• 6. ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123105(d); 45 C.F.R. § 164.524(a)(2)(v).
• 7. ក្រមសុខុមាលភាព និង ស្ថាប័នរដ្ឋកាលីហ្វ័រញ៉ា § 5328(a)(10)។
• 8. ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123110(a), (b)(1)។
• 9. ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123110(b)(1)។
• 10. 45 C.F.R. § 164.524(b)។
• 11. ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123110(a)។
• 12. ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123110(b)។
• 13. 45 C.F.R. § 164.524(c)(2)(iii) សូមមើលផងដែរ ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123130(a)។ [ច្បាប់កាលីហ្វ័រញ៉ា និងច្បាប់សហព័ន្ធគឺខុសគ្នាតិចតួច។ ច្បាប់កាលីហ្វ័រញ៉ាផ្ដល់ឱ្យអ្នកផ្ដល់សេវាសុខភាពនូវជម្រើសក្នុងការផ្ដល់សេចក្ដីសង្ខេបអំពីកំណត់ត្រាអ្នកជំងឺ ជំនួសឱ្យសេចក្ដីចម្លងអំពីកំណត់ត្រាអ្នកជំងឺ ប៉ុន្តែច្បាប់សហព័ន្ធផ្តល់ឱ្យអ្នកជំងឺនូវជម្រើសនេះ និងតម្រូវឱ្យមានការយល់ព្រមជាមុនពីអ្នកជំងឺ។]
• 14. ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123130(a)។
• 15. ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123130(a)។
• 16. ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123130(b)។
• 17. ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123130(b)។
• 18. ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123110(j)(2)។
• 19. ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123110(j)(1)។
• 20. ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123110(j)(1)។
• 21. ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123110(d)(1)។
• 22. ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123110(e)។
• 23. ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123110(d)(3)។
• 24. 45 C.F.R. § 164.524(a)(i)។
• 25. 45 C.F.R. § 164.501។
• 26. ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123115(b)។
• 27. ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123115(b)(1)-(b)(4)។
• 28. ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 123115(a)(1), (a)(3); 45 C.F.R. § 164.502(g)(3)(i)(B)។
• 29. ក្រម គ្រួសារ រដ្ឋកាលីហ្វ័រញ៉ា § 6924(b) ក្រម សុខភាព និងសុវត្ថិភាពរដ្ឋកាលីហ្វ័រញ៉ា § 124260(b)(1)។
• 30. ក្រម គ្រួសារ រដ្ឋកាលីហ្វ័រញ៉ា § 6926(a)។
• 31. ក្រម គ្រួសារ រដ្ឋកាលីហ្វ័រញ៉ា § 6926(b)។
• 32. ក្រម គ្រួសារ រដ្ឋកាលីហ្វ័រញ៉ា § 6927។
• 33. ក្រម គ្រួសារ រដ្ឋកាលីហ្វ័រញ៉ា § 6928។
• 34. ក្រម គ្រួសារ រដ្ឋកាលីហ្វ័រញ៉ា § 6929(b)។
• 35. ក្រម សុខភាព និងសុវត្ថិភាពរដ្ឋកាលីហ្វ័រញ៉ា § 121020(a)(1)។
• 36.
• 37. ក្រម សុខភាព និងសុវត្ថិភាពរដ្ឋកាលីហ្វ័រញ៉ា § 123116(a)។
• 38. 45 C.F.R. § 164.524(a)។
• 39. 45 C.F.R. § 164.524(a)(2)។
• 40. 45 C.F.R. § 164.524(a)(3)។
• 41. ក្រម សុខភាព និងសុវត្ថិភាពរដ្ឋកាលីហ្វ័រញ៉ា § 123110(c)។
• 42. ក្រម សុខភាព និងសុវត្ថិភាពរដ្ឋកាលីហ្វ័រញ៉ា § 123125(a)។
• 43. ក្រម សុខភាព និងសុវត្ថិភាពរដ្ឋកាលីហ្វ័រញ៉ា § 123125(b)។
• 44. ក្រម សុខភាព និងសុវត្ថិភាពរដ្ឋកាលីហ្វ័រញ៉ា § 123110(i)។
• 45. 45 C.F.R. § 164.524(d)(2)។
• 46. ក្រសួងសុខាភិបាលនិងសេវាមនុស្សសហរដ្ឋអាមេរិក ជំនួយការផតថលបណ្ដឹង https://ocrportal.hhs.gov/ocr/smartscreen/main.jsf (ចូលប្រើចុងក្រោយនៅថ្ងៃទី 19 ខែធ្នូ ឆ្នាំ 2023)។
• 47. 45 C.F.R. §§ 160.306(b)(1), (3)។
• 48. 45 C.F.R. § 160.306(b)(2)។
• 49. 45 C.F.R. 164.530(g)។
• 50. ក្រម សុខភាព និងសុវត្ថិភាពរដ្ឋកាលីហ្វ័រញ៉ា § 123120។
• 51. ក្រម សុខភាព និងសុវត្ថិភាពរដ្ឋកាលីហ្វ័រញ៉ា § 123145(b)។
• 52. ក្រម សុខភាព និងសុវត្ថិភាពរដ្ឋកាលីហ្វ័រញ៉ា § 123145(a)
• 53. 45 C.F.R. §§ 164.526(a)(1)។
• 54. 45 C.F.R. § 164.526(b)(1)។
• 55. 45 C.F.R. § 164.526(b)(2)។
• 56. 45 C.F.R. § 164.526(a)។
• 57. 45 C.F.R. §§ 164.526(c)(1)-(3)។
• 58. 45 C.F.R. § 164.526(e)។
• 59. 45 C.F.R. § 164.526(d)(1)។
• 60. 45 C.F.R. § 164.526(d)(2)។
• 61. 45 C.F.R. § 164.526(d)(5)។
• 62. 45 C.F.R. § 164.526(d)(3)។
• 63. ក្រម សុខភាព និងសុវត្ថិភាពរដ្ឋកាលីហ្វ័រញ៉ា § 123111(b)។