តើការទិញសេវាកម្ម (POS) គឺជាអ្វី?

មណ្ឌលក្នុងតំបន់ទិញសេវាកម្ម និងការគាំទ្រ​សម្រាប់អតិថិជន​របស់ពួកគេ​។​ ការទូទាត់​ថ្លៃ​សេវា​កម្ម និងការគាំទ្រនេះត្រូវបានគេហៅថាការទិញសេវាកម្ម (POS)។

តើមានសេវាកម្មអ្វីខ្លះសម្រាប់មណ្ឌលក្នុងតំបន់ដើម្បីទិញ ឬអនុញ្ញាត?

មណ្ឌលក្នុងតំបន់អាចបង់ថ្លៃសេវាច្រើនប្រភេទដូចជាឧបករណ៍បន្សាំ សេវាថែទាំកុមារ សេវា​ផ្នែក​សម្ដី ការបណ្តុះបណ្តាលស្វ័យតស៊ូមតិ ការបណ្តុះបណ្តាលបំណិនសង្គម អន្តរាគមន៍វិបត្តិ ការដឹកជញ្ជូន ការវាយតម្លៃ ការកម្សាន្ដសង្គម ការបង្វឹកបង្ហាត់ការងារ និងពេល​សម្រាក។​សេវាកម្មជាច្រើនទៀតត្រូវបានរាយក្នុងមគ្គុទ្ទេសក៍ សិទ្ធិនៅក្រោមច្បាប់ Lanterman​ របស់យើង​។

តើទិន្នន័យ POS គឺជាអ្វី?

ជារៀងរាល់ឆ្នាំ មណ្ឌលក្នុងតំបន់ត្រូវកត់ត្រាចំនួនទឹកប្រាក់ដែលពួកគេចំណាយលើ​ក្រុម​មនុស្ស​ផ្សេងៗគ្នាតាម៖

• ពិការភាព
• ក្រុមអាយុ (0-2, 3-21, និង 22 ឆ្នាំឡើងទៅ)
• ជាតិសាសន៍/ជាតិពន្ធុ
• ភាសា
• ប្រភេទលំនៅឋាន

ពួកគេក៏ត្រូវតែប្រមូលផងដែរនូវព័ត៌មានអំពីចំនួនដងដែលមនុស្សចង់បានគម្រោងកម្មវិធីជា​លក្ខ​ណៈបុគ្គល (IPP) ជាភាសាមិនសូវសាមញ្ញ។  ព័ត៌មានដែលបានប្រមូលមក ហៅថា “ទិន្នន័​យ​”។

តើមណ្ឌលក្នុងតំបន់មានទិន្នន័យ POS សម្រាប់ខ្ញុំមើលទេ?

មាន។ មណ្ឌលក្នុងតំបន់នីមួយៗត្រូវតែបង្ហោះទិន្នន័យ POS បច្ចុប្បន្នចូលទៅគេហទំព័រ​របស់​ពួក​គេ​ត្រឹមថ្ងៃទី 31 ខែធ្នូ​ជារៀងរាល់ឆ្នាំ។  មណ្ឌលក្នុង​តំបន់ត្រូវតែរក្សាទុកទិន្នន័យពីឆ្នាំផ្សេង​ទៀត​នៅលើគេហទំព័ររបស់ពួកគេផងដែរ។

ដើម្បីស្វែងរកទិន្នន័យសម្រាប់មណ្ឌលក្នុងតំបន់ទាំង 21 សូមចូលទៅកាន់តំណភ្ជាប់នេះ៖ https://www.dds.ca.gov/rc/purchase-of-service-data/

តើវិសមភាពនៃ POS មានអ្វីខ្លះ?

វិសមភាពមានន័យថា ភាពខុសគ្នា​ឬគម្លាត។  ដូច្នេះ វិសមភាពរបស់ POS  គឺជាភាពខុសគ្នា​ដ៏​ធំរវាងតម្លៃ និងការប្រើប្រាស់សេវាកម្មដោយសមាជិកក្រុម​មួយចំនួន។​  មណ្ឌលក្នុង​តំបន់​ចំណា​​យ​លើក្រុមមួយចំនួន ច្រើនជាងក្រុមមួយចំនួនទៀត។

ឧទាហរណ៍នៃវិសមភាពក្នុងឆ្នាំ 2021-2022៖

​មណ្ឌល​ក្នុង​តំបន់​ A

ជាមធ្យម មណ្ឌលក្នុងតំបន់ A ផ្តល់ការអនុញ្ញាត (ផ្តល់ឱ្យ) ឱ្យមានទឹកប្រាក់ចំនួន $30,920 នៅក្នុង POS សម្រាប់អតិថិជនជនជាតិស្បែកសគ្រប់រូប។  ជាមធ្យម មណ្ឌលក្នុងតំបន់ A ផ្តល់ការអនុញ្ញាតឱ្យមានទឹកប្រាក់ចំនួន $14,423 នៅក្នុង POS សម្រាប់អតិថិជន​ជនជាតិ​អាមេរិកឡាទីនគ្រប់រូប។  មណ្ឌលក្នុងតំបន់ A ផ្តល់ការអនុញ្ញាតឱ្យមានទឹកប្រាក់ចំនួន $14,919 នៅក្នុង POS សម្រាប់អតិថិជនជនជាតិអាស៊ីគ្រប់រូប។

មណ្ឌល​ក្នុង​តំបន់​ B

ជាមធ្យម មជ្ឈមណ្ឌលក្នុងតំបន់ B ផ្តល់ការអនុញ្ញាតនូវទឹកប្រាក់ចំនួន $7,099 សម្រាប់អ្នកជំងឺ​អូទីស្សឹម, $35,160 សម្រាប់ជនពិការបញ្ញា និង $28,425 សម្រាប់អ្នកជំងឺអូទីស្សឹម និង​ពិការ​បញ្ញា។  មណ្ឌលក្នុងតំបន់ B ផ្តល់ការអនុញ្ញាតជាមធ្យមនូវទឹកប្រាក់ចំនួន $25,246 សម្រាប់​អ្នក​មានជំងឺឆ្កួតជ្រូកម្នាក់ និង $32,492 សម្រាប់អ្នកមានជំងឺពិការខួរក្បាល​ម្នាក់។

​មណ្ឌល​ក្នុង​តំបន់​ C

ជាមធ្យមអតិថិជនដែលនិយាយភាសាអង់គ្លេសទទួលបាន 35,430 ដុល្លារជាសេវាកម្ម​ពី​មណ្ឌ​ល​ក្នុងតំបន់ C។ មណ្ឌលក្នុងតំបន់ B ផ្តល់ការអនុញ្ញាតជាមធ្យមនូវទឹកប្រាក់​ចំនួន 25,496 ដុល្លារ​សម្រាប់អ្នកដែលនិយាយ​ភាសាអេស្ប៉ាញ 76,996 ដុល្លារសម្រាប់អ្ន​កដែលនិយាយ​ភាសាហ្វា​ស៊ី (Farsi) និង 46,038 ដុល្លារសម្រាប់អ្នកដែលនិយាយភាសាកូរ៉េ។

ជារឿយៗមានភាពផ្សេងគ្នារវាងសេវាកម្មដែលមណ្ឌលក្នុងតំបន់ផ្តល់ឱ្យនរណាម្នាក់ ("ផ្តល់ការ​អនុញ្ញាត") និងចំនួនទឹកប្រាក់ដែលអ្នក​នោះត្រូវចំណាយ។​ មណ្ឌលក្នុង​តំបន់សរុប​លទ្ធផល​ដោយ​ការបង់ថ្លៃសេវាដែលបានប្រើ មិនមែនជាសេវាកម្មដែលមានការអនុញ្ញាតនោះទេ។

ជាឧទាហរណ៍ នៅមណ្ឌលក្នុងតំបន់មួយក្នុងឆ្នាំ 2021-2022៖

• កុមារជនជាតិស្បែកសដែលមានអាយុក្រោម 3 ឆ្នាំត្រូវបានអនុញ្ញាតជាមធ្យមនូវ​ទឹក​ប្រា​ក់​ចំនួន $10,870 ប៉ុន្តែប្រើត្រឹមតែ $6,959 ប៉ុណ្ណោះ។ 
• កុមារជនជាតិស្បែក​ខ្មៅដែលមានអាយុក្រោម 3 ឆ្នាំត្រូវបានអនុញ្ញាតជាមធ្យមនូវ​ទឹក​ប្រា​ក់​ចំនួន $11,391 ប៉ុន្តែប្រើត្រឹមតែ $5,649 ប៉ុណ្ណោះ។ 
• កុមារជនជាតិដើមហាវ៉ៃ ឬកុមារដែនកោះប៉ាស៊ីហ្វិកដែលមានអាយុក្រោម 3 ឆ្នាំត្រូវ​បាន​​អនុញ្ញាតជាមធ្យមនូវ​ទឹកប្រាក់ចំនួន $15,591 ប៉ុន្តែប្រើត្រឹមតែ $7,338 ប៉ុណ្ណោះ។
• កុមារជនជាតិអាមេរិកដើមកំណើតឥណ្ឌា ឬកុមារជនជាតិដើមអាឡាស្កាដែលមាន​អាយុ​ក្រោម 3 ឆ្នាំត្រូវបានអនុញ្ញាតជាមធ្យមនូវ​ទឹកប្រាក់ចំនួន $8,318 ប៉ុន្តែប្រើត្រឹមតែ $5,306 ប៉ុណ្ណោះ។

ហេតុអ្វីបានជាមានវិសមភាព?

វិសមភាពអាចកើតមានដោយសារហេតុផលជាច្រើន។  នេះជាឧទាហរណ៍ដែលមនុស្សបានប្រាប់​យើង និងមណ្ឌលនានាក្នុងតំបន់៖

• បុគ្គលិកមណ្ឌលក្នុងតំបន់មិនប្រាប់ក្រុមគ្រួសារថាមានសេវាកម្ម។
• ក្រុមគ្រួសារស្នើសុំសេវាកម្ម ប៉ុន្តែនៅពេលនោះមានការភ័យខ្លាចក្នុងការបញ្ជូន​ត្រឡប់​មក​វិញ ប្រសិនបើមណ្ឌលក្នុងតំបន់និយាយថា "មិនមាន"។
• ក្រុមគ្រួសារ​មិន​ដឹង​ពី​សិទ្ធិ​របស់​ខ្លួន​ក្នុង​ការ​ប្ដឹង​តវ៉ា។
• មណ្ឌលក្នុងតំបន់មិនផ្តល់ព័ត៌មានដល់ក្រុមគ្រួសារជាភាសារបស់ពួកគេ។
• មិនមានសេវាកម្មផ្សេងៗដើម្បីបំពេញតម្រូវការផ្នែកវប្បធម៌។
• អ្នកសម្របសម្រួលសេវាកម្មត្រូវការការបណ្តុះបណ្តាលបន្ថែម។
• មណ្ឌលក្នុងតំបន់ត្រូវចំណាយពេលយូរពេកដើម្បីផ្តល់ការសម្រេចចិត្តអំពីសេវាកម្មដល់ក្រុម​គ្រួសារ។
• បុគ្គលិកមណ្ឌលក្នុងតំបន់សម្រេចថាអ្វីដែលត្រូវបានអនុញ្ញាត។ ពួកគេមានភាពលម្អៀង​ដែលបណ្តាលឱ្យមានភាពខុសគ្នាអំពីរបៀបផ្ដល់សេវាកម្ម​ដល់អតិថិជន។
• ក្រុមគ្រួសារមិនមានមធ្យោបាយធ្វើដំណើរដែលអាចទុកចិត្តបានដើម្បីទៅទទួលសេវាកម្ម​។
• មិនមានសេវាកម្មក្នុងអំឡុងពេលដែលត្រូវផ្ដល់សម្រាប់ក្រុមគ្រួសារ។
• នៅពេលក្រុមគ្រួសារប្រាប់មណ្ឌលក្នុងតំបន់ថាពួកគេមានបញ្ហាក្នុងការប្រើប្រាស់សេវាកម្ម មណ្ឌលក្នុងតំបន់មិនដោះស្រាយបញ្ហានោះទេ។

មិនថាហេតុផលអ្វីក៏ដោយ មានឧបសគ្គដល់អតិថិជនក្នុងការទទួលបានសេវា​ដែល​ពួកគេ​ត្រូវការ។

តើ​មណ្ឌល​ក្នុង​តំបន់​ត្រូវ​ចាត់​វិធានការ​ដើម្បី​ជួយ​ដោះស្រាយ​វិសមភាព​ផ្សេងៗដែរ​ឬ​ទេ?

​បាទ/ចាស។  មណ្ឌលក្នុងតំបន់នីមួយៗត្រូវតែរៀបចំការប្រជុំ "ភាគីពាក់ព័ន្ធ” ជាសាធារណៈ ដើម្បី​ចែករំលែកទិន្នន័យ POS និងស្តាប់យោបល់ពីមនុស្សម្នាទាំងឡាយ។​  ការប្រជុំនេះ​ត្រូវ​រៀបចំធ្វើឡើងនៅចន្លោះខែមករា និងខែមីនា។  បន្ទាប់មកនៅត្រឹម ថ្ងៃទី 31 ខែសីហា មណ្ឌល​ក្នុងតំបន់ត្រូវតែផ្ញើរបាយការណ៍​ទៅក្រសួងសេវាអភិវឌ្ឍន៍ (DDS) ដោយពន្យល់​ពីរបៀបដែល​កិច្ចប្រជុំបានដំណើរការ និងរបៀបដែលពួកគេនឹងបម្រើអតិថិជនឱ្យកាន់តែប្រសើរឡើង។ 

តើ​មាន​ច្បាប់​ដែល​ពន្យល់​អំពី​មុខងារ POS ​របស់​មណ្ឌល​ក្នុង​តំបន់​ដែរឬទេ?

​បាទ/ចាស។  ផ្នែក​ 4519.5 នៃ​ក្រម​សុខុមាលភាព​និង​ស្ថាប័ន ​ពន្យល់​ពី​អ្វី​ដែល​មណ្ឌលក្នុង​តំបន់​​ត្រូវ​ធ្វើ។

តើខ្ញុំអាចធ្វើអ្វីបាន ដើម្បីស្វែងយល់បន្ថែមអំពីបញ្ហានេះ?

• សូមចូលទៅកាន់គេហទំព័ររបស់មជ្ឈមណ្ឌលក្នុងតំបន់ ដើម្បីពិនិត្យមើលទិន្នន័យ POS ពីមុន និងនាពេលបច្ចុប្បន្ន។
• ចូលរួមកិច្ចប្រជុំភាគីពាក់ព័ន្ធសាធារណៈរបស់មណ្ឌលក្នុងតំបន់។
• ចូលរួមវគ្គបណ្តុះបណ្តាល POS។  ការិយាល័យតស៊ូមតិសិទ្ធិអតិថិជន (OCRA) របស់ DRC បើកវគ្គបណ្តុះបណ្តាលផ្សេងៗ ពេញមួយឆ្នាំ។
• សូមទាក់ទង OCRA សម្រាប់ព័ត៌មាន ឬជំនួយផ្នែកច្បាប់លើបញ្ហាដែលទាក់ទងនឹង POS​។
• ចូលរួម ឬបង្កើតក្រុមមួយដើម្បីស្វែងយល់បន្ថែម និងពិភាក្សាសំណួររបស់អ្នក។

តើខ្ញុំអាចចាត់វិធានការដើម្បីកែលម្អទិន្នន័យ POS បានទេ?

​បាទ/ចាស។  អ្នកអាចជួយខ្លួនអ្នក ឬអ្នកដ៏ទៃក្នុងការស្នើសុំសេវាកម្មដែលត្រូវការចាំបាច់​បន្ថែម​ទៀតបាន។  ប្រសិនបើអ្នកមានបញ្ហាក្នុងការទទួលបានសេវាកម្មដែលមណ្ឌលក្នុងតំបន់បានផ្តល់​​ឱ្យអ្នករួចហើយ សូមសាកសួរអ្នកសម្របសម្រួលសេ​វាកម្មរបស់​អ្នកដើម្បីដោះស្រាយ​បញ្ហា​នេះ​។  សូមជជែកជាមួយអ្នកគ្រប់គ្រង ប្រសិនបើអ្នកសម្របសម្រួលសេវាកម្មរបស់​អ្នកមិន​បាន​ជួយអ្នក។

អ្នកក៏អាចដាក់ពាក្យសុំ ការផ្ដល់ប្រាក់សេវានិងសមធ៌ម (SAE) ដែលមាន​ដើម្បីដោះស្រាយ​វិសមភាព POS ផងដែរ។ 

តើអតិថិជនទាំងអស់របស់មណ្ឌលក្នុងតំបន់ទទួលបាន POS មែនដែរឬទេ?

ជាអកុសល អត់ទេ។ មិនមែនអតិថិជនទាំងអស់សុទ្ធតែទទួលបាន POS នោះទេ។ មនុស្ស​មួយ​ចំនួន​ទទួលបាន 0 ដុល្លារ ក្នុងសេវាកម្មពីមណ្ឌលក្នុងតំបន់។ អ្នកដែលមានសេវា 0 ដុល្លារក្នុងសេវាកម្ម អាចស្នើសុំមណ្ឌលក្នុងតំបន់ផ្ដល់​ការអនុញ្ញាតឱ្យមា​នសេវាកម្ម​ដែល​បំពេញ​តម្រូវការរបស់ពួកគេ។ ប្រសិន​បើមណ្ឌលក្នុងតំបន់​បដិសេធចំពោះសំណើផ្ដល់​សេវាកម្មរបស់អ្នក អ្នក​អាច​ដាក់បណ្តឹងតវ៉ាបាន​។​ សម្រាប់ព័ត៌មាន​បន្ថែមមាន​នៅក្នុង​សិទ្ធិក្រោមជំពូកបណ្តឹងតវ៉ាច្បាប់ Lanterman របស់យើង។