I. តើមានភាពខុសគ្នាអ្វីខ្លះរវាងសត្វនាំផ្លូវ និងសត្វគាំពារផ្លូវអារម្មណ៍?

សត្វនាំផ្លូវនិងសត្វគាំពារផ្លូវអារម្មណ៍​​ គឺជាសត្វពីរប្រភេទ​ផ្សេងពីគ្នាដែលអាច​ជួយ​ដល់​ជន​ពិការ​បាន​។

ការយល់ដឹងពីភាពខុសគ្នាផ្នែកច្បាប់រវាងសត្វជំនួយទាំងពីរប្រភេទគឺសំខាន់ណាស់ ព្រោះ​វិធាន​​ដែល​អនុវត្ត​ចំពោះស្ថានភាពរបស់អ្នកអាចនឹង​ខុសគ្នា!

សត្វនាំផ្លូវ គឺជាសត្វសុនខ ឬសត្វសេះតូចៗដែលធ្វើការ​ ផ្ដល់ជំនួយ ឬបំពេញ​ការងារ​​​សម្រាប់​ជន​ពិការ​។ មានតែសត្វឆ្កែនិងសត្វសេះតូចៗប៉ុណ្ណោះដែលអាចជាសត្វនាំផ្លូវបាន។ សត្វ​នាំផ្លូវ ត្រូវតែបានបង្វឹកដើម្បីបំពេញការងារជាក់លាក់សម្រាប់ពិការភាពរបស់អ្នក។ សត្វនាំផ្លូវ​ដែល​កំពុងតែហ្វឹកហាត់ មិនត្រូវបានចាត់ទុកជាសត្វនាំផ្លូវនោះទេ ប៉ុន្តែអ្នក​អាច​យក​ពួកវា​ទៅកាន់​ទីសាធារណៈរដ្ឋកាលីហ្វ័រញ៉ាដើម្បី​បង្វឹកបាន។ ប្រសិនបើសត្វនាំផ្លូវដែលកំពុងតែហ្វឹកហាត់​បាន​បង្ក​ឱ្យ​មាន​ការខូចខាត អ្នកអាច​ទទួល​ខុស​ត្រូវ​តាមផ្លូវច្បាប់ និងតម្រូវឱ្យបង់ប្រាក់​សម្រា​ប់​ការ​ខូចខាត។

សត្វគាំពារ​ផ្លូវអារម្មណ៍​ (ESA) អាចជាសត្វណាមួយក៏បាន ឱ្យ​តែ​អាចផ្ដល់ការលួងលោម ឬ​ការគាំទ្រ​ដែល​កាត់បន្ថយរោគសញ្ញាមួយ ឬច្រើននៃពិការភាពរបស់បុគ្គល។ សត្វគាំពារ​ផ្លូវ​អារម្មណ៍ មិនត្រូវការការបង្វឹកជាក់លាក់ដើម្បីផ្ដល់នូវការលួងលោម ឬការគាំទ្រ​ដល់​ពិការភា​ព​របស់នរណាម្នាក់នោះទេ។ ESA មិន​មាន​សិទ្ធិ​ចូល​ទៅកាន់​ទី​កន្លែង​សាធារណៈ​ដូចសត្វ​នាំ​ផ្លូវ​មាននោះទេ។ ប្រសិនបើអ្នកមាន ESA អ្នកមិនត្រូវបានអនុញ្ញាតដោយ​ស្របច្បាប់ក្នុង​ការនាំ​សត្វ​ចូល​ទៅក្នុងអាជីវកម្មទេ ហើយ​អាជីវកម្ម​អាចបដិសេធអ្នកដោយស្របច្បាប់។ ការក្លែង​ប​ន្លំ ESA ថាជាសត្វនាំផ្លូវដែលបានបង្វឹក គឺជា​បទល្មើស​មជ្ឈិម​​ដែលមានការ​ផ្តន្ទា​ទោស​ជាប់​ពន្ធនា​គារ​រហូតដល់ប្រាំមួយខែ និង/ឬពិន័យជាប្រាក់រហូតដល់ $1000។ (ក្រម​ព្រហ្មទណ្ឌ​ ផ្នែក​ 365.7(a))។

II. តើអ្នកផ្ដល់សេវាលំនៅដ្ឋានអាចតម្រូវឱ្យខ្ញុំបង្ហាញថាខ្ញុំមាន​សត្វជំនួយ និង​បញ្ជាក់​ថា​សត្វ​របស់​ខ្ញុំ​គឺជាសត្វជំនួយ​ដែរឬ​ទេ​?

A. Service Animals

1. ប្រសិនបើអ្នកមានសត្វនាំផ្លូវ (សត្វសុនខ ឬសត្វសេះតូចៗ) នោះនឹងមានដែនកំណត់ផ្លូវច្បាប់បន្ថែមទៀតទៅលើអ្វីដែលអ្នកផ្ដល់សេវាលំនៅដ្ឋានអាចសាកសួរបាន។ ប្រសិនបើអ្នកកំពុងស្នើសុំជួល ជាទូទៅអ្នកមិនចាំបាច់បង្ហាញថាអ្នកមានសត្វនាំផ្លូវនោះទេ។ ទោះជាយ៉ាងណាក៏ដោយ អាស្រ័យលើអ្វីដែលទម្រង់ពាក្យសុំសាកសួរអំពីសត្វ អ្នកគួរតែស្វែងរកដំបូន្មានផ្នែកច្បាប់អំពីស្ថានភាពជាក់លាក់របស់អ្នក។ តាមច្បាប់ ប្រសិនបើអ្នកបង្ហាញប្រាប់អំពីសត្វ ឬប្រសិនបើអ្នកផ្តល់សេវាលំនៅដ្ឋានដឹងរួចហើយថាអ្នកមានសត្វ 
   1. តើសត្វនេះតម្រូវឱ្យមានដោយសារតែពិការភាពរបស់អ្នកដែរឬទេ?
   2. តើការងារឬកិច្ចការអ្វីខ្លះដែលគេបង្វឹកសត្វនោះឱ្យធ្វើ?
2. អ្នកផ្តល់សេវាលំនៅដ្ឋានរបស់អ្នក មិនអាចតម្រូវឱ្យអ្នកផ្តល់ភស្តុតាងបញ្ជាក់ការបណ្តុះបណ្តាល ឬវិញ្ញាបនបត្រនោះទេ ប៉ុន្តែសត្វនាំផ្លូវត្រូវតែស្ថិតនៅក្រោមការគ្រប់គ្រងរបស់អ្នកកាន់កាប់របស់វា។ 
   ឧទាហរណ៍៖ “ក្រោមការគ្រប់គ្រង” មានន័យថាអ្នកត្រូវតែឱ្យគេពាក់បង្ហៀ ខ្សែ ឬចងសត្វនាំផ្លូវនោះ ខណៈពេលស្ថិតនៅទីកន្លែងសាធារណៈ លើកលែងតែសត្វនោះត្រូវបានពន្លែងនៅពេលជាក់លាក់ណាមួយដើម្បីបំពេញកិច្ចការអ្វីមួយ។ ទោះជាយ៉ាងនេះក្ដី ត្រូវតែចងវាសារជាថ្មីនៅពេលដែលកិច្ចការត្រូវបានបញ្ចប់។ ម្ចាស់ត្រូវតែប្រើប្រាស់សញ្ញានានាដើម្បីណែនាំសត្វនាំផ្លូវ យ៉ាងមានប្រសិទ្ធភាព ហើយសត្វនាំផ្លូវគួរតែមានអាកប្បកិរិយាល្អ។ ម្ចាស់គួរតែធានាថា សត្វនាំផ្លូវមិនព្រុសម្ដងហើយម្ដងទៀត ឬដើរដោយគ្មានម្ចាស់នោះទេ។ 
3. អ្នកផ្ដល់សេវាលំនៅដ្ឋាន អាចធ្វើឱ្យប្រាកដថាមនុស្សដែលមានសត្វនាំផ្លូវប្រាប់ការពិតតាមរយៈឯកសារដែលបានចុះហត្ថលេខា ដូចជាកិច្ចសន្យាជួលជាដើម។ ក្រៅពីលទ្ធភាពអាចបណ្ដេញចេញ ការក្លែងបន្លំសត្វថាជាសត្វនាំផ្លូវដែលបានបង្វឹក គឺជាបទល្មើសមជ្ឈិមដែលមានការផ្តន្ទាទោសជាប់ពន្ធនាគាររហូតដល់ប្រាំមួយខែ និង/ឬពិន័យជាប្រាក់រហូតដល់ $1000។ (ក្រមព្រហ្មទណ្ឌ ផ្នែក 365.7(a))។

B. សត្វគាំពារផ្លូវអារម្មណ៍ (ESA) 

1. ប្រសិនបើអ្នកមានសត្វគាំពារផ្លូវអារម្មណ៍ (ESA) អ្នកផ្ដល់សេវាលំនៅដ្ឋានរបស់អ្នកអាចតម្រូវឱ្យមានឯកសារដែលបញ្ជាក់ថាអ្នកមានពិការភាព ហើយអ្នកមានតម្រូវការពាក់ព័ន្ធនឹងពិការភាពសម្រាប់ ESA។ អ្នកផ្ដល់សេវាលំនៅដ្ឋាន ក៏អាចស្នើសុំឱ្យអ្នកផ្តល់ការផ្ទៀងផ្ទាត់ផ្នែកវេជ្ជសាស្រ្តទៅលើតម្រូវការរបស់អ្នកសម្រាប់ ESA ពីអ្នកជំនាញផ្នែកវេជ្ជសាស្រ្ត ប៉ុន្តែអ្នកផ្តល់លំនៅដ្ឋានរបស់អ្នកមិនអាចទាមទារព័ត៌មានលម្អិតអំពីការធ្វើរោគវិនិច្ឆ័យរបស់អ្នកបានទេ។ សូមមើលនៅខាងចុងបញ្ចប់នៃឯកសារនេះ សម្រាប់លិខិតគម្រូសម្រាប់ការស្នើរក្សាទុក ESA នៅក្នុងផ្ទះរបស់អ្នក។

សម្រាប់ព័ត៌មានបន្ថែមពី HUD និង CRD ចូលទៅ៖ https://www.hud.gov/sites/dfiles/PA/documents/HUDAsstAnimalNC1-28-2020.pdf

https://calcivilrights.ca.gov/wp-content/uploads/sites/32/2022/12/Emotional-Support-Animals-and-Fair-Housing-Law-FAQ_ENG.pdf

III. តើអ្នកផ្ដល់សេវាលំនៅដ្ឋានរបស់ខ្ញុំអាចគិតថ្លៃសម្រាប់សត្វជំនួយរបស់ខ្ញុំដែរឬទេ?

ទេ អ្នកផ្តល់សេវាលំនៅដ្ឋានរបស់អ្នកមិនអាចគិតថ្លៃឈ្នួលលើសត្វចិញ្ចឹម ឬប្រាក់តម្កល់ធានាសម្រាប់សត្វចិញ្ចឹមបានទេ ដោយសារតែសត្វជំនួយ (ទាំងសត្វនាំផ្លូវ និង ESA) មិនត្រូវបានចាត់ទុកថាជាសត្វចិញ្ចឹមទេ។ ទោះជាយ៉ាងនេះក្ដី អ្នកអាចនឹងត្រូវបង់ប្រាក់សម្រាប់ការខូចខាតដែលបង្កដោយសត្វជំនួយ។

IV. តើអ្នកផ្តល់លំនៅដ្ឋានរបស់ខ្ញុំអាចតម្រូវឱ្យខ្ញុំគោរពតាមច្បាប់របស់រដ្ឋ/រដ្ឋាភិបាលមូលដ្ឋានដែលអនុវត្តចំពោះសត្វទាំងអស់បានដែរឬទេ?

បាទ/ចាស អ្នកផ្ដល់សេវាលំនៅដ្ឋានរបស់អ្នកអាចតម្រូវឱ្យអ្នកយកសត្វជំនួយរបស់អ្នកទៅធ្វើអាជ្ញាប័ណ្ណ ឬទទួលថ្នាំបង្ការ យោងទៅតាមច្បាប់របស់រដ្ឋ/រដ្ឋាភិបាលមូលដ្ឋាន ដែលអនុវត្តចំពោះសត្វទាំងអស់ដែលមាននៅក្នុងតំបន់ដែលអ្នករស់នៅ។

V. តើអ្នកផ្តល់សេវាលំនៅដ្ឋានរបស់ខ្ញុំអាចផ្តល់ការរឹតបន្តឹងផ្សេងទៀតសម្រាប់សត្វជំនួយរបស់ខ្ញុំបានទេ?

គោលការណ៍ "គ្មានសត្វចិញ្ចឹម" មិនអនុវត្តចំពោះសត្វជំនួយទេ។

ជាទូទៅ អ្នកផ្តល់សេវាលំនៅដ្ឋានរបស់អ្នកមិនអាចប្រើការរឹតបន្តឹងទៅលើទម្ងន់និងពូជប្រឆាំងទៅនឹងសត្វជំនួយរបស់អ្នកបាននោះទេ។ ប៉ុន្តែ ពេលខ្លះអ្នកផ្ដល់សេវាលំនៅដ្ឋានអាចស្វែងរកមធ្យោបាយផ្លូវច្បាប់ផ្សេងៗទៀតដើម្បីរឹតបន្តឹងសត្វសុនខ ដោយផ្អែកលើពូជរបស់វា។  ជាការល្អត្រូវស្វែងរកដំបូន្មានផ្នែកច្បាប់អំពីស្ថានភាពជាក់លាក់របស់អ្នក។

VI. តើសិទ្ធិរបស់ខ្ញុំមានអ្វីខ្លះ ប្រសិនបើខ្ញុំរស់នៅក្នុងទីជម្រក?

អ្នកគួរតែត្រូវបានអនុញ្ញាតឱ្យរក្សាទុកសត្វនាំផ្លូវ និង ESA ខណៈពេលដែលអ្នកស្នាក់នៅក្នុងទីជម្រក។

ប្រសិនបើអ្នកមាន ESA អ្នកនឹងត្រូវស្នើសុំជំនួយសមស្រប ដើម្បីរក្សា ESA ទុកនៅជាមួយអ្នក។ ទោះជាយ៉ាងនេះក្ដី ESA អាចនឹងមិនត្រូវបានអនុញ្ញាតនៅទីកន្លែងសាធារណៈនៅក្នុងទីជម្រកនោះទេ។

សត្វនាំផ្លូវអាចត្រូវបានអនុញ្ញាតឱ្យស្ថិតនៅទីកន្លែងទទួលទានអាហាររួម និងកន្លែងផ្សេងទៀតដែលអ្នកត្រូវបានអនុញ្ញាត។

VII. តើអ្វីជាជំនួយសមស្រប ហើយតើខ្ញុំត្រូវការជំនួយសមស្របសម្រាប់សត្វជំនួយរបស់ខ្ញុំដែរឬទេ?

ជំនួយសមស្របគឺជាការលើកលែង ឬការផ្លាស់ប្តូរចំពោះច្បាប់ គោលការណ៍ ឬការអនុវត្តរបស់អ្នកផ្ដល់សេវាលំនៅដ្ឋាន។

សម្រាប់សត្វនាំផ្លូវ អ្នកមិនចាំបាច់ស្នើសុំជំនួយសមស្របនៅក្នុងការរក្សាទុកសត្វនាំផ្លូវរបស់អ្នកនៅក្នុងផ្ទះជាមួយអ្នកនោះទេ បើទោះជាអ្នកផ្ដល់សេវាលំនៅដ្ឋានមានគោលការណ៍គ្មានសត្វចិញ្ចឹម ឬច្បាប់ផ្សេងៗដែលស្រដៀងហ្នឹងក៏ដោយ។

សម្រាប់ ESA អ្នកអាចនឹងត្រូវស្នើជំនួយសមស្រប ប្រសិនបើអ្នកផ្ដល់សេវាលំនៅដ្ឋានមានច្បាប់ គោលការណ៍ ឬការអនុវត្តដែលអាចនឹងរារាំងអ្នកមិនឱ្យមានសត្វចិញ្ចឹម។

ទោះបីជាការស្នើសុំស្នាក់នៅសមស្របមិនចាំបាច់សរសេរជាលាយលក្ខណ៍អក្សរក៏ដោយ ការផ្ញើសំណើជាលាយលក្ខណ៍អក្សរ (និងរក្សាច្បាប់ចម្លងសម្រាប់កំណត់ត្រារបស់អ្នក) នឹងជួយការពារអ្នក។ សូមមើលនៅខាងចុងបញ្ចប់នៃឯកសារនេះ សម្រាប់លិខិតគម្រូសម្រាប់ការស្នើរក្សាទុក ESA នៅក្នុងផ្ទះរបស់អ្នក។

អ្នកផ្តល់សេវាលំនៅដ្ឋាន គួរតែឆ្លើយតបភ្លាមៗចំពោះសំណើរបស់អ្នក។ ការខកខានរបស់អ្នកផ្តល់សេវាលំនៅដ្ឋានក្នុងការឆ្លើយតបក្នុងរយៈពេលសមស្រប អាចចាត់ទុកថាជាការបដិសេធចំពោះការស្នាក់នៅសមរម្យ និងការរើសអើងដោយផ្អែកលើពិការភាព។

សូមមើលព័ត៌មានបន្ថែមពី HUD នៅទីនេះ៖ https://www.hud.gov/sites/dfiles/PA/documents/HUDAsstAnimalNC1-28-2020.pdf

VIII. តើអ្នកផ្ដល់សេវាលំនៅដ្ឋានអាចបដិសេធសំណើរបស់អ្នកសម្រាប់សត្វជំនួយដើម្បីនៅជាមួយអ្នកក្នុងលំនៅដ្ឋានរបស់អ្នកបានដែរឬទេ?

ក្នុងកាលៈទេសៈកំណត់មួយចំនួន អ្នកផ្តល់សេវាលំនៅដ្ឋានអាចបដិសេធស្របតាមច្បាប់ចំពោះសំណើរបស់អ្នកក្នុងការរក្សាទុកសត្វជំនួយ ប្រសិនបើសត្វនោះ៖

1. មិនមែនជាតម្រូវការចាំបាច់ព្រោះតែពិការភាពបស់អ្នក ឬពិការភាពសមាជិកគ្រួសាររបស់អ្នក
2. បង្កគ្រោះថ្នាក់ដោយផ្ទាល់ដល់អ្នកដទៃ ឬទ្រព្យសម្បត្តិផ្សេងៗ
3. មិនស្ថិតនៅក្រោមការថែទាំរបស់ម្ចាស់សត្វ ឬមិនត្រូវបានបង្វឹកឱ្យនោមឬជុះនៅក្រៅផ្ទះ
4. ចំណាយប្រាក់ច្រើនពេក ឬជាបន្ទុកធ្ងន់ធ្ងរផ្នែករដ្ឋបាល ឬ
5. ផ្លាស់ប្តូរយ៉ាងខ្លាំងនូវលក្ខណៈនៃសេវាកម្មដែលអ្នកផ្តល់សេវាលំនៅដ្ឋាន ឬសមាគមម្ចាស់ផ្ទះផ្តល់ឱ្យ។
   ឧទាហរណ៍៖ អ្នកមានទំនួលខុសត្រូវចំពោះការផ្តល់អាហារ ការបណ្តើរ ឬការសម្អាតពីក្រោយសត្វជំនួយរបស់អ្នក។ ការស្នើសុំអ្នកផ្តល់សេវាលំនៅដ្ឋានឱ្យដាក់ចំណី បណ្ដើរ ឬសម្អាតពីក្រោយសត្វជំនួយ អាចត្រូវបានចាត់ទុកថាជាការផ្លាស់ប្តូរដ៏សំខាន់ ("ការផ្លាស់ប្តូរជាមូលដ្ឋាន") នៅក្នុងសេវាកម្មដែលអ្នកផ្តល់សេវាលំនៅដ្ឋានអាចផ្តល់ជូន។

IX. តើមានកម្មវិធីដែលជួយខ្ញុំខាងផ្នែកហិរញ្ញវត្ថុនៅក្នុងការថែរក្សាសត្វជំនួយដែរឬទេ?

មានតែសម្រាប់សត្វនាំផ្លូវតែប៉ុណ្ណោះ មិនមានសម្រាប់ ESA នោះទេ។

ប្រសិនបើអ្នកត្រូវការជំនួយក្នុងការបង់ថ្លៃដែលទាក់ទងនឹងសុនខនាំផ្លូវរបស់អ្នក រដ្ឋកាលីហ្វ័រ​ញ៉ា​​មាន​កម្មវិធី​ដែលផ្តល់ប្រាក់ចំនួន 50 ដុល្លារក្នុងមួយខែ ដើម្បីឧបត្ថម្ភលើការ​ចំណាយទាំង​នេះ​។ ព័ត៌មានបន្ថែមអំពីកម្មវិធីនេះអាចរកបានតាមរយៈ https://www.cdss.ca.gov/assistance-dogs.

X. តើជម្រើសរបស់ខ្ញុំមានអ្វីខ្លះ ប្រសិនបើខ្ញុំជឿថាអ្នកផ្តល់សេវាលំនៅដ្ឋានកំពុងរើសអើងខ្ញុំដោយសារតែការមានសត្វជំនួយ?

1. ដាក់ពាក្យបណ្តឹងអំពីការរើសអើងលំនៅដ្ឋានប្រឆាំងនឹងអ្នកផ្តល់សេវាលំនៅដ្ឋានទៅកាន់​​ក្រសួង​​សិទ្ធិពលរដ្ឋរដ្ឋកាលីហ្វ័រញ៉ា។ សម្រាប់ព័ត៌មានបន្ថែមអំពីដំណើរការនេះ អាចរក​បានតាមរយៈ https://calcivilrights.ca.gov/complaintprocess/
2. ដាក់ពាក្យបណ្តឹងអំពីការរើសអើងលំនៅដ្ឋានប្រឆាំងនឹងអ្នកផ្តល់សេវាលំនៅដ្ឋានទៅកាន់
   ការិយាល័យលំនៅដ្ឋានដោយយុត្តិធម៌និងឱកាសស្មើភាពគ្នា នៃក្រសួងអភិវឌ្ឍលំនៅដ្ឋាននិងទីក្រុង សហរដ្ឋអាមេរិក។ ព័ត៌មានបន្ថែមអំពីដំណើរការនេះមាននៅ  https://www.hud.gov/program_offices/fair_housing_equal_opp/online-complaint
3. ដាក់ពាក្យបណ្តឹងនៅតុលាការរដ្ឋឬសហព័ន្ធប្រឆាំងនឹងអ្នកផ្តល់សេវាលំនៅដ្ឋាន។

XI. ច្បាប់ដែលអនុវត្តចំពោះសត្វជំនួយទាំងអស់

សម្រាប់ព័ត៌មានស៊ីជម្រៅបន្ថែមទៀត ទាំងនេះ​គឺជាច្បាប់មួយ​ចំនួនដែលធនធាន​នេះត្រូវ​បាន​ផ្អែក​ទៅ​លើ។

1. ច្បាប់​សហព័ន្ធ​អា​មេរិក​ស្តី​ពី​ពិ​ការ​ភាព (ADA) មាត្រា II និង មាត្រា III https://www.ada.gov/law-and-regs/ada/
2. ច្បាប់​វិសោធនកម្មស្ដីពីលំនៅដ្ឋានស្មើភាពគ្នា និងច្បាប់សហព័ន្ធផ្នែកទី 504 នៃច្បាប់​ស្តារ​នីតិសម្បទា https://www.hud.gov/program_offices/fair_housing_equal_opp/fair_housing_and_related_law
3. ច្បាប់ស្ដីពីបុគ្គលដែលមានពិការភាពរបស់រដ្ឋកាលីហ្វ័រញ៉ា និងច្បាប់ស្ដីពីលំនៅដ្ឋាន​និង​ការងារស្មើភាព​គ្នា​របស់រដ្ឋកាលីហ្វ័រញ៉ា https://calcivilrights.ca.gov/legalrecords/?content=law#law

XII. គំរូលិខិតសំណើសុំជំនួយសមស្របសម្រាប់សត្វគាំពារផ្លូវអារម្មណ៍៖ ជូនចំពោះ

[ឈ្មោះម្ចាស់ដី និង/ឬអ្នកគ្រប់គ្រងទ្រព្យសម្បត្តិ]

ខ្ញុំរស់នៅ/កំពុងដាក់ពាក្យស្នើសុំជួលទ្រព្យរបស់អ្នកនៅ [អាសយដ្ឋាន]។ ខ្ញុំបាទ/នាងខ្ញុំសរសេរលិខិតនេះដើម្បីស្នើសុំដំណោះស្រាយ/ការកែប្រែសមស្របណាមួយសម្រាប់បញ្ហាពិការភាពរបស់ខ្ញុំ។ ខ្ញុំត្រូវមានសត្វគាំពារផ្លូវអារម្មណ៍រស់នៅជាមួយខ្ញុំ។                                                                                                                  

សំណើនេះពាក់ព័ន្ធនឹងពិការភាពរបស់ខ្ញុំព្រោះ៖

________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________

[គ្រូពេទ្យ/វិកលចរិត/ចិត្តសាស្ត្រ/អ្នកព្យាបាល/បុគ្គលិកសង្គម/អ្នកព្យាបាលការងារ/បុគ្គលផ្សេងទៀត] របស់ខ្ញុំបានចាត់ទុកថា ដំណោះស្រាយ/ការកែប្រែទាំងនេះចាំបាច់ដោយសារតែពិការភាពរបស់ខ្ញុំ។ ខ្ញុំអាចផ្តល់ការផ្ទៀងផ្ទាត់នេះ ប្រសិនបើអ្នកត្រូវការវា។

ច្បាប់សហព័ន្ធនិងច្បាប់រដ្ឋ តម្រូវឱ្យអ្នកផ្តល់សេវាលំនៅដ្ឋានផ្ដល់ជំនួយគាំទ្រសមស្របជូនអ្នកជួល/អ្នកស្នាក់នៅ និងអ្នកដាក់ពាក្យសុំដែលមានពិការភាព។

សូមមេត្តាឆ្លើយតបចំពោះសំណើនេះឱ្យបានត្រឹមថ្ងៃ [កាលបរិច្ឆេទ]។ សូមយល់ថាការមិនឆ្លើយតបទៅនឹងការស្នាក់នៅសមស្រប ការពន្យារពេលក្នុងការឆ្លើយតបមិនសមស្រប ឬការបដិសេធដោយខុសច្បាប់នូវសំណើសុំដំណោះស្រាយសមស្រប បង្កើតជាការរើសអើងពិការភាព។ សូមមើល 2 CCR §12177(e)។ សូមទាក់ទងមកខ្ញុំតាម [អាសយដ្ឋានអ៊ីមែលរបស់អ្នក]។ សូមអរគុណចំពោះការយកចិត្តទុកដាក់របស់អ្នកចំពោះសំណើនេះ។

 

ដោយសេចក្តីគោរពរាប់អាន
[ឈ្មោះរបស់អ្នក]
[អាសយដ្ឋានរបស់អ្នក]