ការបោះពុម្ពផ្សាយនេះគ្របដណ្ដប់សិទ្ធិស្របច្បាប់របស់អ្នកទាក់ទងនឹងឯកជនភាព (“ការ​សម្ងា​ត់”) នៃកំណត់ត្រា និងព័ត៌មានសុខភាពផ្លូវចិត្តរបស់​អ្នក​ក្រោម​ច្បាប់​រដ្ឋ។ ឯកសារនេះពិ​ភាក្សា​អំពីស្ថានភាពនានាដែលព័ត៌មាន និង​កំណត់ត្រា​សុខ​ភាព​ផ្លូវចិត្តរបស់អ្នកអាចនឹង​ត្រូវបាន​ចែករំលែក (ឬ “បញ្ចេញ”) ដោយមាន និងគ្មានការអនុញ្ញាតពីអ្នក។

ឯកជនភាពនៃកំណត់ត្រា និងព័ត៌មានសុខភាពគឺជាផ្នែកមួយដែលស្មុគ​ស្មាញ​​នៃ​ប្រធានបទ​ច្បាប់ ទាំងច្បាប់និងបទប្បញ្ញត្តិរដ្ឋ និងសហព័ន្ធ។ ការបោះពុម្ពផ្សាយ​នេះ​ផ្ដល់តែព័ត៌មាន​ផ្លូវ
ច្បា​​ប់​មូលដ្ឋានដែលផ្ដោតលើច្បាប់រដ្ឋប៉ុណ្ណោះ ប៉ុន្តែមិន​គ្រប​ដណ្ដប់បញ្ហាទាំងអស់ស្ដីពី​ការសម្ងាត់​ទេ។ សូមទាក់ទង DRC ឬមេធាវីសម្រាប់​ព័ត៌មាន​អំពីស្ថានភាព ឬសំណួរជាក់​លាក់​របស់អ្នក។

A. តើការរក្សាកំណត់ត្រា/ព័ត៌មានជាសម្ងាត់​មានន័យដូច​ម្ដេច​?

បើសិនជាអ្នកទទួលសេវាកម្មសុខភាពផ្លូវចិត្ត (ឧទាហរណ៍ អ្នកទទួលការព្យា​​បា​ល​ដោយ​មិនស្ម័គ្រ​ចិត្ត ឬស្ម័គ្រចិត្តនៅក្នុងមន្ទីរពេទ្យរដ្ឋ មជ្ឈមណ្ឌលអភិ​វឌ្ឍន៍​របស់រដ្ឋ មន្ទីរពេទ្យរោគ​ចិត្តខោនធី គ្រឹះស្ថានឯកជន ឬកម្មវិធីសុខភាព​ផ្លូវ​​ចិ​ត្តសហគមន៍) ព័ត៌មានទាំងអស់អំពី​សេវាកម្មដែល​អ្នកទទួលគឺមាន​លក្ខណៈ​ឯ​ក​ជន ហើយគេមិនអាចចែករំលែកដោយ​គ្មានការអនុញ្ញាត​ពីអ្នក​បានឡើយ។ នេះ​មាន​ន័យថា ជាទូទៅគ្មាន​អ្នកណាម្នាក់អាច​ចែក​រំលែកព័ត៌មានអំពីសេវាកម្ម ឬ​​ការ​ព្យាបាលសុខភាពផ្លូវចិត្តរបស់អ្នកដោយ​គ្មាន​ការ​អនុ​ញ្ញាត​ពី​អ្នកឡើយ​។1 ទោះ​​យ៉ាងនេះក្ដី មាន​ស្ថានភាពមួយ​ចំនួ​នដែលគេអាចនឹងចែករំលែក​ព័ត៌​មាន​​របស់​អ្នកដោយគ្មានការ​អនុញ្ញាត​ពីអ្នក។ ស្ថានភាពទាំងនោះមាននៅក្នុង​ផ្នែក C ខាង​ក្រោម។

B. តើកំណត់ត្រា/ព័ត៌មានសុខភាពផ្លូវចិត្តអ្វីខ្លះដែលគេអាច​នឹង​ប​ញ្ចេ​ញ​បាន​ដោយមានការអនុញ្ញាតពីខ្ញុំ?

1. ការបញ្ចេញព័ត៌មានទៅបុគ្គលដែលត្រូវបានចាត់តាំង៖ អ្នកមានសិទ្ធិ​ជ្រើស​រើស (ឬ “ចាត់​តាំង”) បុគ្គលម្នាក់​ដែលគេអាចចែករំលែកព័ត៌មានរបស់​អ្នក​ជាមួយ។2 អ្នកជំនាញដែល​ទទួលបន្ទុក​ថែទាំអ្នកត្រូវតែយល់ព្រមលើការចាត់តាំងនេះ។3 ទោះយ៉ាងនេះក្ដី ទោះបី​ជាមាន​ការអនុ​ញ្ញាត​ពីអ្នកក៏ដោយ ក៏​ព័ត៌មានដែលគ្រួសាររបស់អ្នកបានចែករំលែក​ជា​លក្ខ​ណៈ​ឯកជនជាមួយ​អ្នក​​ជំនាញមួយចំនួន រួមទាំងអ្នកផ្ដល់សេវាថែទាំសុខភាព មេធាវី អាចនឹង​មិនត្រូវបានបញ្ចេញទេ។
2. ការបញ្ចេញព័ត៌មានទៅគ្រួសាររបស់អ្នក៖ អ្នកត្រូវតែផ្ដល់ការអនុញ្ញាតសិន មុននឹងទាម​ទារ​​​ឱ្យមន្ទីរព្យាបាលលាតត្រដាងព័ត៌មានទៅកាន់​គ្រួសារ​របស់​អ្នក​នូវរោគ​វិនិច្ឆ័យ ការ​ប៉ាន់ស្មានជំងឺ ថ្នាំដែលបានចេញវេជ្ជបញ្ជា និងវឌ្ឍន​ភាពរបស់​អ្នក។​4 វិធានផ្សេង​ទៀត​នឹងអនុវត្តបើសិនជាអ្នក​មិនអាចផ្ដល់​ការ​អនុញ្ញាត ឬស្នើសុំ​មិនឱ្យចែករំលែកព័ត៌មា​ន​នេះ​។5
3. ការបញ្ចេញព័ត៌មានទៅអ្នកជំនាញដែលមានគុណវុឌ្ឍិផ្សេងទៀត៖ អ្នក (អ្នក​រក្សាការពារ​របស់​អ្នក) ត្រូវតែផ្ដល់ការ​អនុ​ញ្ញាត​ជាមុនសិន មុននឹង​អ្នក​ជំនាញ​ដែលព្យាបាលអ្នក​នៅ​ក្នុងមន្ទីរព្យាបាល​មួយអាចផ្ដល់ព័ត៌មានរបស់​អ្នកទៅអ្នកជំនាញផ្សេងទៀតដែល​មិន​ធ្វើ​ការនៅមន្ទីរព្យាបាលនោះ និង​មិនទទួលខុសត្រូវលើការថែទាំ​អ្នក។6
4. ការបញ្ចេញព័ត៌មានទៅអ្នកគាំពារសិទ្ធិអ្នកជំងឺរបស់ខោនធី៖ អ្នក ឬអាណា​ព្យា​បាលរបស់​អ្នកដែលតុលាការតែង​តាំង​ត្រូវតែផ្ដល់ការអនុញ្ញាតជាមុន​សិន មុន​នឹងតម្រូវឱ្យចែក​រំលែក​ព័ត៌មាន​របស់អ្នកទៅអ្នកគាំពារ​សិទ្ធិអ្នក​ជំងឺរបស់ខោនធីដែលជួយអ្នក។7 អ្នក​អាច​លុបចោលការអនុញ្ញាតរបស់អ្នកពេលណាក៏បាន។
5. ការបញ្ចេញព័ត៌មានទៅមេធាវី៖ អ្នកត្រូវតែផ្ដល់ការអនុញ្ញាតជាមុនសិន មុននឹងតម្រូវឱ្យ​ចែក​រំលែកព័ត៌​មានរ​ប​ស់​អ្នកជាមួយមេធាវីរបស់អ្នក។ ទោះយ៉ាងនេះក្ដី សូម្បីតែមានការ​អនុញ្ញាតពីអ្នក​ហើ​យ​ក៏ដោយ ក៏ព័ត៌មានដែលគ្រួសាររបស់អ្នកបាន​ចែករំលែកជាលក្ខណៈ​ឯក​ជន​ជាមួយអ្នកជំនាញមួយចំនួន រួមទាំងអ្នកផ្ដល់សេវាថែទាំសុខភាព និងមេធាវី អាចនឹងមិនត្រូវបានបញ្ចេញទេ។8
6. ការបញ្ចេញព័ត៌មានទៅនិយោជកដែលមានសក្ដានុពល៖ បើសិនជាអ្នកដាក់ពាក្យធ្វើការ តាម​សំណើរបស់អ្នក ព័ត៌មានរបស់អ្នក​ត្រូវតែ​បញ្ជូនទៅគ្រូពេទ្យដែលមានគុណវុឌ្ឍិ ឬគ្រូ​ពេទ្យជំងឺផ្លូវចិត្តដែលតំណាងឱ្យ​និយោ​ជក។ ទោះយ៉ាងនេះក្ដី អ្នកជំនាញដែលទទួលខុស​ត្រូវលើការថែទាំអ្នកអាចសម្រេច​ចិត្ត​ថាការបញ្ចេញព័ត៌មានរបស់​អ្នកមិនមែន​ជាឧត្តម​ប្រយោជន៍របស់​អ្នក​​ទេ​។ ក្នុងករណីនោះ អ្នកត្រូវតែអនុវត្តជំហានបន្ថែម​ដើ​ម្បីតវ៉ានឹង​ការសម្រេចចិត្តរបស់អ្នកជំនាញនោះ។9
7. ការបញ្ចេញព័ត៌មានទៅស្ថាប័នអនុវត្តច្បាប់៖ បើសិនជាអ្នកកំពុង (ឬបានកំពុង) ត្រូវ​គេ​ឃុំ​ខ្លួន​ក្រោម​ប្រភេទដីកាឃុំខ្លួនព្រហ្មទណ្ឌជាក់លាក់ណាមួយ ហើយមន្ទីរពេទ្យរដ្ឋមាន​កំណត់​ត្រារបស់អ្នក គេត្រូវតែចែករំលែកព័ត៌មានរបស់អ្នកជាមួយស្ថាប័ន​អនុ​វត្ត​ច្បាប់​ដែលស៊ើបអង្កេតបទឧក្រិដ្ឋ ប៉ុន្តែតែក្នុងករណីដែលអ្នក​អនុញ្ញាត​ប៉ុណ្ណោះ។10 សូម​កត់​សម្គាល់ថាព័ត៌មាននេះត្រូវតែចែករំលែកជាមួយស្ថាប័នអនុវត្តច្បាប់ ទោះបីជាអ្នក​មិន​អនុញ្ញាត​ក៏ដោយ បើសិនជាតុលាការចេញដីកាឱ្យធ្វើដូច្នេះ។
8. ការបញ្ចេញព័ត៌មានទៅមន្ត្រីគ្រប់គ្រងជនល្មើសនៅក្រៅឃុំ៖ បើសិនជាអ្នក​ទទួលការ​ព្យា​បាលពីមន្ទីរព្យាបាល ម​ន្ទីរព្យាបាលអាចនឹងចែករំលែកព័ត៌មានរបស់អ្នកជាមួយ​មន្ត្រី​គ្រប់គ្រងជនល្មើសនៅក្រៅឃុំដែលទទួលខុសត្រូវក្នុងការវាយតម្លៃអ្នកបន្ទាប់ពីការផ្ទន្ដាទោសព្រហ្មទណ្ឌ ប៉ុន្តែក្នុងករណីដែលអ្នកអនុញ្ញាត​ប៉ុណ្ណោះ។11 ប្រការនេះ​អនុវត្តតែ​ក្នុង​ករណី​មន្ទីរព្យាបាលដែលអ្នកទទួលសេវា រកឃើញព័ត៌មានទាក់ទងនឹងការវាយតម្លៃការ​នៅ​​ក្រៅ​ឃុំរបស់អ្នកប៉ុណ្ណោះ។ មន្ទីរព្យាបាលអាចនឹងមិនចែករំលែកព័ត៌មានដែល​គ្រួសារ​របស់​អ្នកបានចែករំលែកជាលក្ខណៈឯកជនទេ។ ព័ត៌មាននេះអាចត្រូវបានបញ្ចេញ ទាល់​តែពេលដែលអ្នកត្រូវបានកាត់ទោស​ពីបទឧក្រិដ្ឋប៉ុណ្ណោះ។ ព័ត៌មានដែលបានបញ្ចេញត្រូវ​តែរក្សាដោយឡែកពីរបាយការណ៍ការនៅក្រៅឃុំរបស់អ្នក។ ព័ត៌មានរបស់អ្នកត្រូវតែ​នៅ​ជា​សម្ងាត់ លើកលែងតែប្រើសម្រាប់គោល​បំណង​កាត់ទោស។ បន្ទាប់ពីនោះ ព័ត៌មាន​ត្រូវតែបិទជិត។
9. ការបញ្ចេញព័ត៌មានទៅក្រុមហ៊ុនធានារ៉ាប់រង៖ អ្នកត្រូវតែផ្ដល់ការអនុញ្ញាតជាមុនសិន មុន​នឹងគេ​អាច​នឹងចែករំលែកព័ត៌មានរបស់អ្នកជាមួយក្រុមហ៊ុនធានារ៉ាប់រង នៅពេល​ដែល​អ្នកដាក់ពាក្យសុំធានារ៉ាប់រងអាយុជីវិត ឬធានារ៉ាប់រងពិការ​ភាព។12
10. ការបញ្ចេញព័ត៌មានទៅទីប្រឹក្សាហ្សែន៖ អ្នកត្រូវតែផ្ដល់ការអនុញ្ញាតជាមុនសិន មុននឹង​គេ​​អាច​នឹងចែករំលែកព័ត៌មានរបស់អ្នកជាមួយអ្នកជំនាញ​ដែលកំពុងផ្ដល់​ការប្រឹក្សា​ពី​ហ្សែនដល់សាច់ញាតិរបស់អ្នក ដែលតាមសំណើសាច់ញាតិរបស់​អ្នក​។13 វិធានផ្សេងនឹង​អនុវត្ត​បើសិនជាអ្នកមិនឆ្លើយតបសំណើសុំការអនុញ្ញាតបញ្ចេញព័ត៌មានរបស់អ្នក។

C. តើកំណត់ត្រា/ព័ត៌មានសុខភាពផ្លូវចិត្តអ្វីខ្លះដែលគេអាច​នឹងប​ញ្ចេ​ញ​បាន​ដោយគ្មានការអនុញ្ញាតពីខ្ញុំ?

1. ការបញ្ចេញព័ត៌មានទៅគ្រួសារ៖ បើសិនជាអ្នកចូលមន្ទីរព្យាបាលដើម្បីទទួលសេវា​សុខ​ភាព​​ផ្លូវចិត្ត នោះមន្ទីរព្យាបាលអាចនឹងប្រាប់គ្រួសាររបស់អ្នកថា​អ្នកកំពុង​នៅ​មន្ទីរ​ព្យាបាល (លើកលែងតែច្បាប់សហព័ន្ធហាមឃាត់) បើសិនជាអ្នកមិន​អាច​បញ្ជាក់ថា​មិន​អាចចែករំលែកព័ត៌មាននេះជាមួយគ្រួសារ​បាន។14 ដូចគ្នានេះដែរ បើសិនជាគ្រួសារ​របស់​​អ្ន​ក​ស្នើ​សុំព័ត៌មាននេះ ហើយអ្នកមិនបញ្ជាក់ថាមិនអាចចែករំលែកព័ត៌មាន​នេះ​បាន មន្ទីរព្យាបាលត្រូវតែជូនដំណឹងទៅគ្រួសាររបស់អ្នកអំពីការឱ្យ​ចេញពីម​ន្ទីរ​ព្យាបាល ការ​បញ្ជូន ជំងឺធ្ងន់ធ្ងរ របួស ឬការស្លាប់របស់អ្នក។ 15
2. ការបញ្ចេញព័ត៌មានទៅបុគ្គលដែលត្រូវបានចាត់តាំង – ព័ត៌​មានអំពីផែនការថែទាំក្រោ​យ​​ចេញពីមន្ទីរព្យាបាល៖ មន្ទីរព្យាបាលអ្នកជំងឺក្នុងមួយចំនួនត្រូវតែផ្ដល់ឱ្យអ្នក និង​អ្នកតំណាងស្របច្បាប់របស់អ្នក (ឬបុគ្គលផ្សេងទៀតដែលអ្នកជ្រើស​រើ​ស​) នូវ​ព័ត៌​មាន​អំពី​ផែនការថែទាំក្រោយចេញពីមន្ទីរព្យាបាល នៅពេលដែល​គេឱ្យ​អ្នកចេញពីមន្ទីរ​ព្យាបាល ទោះបីគ្មានការអនុញ្ញាតពីអ្នក​ក៏ដោយ​។16
3. ការបញ្ចេញកំណត់ត្រាអនីតិជន/អ្នកទទួលការរក្សាការពារទៅអ្នកផ្សេងទៀត៖ គេ​ត្រូវ​តែ​ចែក​រំលែកព័ត៌មានរបស់អ្នក ទោះបីគ្មាន​ការអនុញ្ញាតពីអ្នកក៏ដោយ បើសិនជាអ្នកជា​អនីតិជន ឬអ្នកទទួលការរក្សា​ការពារ ហើយឪពុកម្ដាយ អាណាព្យាបាលស្របច្បាប់ អា​ណា​ព្យាបាលដែលតុលា​ការ​តែង​តាំងរបស់អ្នក ឬអ្នករក្សាការពារតែង​តាំងជាលាយ​លក្ខណ៍​នូវបុគ្គល​ដែលគេអាចចែករំលែកព័ត៌មានរបស់អ្នកជាមួយ។17 ទោះយ៉ាងនេះក្ដី ព័ត៌មានដែលគ្រួសាររ​ប​ស់​អ្នកបានចែករំលែកជាលក្ខណៈឯកជនជាមួយអ្នក​ជំនាញមួយ​ចំនួន រួម​ទាំង​អ្នកផ្ដល់សេវាថែទាំសុខភាព និងមេធាវី អាចនឹងមិនត្រូវបានបញ្ចេញ​ទេ។
4. ការបញ្ចេញព័ត៌មានក្នុងអំឡុងពេលនីតិវិធីរក្សាការពារ៖ ព័ត៌មានរបស់អ្នកអាចនឹង​ត្រូវ​បានចែករំលែកដោយគ្មានការអនុញ្ញាតពីអ្នកនៅក្នុងការប្រាស្រ័យទាក់ទងរវាងអ្នកជំនាញដែលមានគុណវុឌ្ឍិ ក្នុងអំឡុងពេលនីតិវិធីរក្សាការពារ។​18 ទោះយ៉ាងនេះក្ដី អ្នក​ជំនាញ​ដែលចែក​រំលែ​ក និងទទួលព័ត៌មានត្រូវតែធ្វើការនៅក្នុងមន្ទីរព្យាបាលតែមួយ ឬត្រូវ​តែ​ទទួលខុសត្រូវលើការថែទាំអ្នក។
5. ការបញ្ចេញព័ត៌មានទៅស្ថាប័នអនុវត្តច្បាប់ – គ្រោះថ្នាក់ធ្ងន់​ធ្ងរ​ដល់ជនរងគ្រោះដែល​គេ​អាច​ប្រមើលទុកមុន៖ ព័ត៌មានរបស់អ្នកអាចនឹងត្រូវបានចែករំលែកដោយគ្មាន​ការ​អនុញ្ញាតពីអ្នក បើសិនជាគ្រូព្យាបាលរបស់អ្នកជឿថាអ្នកបង្ហាញនូវគ្រោះថ្នាក់ធ្ងន់ធ្ងរ​ទាក់ទងនឹងអំពើហិង្សាទៅលើជនរងគ្រោះដែលទំនងជា (“អាចប្រមើលទុកមុនតាម​ហេតុផលសមរម្យ”)។ ព័ត៌មានរបស់អ្នកអាចនឹងត្រូវបានបញ្ចេញទៅ​ជនរងគ្រោះ​ដែល​អាចមាន ស្ថាប័នអនុវត្តច្បាប់ និងទីភ្នាក់ងារសុខុមាលភាព​កុមា​រ​របស់ខោនធី តាម​ការចាំបាច់ដើម្បីការពារជនរងគ្រោះដែលអាច​មាន។19
6. ការបញ្ចេញព័ត៌មានទៅស្ថាប័នអនុវត្តច្បាប់ – បន្ទាប់ពីការឃុំ​ខ្លួន 5150 ឬ 5250៖ ទោះបី​ជា​គ្មានការអនុញ្ញាតពីអ្នកក៏ដោយ គេត្រូវ​តែ​បញ្ចេញព័ត៌មានតិចតួច ទៅកាន់​ស្ថាប័ន​អនុវត្តច្បាប់ដែលបានដាក់អ្នក​ក្រោ​ម​ការឃុំខ្លួន 72 ម៉ោង (5150) ឬការឃុំខ្លួនព្យាបាល 14 ថ្ងៃ (5250) នៅពេល​ដែល​អ្នកត្រូវបានដោះលែងពីការឃុំខ្លួន ប៉ុន្តែក្នុងករណីតែស្ថាប័ន​អនុវត្តច្បាប់​ស្នើសុំ​សេចក្ដីជូនដំណឹងប៉ុណ្ណោះ។20
7. ការបញ្ចេញព័ត៌មានទៅស្ថាប័នអនុវត្តច្បាប់ – ដីកាឃុំខ្លួន​ក្រោ​ម​ក្រម​ព្រហ្មទណ្ឌ៖ នៅ​ក្នុង​ស្ថានភាព​មួយចំនួន ទោះបីជាគ្មានការ​អនុ​ញ្ញាតពីអ្នកក៏ដោយ គេត្រូវតែបញ្ចេញ​ព័ត៌​មាន​តិចតួចទៅកាន់ស្ថាប័ន​អនុវត្ត​ច្បាប់ បើសិនជាអ្នកនៅក្នុងមន្ទីរព្យាបាល​ក្រោម​ដីកា​ឃុំខ្លួនក្រោម​ក្រមព្រហ្ម​ទណ្ឌ និងកំពុងត្រូវបានគេចល័ត ក្រោមការស៊ើបអង្កេត​ព្រហ្មទណ្ឌ ឬ​បាន​រត់​គេចពីមន្ទីរព្យាបាល។21
8. ការបញ្ចេញព័ត៌មានទៅស្ថាប័នអនុវត្តច្បាប់ – ដីកាចាប់ខ្លួន៖ ទោះបីជាគ្មានការ​អនុញ្ញា​ត​​ពីអ្នកក៏ដោយ មន្ទីរព្យា​បាល​ត្រូវតែជូនដំណឹងដល់ស្ថាប័នអនុវត្តច្បាប់ បើសិន​ជាបច្ចុប្បន្នអ្នកកំពុង​ស្ថិត​នៅក្នុងមន្ទីរព្យាបាល នៅពេលស្ថាប័នអនុវត្តច្បាប់ផ្ដល់​ដីកា​ចាប់ខ្លួនឱ្យ​​មន្ទីរ​ព្យា​បាល​ដោយបង្ហាញថាគេកំពុងតាមចាប់ខ្លួនអ្នកដោយសារ​បទ​ឧក្រិដ្ឋ​​ធ្ងន់ធ្ងរ ឬហិង្សា។22
9. ការបញ្ចេញព័ត៌មានទៅស្ថាប័នអនុវត្តច្បាប់ – ជនរងគ្រោះនៃ​បទ​ឧក្រិដ្ឋ៖ ព័ត៌មានរបស់​អ្នកអាចនឹងត្រូវបានចែករំលែកដោយគ្មានការអនុញ្ញាតពីអ្នកទៅស្ថាប័នអនុវត្តច្បាប់ បើសិន​ជាអ្នកជាបុគ្គល​ដែ​ល​មាន "វិបត្តិសុខភាពផ្លូវចិត្ត" ឬមានពិការភាពខាង​ការអភិវឌ្ឍ ហើយ​មាន​​នរណាម្នាក់ជឿថាអ្នកជាជនរងគ្រោះនៃបទឧក្រិដ្ឋ។23
10. ការបញ្ចេញព័ត៌មានទៅស្ថាប័នអនុវត្តច្បាប់ – ឧក្រិដ្ឋកម្មប្រ​ឆាំង​នឹងមនុស្ស៖ គេត្រូវតែ​ផ្ដល់​ព័ត៌មានរបស់អ្នកទៅស្ថាប័នអនុវត្តច្បាប់ ទោះបីគ្មានការអនុ​ញ្ញា​ត​ពីអ្នកក៏ដោយ បើសិន​ជាមន្ទីរព្យាបាល ឬអ្នកផ្ដល់សេវាសុខភាពជឿថា​អ្នកបានប្រព្រឹត្ត ឬជាជនរង​គ្រោះ​នៃបទឧក្រិដ្ឋមួយចំនួននៅពេល​សម្រាក​ពេទ្យ។ ការបញ្ចេញព័ត៌មាន​ត្រូវតែមាន​កម្រិត​ត្រឹមអង្គហេតុនៃបទឧក្រិដ្ឋដែលគេចោទប្រកាន់ប៉ុណ្ណោះ។24
11. ការបញ្ចេញព័ត៌មានទៅស្ថាប័នអនុវត្តច្បាប់ – ការការពារ​មន្ត្រី​រដ្ឋធម្មនុញ្ញជាប់ឆ្នោត៖ គេ​ត្រូវ​តែផ្ដល់ព័ត៌មានរបស់អ្នកទៅស្ថាប័នអនុវត្តច្បាប់ ទោះបីគ្មានការ​អនុញ្ញាតពីអ្នកក៏​ដោយ នៅពេលដែលគេត្រូវការដើម្បី​ការពារមន្ត្រីរដ្ឋធម្មនុញ្ញជាប់ឆ្នោតរបស់រដ្ឋ ឬសហ​ព័ន្ធ និងក្រុមគ្រួសារ​របស់​ពួកគេ។25
12. ការបញ្ចេញព័ត៌មានទៅអាជ្ញាធរយុវជន និងទីភ្នាក់ងារកែប្រែ​មនុ​ស្ស​ពេញវ័យ៖ តាមការ​ចាំបាច់​សម្រាប់រដ្ឋបាលយុត្តិធម៌ គេត្រូវតែ​ផ្ដល់​ព័ត៌មានរបស់អ្នកទៅអាជ្ញាធរយុវជន និង​ទីភ្នាក់ងារ​កែប្រែមនុស្ស​ពេញ​វ័យ ទោះបីជាគ្មានការអនុញ្ញាតពីអ្នកក៏​ដោយ។26
13. ការបញ្ចេញព័ត៌មានទាក់ទងនឹងការរំលោភបំពាន៖ គេអាចចែករំលែកព័ត៌មាន​របស់​អ្នក​ដោយគ្មានការយល់ព្រមពីអ្នក ដើម្បីបង្ការ ស៊ើបអង្កេត ឬដោះស្រាយ​បញ្ហារំលោភ​បំពាន​លើ​កុមារ មនុស្សចាស់ និងមនុស្សក្នុងបន្ទុក​។27 វិបត្តិសុខភាពទាក់ទងនឹង​ការភ្លេច​ភ្លាំងស្មារតីក៏​គេអាចនឹងបញ្ចេញព័ត៌មានដែរ។28គេអាចនឹង​បញ្ចេញតែព័ត៌​មានដែលពាក់ព័ន្ធ​ប៉ុណ្ណោះ។29
14. ការបញ្ចេញព័ត៌មានទៅក្រុមការងារត្រួតពិនិត្យការស្លាប់ដោយអំពើហិង្សាក្នុងគ្រួសារ ឬការស្លាប់របស់កុមារ ឬមនុស្សចាស់៖ គេអាចនឹងចែករំលែកព័ត៌មានរបស់​អ្នក​ដោយ​គ្មានការអនុញ្ញាតពីអ្នក ជាមួយនឹងក្រុមការងារត្រួតពិនិត្យការស្លាប់ដោយ​អំពើ​ហិង្សា​ក្នុង​គ្រួសារ30ក្រុមការងារត្រួតពិនិត្យការស្លាប់របស់កុមារ31ឬក្រុម​ការងារត្រួត​ពិនិត្យ​ការស្លាប់របស់មនុស្ស​ចាស់។32
15. ការបញ្ចេញព័ត៌មានទៅតុលាការ៖ គេត្រូវតែចែករំលែកព័ត៌មានជាមួយតុលាការ តាម​ការ​ចាំបាច់សម្រាប់រដ្ឋបាលយុត្តិធម៌ ទោះបីគ្មានការអនុញ្ញាតពីអ្នកក៏​ដោយ​។33
16. ការបញ្ចេញព័ត៌មានទៅអង្គភាពទាក់ទងនឹងការបដិសេធសិទ្ធិ៖ ទោះបីគ្មានការ​អនុញ្ញាត​ពី​អ្នកក៏ដោយ ព័ត៌មាន​អំ​ពី​ការបដិសេធសិទ្ធិរបស់អ្នក (ប៉ុន្តែមិនមែនអត្តសញ្ញាណ​របស់​អ្នក) គេត្រូវតែ​បញ្ចេញទៅកាន់អ្នករក្សាការពារ ឬអាណាព្យាបាលរបស់អ្នក នាយក​សុខ​ភាព​​ផ្លូវចិត្ត​ក្នុងមូលដ្ឋាន អង្គនីតិបញ្ញត្តិរបស់រដ្ឋ ការិយាល័យសិទ្ធិអ្នកជំងឺរបស់រដ្ឋ​កាលីហ្វ័រ​ញ៉ា ឬអ្នកគាំពារសិទ្ធិអ្នកជំងឺរបស់ខោនធី បើសិនជាគេស្នើសុំ។34
17. ការបញ្ចេញព័ត៌មានទៅទីភ្នាក់ងារសិទ្ធិជនមានពិការភាពរដ្ឋកាលីហ្វ័រញ៉ា៖ នៅក្នុងស្ថាន​ភាព​មួយចំនួនទោះបីគ្មានការអនុញ្ញាតពីអ្នកក៏ដោយ គេត្រូវតែបញ្ចេញព័ត៌មាន​របស់​អ្នក​ទៅទីភ្នាក់ងារសិទ្ធិជន​មា​ន​ពិការភាពរដ្ឋកាលីហ្វ័រញ៉ាសម្រាប់ការការពារ និងការ​គាំពារ​សិទ្ធិបុគ្គល​ដែល​មានពិការភាព។35
18. ការបញ្ចេញព័ត៌មានទៅបុគ្គលិកផ្ដល់អាជ្ញាបណ្ណ – អធិការ​កិ​ច្ច និងការផ្ដល់អាជ្ញាបណ្ណ​នៃ​មន្ទីរ​ព្យាបាល៖ គេអាចនឹងបញ្ចេញព័ត៌មានរបស់អ្នក ទោះបីគ្មានការអនុញ្ញាតពីអ្នក​ក៏​ដោយ ទៅក្រសួងសុខភាពសាធារណៈ ឬក្រសួងសេវាសង្គម ដើម្បីធានាថាមន្ទីរព្យា​បា​ល​អនុវត្តតាមច្បាប់តម្រូវ។ គេអាចប្រើព័ត៌មាននៅក្នុងសវនាការ និងនីតិវិធី​តុ​លា​ការ​មួយចំនួន ប៉ុន្តែអាចបញ្ចេញតែទៅចៅក្រម និងភាគីក្ដីប៉ុណ្ណោះ ហើយ​ត្រូវតែរក្សាជា​លក្ខណៈ​ឯកជននៅពេលរឿងក្ដីបញ្ចប់។36
19. ការបញ្ចេញព័ត៌មានទៅបុគ្គលិកផ្ដល់អាជ្ញាបណ្ណ – ការបំពាន​អាជ្ញា​បណ្ណដែលអាចមាន៖ គេអាចនឹងចែករំលែកព័ត៌មានរបស់អ្នកដោយគ្មានការអនុញ្ញាតពីអ្នកជាមួយក្រុមប្រឹក្សា​ផ្ដល់អាជ្ញាបណ្ណសម្រាប់អ្នកជំនាញសុខភាពផ្លូវចិត្ត នៅពេលដែល​នាយកមន្ទីរ​ពេទ្យ​រដ្ឋជឿថាមានការបំពានកើតឡើង។ ព័ត៌មាននោះមិនអាចមានឈ្មោះរបស់អ្នកទេ ហើយ​ត្រូវតែបិទជិតបន្ទាប់ពីក្រុមប្រឹក្សាធ្វើសេចក្ដីសម្រេចអំពីការបំពាន។37
20. ការបញ្ចេញព័ត៌មានដើម្បីធ្វើការទាមទារសំណង៖ គេត្រូវតែចែករំលែកព័ត៌មានរបស់អ្នក ទោះ​បីគ្មាន​ការ​អនុញ្ញាតពីអ្នកក៏ដោយ ដើម្បីដំណើរការការទាមទារប្រាក់ជំនួយ ធានា​រ៉ាប់​​​រង ឬជំនួយវេជ្ជសាស្ត្រសម្រាប់អត្ថប្រយោជន៍របស់អ្នក ប៉ុន្តែតាមការចាំបាច់​សម្រាប់​ការទាមទារប៉ុណ្ណោះ។38
21. ការបញ្ចេញព័ត៌មាននៅពេលបាត់ខ្លួន៖ បើសិនអ្នកជាអ្នកជំងឺស្ម័គ្រចិត្ត (ប៉ុន្តែនៅតែ​ឆ្លើយ​តបនឹងលក្ខណៈវិនិច្ឆ័យ​ស​ម្រាប់ការឃុំខ្លួនដោយសារសុខភាពផ្លូវចិត្តដោយមិនស្ម័​គ្រចិត្ត) ហើយចាក​ចេ​ញ​ពីមន្ទីរព្យាបាលដោយគ្មានការជូនដំណឹង នោះគ្រួសាររបស់អ្នក និងស្ថា​ប័​ន​អនុវត្តច្បាប់អាចទទួលបានការជូនដំណឹងអំពីការបាត់ខ្លួនរបស់អ្នក ទោះ​បី​គ្មានការអនុញ្ញាតពីអ្នកក៏ដោយ។ បើសិនអ្នកជាអ្នកជំងឺមិនស្ម័គ្រចិត្តក្រោមការរក្សា​ការ​ពារដោយសារសុខភាពផ្លូវចិត្ត ហើយចាកចេញពីមន្ទីរព្យាបាលដោយ​គ្មាន​ការជូនដំណឹង នោះតុលាការ និងស្ថាប័នអនុវត្តច្បាប់ត្រូវតែទទួលបានការជូន​ដំណឹង​អំពីការបាត់ខ្លួន​របស់អ្នក ទោះបីជាគ្មានការអនុញ្ញាតពីអ្នក​ក៏ដោយ​។39
22. ការបញ្ចេញព័ត៌មានទៅអ្នកពិនិត្យផ្នែកវេជ្ជសាស្ត្រ ឬអ្នកពិនិត្យ​សាក​សព៖ បើសិនជាអ្នក​ស្លាប់​នៅក្នុងមន្ទីរពេទ្យរដ្ឋ ឬមន្ទីរព្យា​បាលសុខភាពអាកប្បកិរិយាផ្សេងទៀត នោះគេត្រូវ​តែ​ចែករំលែក​ព័ត៌មាន​របស់​អ្នក​ជាមួយអ្នកពិនិត្យផ្នែកវេជ្ជសាស្ត្រ ឬអ្នកពិនិត្យសាកសព​តាម​សំណើ​។40 ព័ត៌មាននេះមិនត្រូវលាតត្រដាងដោយគ្មានដីកាតុលាការ ឬលិខិត​អនុញ្ញាត​ផ្សេងទៀតឡើយ។ ​41
23. ការបញ្ចេញព័ត៌មានទៅអង្គនីតិបញ្ញត្តិ៖ ទោះបីជាគ្មានការអនុញ្ញាតពីអ្នកក៏ដោយ គេ​ត្រូវតែ​ចែករំលែកព័ត៌មានរបស់អ្នកជាមួយនឹងព្រឹទ្ធសភា ឬគណៈកម្មាធិការច្បាប់​សភា​សម្រាប់ការស៊ើបអង្កេតនីតិបញ្ញត្តិ។ 42
24. ការបញ្ចេញព័ត៌មានសម្រាប់ការធានាគុណភាព៖ ទោះបីជាគ្មាន​ការ​អនុញ្ញាត​ពីអ្នក​​ក៏​ដោយ គេត្រូវ​តែ​ចែករំលែកព័ត៌មានរបស់អ្នកជាមួយនឹងគណៈ​កម្មាធិការ​ធានាគុណ​ភាព​ដែលបង្កើតឡើងដោយក្រសួងសេវាថែទាំសុខភាពរដ្ឋកាលីហ្វ័រញ៉ា។ 43
25. ការបញ្ចេញព័ត៌មានទៅនាយកមន្ទីរពេទ្យរដ្ឋ៖ គេអាចចែករំលែកព័ត៌មានរបស់​អ្នក​ដោយ​គ្មានការអនុញ្ញាតពីអ្នកជាមួយនាយកមន្ទីរពេទ្យរដ្ឋសម្រាប់ទិន្នន័យស្ថិតិ។ 44
26. ការបញ្ចេញព័ត៌មានទៅរដ្ឋមន្ត្រីនៃក្រសួងសុខាភិបាល និងសេវា​ម​នុ​ស្ស៖ ទោះបី​ជាគ្មាន​ការ​អនុញ្ញាតពីអ្នកក៏ដោយ គេត្រូវតែ​ចែករំលែកព័ត៌មានរបស់អ្នកជាមួយរដ្ឋមន្ត្រី​ក្រសួង​សុខាភិបាលនិងសេវាមនុស្ស នៅពេលត្រូវការដើម្បីកំណត់ភាពអនុលោម​ជាមួយច្បាប់ស្ដី​ពីគណ​នេយ្យ​ភាព និងការចល័តធានារ៉ាប់រងសុខភាព (HIPAA)។45
27. ការបញ្ចេញព័ត៌មានសម្រាប់ការស្រាវជ្រាវ៖ ទោះបីជាគ្មាន​ការអនុញ្ញាតពីអ្នក​ក៏​ដោយ គេត្រូវតែចែករំលែកព័ត៌មាន​របស់​អ្នកសម្រាប់ការស្រាវជ្រាវ ប៉ុន្តែតែក្នុងករណី​ដែល​នាយកសេវាថែទាំសុខភាព នា​យកមន្ទីរពេទ្យរដ្ឋ នាយកសេវាសង្គម ឬនាយកសេវា​អភិវឌ្ឍន៍​កំណត់ច្បាប់​សម្រា​​ប់​ការស្រាវជ្រាវ ហើយក្រុមប្រឹក្សាសមស្របត្រួតពិនិត្យការ​ស្រា​វ​ជ្រាវជាមុន​ប៉ុណ្ណោះ។ ជាដំបូងអ្នកស្រាវជ្រាវត្រូវតែព្យាយាម​សុំការយល់ព្រមដោយមាន​ការយល់​ដឹងពីអ្នកជាមុនសិន។ ពួកគេក៏ត្រូវតែចុះហត្ថលេខាសច្ចា​ប្រណិធាន​ដោយ​យល់​ព្រមមិនបញ្ចេញព័ត៌មានរបស់អ្នកទៅអ្នកដែលគ្មានការអនុញ្ញាតផងដែរ ហើយត្រូវតែ​រក្សាអត្តសញ្ញាណរបស់អ្នកជាលក្ខណៈ​ឯកជន​។46

D. តើការយល់ព្រមជាលាយលក្ខណ៍អក្សរអំពីការអនុញ្ញាត​មានន័យ​ដូច​ម្ដេច?

ជាទូទៅ អ្នក (ឬឪពុកម្ដាយ អាណាព្យាបាល ឬអ្នក​រក្សាការពាររបស់អ្នក) ត្រូវតែចុះហត្ថលេខា​លើទម្រង់​បែបបទដើម្បីផ្ដល់សិទ្ធិ (“អនុញ្ញាត”) ចំពោះការចែករំលែកព័ត៌មានរបស់​អ្នក​រាល់​ពេល​ដែល​ព័ត៌​មាន​ត្រូវបានបញ្ចេញ។47 រាល់ការប្រើទម្រង់បែបបទនេះ​ត្រូវតែកត់សម្គាល់​នៅក្នុង​កំណត់​​ត្រាវេជ្ជសាស្ត្ររបស់​អ្នក។ វាត្រូវតែរួមបញ្ចូល៖

• គោលបំណងនៃការប្រើប្រាស់ព័ត៌មាន
• ព័ត៌មានជាក់លាក់ដែលត្រូវបញ្ចេញ
• ឈ្មោះទីភ្នាក់ងារ ឬបុគ្គលដែលទទួលការបញ្ចេញព័ត៌មាន និង
• ឈ្មោះទីភ្នាក់ងារ ឬបុគ្គលដែលត្រូវបានអនុញ្ញាត​ឱ្យ​បញ្ចេញព័ត៌មានរបស់អ្នក។48

ទម្រង់បែបបទនេះក៏ត្រូវប្រាប់អ្នកអំពីសិទ្ធិរបស់អ្នកក្នុងការលុបចោលការអនុញ្ញាតផងដែរ។49 អ្នកក៏ត្រូវតែទទួលបានច្បាប់ចម្លងនៃទម្រង់បែបបទយល់ព្រមដែលបានចុះហត្ថលេខាផងដែរ។50

E. តើមានលក្ខខណ្ឌតម្រូវដោយឡែកសម្រាប់​ការបញ្ចេញ​កំណត់​សម្គា​ល់​ការព្យាបាលរោគផ្លូវចិត្តដែរឬទេ?

មាន ដោយមានករណីលើកលែងមួយចំនួន កំណត់​សម្គា​ល់ការព្យាបាលរោគផ្លូវចិត្តអាចបញ្ចេញ​បានតែក្នុងករណីដែលអ្នកអនុញ្ញាតជាពិសេសនៅក្នុងទម្រង់បែបបទដាច់ដោយឡែកប៉ុណ្ណោះ។51

F. បើសិនជាព័ត៌មានត្រូវបានបញ្ចេញ តើអ្នកផ្ដល់សេវាត្រូវធ្វើអ្វីខ្លះ?

អ្នកផ្ដល់សេវាត្រូវតែចងក្រងជាឯកសារនូវការបញ្ចេញព័ត៌មាននៅក្នុងកំណត់ត្រាវេជ្ជសាស្ត្ររបស់អ្នក។ ការចងក្រងឯកសារត្រូវតែរួមបញ្ចូល៖

• កាលបរិច្ឆេទ និងស្ថានភាពដែលពួកគេបញ្ចេញព័ត៌មាន
• ឈ្មោះបុគ្គល ឬទីភ្នាក់ងារដែលទទួលបានព័ត៌មាន រួមទាំងទំនាក់ទំនងរបស់​ពួក​គេ​ជាមួយ​អ្នក បើមាន និង
• ព័ត៌មានដែលបានលាតត្រដាង។52

G. តើខ្ញុំអាចធ្វើអ្វីខ្លះ បើនរណាម្នាក់បញ្ចេញព័ត៌មានសុខភាពសម្ងាត់​របស់ខ្ញុំ​ដោយ​ខុសច្បាប់?

អ្នកអាចនឹងប្ដឹងរដ្ឋប្បវេណីចំពោះបុគ្គលដែលមានចេតនាបញ្ចេញព័ត៌មាន ឬកំណត់ត្រាសម្ងាត់​របស់​អ្នកដោយដឹងខ្លួន។​53 ការផាកពិន័យគឺ $10,000 ឬស្មើនឹង​បី​ដងនៃការខូចខាតជាក់​ស្ដែង​របស់​អ្នក ដោយយកមួយណាដែលច្រើន​ជាង។ អ្នកក៏អាចប្ដឹងបុគ្គលដែលបញ្ចេញព័ត៌មាន ឬ​កំណត់​ត្រាសម្ងាត់របស់អ្នក​ដោ​យ​ការធ្វេសប្រហែសផងដែរ។ ការផាកពិន័យសម្រាប់ករណីនេះគឺ $1,000 បូកនិងចំនួនប្រាក់ខូចខាត​ជាក់​ស្តែងរបស់អ្នក។ ចុងក្រោយ អ្នកអាចប្ដឹង​ដើម្បី​បញ្ឈប់​នរណាម្នាក់មិនឱ្យបញ្ចេញព័ត៌មាន ឬកំ​ណ​ត់ត្រារបស់អ្នក។ អ្នកអាច​មានសិទ្ធិទទួល​បាន​ប្រាក់​ថ្លៃតុលាការ និងថ្លៃមេធាវីដែលសមស្រប។

អ្នកក៏អាចដាក់បណ្ដឹងរដ្ឋបាលក្រោម HIPAA ផងដែរ។54 អង្គភាពនានាអាចរង​ការពិន័យ​ជា​ប្រាក់ដោយសារការបំពាន HIPAA។55 ហើយបុគ្គលក៏អាចរងការផ្ដន្ទាទោសព្រហ្មទណ្ឌ​ដោយ​សារ​ការដឹងពីការបំពានដែរ។ 56

• 1. សូមមើលក្រមសុខុមាលភាព និងស្ថាប័ន រដ្ឋកាលីហ្វ័រញ៉ា § 5328។
• 2. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328(a)(2)។
• 3. លក្ខន្តិកៈនេះកំណត់ច្បាស់លាស់ថាអ្នកជំនាញដែលត្រូវតែអនុម័តលើការជ្រើសតាំង​របស់អ្នកគឺជាគ្រូពេទ្យ និងគ្រូ​ពេទ្យ​វះកាត់ ចិត្តវិទូមានអាជ្ញាបណ្ណ បុគ្គ​លិ​ក​សង្គមកិ​ច្ច​ដែលមានសញ្ញាបត្រ​បរិញ្ញា​ប័​ត្រជាន់ខ្ពស់ផ្នែកសង្គមកិច្ច គ្រូព្យា​បាល​ផ្នែក​អាពាហ៍ពិពាហ៍និងគ្រួសារដែល​មានអាជ្ញាបណ្ណ ឬទីប្រឹក្សាគ្លីនិក​ជំនា​ញដែលមាន​អាជ្ញា ប​ណ្ណ​ដែលទទួល​បន្ទុក​ការថែទាំអ្នក។ ក្រមសុខុមាលភាព និងស្ថាប័ន រដ្ឋកាលីហ្វ័រញ៉ា § 5328(a)(2)។
• 4. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328.1(a)-(b)។
• 5. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328.1(a)-(b)។
• 6. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328(a)(1)(A)។
• 7. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328(a)(13)។
• 8. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328(a)(10)។
• 9. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328.9។
• 10. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328.01(a)។
• 11. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328(a)(11)។
• 12. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328(a)(9)។
• 13. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328(a)(17)។
• 14. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328.1(a)។
• 15. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328.1(b)
• 16. ក្រម សុវត្ថិភាព និងសុខភាពរដ្ឋកាលីហ្វ័រញ៉ា § 1262; ក្រមសុខុមាលភាព និងស្ថាប័ន រដ្ឋកាលីហ្វ័រញ៉ា §§ 5622, 5768.5។
• 17. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328(a)(4)(A)។
• 18. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328(a)(1)(A)។
• 19. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328(a)(18)។
• 20. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា §§ 5152.1, 5250.1, 5328(a)(16)។
• 21. 21.ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា §§ 5328.2, 5328.3, 5328.01, 7325.5។ សូមមើលផងដែរនូវក្រមព្រហ្មទណ្ឌរដ្ឋកាលីហ្វ័រញ៉ា § 4536(b), 1370.5(b)។
• 22. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328(a)(20)(A)។
• 23. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5004.5(a)។
• 24. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328.4។
• 25. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328(a)(7)។
• 26. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328.02។
• 27. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា §§ 5328(a)(12)(A), 5328(a)(21), 5328.5,15633, 18951; ក្រមព្រហ្មទណ្ឌរដ្ឋកាលីហ្វ័រញ៉ា §§ 11165-11174 សូមមើលផងដែរនូវ 65 Ops. Cal. Atty. Gen. 345 (1982); People v. Stritzinger, 34 Cal. 3d 505 (1983)។
• 28. ក្រម សុខភាព និងសុវត្ថិភាពរដ្ឋកាលីហ្វ័រញ៉ា § 103900; 17 ក្រមស្ដីពី​បទប្ប​ញ្ញ​ត្តិ​រដ្ឋកាលីហ្វ័រញ៉ា § 2810។
• 29. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា §§ 5328.5,15633 ក្រមព្រហ្មទណ្ឌរដ្ឋកាលីហ្វ័រញ៉ា §§ 11165-11174 ក្រមសុខភាព និងសុវត្ថិភាពរដ្ឋកាលីហ្វ័រញ៉ា § 103900; 17 ក្រមស្ដីពីបទប្បញ្ញត្តិរដ្ឋកាលីហ្វ័រញ៉ា § 2810។
• 30. ក្រម ព្រហ្មទណ្ឌរដ្ឋកាលីហ្វ័រញ៉ា § 11163.3(g)(1)(B)។
• 31. ក្រម ព្រហ្មទណ្ឌរដ្ឋកាលីហ្វ័រញ៉ា § 11174.32(e)(2)(B)។
• 32. ក្រម ព្រហ្មទណ្ឌរដ្ឋកាលីហ្វ័រញ៉ា § 11174.8(b)(3)(B)។
• 33. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328(a)(6)។
• 34. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5326.1។
• 35. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា §§ 5328.06, 4903។ សូមមើលការបោះពុម្ពផ្សាយរបស់ DRC #5031 (1 មករា 2020)៖ សេចក្ដីសង្ខេបនៃសិទ្ធិជនមានពិការភាពរបស់អាជ្ញាធររដ្ឋកាលីហ្វ័រញ៉ាក្រោមច្បាប់រដ្ឋនិងសហព័ន្ធ។
• 36. 36.ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328.15(a)។
• 37. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328.15(b)។
• 38. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328(a)(3)។
• 39. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា §§ 5328.3(a)-(b), 7325, 7325.5។
• 40. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328.8។
• 41. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328.8 ក្រមរដ្ឋប្បវេណីរដ្ឋកាលីហ្វ័រញ៉ា § 56.11។
• 42. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328(a)(8)។
• 43. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា §§ 5328(a)(14), 14725
• 44. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5329។
• 45. 45 C.F.R. §164.502(a)(2)(ii)។
• 46. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328(a)(5)។
• 47. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328.7។
• 48. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328.7; 45 C.F.R. § 164.508(c)(1)។
• 49. 45 C.F.R. §§ 164.508(c)(2)(i), 164.508(c)(4)។
• 50. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328.7; 45 C.F.R. 164.508(c)(4)។
• 51. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328.04(h); 45 C.F.R. §§ 164.501, 164.508(a)(2)។
• 52. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5328.6។
• 53. ក្រម សុខុមាលភាព និងស្ថាប័ន រដ្ឋកាលីហ្វ័រញ៉ា § 5330។
• 54. 45 C.F.R. § 160.306។
• 55. 45 C.F.R. § 160.404(b)។
• 56. 42 U.S.C. § 1320d-6។