តើខ្ញុំអាចធ្វើអ្វីបានប្រសិនបើខ្ញុំមានបញ្ហាជាមួយអ្នកផ្ដល់ប្រឹក្សា DOR របស់ខ្ញុំ?

ជំហានដំបូងរបស់អ្នកគឺថាគួរតែព្យាយាមដោះស្រាយបញ្ហានោះជាមួយនឹងអ្នកផ្ដល់ប្រឹក្សា DOR របស់អ្នកសិន។ ប្រសិនបើអ្នកមិនអាចដោះស្រាយបញ្ហានោះជាមួយនឹងអ្នកផ្ដល់ប្រឹក្សារបស់អ្នកបានទេ ចូរស្នើសុំជួបជាមួយប្រធានរបស់អ្នកផ្ដល់ប្រឹក្សានោះ។ ប្រធានស្ដារនីតិសម្បទា (ដែលត្រូវបានគេស្គាល់ផងដែរថាជាអ្នកគ្រប់គ្រងក្រុម) ប្រហែលជាអាចជួយឱ្យអ្នកធ្វើការដោះស្រាយនូវបញ្ហានានាបាន។ ប្រសិនបើអ្នកនៅតែមិនពេញចិត្តនឹងចំណាត់ការរបស់ DOR នោះអ្នកមានសិទ្ធិប្តឹងតវ៉ាបាន។

តើអ្វីខ្លះជាជម្រើសរបស់ខ្ញុំសម្រាប់ការប្តឹងតវ៉ា?

មានជម្រើសមួយចំនួនសម្រាប់ការប្តឹងតវ៉ា។ អ្នកអាចស្នើសុំឱ្យមានការត្រួតពិនិត្យឡើងវិញផ្នែករដ្ឋបាលក្នុងអំឡុងពេលមួយឆ្នាំគិតចាប់ពីពេលមានចំណាត់ការរបស់ DOR ដែលអ្នកមិនយល់ស្របជាមួយ។ ឬ អ្នកអាចស្នើសុំឱ្យមានការសម្រុះសម្រួល ឬសវនាការយុត្តិធម៌ ក្នុងអំឡុងពេលមួយឆ្នាំគិតចាប់ពីពេលមានចំណាត់ការដែលអ្នកមិនយល់ស្របជាមួយ។ សូមដឹងថា ប្រសិនបើអ្នកស្នើសុំឱ្យមានការត្រួតពិនិត្យឡើងវិញផ្នែករដ្ឋបាលជាដំបូងសិន ហើយអ្នកទទួលបានសេចក្តីសម្រេចមួយដែលមិនអនុគ្រោះ នោះអ្នកនឹងមានរយៈពេលតែ 30 ថ្ងៃប៉ុណ្ណោះ គិតចាប់ពីកាលបរិច្ឆេទចេញសេចក្តីសម្រេច ដើម្បីធ្វើការស្នើសុំឱ្យមានសវនាការយុត្តិធម៌មួយ។ ជម្រើសផ្សេងគ្នាទាំងនេះនឹងមានពន្យល់ដោយលម្អិតកាន់តែខ្លាំងដូចខាងក្រោម។

តើខ្ញុំធ្វើការស្នើសុំឱ្យមានការត្រួតពិនិត្យឡើងវិញផ្នែករដ្ឋបាលបានដោយរបៀបណា?

ប្រសិនបើក្តីកង្វល់របស់អ្នកមិនត្រូវបានដោះស្រាយតាមរយៈអ្នកផ្ដល់ប្រឹក្សា DOR ឬ ដោយប្រធានស្ដារនីតិសម្បទា នៅថ្នាក់មូលដ្ឋានរបស់អ្នកទេ នោះអ្នកអាចស្នើសុំឱ្យមានការត្រួតពិនិត្យឡើងវិញផ្នែករដ្ឋបាលមួយដែលធ្វើឡើងដោយរដ្ឋបាលមណ្ឌលបាន។ អ្នកត្រូវស្នើសុំការត្រួតពិនិត្យឡើងវិញផ្នែករដ្ឋបាលនៅក្នុងអំឡុងពេលមួយឆ្នាំគិតចាប់ពីពេលមានសេចក្តីសម្រេចដែលអ្នកមិនយល់ស្របជាមួយ។ ការស្នើសុំរបស់អ្នកត្រូវរួមបញ្ចូលនូវ៖

ហេតុផលនៃការប្តឹងតវ៉ា និងមូលហេតុដែលអ្នកគិតថាសេចក្តីសម្រេចនោះគួរត្រូវកែប្រែ និង

ចំណាត់ការអ្វីដែលអ្នកស្នើសុំឱ្យ DOR ធ្វើ។

ចំណងជើងទី 9 នៃក្រមស្តីពីបទប្បញ្ញត្តិរដ្ឋកាលីហ្វ័រញ៉ា §7353(a)(3)(A)-(B)។

តើអ្វីនឹងកើតឡើងនៅក្នុងការត្រួតពិនិត្យឡើងវិញផ្នែករដ្ឋបាល?

នៅពេលរដ្ឋបាលមណ្ឌលទទួលពាក្យស្នើសុំឱ្យមានការត្រួតពិនិត្យឡើងវិញផ្នែករដ្ឋបាល ពួកគេអាចនឹងសម្រេចរៀបចំកិច្ចប្រជុំត្រួតពិនិត្យឡើងវិញផ្នែករដ្ឋបាលដែលអ្នកត្រូវជួបជាមួយរដ្ឋបាលមណ្ឌលដែលនឹងពិនិត្យមើលលើបញ្ហារបស់អ្នក។ នៅឯកិច្ចប្រជុំនេះ អ្នកនឹងមានឱកាសពន្យល់ពីមូលហេតុដែលអ្នកគិតថាសេចក្តីសម្រេចរបស់ DOR គឺខុសឆ្គង។ អ្នកអាចយកឯកសារ និងភ័ស្តុតាងផ្សេងៗដើម្បីគាំទ្រជំហររបស់អ្នក។ អ្នកផ្ដល់ប្រឹក្សា DOR របស់អ្នក ឬប្រធានស្ដារនីតិសម្បទារបស់អ្នកអាចមានវត្តមានក្នុងពេលត្រួតពិនិត្យឡើងវិញផ្នែករដ្ឋបាល ដើម្បីពន្យល់អំពីសេចក្តីសម្រេចរបស់ DOR។

ក្នុងករណីខ្លះ រដ្ឋបាលមណ្ឌលអាចនឹងសម្រេចធ្វើការត្រួតពិនិត្យឡើងវិញ និងធ្វើសេចក្តីសម្រេច “ជាសាធារណៈ”។ រដ្ឋបាលមណ្ឌលនឹងពិនិត្យមើលលើសំណើសុំរបស់អ្នក ឯកសារករណីរបស់អ្នក និងឯកសារទាំងឡាយដែលអ្នកបញ្ជូនមក។ រដ្ឋបាលមណ្ឌលនឹងចេញសេចក្តីសម្រេចរបស់ពួកគេដោយផ្អែកលើឯកសារកំណត់ត្រាទាំងនេះ។

រដ្ឋបាលមណ្ឌលនឹងសម្រេចថាតើចំណាត់ការរបស់ DOR មានលក្ខណៈសមស្របដែរឬទេ ហើយនិងផ្ញើសេចក្តីសម្រេចជាលាយលក្ខណ៍អក្សរទៅឱ្យអ្នកក្នុងរយៈពេល 15 ថ្ងៃ គិតចាប់ពីពេលដែលអ្នកស្នើសុំឱ្យមានការត្រួតពិនិត្យឡើងវិញផ្នែករដ្ឋបាល។

ចុះប្រសិនបើខ្ញុំមិនពេញចិត្តនឹងសេចក្តីសម្រេចនៃការត្រួតពិនិត្យឡើងវិញផ្នែករដ្ឋបាលនោះតើយ៉ាងម៉េចវិញ?

ប្រសិនបើអ្នកមិនពេញចិត្តនឹងសេចក្តីសម្រេចនៃការត្រួតពិនិត្យឡើងវិញផ្នែករដ្ឋបាលទេ អ្នកអាចស្នើសុំឱ្យមានការសម្រុះសម្រួល និង/ឬសវនាការយុត្តិធម៌បាន។ អ្នកត្រូវធ្វើការស្នើសុំនេះក្នុងរយៈពេល 30 ថ្ងៃ គិតចាប់ពីពេលចេញសេចក្តីសម្រេចនៃការត្រួតពិនិត្យឡើងវិញផ្នែករដ្ឋបាល។ ចំណងជើងទី 9 នៃក្រមស្តីពីបទប្បញ្ញត្តិរដ្ឋកាលីហ្វ័រញ៉ា §7353(f)។

តើការត្រួតពិនិត្យឡើងវិញផ្នែករដ្ឋបាលមានលក្ខណៈតម្រូវជាចាំបាច់ដែរឬទេ?

ទេ ដំណើរការត្រួតពិនិត្យឡើងវិញផ្នែករដ្ឋបាលគឺមានលក្ខណៈមួយស្រេចតែចិត្តប៉ុណ្ណោះ។ អ្នកអាចរំលងចោលការត្រួតពិនិត្យឡើងវិញផ្នែករដ្ឋបាលបាន ហើយស្នើសុំភ្លាមៗឱ្យមានសវនាការយុត្តិធម៌ និង/ឬការសម្រុះសម្រួលបាន។ ចំណងជើងទី 9 នៃក្រមស្តីពីបទប្បញ្ញត្តិរដ្ឋកាលីហ្វ័រញ៉ា §7351(c)។ ទោះជាយ៉ាងនេះក៏ដោយ ក៏វាអាចនឹងមានប្រយោជន៍ក្នុងការធ្វើការតាមរយៈដំណើរការត្រួតពិនិត្យឡើងវិញផ្នែករដ្ឋបាលរបស់ DOR នៅមុនពេលស្នើសុំការសម្រុះសម្រួល ឬសវនាការយុត្តិធម៌ផងដែរ។ បញ្ហាជាច្រើនអាចត្រូវបានដោះស្រាយនៅថ្នាក់មូលដ្ឋាន ជាលក្ខណៈក្រៅផ្លូវការ និងយ៉ាងកាន់តែឆាប់រហ័សជាង តាមរយៈដំណើរការត្រួតពិនិត្យឡើងវិញផ្នែករដ្ឋបាលនោះ។

តើខ្ញុំស្នើសុំឱ្យមានការសម្រុះសម្រួលដោយរបៀបណា?

អ្នកត្រូវស្នើសុំការសម្រុះសម្រួលក្នុងអំឡុងពេលមួយឆ្នាំគិតចាប់ពីពេលមានចំណាត់ការដែលអ្នកមិនយល់ស្របជាមួយ។ ប្រសិនបើអ្នកបានទទួលសេចក្តីសម្រេចនៃការត្រួតពិនិត្យឡើងវិញផ្នែករដ្ឋបាល អ្នកត្រូវស្នើសុំការសម្រុះសម្រួលក្នុងអំឡុងពេល 30 ថ្ងៃ គិតចាប់ពីពេលចេញសេចក្តីសម្រេចនៃការត្រួតពិនិត្យឡើងវិញផ្នែករដ្ឋបាល។ ការស្នើសុំការសម្រុះសម្រួលគួរត្រូវបានដាក់បញ្ជូនទៅនៅលើទម្រង់បែបបទ DR 107។ អ្នកក៏អាចរកឃើញរកទម្រង់បែបបទនេះតាមអនឡាញនៅលើគេហទំព័រ
https://www.dor.ca.gov/Home/Forms#fairhearing.

ប្រសិនបើភាគីទាំងពីរយល់ព្រមឱ្យមានការសម្រុះសម្រួល នោះការសម្រុះសម្រួលនឹងត្រូវបានរៀបចំនៅពេលវេលា និងនៅទីតាំងដ៏ងាយស្រួលសម្រាប់គ្រប់ភាគីទាំងអស់ នៅក្នុងអំឡុងពេល 25 ថ្ងៃប្រក្រតិទិន គិតចាប់ពីពេលដែលការស្នើសុំត្រូវបានទទួលដោយអ្នកសម្របសម្រួលដំណើរការសម្រុះសម្រួល។ ចំណងជើងទី 9 នៃក្រមស្តីពីបទប្បញ្ញត្តិរដ្ឋកាលីហ្វ័រញ៉ា §7353.6 (b)-(c) ចំណងជើងទី 34 នៃក្រមស្តីពីបទប្បញ្ញត្តិសហព័ន្ធ §361.57(d)។

តើការសម្រុះសម្រួលមានលក្ខណៈតម្រូវជាចាំបាច់ដែរឬ?

ទេ ការសម្រុះសម្រួលក៏ជាលក្ខណៈមួយស្រេចតែចិត្តផងដែរ។ ចំណងជើងទី 34 នៃក្រមស្តីពីបទប្បញ្ញត្តិសហព័ន្ធ  §361.57(d)(2)(i)។ អ្នកអាចសម្រេចចិត្តរំលងចោលបាន ដំណើរការសម្រុះសម្រួល ហើយទៅកាន់សវនាការយុត្តិធម៌ដោយផ្ទាល់។ ដូចគ្នានេះផងដែរ DOR ក៏មិនត្រូវបានតម្រូវឱ្យចូលរួមក្នុងដំណើរការសម្រុះសម្រួលនេះទេ DOR អាចសម្រេចថាពួកគេមិនចង់ចូលរួមក្នុងដំណើរការសម្រុះសម្រួលបាន។ ដូចដំណើរការត្រួតពិនិត្យឡើងវិញផ្នែករដ្ឋបាលផងដែរ ការសម្រុះសម្រួលមិនបានពន្យារពេលនៃសិទ្ធិទទួលបានសវនាការយុត្តិធម៌ឡើយ។ ចំណងជើងទី 9 នៃក្រមស្តីពីបទប្បញ្ញត្តិរដ្ឋកាលីហ្វ័រញ៉ា §7353.6 (b)។

តើមានអ្វីកើតឡើងនៅពេលធ្វើការសម្រុះសម្រួល?

នៅពេលធ្វើការសម្រុះសម្រួល អ្នកនឹងជួបជាមួយអ្នកសម្រុះសម្រួលដែលមិនលម្អៀងម្នាក់ និងអ្នកតំណាងម្នាក់មកពី DOR។ អ្នកសម្រុះសម្រួលនឹងព្យាយាមជួយអ្នក និង DOR ក្នុងការដោះស្រាយវិវាទរបស់អ្នក និងឈានទៅរកការព្រមព្រៀងមួយ។ ប្រសិនបើអ្នកដាក់ពាក្យស្នើសុំការសម្រុះសម្រួល និងសវនាការយុត្តិធម៌ក្នុងពេលតែមួយ ហើយអ្នកអាចដោះស្រាយគ្រប់បញ្ហាទាំងអស់ដែលបានលើកឡើងនៅក្នុងវិវាទរបស់អ្នកនៅពេលធ្វើការសម្រុះសម្រួល នោះដំណើរការសវនាការយុត្តិធម៌នឹងត្រូវបានដកចេញ។

ការសម្រុះសម្រួលគឺជាដំណើរការមានលក្ខណៈសម្ងាត់។ វាមានន័យថាព័ត៌មានទាំងឡាយដែលត្រូវបានចែករំលែកនៅពេលធ្វើការសម្រុះសម្រួលមិនអាចត្រូវយកទៅពិភាក្សានាពេលក្រោយក្នុងពេលសវនាការយុត្តិធម៌ ឬក្នុងសំណុំរឿងតុលាការឡើយ។

តើខ្ញុំស្នើសុំឱ្យមានសវនាការយុត្តិធម៌ដោយរបៀបណា?

អ្នកក៏អាចស្នើសុំឱ្យមានសវនាការយុត្តិធម៌ទាក់ទងនឹងបញ្ហា DOR របស់អ្នក ជំនួសឱ្យការសម្រុះសម្រួល ឬបន្ថែមពីលើដំណើការសម្រុះសម្រួលបានផងដែរ។ អ្នកត្រូវធ្វើសំណើសុំរបស់អ្នកឱ្យមានសវនាការយុត្តិធម៌ក្នុងអំឡុងពេលមួយឆ្នាំគិតចាប់ពីកាលបរិច្ឆេទដែលអ្នកទទួលបានសេចក្តីជូនដំណឹងជាលាយលក្ខណ៍អក្សរទាក់ទងនឹងចំណាត់ការឬសេចក្តីសម្រេចដែលអ្នកមិនយល់ស្របជាមួយ។ ចំណងជើងទី 9 នៃក្រមស្តីពីបទប្បញ្ញត្តិរដ្ឋកាលីហ្វ័រញ៉ា §7354 (a) (1)។ ដូចមានកត់សម្គាល់ពីខាងលើ ប្រសិនបើអ្នកទៅកាន់ការត្រួតពិនិត្យឡើងវិញផ្នែករដ្ឋបាល អ្នកត្រូវស្នើសុំសវនាការយុត្តិធម៌ក្នុងអំឡុងពេល 30 ថ្ងៃ គិតចាប់ពីពេលមានសេចក្តីសម្រេចនៃការត្រួតពិនិត្យឡើងវិញផ្នែករដ្ឋបាល។

សវនាការយុត្តិធម៌ត្រូវរៀបចំឡើងក្នុងអំឡុងពេល 60 ថ្ងៃ គិតចាប់ពីពេលដែលអ្នកធ្វើសំណើសុំជាលាយលក្ខណ៍អក្សររបស់អ្នក លើកលែងតែអ្នកយល់ព្រមឱ្យមានការពន្យារពេល។ ចំណងជើងទី 9 នៃក្រមស្តីពីបទប្បញ្ញត្តិរដ្ឋកាលីហ្វ័រញ៉ា §7354 (b) ។

ការស្នើសុំសវនាការយុត្តិធម៌គួរត្រូវដាក់បញ្ជូននៅលើទម្រង់បែបបទ DR 107។ អ្នកអាចរកឃើញទម្រង់បែបបទនេះតាមអនឡាញតាមរយៈគេហទំព័រ
https://www.dor.ca.gov/Home/Forms#fairhearing.

តើនឹងមានអ្វីកើតឡើងនៅឯសវនាការយុត្តិធម៌?

នៅឯសវនាការយុត្តិធម៌ អ្នកមានឱកាសបង្ហាញនិងបញ្ជាក់ភ័ស្តុតាងលើការទាមទាររបស់អ្នកនៅចំពោះមុខចៅក្រមរដ្ឋបាល (ALJ, Administrative Law Judge)។ អ្នកអាចនាំយកឯកសារ សាក្សី ឬភ័ស្តុតាងផ្សេងទៀតដើម្បីបង្ហាញដល់ចៅក្រម ALJ បាន។ បណ្តឹងតវ៉ាស្នើសុំឱ្យមានសវនាការយុត្តិធម៌ ដែលស្នើសុំដោយអ្នកដាក់ពាក្យសុំ ឬអតិថិជនរបស់ DOR នឹងត្រូវបានធ្វើសវនការដោយមន្រ្តីសវនាការមិនលម្អៀងមួយរូប ដែលជាអ្នកស្ថិតនៅក្នុងបញ្ជីចៅក្រម ALJs ជាមួយផ្នែកសវនាការរដ្ឋ (SHD, State Hearings Division) នៃក្រសួងសេវាសង្គមរបស់រដ្ឋ California។ ចៅក្រម ALJ នឹងចេញសេចក្តីសម្រេចមួយក្នុងអំឡុងពេល 30 ថ្ងៃ បន្ទាប់ពីសវនាការយុត្តិធម៌។ ចំណងជើងទី 9 នៃក្រមស្តីពីបទប្បញ្ញត្តិរដ្ឋកាលីហ្វ័រញ៉ា §7358។

តើ DOR អាចកាត់ផ្តាច់សេវាកម្មទាំងឡាយដែលខ្ញុំកំពុងទទួលបានរហូតដល់ពេលដែលមានសេចក្តីសម្រេចបានដែរឬទេ?

ទេ រហូតដល់ពេលដែលដំណើរការត្រួតពិនិត្យឡើងវិញផ្នែករដ្ឋបាលត្រូវបានបញ្ចប់ ឬរហូតដល់ពេលដែលផ្នែកសវនាការរដ្ឋចេញសេចក្តីសម្រេច DOR មិនត្រូវរំពឹងថាត្រូវផ្អាក កាត់បន្ថយ ឬបញ្ចប់សេវាកម្មទាំងឡាយដែលកំពុងត្រូវបានផ្ដល់ជូននៅក្រោម IPE ឡើយ។ វាមានករណីលើកលែងចំនួនពីរគឺថាប្រសិនបើបុគ្គលនោះស្នើសុំឱ្យបញ្ចប់សេវាកម្ម ឬ DOR សម្រេចថាមានករណីបន្លំឬអំពើល្មើសច្បាប់ព្រហ្មទណ្ឌផ្សេងទៀតដែលប្រព្រឹត្តដោយបុគ្គលនោះ។ ចំណងជើងទី 9 នៃក្រមស្តីពីបទប្បញ្ញត្តិរដ្ឋកាលីហ្វ័រញ៉ា §7351 (e)។

ចុះបើខ្ញុំមិនពេញចិត្តនឹងសេចក្តីសម្រេចនៃសវនាការយុត្តិធម៌តើយ៉ាងម៉េចវិញ?

ប្រសិនបើអ្នកមិនពេញចិត្តនឹងសេចក្តីសម្រេចដែលចេញក្រោយពេលសវនាការយុត្តិធម៌ អ្នកមានសិទ្ធិដាក់ពាក្យសុំដីកាបង្គាប់ឱ្យអនុវត្តច្បាប់ ក្នុងអំឡុងពេលប្រាំមួយខែទៅតុលាការជាន់ខ្ពស់នៃរដ្ឋកាលីហ្វ័រញ៉ា។

តើខ្ញុំអាចសុំឱ្យសមាជិកគ្រួសារណាម្នាក់តំណាងឱ្យខ្ញុំនៅពេលធ្វើការសម្រុះសម្រួល ឬពេលមានសវនាការយុត្តិធម៌បានដែរឬទេ?

អ្នកអាចចាត់តាំងអ្នកណាម្នាក់ធ្វើជាអ្នកតំណាងស្របច្បាប់របស់អ្នក និងតំណាងឱ្យអ្នកនៅពេលធ្វើការសម្រុះសម្រួល ឬពេលមានសវនាការយុត្តិធម៌បាន។ អ្នកអាចសុំឱ្យសមាជិកគ្រួសារណាម្នាក់ មិត្តភក្តិ ឬអ្នកតស៊ូមតិផ្សេងទៀតធ្វើជាអ្នកតំណាងស្របច្បាប់របស់អ្នកបាន។ អ្នកតំណាងស្របច្បាប់គួរបំពេញទម្រង់បែបបទ DR 108 នៅមុនពេលដែលពួកគេអាចតំណាងឱ្យអ្នកបាន។ ទម្រង់បែបបទនេះមាននៅក្នុងតំណខាងក្រោម៖
https://www.dor.ca.gov/Home/Forms#fairhearing។

ចុះបើខ្ញុំមិនចេះអានភាសាអង់គ្លេស ឬមានកម្សោយផ្នែកស្តាប់ឬគំហើញវិញនោះតើយ៉ាងម៉េចវិញ?

អ្នកអាចស្នើសុំឱ្យមានការផ្ញើជូនអ្នកនូវសេចក្តីជូនដំណឹងនិងសេចក្តីសម្រេចជាភាសាទីមួយរបស់អ្នក ឬតាមរបៀបប្រាស្រ័យទាក់ទងដែលអ្នកចង់បាន។ នៅពេលដែលអ្នកធ្វើសំណើសុំជាក់លាក់ DOR ត្រូវរំពឹងថានឹងផ្តល់ជូនអ្នកនូវសេចក្តីជូនដំណឹងនិងសេចក្តីសម្រេចទាំងឡាយជាភាសាទីមួយរបស់អ្នក ឬតាមរបៀបប្រាស្រ័យទាក់ទងរបស់អ្នក។ ក្រមស្តីពីសុខុមាលភាព និងស្ថាប័នរបស់រដ្ឋកាលីហ្វ័រញ៉ា §19013.5 (a)-(b) ចំណងជើងទី 9 នៃក្រមស្តីពីបទប្បញ្ញត្តិរដ្ឋកាលីហ្វ័រញ៉ា §7352(a)។ ប្រសិនបើអ្នកក៏ចង់ទទួលបានសេចក្តីជូនដំណឹង និងសេចក្តីសម្រេចទាំងឡាយជាភាសាផ្សេងក្រៅពីភាសាអង់គ្លេស ជាអក្សរពុម្ពធំៗ ឬជាអក្សរស្ទាប ចូរប្រាកដថាអ្នកបានស្នើសុំភាសា ឬទម្រង់ជាក់លាក់នោះ ដែលអ្នកត្រូវការឲ្យបានឆាប់តាមតែអាចធ្វើបាន។ អ្នកអាចស្នើសុំទទួលសេចក្តីជូនដំណឹងជាភាសា និង/ឬ ទម្រង់ផ្សេងៗ នៅពេលដែលអ្នកធ្វើការស្នើសុំការត្រួតពិនិត្យឡើងវិញផ្នែករដ្ឋបាល ការសម្រុះសម្រួល ឬសវនាការយុត្តិធម៌។

តើខ្ញុំអាចទទួលបានអ្នកបកប្រែភាសា ឬអ្នកអាន ឬការសម្របសម្រួលផ្សេងៗ នៅពេលត្រួតពិនិត្យឡើងវិញផ្នែករដ្ឋបាល ពេលសម្រុះសម្រួល ឬពេលសវនាការយុត្តិធម៌បានដែរឬទេ?

បាន ប្រសិនបើអ្នកមិនមែនជាអ្នកនិយាយភាសាអង់គ្លេស ថ្លង់ ខ្សោយផ្នែកស្តាប់ ខ្សោយផ្នែកនិយាយ ខ្វាក់ ឬខ្សោយផ្នែកគំហើញ គេត្រូវផ្តល់ជូនអ្នកនូវសេវាកម្មអ្នកបកប្រែផ្ទាល់មាត់ អ្នកអាន ឬឧបករណ៍ជំនួយការស្តាប់។ វាអាស្រ័យលើអ្នកក្នុងការស្នើសុំសេវាកម្មទាំងនេះ។ ចំណងជើងទី 9 នៃក្រមស្តីពីបទប្បញ្ញត្តិរដ្ឋកាលីហ្វ័រញ៉ា §§ 7353 (c), 7353.6 (c), 7354 (d) (3)។ ប្រសិនបើអាចធ្វើបាន ចូរស្នើសុំជាមុននូវការសម្របសម្រួលណាមួយដែលអ្នកត្រូវការ។

អ្នកអាចស្នើសុំការសម្របសម្រួលទាំងឡាយបាននៅពេលដែលអ្នកធ្វើការស្នើសុំការត្រួតពិនិត្យឡើងវិញផ្នែករដ្ឋបាល ការសម្រុះសម្រួល ឬសវនាការយុត្តិធម៌។

តើខ្ញុំអាចស្នើសុំឱ្យមានការដឹកជញ្ជូនធ្វើដំណើរទៅកាន់ និងត្រលប់មកពីកន្លែងត្រួតពិនិត្យឡើងវិញផ្នែករដ្ឋបាល កន្លែងធ្វើការសម្រុះសម្រួល ឬកន្លែងសវនាការយុត្តិធម៌បានដែរឬទេ?

អ្នកអាចស្នើសុំ DOR ឱ្យផ្តល់ការដឹកជញ្ជូនធ្វើដំណើរទៅកាន់កន្លែងត្រួតពិនិត្យឡើងវិញផ្នែករដ្ឋបាលឬកន្លែងធ្វើការសម្រុះសម្រួលបាន។ ចំណងជើងទី 9 នៃក្រមស្តីពីបទប្បញ្ញត្តិរដ្ឋកាលីហ្វ័រញ៉ា §7353 (d), 7353.6 (d)។ បើទោះបីជាបទប្បញ្ញត្តិមិនបានចែងជាក់លាក់ក៏ដោយ ក៏អ្នកអាចសាកសួរ DOR ថាតើគេអាចផ្តល់ជូនអ្នកនូវមធ្យោបាយដឹកជញ្ជូនធ្វើដំណើរទៅចូលរួមសវនាការយុត្តិធម៌ប្រសិនបើអ្នកត្រូវការវាបានដែរឬអត់។

សូមទាក់ទងអ្នកតស៊ូមតិ CAP របស់អ្នកដើម្បីទទួលបានជំនួយ តាមរយៈលេខ 800-776-5746។ អ្នកតស៊ូមតិ CAP ប្រហែលជាអាចជួយអ្នកក្នុងការដោះស្រាយបញ្ហារបស់អ្នកជាមួយ DOR បាន។