Kev Ntxub Ntxaug Txog Vaj Tse Nyob Raws Li Kev Xiam OOb Qhab - Koj Cov Cai thiab Cov Kev Xaiv

Publications
May 1, 2024
#F108.09

Kev Ntxub Ntxaug Txog Vaj Tse Nyob Raws Li Kev Xiam OOb Qhab - Koj Cov Cai thiab Cov Kev Xaiv

Daim ntawv qhia tseeb no tham txog txoj cai ntawm cov neeg xiam oob khab kom tsis txhob muaj kev xiam oob khab-raws li kev ntxub ntxaug hauv vaj tse raws li tsoomfwv thiab California txoj cai lij choj.

Sau daim ntawv no

Kev lees paub: Qhov kev tshaj tawm no tsuas yog cov ntaub ntawv raug cai thiab tsis yog lus qhia txog kev cai lij choj ntawm koj tus kheej. Nws yog tam sim no raws li hnub tshaj tawm. Peb sim hloov peb cov ntaub ntawv tsis tu ncua. Txawm li cas los xij, txoj cai hloov tsis tu ncua. Yog tias koj xav paub tseeb tias txoj cai tsis tau hloov, hu rau DRC lossis lwm lub chaw haujlwm raug cai.

Cov Txheej Lus

Cov Lus Taw Qhia

Kev ntxub ntxaug txog vaj tse nyob rau cov neeg uas muaj kev xiam oob qhab yog qhov txhaum kev cai. Tuaj yeem xav txog ntau yam sib txawv tias yog kev ntxub ntxaug txog vaj tse nyob. Qee qhov piv txwv txog yam uas kev ntxub ntxaug txog vaj tse nyob zoo li cas ntawd yuav yog:

  • Tau txais kev saib sib txawv lwm tus vim tias muaj kev xiam oob qhab
  • Tej khoom thiav lub cev uas thaiv los sis tab kaum kev nkag cuag
  • Kev ua phem
  • Kev ua pauj
  • Cov lus hais txog kev ntxub ntxaug
  • Muab tsis tau cov kev zamm los sis cov kev hloov pauv uas tsim nyog ("cov chaw nyob thiab cov kev hloov kho kom tsim nyog").

Qhov Sib Txawv Ntawm Cov Chaw Nyob thiab Cov Kev Hloov Kho

Cov Chaw nyob uas tsim nyog yog cov kev zam rau cov cai, cov txheej txheem hauj lwm, cov kev pab cuam, los sis cov cai tswj hwm. Cov kev hloov kho kom tsim nyog yog cov kev hloov pauv kiag rau cov tuam tsev, cov chav tsev, los sis ib cheeb tsam. Cov kev pab cuam thiab cov kev hloov kho yog qhov tsim nyog yog tias lawv:

  1. Yog qhov tsim nyog los muab ib lub hwv tsam sib npaug zog rau ib tus neeg uas xiam oob qhab twg los siv thiab muaj kev lom zem nrog vaj tse nyob;
  2. sis hloov pauv tus yam ntxwv ntawm lub vaj tse nyob los sis lwm cov kev pab cuam uas tau txais yam tsawg kawg; los sis
  3. Tsis tsim ua kom muaj hauj lwm rau lub chaw muab kev pab cuam vaj tse nyob; los sis
  4. Tsis xam tias yog kev phom sij ncaj qha rau kev noj qab haus huv los sis kev nyab xeeb ntawm lwm tus los sis yuav tsis ua rau muaj kev puas tsuaj rau lub cev ntau heev rau thaj av vaj tsev ntawm lwm tus.

Tom qab tus neeg ua ntawv thov qhia tias kev pab cuam thiab/los sis kev hloov kho yog qhov tsim nyog (#1 saum toj no), lub chaw muab kev pab cuam vaj tse nyob uas tau txais daim ntawv thov tsuas yuav tsis kam pom zoo rau daim ntawv thov vim yog muaj #2, 3, los sis 4 saum toj no nkaus xwb.

Yog xav paub ntxiv los ntawm Teb Chaws Mes Kas Lub Thawj Fab Saib Xyuas Saib Xyuas Hauj Lwm Kev Txhim Kho Vaj Tse Nyob thiab Nroog Loj ("HUD"), lub chaw ua hauj lwm ntawm tsoom fwv teb chaws tau tso cai kom yuav siv tsoom fwv teb chaws cov kev cai lij choj hais txog vaj tse nyob yam ncaj ncees, saib hauv: https://www.hud.gov/program_offices/fair_housing_equal_opp/reasonable_accommodations_and_modifications

Kev Ua Daim Ntawv Thov Txog Chaw Nyob Uas Tsim Nyog

Txhawm rau kom tau txais chaw nyob uas tsim nyog los sis kev hloov kho uas tsim nyog, koj yuav tsum tau thov thiaj tau. Txawm hais tias koj tsis tas yuav sau ntawv mus thov los tau, thiab koj tsis tas yuav siv cov lo lus "chaw nyob uas tsim nyog" los sis "kev hloov kho uas tsim nyog," nws yog ib qho tswv yim zoo yuav ua tag nrho ob qho. Qhov no yog vim tias nws pab ua kom yam uas koj tab tom thov no meej zog tuaj, thiab koj yuav tsum tau siv daim ntawv tom qab ntawd dua los qhia ua pov thawj tias koj tau thov txog kev hloov pauv. Kev xa koj daim ntawv thov mus hauv email yog ib txoj hau kev yooj yim kom thiaj li muaj ntaub ntawv cia siv yav tom ntej, tab sis yog tias koj nyiam xa raws kev xa ntawv snail mail nco ntsoov khaws ib daim ntawv theej ntawm koj daim ntawv thov rau koj khaws cia.

Txhawm rau ua daim ntawv thov chaw nyob uas tsim nyog los sis kev hloov kho uas tsim nyog, kev sib cuam tshuam ntawm kev hloov pauv uas tsim nyog thiab tus neeg li kev xiam oob qhab yuav tsum tau muab hais rau hauv. Piv txwv li, koj yuav hais tias "Kuv yog ib tug neeg xiam oob qhab, thiab kuv xav them kuv tus nqi xauj tsev hauv hnub tim 7 uas tsis yog tim 1 ntawm lub hli" yooj yim li no xwb tsis tau txog kev thov chaw nyob uas tsim nyog. "Koj yuav tsum tau muab ntaub ntawv qhia paub kom ntau ntxiv me ntsis dua qhov ntawd. Hloov rau qhov ntawd, nws yuav pab tau ntau zog tuaj thiab meej zog tuaj uas yuav hais tias, "vim tias kuv tseem tsis tau txais kuv li nyiaj khwv tau los uas cuam tshuam txog kev xiam oob qhab kom txog thaum hnub tim 6 ntawm lub hlis, kuv thiaj li them tsis tau nqi xauj hauv hnub tim 1 ntawm lub hlis, yog li ntad kuv thiaj li xav thov kev zam rau txoj cai no los them rau hnub tim 7. "Hauv qab no yog qhov qauv piv txwv txog kev ua cov ntawv thov no mus rau cov chaw pab cuam vaj tse nyob.

Tsab Ntawv Qauv Piv Txwv mus rau Tus Neeg Muab Kev Pab Cuam Vaj Tse Nyob Uas Thov Txog (Cov)Qhov Chaw Nyob Uas Tsim Nyog los sis (Cov)Qhov Kev Hloov Kho Uas Tsim Nyog

[Hnub Tim]

[Lub Npe Thiab Xeem ntawm Tus Tswv Av thiab/los sis Tus Thawj Tswj Xyuas Thaj Av Vaj Tse]

[Qhov chaw nyob email los sis chaw nyob lub tsev kiag ntawm Tus Tswv Av thiab/los sis Tus Thawj Tswj Xyuas Thaj Av Vaj Tse]

 

Nyob zoo txog [lub npe ntawm Tus Tswv Av thiab/los sis Tus Thawj Tswj Xyuas Thaj Av Vaj Tse]

Kuv nyob rau ntawm/tab tom thov xauj koj thaj av vaj tsev ntawm [qhov chaw nyob]. Kuv sau ntawv tuaj no yog tuaj thov cov vaj tse nyob/cov kev hloov kho uas tsim nyog hauv qab no rau kuv qhov kev xiam oob qhab:

___________________________________________________________

___________________________________________________________

___________________________________________________________

Daim ntawv thov no cuam tshuam txog kuv li kev xiam oob qhab vim tias:

___________________________________________________________

___________________________________________________________

___________________________________________________________

Kuv [tus kws kho mob/tus kws kho kev puas siab puas ntsws/tus kws kho kev mob hlwb los sis kev nyuaj siab/tus kws kho mob rau lub cev/tus neeg ua hauj lwm pab xaus saus/tus kws kho mob kom ua tau hauj lwm /lwm tus neeg] xam tias cov chaw nyob/cov kev hloov kho no tseem ceeb vim tias kuv muaj kev xiam oob qhab. Kuv yuav muab kev kuaj xyuas txog qhov tseeb tau yog tias koj xav tau.

Tsoom fwv thiab lub xeev tsab kev cai lij choj tseev kom lub chaw pab cuam vaj tse nyob muab chaw nyob rau cov neeg xauj/cov neeg nkag los nyob thiab cov neeg thov uas muaj kev xiam oob qhab yam tsim nyog.

Thov teb rov qab rau daim ntawv thov no, sau ua ntawv, hauv [hnub tim]. Thov nkag siab tias kev tsis teb rov qab rau chaw nyob uas tsim nyog, kev teb rov qab qeeb dhau, los sis kev tsis pom zoo yam tsis raug kev cai rau daim ntawv thov chaw nyob uas tsim nyog xam tias yog kev ntxub ntxaug rau kev xiam oob qhab. Saib hauv Cal. Code Regs. tit.2, § 12177(e). Txhob ua siab deb yuav tiv tauj tuaj rau kuv ntawm [koj qhov chaw nyob e-mail/tus naj npawb xov tooj]. Ua tsaug rau qhov uas koj xav paub txog daim ntawv thov no.

 

Sau npe,

[Koj lub npe]

[Koj qhov chaw nyob]

___________________________________________________________

 

Cov chaw muab kev pab cuam vaj tse nyob tuaj yeem thov tsab ntawv kuaj xyuas qhov tseeb los ntawm lawv cov pej xeem tuaj nyob thaum tus pej xeem thov chaw nyob uas tsim nyog los sis kev hloov kho uas tsim nyog thiab kev xav tau chaw nyob los sis kev hloov kho tsis pom tseeb. Tsab ntawv kuaj xyuas qhov tseeb lees paub tias tus neeg xiam oob qhab muaj kev xav tau ntsig txog kev xiam oob qhab rau kev hloov pauv uas lawv tab tom thov txog lawv cov cai vaj tse nyob, cov txheej txheem kev ua hauj lwm, cov kev pab cuam, los sis cov txheej txheem vaj tse kiag. Hauv qab no yog tus qauv piv txwv ntawm cov tsab ntawv kev kuaj xyhuas qhov tseeb fab kev kho mob.

Tsab Ntawv Kuaj Xyuas Ua Qauv tuaj ntawm Tus Kws Txawj Ua Hauj Lwm Ntsig Txog Fab Kev Kho Mob

[Hnub Tim]

Txog rau [Tus Tswv Av, Lub Chaw Hauj Lwm Muaj Cai Tswj Vaj Tse Nyob, thiab Lub Koom haum Ntawm Cov Tswv Tsev]:

 

Kuv yog [tus kws kho mob/tus kws kho kev puas siab puas ntsws/tus kws kho kev mob hlwb los sis nyuaj siab/tus kws kho lub cev/tus neeg ua hauj lwm pab xaus saus/tus kws kho kom ua taus hauj lwm] rau [tus neeg mob/tus neeg qhua lub npe] thiab kuv muaj kev swm nrog [nws/lawv] tus zwj ceeb mob. [Tus neeg mob lub npe] muaj kev xiam oob qhab uas ua rau muaj qee yam kev xwv txog kev ua taus hauj lwm. Cov kev txwv no suav muaj [teev qhia txog cov kev txwv fab kev ua taus hauj lwm uas yuav tsum tau muaj chaw nyob uas tau thov tuaj no]:

___________________________________________________________

___________________________________________________________

___________________________________________________________

[Qhov chaw nyob uas tau thov tuaj no] yog qhov tseem ceeb rau [tus neeg mob/tus neeg qhua lub npe] kom nyob tau hauv lub zej zog thiab siv thiab muaj kev lom zeem nrog [nws/lawv] lub tsev los ntawm [piav qhia txog txoj hau kev uas lub chaw nyob yuav pab los sis txhawb nqa tau ib tug neeg [teev qhia txog cov kev txwv uas yuav tsum tau muaj lub chaw nyob uas tau thov tuaj no]:

___________________________________________________________

___________________________________________________________

___________________________________________________________

Ua tsaug rau qhov uas muab qhov chaw nyob uas tsim nyog no rau [tus neeg mob/tus neeg qhua lub npe].

 

Sau npe,

[Lub Npe thiab Qib Hauj Lwm]

Kev Yuam Siv Koj Cov Cai: Cov Kev Tsis Txaus Siab thiab Kev Sib Foob

Yog tus tswv av, lub koom haum ntawm cov tswv tsev, los sis lwm tus neeg muab kev pab cuam vaj tsev nyob tsis pom zoo muab chaw nyob los sis kev hloov kho uas tsim nyog, los sis tsis tas li ntawd ho ntxub ntxaug rau koj, koj yuav tsum tau sau ntawv foob lus tsis txaus siab fab kev tuav tswj los sis foob los yuam siv koj cov cai. Cov kev xaiv no tuaj yeem siv sij hawm ntev.

Cov Kev Tsis Txaus Siab Fab Kev Tuav Tswj

Koj tuaj yeem foob lus tsis txaus siab fab kev tuav tswj nrog California Lub Thawj Fab Saib Xyuas Hauj Lwm Kev Muaj Cai Ntawm Pej Xeem (CRD), thaum ub hu ua Lub Thawj Fab Saib Xyuas Hauj Lwm Kev Ntiav Hauj Lwm thiab Vaj Tse Nyob Yam Ncaj Ncees (DFEH), tsis pub dhau ib xyoos ntawm hnub tim uas muaj kev ntxub ntxaug tsis ntev los no kiag. Lus qhia txhua yam ntawm tus txheej txheem lus tsis txaus siab nrog CRD, thiab ntaub ntawv qhia paub txog txoj hau kev foob lus tsis txaus siab, tuaj yeem nrhiav tau ntawm no: https://calcivilrights.ca.gov/complaintprocess/#:~:text=800%2D884%2D1684,-contact.center%40dfeh thiab koj tuaj yeem saib tau ntawm CRD daim tsham qhia txog lus tsis txaus siab tau ntawm no:https://calcivilrights.ca.gov/wp-content/uploads/sites/32/2022/09/CRD-Non-Employment-Flowchart_ENG.pdf. Tsis tas li ntawd koj kuj tuaj yeem pib tus txheej txheem lus tsis txaus siab los ntawm kev hu rau (800) 884-1684 (hu suab) los sis (800) 700-2320 (TTY).

Yog tias CRD tsis txiav txim kom koj yog tus yeej, tuaj yeem thov kom rov txiav txim dua txog kev txiav txim siab ntawm CRD mus rau CRD Tus Thawj Coj tsis pub dhau 10 hnub txij thaum muaj kev txiav txim siab.Saib hauv 2 C.C.R. Nqe Cai 100651

Yog tias koj xav tau kev pab cuam hauv kev ua hauj lwm nrog CRD, tiv tauj CRD tus neeg cev ncauj cev lus ntawm ADA. Koj tuaj yeem nrhiav tau lawv cov ntaub ntawv qhia paub ntawm no - https://calcivilrights.ca.gov/adacoordinator/

Koj kuj tuaj yeem foob lus tsis txaus siab txog fab tuav tswj nrog Teb Chaws Mes Kas Lub Thawj Fab Saib Xyuas Hauj Lwm Kev Txhim Kho Vaj Tse Nyob thiab Nroog Loj Lub Chaw Lis Hauj Lwm txog Vaj Tse Chaw Nyob Yam Ncaj Ncees thiab Lub Hwv Tsam Sib Npaug Zog (HUD-FHEO)2 tsis pub dhau ib lub xyoos txij thaum muaj kev ntxub ntxaug. Ntaub ntawv qhia paub txog txoj hau kev yuav foob lus tsis txaus siab mus rau HUD-FHEO tuaj yeem nrhiav tau los ntawm kev hu rau 1-800-669-9777 los sis hauv HUD lub vev xaib: https://www.hud.gov/program_offices/fair_housing_equal_opp/online-complaint Ntaub ntawv qhia paub txog seb tus txheej txheem foob lus tsis txaus siab yuav zoo li cas tuaj yeem nrhiav tau nyob ntawm no: https://www.hud.gov/program_offices/fair_housing_equal_opp/complaint-process

Kev Sib Foob Ntiag Tug

Koj tuaj yeem yuam siv koj cov cai los ntawm cov kev foob fab kev nplua nyiaj uas muab foob hauv tsoom fwv teb chaws los sis lub xeev lub tsev hais plaub. Koj tsis tas muaj tus kws lij choj thiab koj muaj cai yuav foob rau koj tus kheej yog tias koj tsis muaj peev xwm tau txais kev pab los sis kev sawv cev los ntawm tus kws lij choj. Thov ceev faj tias yuav muaj sij hawm tsis txaus (ncua sij hawm ntawm rooj plaub") uas txwv txog lub sij hawm ntau npaum li cas uas koj yuav siv los sau cov ntawv thov kev muaj cai hauv tsev hais plaub, thiab koj yuav cia li plam yog tias koj foob tsis tau nyob hauv ncua sij hawm ntawd. Cov hnub tag sij hawm no tuaj yeem luv li ntawm ob lub xyoos xwb txij hnub muaj kev ntxub ntxaug. Yog tias xav paub txog kev sau ib tsab ntawv sib foob, koj yuav tsum sab laj nrog tus kws lij choj kom sai li sai tau kom tau lus pab tswv yim, tshawb nrhiav txog koj cov kev xaiv, thiab qhov yuav muaj kev sawv cev tau. Koj yuav muaj lub luag hauj lwm txog kev them cov nqi kev sau ntawv foob los mus foob koj rooj plaub, tab sis koj yuav muaj cai tsim nyog tau txais kev zam tus nqi yog tias koj them tsis taus cov nqi foob ntawd.

Tsab Ntawv Lus Thov Yuav Cai Me

Yog tias koj xav nqua hu tus nqi puas tsuaj siab kawg nkaus txog $12,500, koj tuaj yeem sau ntawv foob txog rooj plaub kev ntxub ntxaug hauv Lub Tsev Hais Plaub Txog Kev Thov Lus Muaj Cai Me tau. Cov rooj plaub hauv Lub Tsev Hais Plaub Txog Kev Thov Lus Muaj Cai Me yuav tsum tau muab sau foob ua ntej ciaj ciam txwv sij hawm ("sij hawm ntawm rooj plaub") yuav tag, thiab yeej muaj tus nqi kev sau ntawv foob tshwj tsis yog tias koj muaj cai tsim nyog rau kev zam tus nqi. Koj tuaj yeem sab laj nrog tus kws lij choj hais txog cov rooj plaub ntawm Lub Tsev Hais Plaub Txog Kev Thov Lus Muaj Cai Me. Yog xav paub ntau ntxiv, mus saib hauv California Cov Cai Ntawm Neeg Xiam Oob Qhab, Phau Ntawv Qhia txog Lub Tsev Haus Plaub Txog Kev Thov Lus Muaj Cai Me: Txoj Hau Kev Foob yog tias Lub Chaw Lag Luam los sis Tus Tswv Av Ntxub Ntxaug Rau Koj Vim Tias Koj Muaj Kev Xiam Oob Qhab, ntawm https://www.disabilityrightsca.org/system/files?file=file-attachments/520601_0.pdf

Kev Haus Ua Pov Thawj Fab Kev Cai Lij Choj thiab Ntaub Ntawv Qhia Paub Ntxiv

Yuav txwv tsis pub muaj kev ntxub ntxaug txog vaj tse nyob rau cov neeg xauj tsev thiab cov neeg thov uas muaj kev xiam oob qhab raws li tshab txhais meej tseg nyob rau hauv tsoom fwv tsab kev cai lij choj hauv Tsab Cai Hloov Kho Tshiab Txog Kev Muaj Vaj Tse Nyob Yam Ncaj Ncees3 thiab Tshooj Cai 504 ntawm Tsab Cai Hais Txog Kev Txhim Kho Kom Rov Zoo Los ntawm tsoom fwv teb chaws xyoo 1973.4 Tsis tas li ntawd, nws raug txwv raws li California txoj cai lij choj hauv Tsab Cai Hais Txog Kev Ntiav Hauj lwm thiab Vaj Tse Nyob Yam Ncaj Ncees5 thiab Tsab Cai Hais Txog Cov Neeg Xiam Oob Qhab.6 Cov cai no hais txog cov neeg muab kev pab cuam vaj tse nyob suav nrog cov tswv av, cov koom haum ntawm cov tswv tsev, cov neeg muag tsev, cov neeg xauj vaj tsev nyob, thiab cov tswv thiab cov thawj tswj xyuas thaj av vaj tse ntawm lub chaw vaj tse nyob ncua sij hawm ntev suav nrog cov tsev pab cuam muaj chaw nyob thiab zaub mov noj, cov tsev nyob ua pab pawg, cov tsev rau neeg ua neej nyob yam ywj pheej, cov chaw so rau neeg tsis muaj tsev nyob thiab, hauv qee qhov, cov tsev laus.

Yog xav paub ntxaws hais txog kev ntxub ntxaug txog vaj tse raws li kev xiam oob qhab, thiab txoj hau kev thov cov chaw nyob thiab cov kev hloov kho uas tsim nyog tias yog cov neeg xauj tsev los sis tus neeg thov txog vaj tse nyob, saib hauv:

  • Nqe Lus Hais Sib Koom ntawm Lub Thawj Fab Saib Xyuas Hauj Lwm Kev Txhim Kho Vaj Tse Nyob thiab Nroog Loj thiab Lub Thawj Fab Saib Xyuas Hauj Lwm Kev Ncaj Ncees, Cov Chaw Nyob Uas Tsim Nyog Raws Li Tsab Cai Hais Txog Vaj Tse Nyob Ncaj Ncees https://www.justice.gov/crt/us-department-housing-and-urban-development
  • Nqe Lus Hais Sib Koom ntawm Lub Thawj Fab Saib Xyuas Hauj Lwm Kev Txhim Kho Vaj Tse Nyob thiab Nroog Loj thiab Lub Thawj Fab Saib Xyuas Hauj Lwm Kev Ncaj Ncees, Kev Hloov Kho Uas Tsim Nyog Raws Li Tsab Cai Hais Txog Vaj Tse Nyob Ncaj Ncees https://www.hud.gov/sites/documents/DOC_7502.PDF
  • Nqe Lus Hais Sib Koom ntawm Lub Thawj Fab Saib Xyuas Hauj Lwm Kev Txhim Kho Vaj Tse Nyob thiab Nroog Loj thiab Lub Thawj Fab Saib Xyuas Hauj Lwm Kev Ncaj Ncees, Cov Cai Yuav Tsum Tau Muaj Txog Kev Nkag Cuag Tau (Kev Tsim Qauv thiab Kev Tsim Kho Vaj Tse) rau Cov Tsev Nyob Uas Nyob Tau Rau Ntau Tsev Neeg Raws Li Tsab Cai Hais Txog Vaj Tse Ncaj Ncees https://www.hud.gov/sites/documents/JOINTSTATEMENT.PDF
  • 1.
  • 2. Tsab Cai Hais Txog Kev Hloov Kho Vaj Tse Yam Muaj Kev Ncaj Ncees tso cai rau qhov no.
  • 3. 42 U.S.C. Cov Tshooj Cai 3601-3631
  • 4. Rau cov vaj tse nyob uas tau txais kev pab nyiaj los ntawm Teb Chaws Mes Kas Lub Thawj Fab Saib Xyuas Hauj Lwm Kev Txhim Kho Vaj Tse Nyob thiab Nroog Loj los sis lwm yam kev pab fab nyiaj txiag ntawm tsoom fwv teb chaws
  • 5. Tsab Cai Hais Txog Tsoom Fwv Tshooj Cai 12955-12956.2
  • 6. Tsab Cai Hais Txog Kev Txiav Txim Nplua Nyiaj Tshooj Cai 54.1 thiab 54.2