Cov ntaub ntawv no yuav muab cov xov xwm qhia txog koj cov kev muaj cai tau txais xov xwm thiab cov kev pab cuam ua koj yam lus xub thawj los ntawm lub chaw pab cuam hauv cheeb tsam raws lub Phiaj Xwm Early Start.  Early Start pab cov menyuam mos thiab cov menyuam yaus mus txog rau thaum muaj hnub nyoog 3 xyoos uas muaj kev paub tab qeeb.

Txoj cai lij choj hauv California uas hu ua Senate Bill (SB) 555 (Correa) qhia meej txog lub chaw pab cuam hauv cheeb tsam lub luag haujlwm lub Phiaj Xwm Early Start txhawm rau muab xov xwm thiab cov kev pab cuam rau koj ua koj yam lus xub thawj. Koj tuaj yeem nrhiav tau txoj cai lij choj ntawd ntawm no: 
http://www.leginfo.ca.gov/pub/13-14/bill/sen/sb_0551-0600/sb_555_bill_20131009_chaptered.pdf

Qee leej uas tau txais cov kev pab cuam los ntawm cov chaw pab cuam hauv cheeb tsam yog neeg hais tsis tau lus Askiv lossis hais tau lossis nkag siab lus Askiv me ntsis xwb. Tsis muaj kev tseev kom koj yuav tsum hais, nyeem, lossis sau lus Askiv txhawm kom tau txais cov kev pab cuam uas koj lossis koj tus menyuam tsim nyog muaj los ntawm qhov chaw pab cuam hauv cheeb tsam. Txoj cai lij choj no pab ua kom ntseeg tau hais tias cov neeg siv kev pab cuam thiab lawv tsev neeg uas hais lus Askiv tsis tau lossis hais tau tsis zoo txaus muaj xov xwm sib npaug txog ntawm cov kev pab cuam thiab kev pab txhawb los ntawm lub chaw pab cuam hauv cheeb tsam.

1. “Yam lus xub thawj” uas xav txog yog yam twg?

   Nyob rau hauv lub Phiaj Xwm Early Start, "yam lus xub thawj" yog yam lus uas leej niam leej txiv ntawm tus menyuam ib txwm hais.34 Txoj Cai Ntawm Cov Cai Qhuab Hauv Tsoom Fwv Teb Chaws (C.F.R., Code of Federal Regulations) Tshooj 303.25(a); Tsoom Fwv California Txoj Cai tshooj 95020(g)(1). Piv txwv li, yog tias koj hais lus Askiv tau zoo tsis txaus thiab koj ib txwm hais lus Xab Pes Niv xwb, ces koj yam lus xub thawj yog lus Xab Pes Niv.

2. Yuav ua li cas yog hais tias kuv yog neeg lag ntseg lossis tsis hnov lus zoo, dig muag lossis qhov muag tsis pom kev zoo? Yam lus xub xub thawj yuav txhais tau li cas rau kuv hauv Early Start?

   Yog tias koj lag ntseg lossis tsis hnov ​​​​lus zoo, dig muag, lossis qhov muag tsis pom kev zoo, “yam lus xub thawj” yuav yog hom kev sib txuas lus uas koj ib txwm siv. Qhov no tuaj yeem xam muaj xws li, piv txwv hais tias, lus piav tes, ntawv Braille, lossis kev sib txuas lus ntawm qhov ncauj. 34 C.F.R. Tshooj 303.25; Tsoom Fwv California Txoj Cai tshooj 95020(g)(1).  

3. Yog tias kuv tus menyuam tab tom raug ntaus nqi thiab txheeb xyuas rau Early Start lossis rau cov kev pab cuam hauv Early Start, kuv puas muaj cai rau kev ntaus nqi thiab kev txheeb xyuas ua kuv yam lus xub thawj?

   Muaj. Cov kev ntaus nqi thiab kev txheeb xyuas yuav tsum tau ua nyob rau koj yam lus xub thawj, tshwj hais tias lub chaw pab cuam hauv cheeb tsam tuaj yeem qhia kom pom tau hais tias ua tsis tau li ntawd. 34 C.F.R. Tshooj 303.321(a)(5); Tsoom Fwv California Txoj Cai tshooj 95020(g)(1). Yog tias koj yam lus xub thawj yog lug Nyab Laj, ces lub chaw pab cuam hauv cheeb tsam yuav tsum ua qhov kev ntaus nqi thiab kev txheeb xyuas ua lus Nyab Laj. Qhov kev txheeb xyuas no, lub rooj sib tham txhawm rau txiav txim txog kev tsim nyog, thiab lub rooj sib ntawm ntawm qhov Kev Npaj Txog Kev Pab Cuam Rau Tsev Neeg Ib Leeg Zus (IFSP - Individualized Family Service Plan) xub thawj yuav tsum muab ua raws koj yam lus xub thawj tsis dhau 45 hnub tom qab qhov kev xa mus rau lub chaw pab cuam hauv cheeb tsam. 34 C.F.R. Tshooj 303.310; Tsoom Fwv California Txoj Cai tshooj 95020(b). 

4. Yuav ua li cas rau cov kev txheeb xyuas txog tsev neeg? Puas yog yuav tsum muab qhov kev txheeb xyuas txog tsev neeg ua raws yam lus xub thawj ntawm tus neeg hauv tsev neeg uas raug txheeb xyuas?

   Yog. Kev txheeb xyuas ntawm ib tug neeg hauv tsev neeg uas yog ib feem ntawm kev txheeb xyuas txog tsev neeg yuav tsum tau muab ua raws yam lus xub thawj ntawm tus neeg hauv tsev neeg ntawd, tshwj hais tias lub chaw pab cuam hauv cheeb tsam tuaj qhia kom pom tau hais tias ua tsis tau li ntawd. 34 C.F.R tshooj 303.321(a)(6), 303.25; Tsoom Fwv California Txoj Cai tshooj 95020(g)(1).

5. Cov rooj sib tham ntawm IFSP ne ho yuav ua li cas? Cov rooj sib tham ntawd puas yuav tsum nyob rau kuv yam lus xub thawj?

   Yog. Koj muaj cai muaj tus txheej txheem kev npaj rau IFSP thiab lub rooj sib tham IFSP nyob rau koj tsev neeg yam lus xub thawj, tshwj hais tias lub chaw pab cuam hauv cheeb tsam tuaj qhia kom pom tau hais tias ua tsis tau li ntawd. 34 C.F.R. tshooj 303.342(d); Tsoom Fwv California Txoj Cai tshooj 95020(g)(1). IFSP yuav tsum raug muab ntsuam xyuas txhua 6 lub hli lossis ua heev dua ntawd thaum tsim nyog. 34 C.F.R. tshooj 303.342(b); 17 C.C.R. tshooj 52102(b).

6. Kuv puas tuaj yeem tau txais cov luam qauv ntaw qhov IFSP ua kuv yam lus xub thawj?

   Lub chaw pab cuam hauv cheeb tsam yuav tsum piav qhia kom txhij rau koj, ua koj yam lus xub thawj, hais tias muaj dab tsi nyob rau hauv IFSP. 34 C.F.R. tshooj 303.342(e).

   Lub chaw pab cuam hauv cheeb tsam kuj tseem yuav tsum muab ib tsab luam qauv ntawm IFSP rau koj nyob rau koj yam lus xub thawj, tshwj hais tias lub Tsev Haujlwm Saib Xyuas Txog Kev Paub Tab (DDS, Department of Developmental Services) txiav txim siab nws yuav yog ib qho nyuaj rau lawv los mus ua li ntawd. Tsoom Fwv California Txoj Cai tshooj 95020(g)(1); 2 CCR 11162(c).

7. Kuv yuav tuaj yeem tau txais tsab luam qauv ntawm kuv qhov IFSP ua kuv yam lus xub thawj sai npaum li cas?

   Tsis pub dhau lub sijhawm tsim nyog, tshwj hais tias DDS hais tias nws yog lub nra hnyav heev rau lub chaw pab cuam hauv cheeb tsam. Tsoom Fwv California txoj Cai tshooj 95020(g)(1); 2 CCR 11162(c). Tej zaum koj yuav muaj peev xwm tau txais cov ntaub ntawv txhais lus ntawm qhov IFSP sai dua yog tias koj ceeb toom rau lub chaw pab cuam hauv cheeb tsam tias yog koj tau txais cov ntaub ntawv IFSP txhais lus sai npaum li cas, ces koj yuav tuaj yeem pom zoo rau cov kev pab cuam thiab koj tus menyuam yuav tuaj yeem tau txais cov kev pab cuam sai npaum li ntawd. Yog koj tus menyuam tau txais kev pab cuam los daws nws tus(cov) mob sai npaum li cas, ces yuav muaj lub sijhawm tau txais txiaj ntsig zoo yuav ntau npaum li ntawd.

8. Lub chaw pab cuam hauv cheeb tsam puas yuav tsum tau teev ntaub ua ntawv cia hais tias kuv yam lus xub thawj yog yam lus twg nyob rau hauv IFSP?

   Yog. Lub chaw pab cuam hauv cheeb tsam yuav tsum muab sau rau hauv IFSP hais tias koj yam lus xub thawj yog yam lus twg. Tsoom Fwv California Txoj Cai tshooj 95020(g)(2). Piv txwv hais tias koj ib txwm hais lus Kaus Lim, ces koj qhov IFSP yuav tsum hais tias koj yam lus xub thawj yog lus Kaus Lim.

9. Kuv yuav tuaj yeem hais kom lub chaw pab cuam hauv cheeb tsam ua txhua yam nyob rau kuv yam lus xub thawj tau li cas?

   Koj tuaj yeem siv tsab ntawv piv txwv no los mus thov raws kev sau ntawv.

   Hnub Tim: _______________
   Xa Rau: ____________________________________(Tus Cev Ncauj Cev Lus Txog Kev Pab Cuam Ntawm Lub Chaw Pab Cuam Hauv Cheeb Tsam Lub Npe)

   Kev Thov Txog Xov Xwm Nyob Rau Kuv Yam Lus Xub Thawj Rau: __________________ (Lub Npe ntawm Tus Neeg Thov Kev Pab ntawm Lub Chaw Pab Cuam Hauv Cheeb Tsam)

   Kuv thov kom muab qhov IFSP hloov kho kom muaj nqe lus hais tias peb yam lus xub thawj yog _________________.

   Kuv thov kom txhua yam kev txheeb xyuas, thiab qhov kev npaj thiab kev tsim kho ntawm kuv tus menyuam qhov IFSP, yog muab ua nyob rau kuv yam lus xub thawj. Tsis tas li ntawd, thov muab ib tsab luam qauv uas txhais tau lawm ntawm kuv qhov IFSP nyob rau kuv yam lus xub thawj raws li lub sij hawm uas teev tseg raws kev cai lij choj.

   Nrog kev saib siab,

   _________________________________________
   Lub Npe

10. Yuav ua li cas yog hais tias lub chaw pab cuam hauv cheeb tsam tsis teev ntaub ntawv qhia kuv yam lus xub thawj lossis tsis nqis tes ua kev txheeb xyuas, kev ntaus nqi, lossis tus txheej txheem kev npaj haujlwm ua kuv yam lus xub thawj?

    Yog hais tias koj lub chaw pab cuam hauv cheeb tsam tsis teev ntaub ntawv ua koj yam lus xub thawj lossis tsis nqis tes ua qhov kev txheeb xyuas, kev ntaus nqi, lossis tus txheej txheem kev npaj haujlwm ua koj yam lus xub thawj, ces koj tuaj yeem xa ib tsab ntawv foob kev tsis txaus siab. 17 CCR 52170. Yog xav ua ntawv foob kev tsis txaus siab nyob rau hauv lub Phiaj Xwm Early Start, ces mus rau ntawm lub page hu ua Txheej Txheem Kev Tsis Txaus Siab Ntawm Early Start kom tau daim foos-DS 1827 uas siv Thov Txog Kev Tshuaj Ntsuam Txog Kev Tsis Txaus Siab ntawm Early Start. Nws muaj ua lus Askiv thiab lus Xab Pes Niv. Xa daim foos, lossis tsab ntawv luv-luv, mus rau:

    Department of Developmental Services (DDS)
    Office of Human Rights and Advocacy Services
    Attention: Appeals, Complaints, and Projects
    1215 O Street, (MS 8-20)
    Sacramento, CA 95814