តើស្វ័យនិយោជន៍គឺជាអ្វី?

ស្វ័យនិយោជន៍មានន័យថា “បរិបទមានការងារធ្វើ ដែលបុគ្គលម្នាក់​ធ្វើ​ការ​នៅ​ក្នុង​មុខរបរដែលគេជ្រើសរើស ដើម្បីរកប្រាក់ចំណេញ ឬប្រាក់កម្រៃ​នៅ​ក្នុង​អា​ជីវ​កម្មខ្នាតតូចរបស់ខ្លួន ដោយមានការគ្រប់គ្រង​និង​ការទទួល​ខុស​ត្រូវ​លើ​សេចក្តី​សម្រេចចិត្ត ដែលជះឥទ្ធិពលដល់ការ​ប្រកប​អាជីវកម្ម” (9 CCR § 7024.9)។ 

ស្វ័យនិយោជន៍អាចជាជម្រើសដ៏ល្អសម្រាប់បុគ្គលដែលមានពិការភាពដែលត្រូវការបរិយាកាសការងារដែលអាចបត់បែនបាន។  វាអាចជួយកាត់បន្ថយឧបសគ្គនៅកន្លែងការងារ ដូចជាកង្វះ​មធ្យោបាយ​​ដឹក​ជញ្ជូនដែលអាចផ្តល់ជូនបាន ភាពអស់កម្លាំង អគារ​និង​ការដ្ឋាន​ដែល​មិន​អា​ច​ចូលទៅដល់បាន និងតម្រូវការសម្រាប់​ជំនួយ​ផ្ទាល់​ខ្លួន។ ច្បាប់ស្តីពីវិសោធនកម្មការស្តារនីតិសម្បទាឆ្នាំ 1998 លើកទឹកចិត្តឱ្យប្រើ​ប្រាស់​ស្វ័យនិយោជន៍ជាមធ្យោបាយដែលអាចទៅរួចដើម្បីសម្រេចបាននូវលទ្ធផលការងារប្រកបដោយជោគជ័យ។ ក្រសួងស្តារនីតិសម្បទា (DOR) ប្រហែលជាអាចជួយអ្នកសម្រេចគោលដៅ​ការ​ងារ​របស់អ្នកនៅក្នុងបរិបទស្វ័យនិយោជន៍។

តើខ្ញុំស្វែងយល់បន្ថែមអំពីស្វ័យនិយោជន៍ដោយរបៀបណា?

ក្នុងនាមជាអតិថិជនរបស់ DOR អ្នកមានសិទ្ធិទទួលបានព័ត៌មានពី DOR ដែ លជួយអ្នកក្នុងការធ្វើការសម្រេចចិត្តដ៏មានន័យអំពីបរិបទការងារ សេវា​ក​ម្ម និងអ្នកផ្តល់សេវាកម្មរបស់អ្នក។  មុនពេលបង្កើតគម្រោងស្វ័យនិយោជន៍បុគ្គល (IPE) អ្នកប្រឹក្សាយោបល់​អំពី​ការ​ស្តារនីតិសម្បទារបស់អ្នកគប្បី​ជូនដំណឹង​អ្នក​អំពី​លក្ខណៈវិនិច្ឆ័យ និង​ដំ​ណើ​រ​ការសម្រាប់ការវាយតម្លៃថាតើបរិបទស្វ័យនិយោជន៍​មាន​លក្ខណៈ​សមស្រប​ស​ម្រាប់​​អ្នកដែរឬទេ។  អ្នកផ្តល់ប្រឹក្សាអំពីការស្តារនីតិសម្បទារបស់អ្នកគប្បីផ្ដល់​ព័ត៌មាន​ជូន​អ្នក​អំពី​វិសាលភាពនៃសេវាកម្មដែល DOR អាចផ្តល់ជូន​ដើម្បីជួយ​ដល់អតិថិជន​ដែល​មានសិទ្ធិ​ឲ្យ​សម្រេច​បានភាពមានការងារធ្វើនៅក្នុងបរិបទស្វ័យនិយោជន៍ និ​ង​​ទំនួលខុសត្រូវរបស់អ្នកដើម្បី​កំណត់ និងទទួលបានធនធាន​ដែល​ចាំ​បាច់​ក្នុងការបង្កើត និងប្រកបអាជីវកម្មខ្នាតតូចដែលបានស្នើឡើង (9 CCR §7136.4)។

តើនរណាជាអ្នកមានសិទ្ធិទទួលបានស្វ័យនិយោជន៍?

ប្រសិនបើអ្នកចាប់អារម្មណ៍លើលទ្ធផលស្វ័យនិយោជន៍ ដំបូងអ្នកត្រូវតែ​បង្ហាញ​ថាបរិបទស្វ័យនិយោជន៍គឺសមស្រប។ បរិបទស្វ័យនិយោជន៍ដែលបានស្នើឡើង គឺមានលក្ខណៈ​សមស្រប​នៅ​ពេល​ដែល​​បានបំពេញតាមលក្ខណៈវិនិច្ឆ័យ​ដូចខាង​ក្រោម៖

• វា​​ស្របគ្នាជា​មួយ​​​នឹង​លក្ខណៈផ្ទាល់ខ្លួនរបស់អ្នក រួមមានភាពខ្លាំង ធនធាន អា​ទិភាព ក្តីកង្វល់ សមត្ថភាព លទ្ធភាព ចំណាប់អារម្មណ៍ និងការជ្រើស​រើស​ដែលមានព័ត៌មានគ្រប់ជ្រុងជ្រោយរបស់អ្នក។
• វាទំនងជាសមហេតុសមផលដែលអាចបង្កើតប្រាក់ចំណូលបានគ្រប់គ្រាន់ក្នុងរយៈពេលសមស្រប បន្ទាប់ពីអ្នកចាប់ផ្តើមប្រកបអាជីវកម្ម មិនត្រូវលើសពី 12 ខែ ដើម្បីទូទាត់ចំណាយប្រតិបត្តិការដែលកំពុងកើតមាន។  ប្រាក់ចំណូលដែលទទួលបានគួរតែអាចប្រៀបធៀបទៅនឹងបុគ្គលដែលមិនមែនជាជនពិការផ្សេងទៀត ដែលជាបុគ្គលស្វ័យនិយោជន៍ក្នុងមុខរបរស្រដៀងគ្នា និងមានជំនាញស្រដៀងគ្នា។ 
• អ្នកត្រូវតែទទួលបានធនធានសំខាន់ៗទាំងអស់ដើម្បីបង្កើត និង​ប្រកប​អា​ជីវកម្មខ្នាតតូចដែលបានស្នើឡើង រួមមានការផ្ដល់មូលនិធិ​លើចំណាយ​ប្រតិ​បត្ដិ​ការអាជីវកម្មដែលកំពុងកើតមាន។

សូមមើល 9 CCR § 7136.6

តើ DOR ពិចារណាអំពីអ្វីខ្លះនៅពេលកំណត់ថាតើបរិបទ​ស្វ័យ​និ​យោ​​ជន៍​គឺសមស្របសម្រាប់ខ្ញុំដែរឬទេ?

DOR ត្រូវតែពិចារណាអំពីព័ត៌មានដែលមាន សេចក្ដីសង្ខេបនៃសំណើ​អាជីវ​ក​ម្ម​​ខ្នាតតូចរបស់អ្នក និងព័ត៌មានដែល​ទទួល​បានតាមរយៈដំណើរការវាយតម្លៃ (9 CCR § 7136.6 (c))។

តើការវាយតម្លៃលើលក្ខណៈផ្ទាល់ខ្លួនជាអ្វី?

ការវាយតម្លៃលើលក្ខណៈផ្ទាល់ខ្លួន គឺជាការកំណត់នូវ​ជំនាញ​និងសមត្ថភាព​ផ្ទាល់​​ខ្លួន ចំ​ណេះដឹងបច្ចេកទេស បទពិសោធ ការអប់រំ ប្រវត្តិហិរញ្ញវត្ថុ និង​កំណត់ត្រាឥណទានរបស់អ្នក។  ប្រសិនបើអ្នកត្រូវការការបណ្តុះបណ្តាល ឬបទពិសោធបន្ថែមក្នុង​គោល​បំណ​ង​ដើម្បីបង្កើតអាជីវកម្មខ្នាតតូចរបស់អ្នក DOR គប្បីពិចារណាថាតើក្រសួងអា​ច​ជួយអ្នកឲ្យ​ទទួលបាន​ការ​បណ្តុះបណ្តាលបន្ថែម ឬក៏បទពិសោធពាក់ព័ន្ធ និង​បញ្ចូលសេវា​កម្មទាំង​​នេះនៅក្នុងផែនការ IPE របស់អ្នកបានដែរឬទេ (9 CCR § 7136.7 (a))។

ការវាយតម្លៃនេះគួរតែរួមបញ្ចូលយ៉ាងហោចណាស់មួយក្នុងចំណោមកត្តាដូចខាងក្រោម៖ តេស្តស្វ័យវាយតម្លៃ ធនធានវេបសាយនានា ដូចជាធនធាន​ដែល​មា​នតាមរយៈរដ្ឋបាលអាជីវកម្មខ្នាតតូច និងការចូលរួមក្នុងសិប្បសាលា ឬ​សិក្ខា​សា​លាស្តីពីស្វ័យនិយោជន៍ (9 CCR § 7136.7(b))។  DOR ក៏អាចនឹងពិចារណាអំពីការចូលរួម​របស់​អ្នកនៅក្នុងសេវាកម្ម​វិជ្ជាជីវៈ​ក្នុង​ការវាយតម្លៃលើលក្ខណៈផ្ទាល់ខ្លួនរបស់អ្នកផងដែរ (CCR §7136.7 9 (c))។

តើ DOR វាយតម្លៃលើសំណើអាជីវកម្ម​របស់ខ្ញុំ​ដោយរបៀបណា?

ដំបូង DOR នឹងសុំ​ឲ្យអ្នកផ្ដល់នូវខ្លឹមសារសង្ខេប​អំពីអាជីវកម្ម​ខ្នាតតូច​ដែល​មាន​ព័ត៌មានមូលដ្ឋានអំពីអាជីវកម្មខ្នាត​តូចដែលបានស្នើ។ 

ខ្លឹមសារសង្ខេបអំពីអាជីវកម្មខ្នាតតូចគួរតែរួមបញ្ចូល៖

• ផលិតផល ឬសេវាកម្មរបស់អាជីវកម្មខ្នាតតូចដែលបានស្នើឡើង
• ការប៉ាន់ស្មានអំពីប្រាក់ចំណូល និងប្រាក់ចំណាយប្រចាំខែនៃ​អាជីវ​កម្ម​ខ្នាត​តូច​សម្រាប់រយៈពេល 12 ខែដំបូងនៃប្រតិបត្តិការអាជីវកម្ម
• ចំនួនម៉ោងដែលអ្នកនឹងធ្វើការនៅក្នុងអាជីវកម្មខ្នាតតូចប្រចាំខែ
• ថ្លៃចំណាយដំបូងដែលចាំបាច់ដើម្បីបង្កើតអាជីវកម្មខ្នាតតូចដែល​បានស្នើ​ឡើ​ង
• ធនធានរបស់អ្នក ដូចជាប្រាក់សន្សំ ឬធនធានហិរញ្ញវត្ថុ ឧបករណ៍ យានយន្ត ឧប​ករណ៍ សម្ភារៈ ឬវត្ថុផ្សេងទៀតដែលអ្នកមាន ដែលអ្នក​នឹង​​​ប្រើប្រាស់​សម្រា​ប់​ប្រកបអាជីវកម្មខ្នាតតូចរបស់អ្នក
• ការវិភាគទីផ្សារ និងយុទ្ធសាស្រ្តទីផ្សារសម្រាប់អាជីវកម្មខ្នាតតូច  និង
• តម្រូវការបុគ្គលិកសម្រាប់អាជីវកម្មខ្នាតតូច។

9 CCR § 7136.8(a)

នៅត្រង់ចំណុចណាដែលតម្រូវឲ្យមានការផ្តល់ជូននូវព័ត៌មានលម្អិត​បន្ថែម​អំពី​អាជីវកម្មខ្នាតតូចដែលបានស្នើឡើងដើម្បីកំណត់អំពីលទ្ធ​ភាពជោគជ័យ​នៃ​អា​ជីវកម្មខ្នាតតូច អំពីវិសាលភាពនៃសេវាកម្មដែលត្រូវ​ការ និង/ឬវា​នឹងផ្តល់​ប្រ​យោ​ជន៍ដល់អ្នកក្នុងការទទួលបាននូវធនធាន​ផ្សេងទៀត នោះអ្នកនឹង​អភិវ​ឌ្ឍ​ផែនការអាជីវកម្មខ្នាតតូច។  អ្នកអាចទទួលបានជំនួយក្នុងការធ្វើផែនការអាជីវកម្មខ្នាតតូច​ពី DOR និង​/​ឬ​ត្រូវបានណែនាំ​ដោយ DOR ទៅរដ្ឋបាលអាជីវកម្មខ្នាតតូច​របស់​សហរដ្ឋ​អាមេ​រិក មជ្ឈមណ្ឌលអភិវឌ្ឍអាជីវកម្មខ្នាតតូចនៅ​មហាវិទ្យាល័យ​​សហគមន៍ក្នុង​តំ​បន់ អង្គការសេវាប្រឹក្សាយោបល់អាជីវកម្ម​ខ្នាតតូច​ដោយនិវត្តជន (SCORE) ឬក៏អ្នកប្រឹក្សាយោបល់ផ្នែកអាជីវកម្ម​ខ្នាត​តូច  (9 CCR § 7136.8 (b - d))។ 

ផែនការអាជីវកម្មខ្នាតតូចគួររួមបញ្ចូល៖

• ការពិពណ៌នាអំពីអាជីវកម្មខ្នាតតូចដែលបានស្នើឡើង និង​ផលិតផល ឬសេ​វា​កម្មដែលត្រូវផ្តល់ជូន
• ទម្រង់រចនាសម្ព័ន្ធអាជីវកម្ម
• ការវិភាគទីផ្សារបែបលម្អិត រួមមានការកំណត់ពីអតិថិជន​ដែល​មាន​​សក្តា​នុព​ល ទីតាំងភូមិសាស្ត្រដែលអាជីវកម្មនឹងផ្តល់ផលិតផល ឬ​សេវាកម្ម និងការប្រ​កួត​ប្រជែងខ្លាំងនៅក្នុងតំបន់
• ផែនការដែលរៀបរាប់ពីរបៀបចែកចាយ និងផ្សព្វផ្សាយផលិតផល ឬសេវាកម្ម
• តារាងពេលវេលាដែលគ្រោងសម្រាប់ចាប់ផ្តើមប្រតិបត្ដិការអាជីវកម្ម និងការ​ប៉ា​ន់ប្រមាណអំពីម៉ោងធ្វើការលើការងារអាជីវកម្មមុនចាប់​ផ្តើមប្រតិបត្ដិការ
• ផែនការហិរញ្ញវត្ថុដែលរួមមានការព្យាករណ៍អំពីការប៉ាន់ប្រមាណទំហំ​នៃការលក់ ប្រាក់ចំណូលប្រចាំខែ និងចំណាយប្រតិបត្តិ​ការសម្រាប់​ឆ្នាំ​ដំបូង​នៃ​ការ​ប្រកប​អាជីវកម្ម ការធ្វើបញ្ជីលម្អិតអំពីចំណាយនានាដែល​ចាំ​បាច់សម្រាប់​បង្កើត​អាជី​វ​កម្ម និងការប៉ាន់ប្រមាណអំពីពេលវេលាដែល​អាជីវកម្មនេះនឹងផ្តល់ប្រាក់​ចំ​ណូល​​ដែលលើសពីថ្លៃចំណាយប្រតិបត្ដិការ
• ការពិពណ៌នាអំពីអាជ្ញាប័ណ្ណ លិខិតអនុញ្ញាត ឬអញ្ញត្រកម្ម និងធានា​រ៉ាប់រង​ដែ​លត្រូវមាន
• ការពិពណ៌នាអំពីការផ្តល់សេវាស្តារនីតិសម្បទាវិជ្ជាជីវៈដែលបុគ្គលស្នើ​សុំ​ពីក្រសួង ដែលស្របទៅនឹងនឹងបទប្បញ្ញត្តិទាំងនេះ ធនធានដែល​នឹង​ត្រូវ​ទទួល​បាន​ពី​ប្រភពផ្សេងទៀតដើម្បីបង្កើត និងប្រតិបត្តិការ​អាជីវ​កម្មខ្នាតតូច របៀប​ផ្តល់​មូលនិធិសម្រាប់ចំណាយលើប្រតិបត្តិការ​អាជីវ​កម្ម​ខ្នាតតូចដែលកំពុងកើត​មា​ន ទោះបីជាតាមរយៈប្រាក់ចំណូលអាជីវកម្ម ប្រាក់កម្ចី ឬក៏​ប្រភព​ផ្សេង​ទៀត​ក៏ដោយ និងរបៀបដែលបុគ្គលម្នាក់ៗនឹងផ្តល់​ធន​ធាន​សម្រាប់​ចំណា​យលើ​ការ​រស់នៅមូលដ្ឋានរហូតដល់អាជីវកម្មខ្នាត​តូច​បង្កើតប្រាក់​ចំណូល​បាន​គ្រប់​គ្រាន់ និង
• ការពិពណ៌នាអំពីកិច្ចការដែលបុគ្គលនឹងត្រូវអនុវត្តក្នុងប្រតិបត្ដិការ​អាជីវកម្ម និងម៉ោងដែលបុគ្គលត្រូវធ្វើការដើម្បីទទួលបានប្រាក់ចំណូល​តាម​ការ​ព្យាករណ៍​ទុក។

9 CCR § 7136.8(e)

តើ DOR អាចជួយខ្ញុំបង្កើតអាជីវកម្ម​ខ្នាតតូចរបស់ខ្ញុំបានយ៉ាង​ដូច​ម្តេច?

DOR អាចផ្តល់ជូនដល់អតិថិជន​ដែលមានសិទ្ធិ​នូវការ​វាយតម្លៃ ជំនួយ​បច្ចេក​ទេស និងការបណ្តុះបណ្តាលដើម្បីជួយ​ដល់បុគ្គលក្នុង​ការរៀបចំការងារ​នៅ​ក្នុង​បរិបទ​ស្វ័យនិយោជន៍។  DOR ក៏អាចផ្ដល់មូលនិធិលើចំណាយ​ដំបូង​តែ​មួយលើក​ដើម្បីបង្កើត​អាជីវ​កម្ម​ខ្នាតតូចដែលបានស្នើឡើង។ 

ចំណាយដំបូងតែមួយលើក គឺជាចំណាយដែលស្រប​គ្នាជាមួយ​វិសាលភាព​ទូទៅ​នៃសេវាកម្ម ថ្លៃអាជ្ញាបណ្ណការងារ ការទិញ ឬការជួលឧបករណ៍ ឬក៏​បរិក្ខារ​ដ៏ទៃ​ទៀត សន្និធិ និងការផ្គត់ផ្គង់ដំបូងរបស់​ DOR សម្រាប់ប្រតិបត្តិការ​រយៈពេល​ប្រាំ​មួយខែដំបូង និងការ​ទូទាត់ប្រាក់កក់ដំបូងដែលត្រូវធ្វើឡើង​ចំពោះ​កិច្ច​សន្យា​ជួល ឬសម្រាប់​ការ​ប្រើប្រាស់​​ដែលមានសមស្រប។  DOR នឹងផ្តល់មូលនិធិតែលើសេវាកម្មដែលចាំ​បាច់ដើម្បីជួយ​ដល់​បុគ្គល​ឲ្យ​ទទួ​ល​បាននូវការងារក្នុងបរិបទស្វ័យនិយោជន៍ ចំណាយដែលមានប្រសិទ្ធភាព និង​ស្របជាមួយ​ចំណាយដំបូង​ធម្មតា និងទូទៅ ដែលចាំបាច់សម្រាប់​បង្កើត​អា​ជីវ​កម្មខ្នាតតូច​ប្រហាក់ប្រហែលគ្នាប៉ុណ្ណោះ។ (9 CCR § 7137(a-c)។  

តើ DOR ត្រូវបានហាមឃាត់មិនឲ្យផ្តល់​អ្វីខ្លះ?

DOR ត្រូវបានហាមឃាត់មិនឲ្យផ្តល់មូលនិធិ​ដូច​ខាងក្រោម៖

• ចំណាយទាក់ទងនឹងការពង្រីកអាជីវកម្មខ្នាតតូច
• ការជួល ឬទិញអចលនទ្រព្យ
• ការសាងសង់ ឬការកែលំអអចលនទ្រព្យ
• ការបង់ប្រាក់ពន្ធ ឬពន្ធលើទ្រព្យសម្បត្តិឃាត់ទុក
• ការបង់ថ្លៃប៉ាតង់ ឬសម្រាប់ការបង្កើតផលិតផល
• ការផ្តល់ហិរញ្ញវត្ថុសារជាថ្មី ឬការសងបំណុល
• សំណង ឬការបង់ប្រាក់លើការខាតបង់ណាមួយដែលទាក់ទងនឹង​អាជីវកម្ម​ខ្នាត​តូច
• ការទិញអាជីវកម្មដែលមានស្រាប់ ឬក៏សិទ្ធិអាជីវកម្ម
• ការទិញ ឬការជួលយានយន្តដើម្បីប្រើប្រាស់នៅក្នុងប្រតិបត្ដិការ​អាជីវកម្ម​ខ្នាត​តូច
• ប្រាក់ឈ្នួល និងអត្ថប្រយោជន៍សម្រាប់និយោជិត និង
• ការផ្តល់មូលនិធិលើចំណាយប្រតិបត្តិការដែលកំពុងកើតមាន។

9 CCR §7137(d)

ប្រសិនបើអាជីវកម្មខ្នាតតូចដែលអ្នកបានស្នើឡើងត្រូវការចំណុចណា​មួយ​​ក្នុ​ងចំណោមចំណុចខាងលើ អ្នកចាំបាច់ត្រូវធានាចំពោះធនធាន​នានាក្រៅពី​ធនធានរបស់ DOR សម្រាប់​ចំណាយ​​​ទាំងនេះ។

តើខ្ញុំត្រូវទទួលបានធនធានប្រភេទណាខ្លះដោយខ្លួនឯង?

DOR ជួយអតិថិជនដែលមានសិទ្ធិ​តែទៅលើ​កា​រ​បណ្តុះបណ្តាល ជំនួយបច្ចេក​ទេ​ស និងសន្និធិនិងការផ្គត់ផ្គង់ដំបូងប៉ុណ្ណោះ ដើម្បីបង្កើតអាជីវកម្មខ្នាតតូច។  អតិថិជនត្រូវតែទទួលបានធនធានទាំងអស់ដែលចាំបាច់ក្នុងការ​បង្កើត និង​ប្រតិបត្តិការអាជីវកម្មខ្នាតតូចដែលបានស្នើឡើង ក្រៅពី​សេវាកម្ម​ដែល​បាន​ផ្តល់​ជូនដោយ DOR។  DOR គប្បីជួយអ្នកកំណត់រកធនធាន​ដែលចាំ​បាច់ក្នុងការបង្កើត និង​ប្រតិ​បត្តិ​ការអាជីវកម្មខ្នាតតូចរបស់អ្នក (9 CCR §7136.9(a)(1))។

ចំណាយប្រតិបត្តិការអាជីវីកម្មដែលកំពុងកើតមាន រួមមាន​ប៉ុន្តែ​មិន​កំណត់​ត្រឹ​ម៖ ថ្លៃជួល ថ្លៃសេវាសាធារណៈ ធានារ៉ាប់រង សេវាកម្មជំនាញវិជ្ជាជីវៈ ប្រាក់​បៀ​វត្សរ៍ ពន្ធលើប្រាក់បៀវត្សរ៍ សារពើភ័ណ្ឌ សន្និធិឬការផ្គត់ផ្គង់ (សន្និធិនិង​ការផ្គត់​ផ្គង់ដំបូងដែលផ្តល់ជូនសម្រាប់រយៈពេលប្រាំមួយខែជា​ចំណាយលើកដំបូង) ការ​ផ្សព្វផ្សាយពាណិជ្ជកម្ម ការបញ្ចុះតម្លៃទំនិញ ការ​ជួសជុល​និងការថែ​រក្សា​ទ្រព្យ​សម្បត្តិ ការផ្លាស់ប្តូឧបករណ៍​និងសម្ភារៈ​បរិក្ខារ ថ្លៃចំណាយផ្សេងៗ សេវាជំនួយ ដូចជាអ្នកចូលរួម អ្នកអាន និង​អ្នក​បកប្រែ ដែលប្រើប្រាស់នៅ​ក្នុង​ប្រតិប​ត្ដិ​ការអាជីវកម្ម និងការដឹក​ជញ្ជូន​ដែលនឹងប្រើប្រាស់នៅ​ក្នុងប្រតិបត្ដិកា​រអា​ជីវកម្ម (9 CCR § 7136.8(g))។  អ្នកត្រូវកំណត់រកធនធានដែលចាំបាច់ដើម្បីផ្ដល់មូលនិធិលើចំណាយ​ទាំងនេះ។ 

ធនធានទាំងនេះអាចជាមូលនិធិ ឬក៏ឧបករណ៍ដែលអ្នកមាន ឬបាន​​​​មក​ពី​សមាជិកគ្រួសារ ការប្រើប្រាស់សេវាកម្ម និងអត្ថប្រយោជន៍​ប្រហាក់​ប្រហែល​គ្នា​នេះ ការផ្តល់មូលនិធិពីប្រាក់ជំនួយ ប្រាក់កម្ចី កម្ម​វិធីកម្ចីធានា មូលនិធិ​អភិវ​ឌ្ឍសេដ្ឋកិច្ច និង/ឬក៏ PASS (9 CCR § 7136.9 (a) (1))។ 

ប្រសិនបើអ្នកមិនទទួលបានមូលនិធិពីប្រភពផ្សេងក្រៅពី DOR ទេ DOR​អាច​ពិចារណា​លើការសម្រេចចិត្ត និងហេតុផល​សម្រាប់ការ​សម្រេចចិត្ត​បែប​នេះ​នៅ​ក្នុងការវាយតម្លៃថាតើបរិបទស្វ័យនិយោជន៍​មាន​លក្ខណៈ​សម​ស្រប​​ឬទេ​​ (9 CCR § 7136.9 (c))។

តើគម្រោងស្វ័យនិយោជន៍បុគ្គល (IPE) របស់ខ្ញុំសម្រាប់ស្វ័យ​និយោ​ជន៍​​នឹង​​ត្រូវបាន​បង្កើត​នៅពេល​ណា? 

គម្រោង IPE នឹងត្រូវបានបង្កើតឡើង "នៅពេលដែលលទ្ធផល​ការងារ​សម​ស្រ​ប​​ និងសេវាកម្មចាំបាច់ដើម្បីជួយបុគ្គលឲ្យ​សម្រេចបានលទ្ធផល​នោះ​ត្រូវ​បាន​កំណត់ " (9 CCR § 7136.5(a))។  នេះមានន័យថា អ្នក និង DOR នឹងយល់​ស្រប​ថា ផែនការអាជីវកម្មរបស់អ្នក គឺអាចសម្រេចបាន និងឯកភាព​អំពី​ប្រភេទសេវាកម្ម​ ដែល​អ្នកនឹ​ង​ត្រូវការ​ដើម្បី​បង្កើតអាជីវកម្មខ្នាតតូចរបស់អ្នក។

លទ្ធផលការងារ គឺជាការងារដែលអ្នកកំពុងស្វែងរកដើម្បីទទួលបាន​ការ​ជ្រើស​រើស​ឲ្យបម្រើការងារ និងការពិពណ៌នាអំពីបរិបទស្វ័យនិយោជន៍។  ឧទាហរណ៍ ប្រសិនបើអ្នកមានបំណងចង់ធ្វើការជាគណនេយ្យករនៅ​ក្នុង​អាជីវ​កម្មគណនេយ្យផ្ទាល់ខ្លួនរបស់អ្នក ដែលអ្នកគឺជាថៅកែ ជា​អ្នកកែលម្អដែល​កំ​ពុងធ្វើការជាប់កិច្ចសន្យាសម្រាប់អតិថិជនដែលបង់ប្រាក់ឲ្យអ្នកដោយផ្ទាល់ (9 CCR § 7136.5 (b))។

ព័ត៌មានដែលអាចស្វែងរកបាន រួមទាំងខ្លឹមសារសង្ខេបនៃអាជីវកម្ម​ខ្នាត​តូច​ដែលបានស្នើឡើងនឹងត្រូវបានប្រើប្រាស់ដើម្បីវាយតម្លៃថា​តើបរិបទស្វ័យនិ​យោ​ជន៍មានលក្ខណៈសមស្របឬទេ និងដើម្បី​កំណត់​តម្រូវការ និង​សេវា​វិជ្ជាជីវៈ​របស់​អ្នក។  នៅពេលត្រូវការព័ត៌មានបន្ថែម DOR អាចសុំឲ្យ​អ្នកធ្វើផែនការ​អាជីវកម្ម​ខ្នាត​តូចមួយ (9 CCR § 7136.5 (e) (1) និង (2)។

តើគម្រោង IPE របស់ខ្ញុំគួររួមបញ្ចូលអ្វីខ្លះ?

គម្រោង IPE របស់អ្នកគួររួមបញ្ចូលព័ត៌មានអំពី​មូលហេតុ​ដែល​ធ្វើឲ្យបរិបទ​ស្វ័​យ​​និយោជន៍​មានលក្ខណៈសមស្រប​សម្រាប់អ្នក និងប្រភេទ​សេវាកម្មដែ​ល​អ្នក​ត្រូវការដើម្បីបង្កើតអាជីវកម្ម​ខ្នាតតូចរបស់អ្នក។  នេះរួមមាន៖

• ការពិពណ៌នាអំពីចំណាយដំបូងតែមួយលើកក្នុងការបង្កើតអាជីវ​កម្ម​ខ្នាត​តូច​របស់អ្នក ដែល DOR នឹងរ៉ាប់រង។
• ទំនួលខុសត្រូវរបស់អ្នកក្នុងការចូលរួមយ៉ាងសកម្មនៅក្នុងការដាក់​ពាក្យសុំ និ​ង​​​ទទួលបានធនធានបន្ថែមដែលចាំបាច់។
• កាលបរិច្ឆេទប៉ាន់ស្មានដែលអ្នកនឹងបង្កើត និងចាប់ផ្តើមធ្វើការ​នៅ​​ក្នុង​អាជីវ​កម្មខ្នាតតូចរបស់អ្នក។
• វិធីសាស្រ្ត និងលក្ខណៈវិនិច្ឆ័យដែល DOR នឹង​​ត្រួត​ពិនិត្យមើល​លើ​ភាព​ជោគ​ជ័យ​នៃអាជីវកម្មខ្នាតតូចរបស់អ្នក និង
• តម្រូវការដែលអាចកើតមានឡើងក្រោយសេវាកម្មការងារ។

9 CCR § 7136.5(e) និង (f) 

ជាផ្នែកមួយនៃការបង្កើតគម្រោង IPE ដែលអ្នក​អាច​​​​​ធ្វើការជាមួយ DOR និ​ង​/ឬ​អ្នកពិគ្រោះ​យោបល់អាជីវកម្មដើម្បីបង្កើតខ្លឹមសារ​សង្ខេប​របស់អាជីវកម្ម និង​ផែន​ការ​អាជីវកម្មមួយ (9 CCR § 7136.5 (c) និង  7136.8 (a))។  ការវាយតម្លៃអាចកើតឡើងក្នុងអំឡុងពេល ឬបន្ទាប់ពីការបង្កើត​គម្រោង​​IPE (CCR § 7136.5 9 (f) និង (g))។  គម្រោង IPE របស់អ្នកអាចនឹងមានការកែប្រែនៅពេលណាមួយប្រសិនបើរក​ឃើញ​ថាមានតម្រូវការសេវាចាំបាច់បន្ថែមនានា (9 CCR § 7136.5 (e) (3)។

តើមានអ្វីកើតឡើងប្រសិនបើខ្ញុំមិនបានទទួលការឯកភាពលើស្វ័យនិយោជន៍?

ក្នុងករណីដែលអ្នកមិនបំពេញបាន​តាមលក្ខណៈវិនិច្ឆ័យវាយ​តម្លៃ​ខាងលើ​នេះ​ក្នុង​អំឡុងពេល ឬបន្ទាប់ពីគម្រោង IPE ត្រូវ​បាន​បង្កើត អ្នក និង DOR នឹង​ពិភាក្សាអំពីបរិបទការងារ​ជំនួស ហើយគម្រោង IPE នឹងត្រូវ​បាន​បង្កើត​ឡើង ឬក៏ធ្វើវិសោធនកម្មស្របជាមួយតាម​ជម្រើសដែលមានការជូនដំណឹង​គ្រប់​គ្រាន់​​របស់អ្នកចំពោះបរិបទ​ការងារជំនួស (9 CCR §§ 7136.5(g), 7136.7(e), 7136.8(h) និង 7136.9(d))។

ប្រសិនបើអ្នកបដិសេធបរិបទការងារជំនួស សំណុំរឿង DOR ​របស់​អ្នក​អាច​ត្រូវ​បាន​បិទ ហើយ DOR អាចស្នើឲ្យអ្នកប្រគល់​ឧបករណ៍ណាមួយ​ដែល​បាន​​ផ្តល់​ជូន​អ្នកនៅក្នុងបរិបទស្វ័យនិយោជន៍ ( 9 CCR 7179.5)។ 

ប្រសិនបើអ្នកមិនយល់ស្របនឹងសេចក្តីសម្រេចរបស់ DOR ទេ អ្នក​មាន​សិទ្ធិ​ក្នុង​ការប្តឹងឧទ្ធរណ៍។  សម្រាប់ព័ត៌មានបន្ថែមអំពីសិទ្ធិប្ដឹងឧទ្ធរណ៍របស់អ្នក សូម ចុចទីនេះដើម្បីអានឯកសារបោះពុម្ពផ្សាយរបស់យើង ព្រឹត្តិបត្រព័ត៌មានអំពីជម្រើស និងនីតិវិធីដាក់បណ្តឹងឧទ្ធរណ៍​របស់​ក្រសួង​ស្តារ​នីតិសម្បទារដ្ឋ California។

តើ DOR ជួយខ្ញុំយ៉ាងដូចម្តេចខ្លះបន្ទាប់ពីខ្ញុំ​បានបង្កើតអាជីវកម្ម​ខ្នាត​តូចរបស់ខ្ញុំ?

DOR នឹងតាមដានការងាររបស់អ្នក​នៅ​ក្នុងស្ថានភាព​ស្វ័យនិយោជន៍​ដោយ​ផ្អែកលើលក្ខណៈវិនិច្ឆ័យ និងវិធីសាស្រ្ត​ដែល​បាន​បង្កើតឡើងនៅក្នុងគម្រោង IPE របស់អ្នក​មិន​តិចជាង 90 ថ្ងៃ និងរហូតដល់ 12 ខែ។  រយៈពេលត្រួតពិនិត្យតាមដានអនុញ្ញាតឲ្យ DOR កំណត់ថា​តើអ្នក​អាច​រក្សា​ការ​ងារបានដែរឬទេ ប្រសិន​បើអ្នកត្រូវការការបណ្តុះបណ្តាល ឬជំនួយបច្ចេកទេស​បន្ថែម ប្រសិនបើអាជីវកម្មរបស់អ្នកកំពុងរកប្រាក់ចំណូលបានតាម​ការ​ព្យាក​រណ៍ និងថាតើបានបំពេញតាមលក្ខណៈវិនិច្ឆ័យសម្រាប់បិទកំណត់ត្រា​នៃ​សេវា​កម្ម​ហើយឬនៅ។ 

ប្រសិនបើក្នុងរយៈពេលត្រួតពិនិត្យតាមដាននេះ អ្នក និង DOR កំណត់ថា អ្នកកំពុងមានបញ្ហារក្សាការងាររបស់អ្នក ឬក៏អាជីវកម្មរបស់អ្នកមិនបាន​ផ្តល់​ប្រាក់​ចំណូល​តាមការព្យាករណ៍ទេ នោះបុគ្គលិក DOR ដែល​មាន​​ជំនាញ​ផ្នែក​ស្វ័យនិយោជន៍ និង/ឬអ្នកពិគ្រោះយោបល់​ផ្នែកអាជីវ​កម្មខ្នាតតូចរបស់ DOR គប្បី​ជួយអ្នកកំណត់រកបញ្ហាទាំងនេះ។  ពួកគេក៏នឹងវាយតម្លៃលើការបណ្តុះបណ្តាល ឬជំនួយបច្ចេកទេសបន្ថែម​ដែល​នឹងជួយអ្នកដោះស្រាយបញ្ហាទាំងនោះ។  អ្នកពិគ្រោះយោបល់ផ្នែកស្តារនីតិសម្បទារបស់អ្នកគួរតែបន្តត្រួតពិនិត្យ និង​វាយតម្លៃឡើងវិញថាតើបញ្ហានេះត្រូវបានដោះស្រាយដែរឬទេ។  ប្រសិនបើ DOR កំណត់ថាការបណ្តុះបណ្តាល ឬជំនួយបច្ចេកទេស​បន្ថែម​នឹង​ជួយ​ដល់ការរក្សាការងារនៅ​ក្នុង​បរិបទស្វ័យនិយោជន៍ DOR នឹង​ពិភាក្សា​អំពី​បរិបទ​ការងារជំនួសជាមួយអ្នក ហើយគម្រោង IPE របស់​អ្នកគួរ​តែត្រូវ​កែប្រែ​ឲ្យបានសមស្រប​ (9 CCR § 7138)។

តើសំណុំរឿង DOR របស់ខ្ញុំនឹងត្រូវបាន​បិទបញ្ចប់ជាស្ថាពរនៅ​ពេល​ណា?

សំណុំរឿង DOR របស់អ្នកអាចត្រូវបានបិទ​បញ្ចប់​ជាស្ថាពរ​នៅពេល​ដែល​បំពេ​ញ​បានតាមលក្ខខណ្ឌដូចខាងក្រោមនេះ៖

• ការងារស្របគ្នាជាមួយនឹងគម្រោង IPE
• អ្នកកំពុងបំពេញបានតាមតម្រូវការចំណូលដែលបានព្យាករណ៍ទុក
• អ្នកបានរក្សាការងារនៅក្នុងបរិបទស្វ័យនិយោជន៍សម្រាប់រយៈពេលមិនតិចជាង 90 ថ្ងៃ (វាអាចពន្យារពេលបើចាំបាច់) និង
• អ្នក និងអ្នកពិគ្រោះយោបល់ឯកភាពថា លទ្ធផលការងារ​នៅក្នុងបរិបទ​​ស្វ័យ​និយោជន៍ គឺជាលទ្ធផលដែលជាទីគាប់ចិត្ត ហើយអ្នក​កំពុង​តែធ្វើបានល្អ។ 

តើខ្ញុំត្រូវធ្វើដូចម្តេចប្រសិនបើខ្ញុំត្រូវការជំនួយដើម្បីទទួលបានសេវាស្វ័យនិយោជន៍តាមរយៈ DOR ?

ប្រសិនបើ DOR បដិសេធចំពោះសំណើ​សុំ​សេវាកម្ម​ស្វ័យ​និយោជន៍របស់អ្នក ឬប្រសិនបើអ្នកមាន​សំណួរអំពីសេវាកម្មស្វ័យ​និយោ​ជន៍​​របស់អ្នក អ្នកអាចទាក់ទងទៅកាន់កម្មវិធីជំនួយអតិថិជន (CAP) ដោយ​ទូ​រ​សព្ទទៅ DRC តាមរយៈលេខ (800) 776-5746 ឬ TTY 1-800-719-5798 ឬចូលទៅកាន់វេបសាយ www.disabilityrightsca.org។