Ամբուլատոր բուժառուի աջակցվող բուժումը (անգլ. Assisted Outpatient Treatment, AOT) դատարանի վճռով նշանակվող ամբուլատոր բուժում է՝ նախատեսված հոգեկան առողջության խնդիրներով պայմանավորված հաշմանդամություն ունեցող մարդկանց համար։   

Այս հրապարակումը տեղեկաթերթ է, որում խոսվում է այն մասին, թե որոնք են բուժման ձեր իրավունքները, եթե դատավորը ձեզ Ամբուլատոր բուժառուի աջակցվող բուժում է նշանակել:

Դուք ունեք փաստաբանի ծառայություններից օգտվելու իրավունք, եթե վարչաշրջանը խնդրել է դատարանին՝ ձեզ Ամբուլատոր բուժառուի աջակցվող բուժում նշանակել: Եթե ցանկանում եք փաստաբան ունենալ, սակայն բավարար գումար չունեք փաստաբանի ծառայությունների դիմաց վճարելու համար, կարող եք խնդրել դատավորին ձեզ հանրային պաշտպան հատկացնել:

Եթե դատավորը որոշում է, որ ըստ օրենքի դուք համապատասխանում եք Ամբուլատոր բուժառուի աջակցվող բուժմանը, և ձեզ Ամբուլատոր բուժառուի աջակցվող բուժում է նշանակված, դուք ունեք իրավունք՝ ստանալու բուժման որոշակի տեսակներ, որոնք հատուկ հարմարեցված են ձեր կարիքներին:[i]

• Ըստ օրենքի Ամբուլատոր բուժառուի աջակցվող բուժմանը համապատասխանության մասին մանրամասն տեղեկությունների համար կարող եք կարդալ «Ում կարող է Ամբուլատոր բուժառուի աջակցվող բուժում նշանակվել» հրապարակումը:
• Ամբուլատոր բուժառուի աջակցվող բուժման լսումների մասին տեղեկությունների համար կարող եք կարդալ «Ձեր իրավունքները, եթե վարչաշրջանը դիմում է Ամբուլատոր բուժառուի աջակցվող բուժում նշանակելու և լսումներ անցկացնելու համար» հրապարակումը: Ամբուլատոր բուժառուի աջակցվող բուժման լսումներում դատավորը որոշում է՝ արդյոք ըստ օրենքի դուք համապատասխանում եք Ամբուլատոր բուժառուի աջակցվող բուժմանը, թե ոչ:

Ամբուլատոր բուժառուի աջակցվող բուժումը

Ձեզ համար նախատեսված Ամբուլատոր բուժառուի աջակցվող բուժումը պետք է.

• Ուղղորդվի ձեր կողմից և օգտագործի հոգեբանասոցիալական վերականգնման և առողջացման սկզբունքներ:[ii]
  • Հոգեբանասոցիալական վերականգնումը նպաստում է անձի հոգեկան առողջացմանը, համայնքում հաջողությամբ ինտեգրվելուն և կարող է բարելավել հոգեկան առողջության խնդիրներով պայմանավորված հաշմանդամություն ունեցող մարդկանց կյանքի որակը: Դա կարող է ներառել հետևյալը.
    • Դեղամիջոցների ընդունման կառավարում
    • Ախտանշանների կառավարում
    • Թմրանյութերի օգտագործման կառավարում
    • Ինքնուրույն կենսակերպի հմտություններ
    • Աշխատանքային հմտությունների ուսուցում
    • Հաղորդակցման հմտություններ
    • Խնդրի լուծման և հաղթահարման հմտություններ
    • Սոցիալական աջակցության ձևավորում
  • Հոգեկան առողջացման սկզբունքներն են.[iii]
    • Ինքնաուղղորդում, երբ «[ա]նհատները որոշում են առողջացման իրենց սեփական ուղին»:
    • Անհատականացված և անձնակենտրոն, երբ առողջացումն ընթանում է ոչ թե յուրաքանչյուրին մատուցվող նույն ծառայությունների տրամադրմամբ, այլ ավելի շուտ հիմնված է ձեր յուրահատուկ առանձնահատկությունների վրա:
    • Հնարավորությունների ընձեռում, երբ ձեզ վրա ազդեցություն ունեցող որոշումներում դուք ձայնի իրավունք ունեք:
    • Համապարփակ, երբ հաշվի են առնված ձեր կյանքի բոլոր ասպեկտները:
    • Ոչ գծային, երբ առողջացումը կարող է «հետընթաց» ունենալ, և գուցե պահանջվի «փորձից դասեր քաղել»:
    • Ուժեղ կողմերի վրա հիմնված, երբ առողջացման ընթացքում շեշտը դրվում է ձեր կողմից շատ տարբեր հմտություններ և տաղանդներ ձևավորելու վրա:
    • Աջակցություն հավասարակիցներից, երբ դուք օգնում եք ուրիշներին, իսկ նրանք՝ ձեզ:
    • Հարգանք, երբ առողջացումը չի ներառում բացասական մտքեր ձեր կամ հոգեկան առողջության խնդիրներով պայմանավորված հաշմանդամություն ունեցող մարդկանց մասին:
    • Պատասխանատվություն, երբ դուք պատասխանատու եք ձեր առողջացմանն ու լավ զգացողությանը օգնելուն:
    • Հույս, երբ գոյություն ունի միտք, որ դուք լավ ապագա եք ունենալու:
• Կապված լինի ձեր մյուս Ամբուլատոր բուժառուի աջակցվող բուժման օգնության, աջակցության և այլ բուժման հետ:[iv]
• Նախատեսի կացարան, որը տրամադրվում է անմիջապես, ժամանակավոր է, մշտական է կամ այս բոլորը միասին վերցրած է:[v]
• Կապված լինի անձնական ծառայությունների համակարգողի հետ, ով օգնում է ձեզ և հավաստիանում է, որ դուք ստանաք ձեզ անհրաժեշտ օգնությունը: [vi]
  • Անձնական ծառայությունների համակարգողը պետք է.
    • Կատարի ձեր կարիքների գնահատում:
    • Կազմի ձեր անձնական ծառայությունների պլանը:
    • Ապահովի ձեզ համար համայնքային օգնության ստացումը, եթե այն ճիշտ է ձեզ համար, և
    • Գրանցի, թե որքանով է լավ այն օգնությունը, որն ստանում եք:

Անձնական ծառայությունների անհատական պլան

Ձեր անձնական ծառայությունների անհատական պլանները պետք է լինեն. [vii]

• Ճիշտ ձեր տարիքի համար:
• Ճիշտ ձեր սեռի համար:
• Ճիշտ ձեր մշակույթի համար:

Ձեր անձնական ծառայությունների անհատական պլանը պետք է լինի այնպիսին, որ հնարավորինս շատ օգնի ձեզ և թույլ տա. [viii]

• Ապրել կացարանում, որը տեղական համայնքում ամենաանկախն է և նվազագույն սահմանափակմամբ է:
• Ապրել սուբսիդավորվող կացարանում, որն օգնում է ձեզ պահպանել ձեր երեխաների խնամակալությունը կամ փորձում է միավորել ձեզ ձեր երեխաների հետ:
• Աշխատել կամ ծավալել որևէ արտադրողական գործունեություն ամենաբարձր մակարդակով՝ հիմնված ձեր գիտելիքների և հմտությունների վրա:
• Ունենալ ընկերներ և ընտանիք և համայնքային ակտիվություն տանից դուրս:
• Ստանալ ճիշտ ձեզ համապատասխանող կրթություն կամ միջին մասնագիտական ուսուցում:
• Վաստակել ապրելու համար բավարար փող:
• Կառավարել ձեր հիվանդությունը և կայացնել որոշումներ ձեր կյանքի վերաբերյալ (ինչպես առօրյա, այնպես էլ երկարաժամկետ):
• Ստանալ ֆիզիկական առողջության խնամք և հնարավորինս ֆիզիկապես առողջ լինել:
• Նվազեցնել կամ վերացնել ձեր կողմից կատարվող հակասոցիալական կամ քրեական բնույթի լուրջ գործողությունները և կրճատել շփումը քրեական արդարադատության համակարգի հետ:
• Նվազեցնել կամ վերացնել ձեր հոգեկան հիվանդության ախտանշանների պատճառած բացասական սթրեսը:
• Անել այնպես, որ դուք չօգտագործեք կախվածություն առաջացնող վտանգավոր նյութեր:

Հոգեկան առողջության պահպանման թիմը

• Դուք իրավունք ունեք, որ ձեզ հետ աշխատի հոգեկան առողջության պահպանման բարձր որակավորմամբ թիմ:[ix]
  • Այս թիմի յուրաքանչյուր անձ չպետք է սպասարկի միաժամանակ 10-ից ավելի հաճախորդի:
  • Այդ թիմը բազմապրոֆիլ է: Դա նշանակում է, որ ձեր թիմում պետք է ընդգրկված լինեն տարբեր մասնագետներ, օրինակ՝ հոգեբույժ, բուժքույր, սոցիալական աշխատող և հավասարակից շահերի պաշտպան, և նրանք պետք է լուծեն խնդիրներ, այդ թվում՝ ձեր հոգեկան առողջության բուժումը և այլ կարիքները կամ նպատակները, ինչպիսիք են կացարանով ապահովումը, եկամուտը կամ նպաստները, աշխատատեղը, կրթությունը կամ սոցիալական կամ ընտանեկան մտահոգությունները: 
  • Այս թիմը պետք է համայնքահեն և շարժական լինի: Դա նշանակում է, որ թիմն աշխատում է համայնքում և կարող է ըստ անհրաժեշտության ձեզ ծառայություններ մատուցել և աջակցություն տրամադրել: 

Դեղամիջոցների ընդունում ձեր ցանկություններին հակառակ

• Դուք իրավունք ունեք, որ ձեզ չստիպեն ընդունել այն դեղամիջոցները, որոնք չեք ցանկանում ընդունել (ոչ կամավոր ընդունվող դեղամիջոցներ):[x]
• Եթե չեք հետևում Ամբուլատոր բուժառուի աջակցվող բուժմանը, և ձեզ ձեր ցանկություններին հակառակ (ոչ կամավոր կերպով) տեղավորում են հոգեբուժական հիվանդանոցում, ձեզ գուցե ստիպեն դեղամիջոցներ ընդունել, որոնք չեք ցանկանում ընդունել: Դա կարող է տեղի ունենալ, եթե առկա է արտակարգ իրավիճակ, կամ եթե լսումներից հետո նշանակվել են դեղամիջոցներ, որպեսզի որոշեն՝ արդյոք դուք չունեք դեղորայքային բուժումից հրաժարվելու կարողություն (դա կոչվում է նաև լսումներ կարողությունների վերաբերյալ):[xi]
  • Մանրամասն տեղեկությունների համար, թե ինչպես է որոշվում, որ դուք չեք հետևում Ամբուլատոր բուժառուի աջակցվող բուժմանը, կարող եք կարդալ «Ամբուլատոր բուժառուի աջակցվող բուժմանը չհետևելը» հրապարակումը:

Հարաբերություններ՝ ընտանիք, երեխաներ և հավասարակիցներ

Ամբուլատոր բուժառուի աջակցվող բուժումն ստանալիս վարչաշրջանը պետք է տրամադրի ձեզ հետևյալ օգնությունը, եթե այն ճիշտ է ձեզ համար. [xii]

• Ընտանիքի օգնությունը և ուղղորդումը:
• Ծնողների օգնությունը և ուղղորդումը:
• Հավասարակիցների օգնությունը կամ ինքնօգնությունը:

Տարեցներ և հաշմանդամություն ունեցող անձինք/վետերաններ

• Եթե տարեց և (կամ) հաշմանդամություն ունեցող անձ եք, վարչաշրջանը պետք է օգնի ձեզ այն բաներով, ինչի կարիքն ունեն տարեցները և (կամ) հաշմանդամություն ունեցող անձինք:[xiii]
• Եթե վետերան եք՝ վետերանների ծառայությունների համակարգում:[xiv]

25 տարեկան կամ ավելի փոքր տարիքի չափահաս երիտասարդներ

• Եթե դուք լուրջ հոգեկան հիվանդության համար Ամբուլատոր բուժառուի աջակցվող բուժում ստացող չափահաս երիտասարդ եք և անօթևան եք կամ կանգնած եք անօթևան դառնալու մեծ վտանգի առաջ, վարչաշրջանը պետք է տրամադրի ձեզ ավելի մեծ օգնություն՝ հարմարեցված չափահաս երիտասարդներին:[xv]

Տարբեր մշակույթների պատկանող կանայք

• Եթե դուք տարբերվող մշակույթի պատկանող կին եք կամ մեկ այլ անձ, վարչաշրջանը պետք է ձեզ տրամադրի այնպիսի օգնություն, որը հատուկ է ձեր համայնքի կարիքներին:[xvi]
• Դա պետք է ներառի.
  • Սուբսիդավորվող կացարան, որում կարող են ապրել նաև երեխաները:
  • Նյութերով բուժում, որն ուղղված է տրավմայի և ձեր սեռի հետ կապված չարաշահման բուժմանը:
  • Արտադրական ուսուցում, որի հիմքում ձեր սեռը չէ, բայց այն հաշվի է առնում կանանց կարիքները:

Մարդիկ, որոնք ունեն չբուժված լուրջ հոգեկան հիվանդություն և անօթևան դառնալու վտանգի տակ են

• Եթե դուք մինչև մեկ տարվա ընթացքում ունեցել եք չբուժված լուրջ հոգեկան հիվանդություն, գուցե չունեք Ամբուլատոր բուժառուի աջակցվող բուժման ծառայությունների ամբողջական փաթեթի կարիքը և անօթևան դառնալու վտանգի առաջ եք կանգնած, վարչաշրջանը պետք է.[xvii]
  • Օգնի ձեզ ընտանիքի օգնության և աջակցության ծառայությունների անհատական պլան կազմել:
  • Տրամադրի ձեզ ծառայություններ, որոնք հատուկ մշակվել են ձեր կարիքները բավարարելու համար:

Լրացուցիչ տեղեկատվություն

Եթե լրացուցիչ տեղեկատվության կարիք կամ հարցեր ունեք, կարող եք.

• Դիմել ձեր փաստաբանին: Դուք ունեք փաստաբանի ծառայություններից օգտվելու իրավունք, եթե վարչաշրջանը դիմել է (խնդրագիր է ներկայացրել) դատարանին ձեզ Ամբուլատոր բուժառուի աջակցվող բուժում նշանակելու համար: Եթե ցանկանում եք դատապաշտպան ունենալ, սակայն բավարար գումար չունեք, դատավորին խնդրեք ձեզ հանրային պաշտպան հատկացնել: Դուք պետք է վճարեք հանրային պաշտպանին միայն այն դեպքում, եթե ունեք դրա գումարը:
• Կապվել ձեր վարչաշրջանի՝ Բուժառուների իրավունքների պաշտպանի հետ: Ձեր բնակության վայրի Բուժառուների իրավունքների պաշտպանին գտնելու համար զանգահարեք (916) 504-5810 հեռախոսահամարով և խնդրեք հատկացնել ձեր բնակավայրի Բուժառուների իրավունքների պաշտպանի կոնտակտային տվյալները կամ անցեք այս հղումով՝ https://www.disabilityrightsca.org/post/patients-rights-advocacy-directory:
• Զանգահարեք Կալիֆոռնիայի Հաշմանդամություն ունեցող անձանց իրավունքների պաշտպանության կազմակերպություն (անգլ. Disability Rights California ) 1-800-776-5746 հեռախոսահամարով: