Tus neeg sawv cev them nyiaj los sis rep. payee yog dab tsi?

Tus neeg sawv cev them nyiaj (rep. payee) yog tus neeg uas Social Security Administration (SSA) xaiv los pab koj tuav pob peev nyiaj thiab siv koj cov nyiaj Social Security. Koj yuav qhia tau li cas tias koj muaj ib tus neeg sawv cev them nyiaj? Koj tau txais cov nyiaj pab txhua hli uas hu ua SSI los sis SSDI, thiab SSA uas tau xaiv ib tus neeg los tswj koj cov nyiaj pab uas them rau koj.  Koj tus neeg sawv cev them nyiaj yuav yog ib tus neeg los sis ib lub koom haum.

Tus neeg sawv cev them nyiaj ua dab tsi?

Yog hais tias koj muaj ib tus neeg sawv cev them nyiaj, ces nws yuav pab koj siv koj cov nyiaj pab SSDI thiab/los sis SSI raws li koj cov kev xav tau. Koj cov nyiaj pab yog them rau tus neeg sawv cev them nyiaj mam li muab cov nyiaj ntawd siv rau koj. Koj tus neeg them nyiaj yog tus saib xyuas kom paub tseeb tias cov nyiaj ntawd yog raug siv los them rau koj cov kev xav tau uas tseem ceeb tshaj plaws. Cov kev xav tau nod yuav suav nrog nqi xauj tsev, nqi dej thiab nqi hluav taws xob, khoom noj, khaub ncaws hnav, nqi kho mob thiab nqi kho hniav, thiab tej yam uas koj siv los tu xyuas koj tus kheej (xws li pas txhuam hniav, tshuaj zawv plaub hau, thiab xab npum da dej).

Yog hais tias tseem tshuav nyiaj tom qab them rau koj cov kev xav tau tas lawm, tus neeg them nyiaj tuaj yeem siv cov nyiaj seem los them rau koj tej nuj nqis, them rau tej yam khoom ua siv lom zem uas koj nyiam ua, los sis muab nyiaj rau koj siv. Koj tus neeg them nyiaj yuav tsum khaws cov ntaub ntawv sau tseg txog txhua yam kev siv nyiaj txog ntawm yam uas lawv ua nrog koj cov nyiaj pab thiab tshaj qhia mus rau SSA.

Koj tus neeg them nyiaj kuj tseem yuav pab koj txuag nyiaj rau yam uas koj xav yuav. Koj thiab koj tus neeg them nyiaj yuav tsum tau sib tham txhua lub hlis los sis ntau zaus dua ntawd thiab tham txog tias koj xav yuav tej yam dab tsi tshwj xeeb los sis tus nqi puas kim los pheej yig.  Koj tus neeg them nyiaj yuav tsum pab koj txuag nyiaj rau kev yuav cov khoom tshwj xeeb no.

Yuav xaiv kuv tus neeg sawv cev them nyiaj li cas?

Koj tus neeg sawv cev them nyiaj yuav tsum yog ib tus neeg uas paub koj zoo thiab xav pab koj tiag. Nws yuav tsum yog ib tug neeg uas pom koj ntau thiab nkag siab txog koj cov kev xav tau. Qee txoj kev xaiv tej zaum kuj yog ib tus neeg hauv tsev neeg, ib tus phooj ywg, los sis ib tus neeg saib xyuas raug cai. Dua li nod lawm nws kuj tseem yuav yog ib lub koom haum xws li ib pab pawg thawj coj thiab saib xyuas qhov chaw uas koj nyob.

Yog hais tias koj xav tau ib tus neeg twg los ua koj tus neeg them nyiaj, koj tuaj yeem qhia rau SSA kom tus neeg ntawd raug xaiv raws cai los ntawm lawv los ua koj tus neeg them nyiaj. SSA yuav muab ib daim ntawv thov rau tus neeg ntawd thiab yuav tshawb xyuas nws li keeb kwm yav dhau los kom paub tseeb tias nws yuav ua yam zoo tshaj plaws rau koj.

Yuav ua li cas yog tias kuv tsis xav tau tus neeg sawv cev them nyiaj uas Social Security xaiv rau kuv los sis kuv xav tias kuv tsis xav tau ib tus neeg sawv cev twg li?

Yog hais tias koj tsis xav tau tus neeg sawv cev them nyiaj uas SSA xaiv rau koj los sis koj tsis xav tias koj xav tau ib tug neeg sawv cev li, koj tuaj yeem tsis pom zoo nrog SSA tau. Yog tsis pom zoo, koj yuav tsum ua ntawv thov rov sib hais dua. Qhov no koj ua tau los ntawm kev sau ib tsab ntawv mus rau SSA txhawm rau piav qhia txog qhov teeb meem. Koj kuj tseem tuaj yeem sau rau hauv ib daim ntawv foos tshwj xeeb uas hu ua“Thov Kom Rov Qab Txiav Txim Dua (Request for Reconsideration)”. Koj tuaj yeem theej ib daim ntawv foos los ntawm SSA lub chaw ua hauj lwm uas nyob hauv koj cheeb tsam zej zos los sis hauv online tau ntawm tus vev xaib no, http://www.ssa.gov/forms/ssa-561.pdf.

Thaum koj tau txais tsab ntawv tuaj ntawm SSA uas xaiv tus neeg them nyiaj rau koj, feem ntau lawm koj yuav tsum ua ntawv thov kom rov qab sib hais dua tsis pub dhau 60 hnub. Qee zaus koj yuav muaj sij hawm ntau ntxiv yog hais tias koj muaj ib qho laj thawj zoo lawm.

Koj kuj tseem tuaj yeem thov kom muaj lwm tus neeg them nyiaj txawv tau. Yog hais tias koj xav tias koj tsis xav tau ib tus neeg them nyiaj twg kiag li, koj tuaj yeem piav qhia qhov ntawd rau SSA tau. Nws pab muab ib tsab ntawv rau SSA los ntawm koj tus kws kho mob, tus kws pab tswv yim fab kev kho mob los sis lwm tus neeg uas tuaj yeem piav qhia tias koj tuaj yeem tswj hwm koj tus kheej cov nyiaj tau.  Mus saib

SSA lub chaw ua hauj lwm hauv koj cheeb tsam zej zos txhawm rau thov los ua koj tus kheej tus neeg them nyiaj. Mus rau lub vev xaib no, https://secure.ssa.gov/apps10/poms.nsf/lnx/0200502115, rau cov ntaub ntawv qhia ntau ntxiv nyob hauv daim ntawv foos thiab cov txheej txheem ua.

Puas muaj tej yam dab tsi uas kuv yuav tsum tau ua yog hais tias kuv muaj ib tus neeg sawv cev them nyiaj lawm?

Muaj qee yam uas koj yuav tsum tau qhia rau koj tus neeg them nyiaj los pab nws tswj hwm koj cov nyiaj pab. Koj yuav tsum tau qhia rau koj tus neeg them nyiaj paub yog tias koj pib los sis tso tseg txoj hauj lwm lawm, tsiv tawm mus rau lwm qhov chaw, sib yuav lawm, mus ntoj ncig txawv teb chaws, mus rau hauv tsev loj cuj los sis raug kaw, mus tom tsev kho mob, los sis koj qhov kev tsis taus ntawm lub cev zoo dua qub lawm.

Yog hais tias koj tau txais cov nyiaj pab los ntawm SSI, koj kuj yuav tsum tau qhia rau koj tus neeg them nyiaj yog tias koj tau txais nyiaj los ntawm lwm qhov chaw muab kev pab los sis thov lwm cov nyiaj pab ntawm tsoom fwv teb chaws. Koj kuj yuav tsum tau qhia rau koj tus neeg them nyiaj paub tias koj muaj nyiaj khaws tseg cia ntau npaum li cas tib si, yog hais tias muaj. Qhov no tseem ceeb heev vim tias koj cov nyiaj SSI yog nyob ntawm seb koj twb muaj nyiaj npaum li cas lawm. Yog hais tias SSA them nyiaj rau koj ntau tshaj qhov lawv yuav tsum muaj lawm, ces koj yuav tau them nyiaj ntau rov qab rau SSA. Qhov no yog hu ua“kev them nyiaj tshaj.”

Kuv tus neeg sawv cev them nyiaj puas tswj kuv lwm cov nyiaj thiab?

Tsis tswj. Tshwj tsis yog tias koj tus neeg them nyiaj kuj yog koj tus neeg saib xyuas los sis tus neeg tswj xyuas raws cai, nws tsuas tuaj yeem pab tswj hwm tau kiag cov nyiaj pab SSA nkaus xwb. Piv txwv li, tus neeg sawv cev them nyiaj tsis tuaj yeem qhia koj tias yuav siv cov nyiaj uas koj tau txais tom hauj lwm li cas. Lawv kuj tsis muaj peev xwm qhia rau koj tias yuav ua li cas nrog txhua cov nyiaj uas koj tau txais los ntawm koj tsev neeg.  Nws yog ib qho tseem ceeb uas koj yuav tau qhia rau nws paub txog cov nyiaj uas koj tau txais los ntawm lwm qhov chaw, txawm li cas los xij. Qhov no pab tau nws thiab ua rau kom SSA tsis txhob tau them nyiaj rau koj ntau dhau.

Nco ntsoov tias, koj yuav tau muab cov nyiaj rov qab tab txawm tias koj twb tau muab cov nyiaj siv tas lawm los xij.

Kuv puas yuav tsum tau them nyiaj rau kuv tus neeg sawv cev them nyiaj?

Yog tias koj tus neeg them nyiaj yog ib tus tib neeg, nws tsis tuaj yeem hais kom koj them nyiaj rau nws txoj kev pab tau. Cov neeg them nyiaj uas yog cov koom haum tej zaum yuav hais kom koj them tus nqi me ntsis rau lawv toj hli. Feem ntau lawm cov nqi uas lawv hais kom them siab tshaj plaws yog $43 toj ib lub hlis. Tej zaum lawv yuav hais kom them nqi $82 toj ib lub hlis yog hais tias tus kws kho mob hais tias koj muaj teeb meem nrog tshuaj los sis dej cawv. Yog hais tias koj tsis paub meej, koj tuaj yeem hais kom SSA qhia rau koj paub tias koj tus neeg them nyiaj puas tuaj yeem hais kom koj them nqi rau thiab them ntau npaum li cas. Cov nyiaj uas tus neeg them nyiaj tuaj yeem tsub nqi tej zaum yuav hloov pauv txhua xyoo. Yog xav saib cov nyiaj tam sim no ces mus rau ntawm lub vev xaib no, https://www.ssa.gov/oact/cola/RepPayee.html.

Yog hais tias koj ntseeg tias koj tus neeg them nyiaj hais koj them nyiaj ntau dhau rau lawv lawm, koj yuav tsum hais qhia lawv kom them nyiaj rov qab los. Tsis muaj teeb meem tias lawv txawm yuav xam cov nqi uas them tshaj ntawd ntev npaum li cas rau koj los xij, lawv yeej yuav tsum tau them rov qab rau koj. Yog tias lawv tsis kam them nyiaj rov qab rau koj, koj tuaj yeem tshaj qhia lawv mus rau SSA tau, koj tus neeg ua hauj lwm saib xyuas rooj plaub, tub ceev xwm los sis lwm tus kws pab tswv yim xws li Disability Rights California.

Kuv yuav paub tau li cas tias kuv tus neeg sawv cev them nyiaj tab tom siv kuv cov nyiaj?

Yog hais tias koj muaj ib tus neeg them nyiaj, ces koj muaj cai los paub tias koj cov nyiaj tau muab siv mus li cas lawm. Koj yuav tsum hais kom koj tus neeg them nyiaj los phiaj yeeg kom pom cov ntaub ntawv teev cov kev siv nyiaj uas nws tau siv mus lawm rau koj pom kom koj thiaj tuaj yeem pom tau tias tau muab siv rau dab tsi thiab koj tshuav nyiaj ntau npaum li cas. Hais kom nws piav qhia tej yam uas koj tsis nkag siab. Qhia rau nws tias koj xav tau qee yam uas nws yuav tsum tau siv koj cov nyiaj pab.

Kuv yuav ua li cas yog hais tias kuv tus neeg sawv cev them nyiaj siv kuv cov nyiaj rau tej yam tsis raug los sis nyiag kuv cov nyiaj lawm ne?

Koj tuaj yeem tshaj qhia cov teeb meem nrog rau txoj kev uas koj tus neeg sawv cev them nyiaj siv koj cov nyiaj rau SSA. Cov teeb meem no yuav suav nrog yog tias koj tus neeg sawv cev them nyiaj ua tej yam dab tsi uas nws yuav tsum tsis tsim nyog ua los sis yog tias nws tsis saib xyuas koj cov kev xav tau. Koj kuj tseem tuaj yeem qhia rau SSA yog tias koj tus neeg sawv cev them nyiaj yuav tsis qhia cov ntaub ntawv teev kev siv nyiaj rau koj paub tias koj cov nyiaj raug siv li cas. Koj tuaj yeem nrhiav SSA lub chaw ua hauj lwm uas nyob ze tshaj plaws los ntawm kev mus rau lub vev xaib no, https://secure.ssa.gov/ICON/main.jsp los sis los ntawm kev hu xov tooj rau 1-800772-1213. Dua li nod lawm koj kuj yuav tsum tham nrog tus neeg ua hauj lwm saib xyuas koj rooj plaub los sis nrog lwm tus kws pab tswv yim xws li Disability Rights California. Disability Rights California tus naj npawb xov tooj yog 1-800-7765746 los sis  email services@DisabilityRightsCa.org.

Yog hais tias koj xav tias koj tus neeg them nyiaj siv nyiaj tsis raug los sis nyiag koj cov nyiaj SSI los sis SSDI, koj yuav tsum tau hu rau Office of the Inspector General (OIG) kom sai li sai tau. Lub chaw hauj lwm OIG yuav muab koj cov lus tsis txaus siab thiab saib koj cov kev txhawj xeeb txhawm rau saib seb puas yuav tsim nyog los pab koj pov thaiv koj cov nyiaj. Koj yuav tsum qhia cov ntaub ntawv tseem ceeb xws li koj lub npe, koj cov ntaub ntawv tiv tauj, tus neeg sawv cev them nyiaj lub npe, lub sij hawm uas tau siv cov nyiaj tsis raug tau tshwm sim, nyob rau qhov chaw twg, thiab lwm yam ntsiab lus qhia tseeb meej txog yam uas tau tshwm sim rau koj cov nyiaj. Yog hais tias koj xav tau, koj tuaj yeem thov kom lub chaw hauj lwm OIG khaws koj lub npe zais tawm ntawm tus neeg sawv cev them nyiaj.

Koj tuaj yeem xa koj daim ntawv teev kev tsis txaus siab los ntawm kev mus rau lub vev xaib no, http://www.ssa.gov/fraudreport/oig/public_fraud_reporting/form.htm los sis raws kev hu xov tooj rau 1-800269-0271.

Yog hais tias kuv muaj los nug ntxiv ne yuav ua li cas?

Yog hais tias koj muaj lus nug ntxiv ces koj tuaj yeem tham nrog Social Security los sis hu xov tooj rau Disability Rights California raws li kev hu xov tooj rau (800) 776-5746. Koj kuj tseem tuaj yeem xa email tuaj rau peb ntawm services@DisabilityRightsCa.org los sis mus saib peb lub vev xaib (website) tau ntawm www.disabilityrightsca.org.