ការមិនឯកភាពជាមួយនឹងសេវាគាំពារតាមគេហដ្ឋាន (IHSS) ពាក្យបណ្ដឹង និងការស្នើសុំបុគ្គលិកសង្គមកិច្ចនៃសេវា IHSS ថ្មី
ការមិនឯកភាពជាមួយនឹងសេវាគាំពារតាមគេហដ្ឋាន (IHSS) ពាក្យបណ្ដឹង និងការស្នើសុំបុគ្គលិកសង្គមកិច្ចនៃសេវា IHSS ថ្មី
គោលបំណងនៃការវាយតម្លៃ និងការវាយតម្លៃឡើងវិញគឺដើម្បីកំណត់ថាតើសេវាកម្មអ្វីខ្លះដែលអ្នកត្រូវការ និងរយៈពេលប៉ុន្មានដែលអ្នកត្រូវការដើម្បីទទួលបានសេវា IHSS ដើម្បីឱ្យអ្នកមានសុវត្ថិភាពនៅផ្ទះ។
តើអ្វីទៅជាសេវា IHSS?
សេវា IHSS គឺជាកម្មវិធីទូទាំងរដ្ឋ ដែលផ្ដល់សេវាថែទាំនៅតាមគេហដ្ឋាន ដើម្បីជួយអ្នកដែលមានសិទ្ធិទទួលបានសេវាដែលមានពិការភាព ឲ្យស្ថិតនៅក្នុងផ្ទះរបស់ពួកគេបាន។
សេវា IHSS ផ្ដល់ជំនួយដល់៖
- ផ្នែកសេវានៅតាមផ្ទះ និងសេវាពាក់ព័ន្ធនានា៖ ការរៀបចំម្ហូបអាហារ ការសម្អាតផ្ទះ និងការបោកអ៊ុតសម្លៀកបំពាក់
- សេវាថែទាំផ្ទាល់ខ្លួន/ការថែទាំមិនមែនវេជ្ជសាស្រ្ត៖ ការងូតទឹក ការបញ្ចុកអាហារ ការស្លៀកពាក់ ការរៀបចំខ្លួន និងការប្រើប្រាស់បង្គន់។
- កិច្ចការអមវេជ្ជសាស្រ្ត៖ ជំនួយខាងឱសថ ការចាក់ថ្នាំ ការថែទាំពោះវៀនធំ និងតម្រងនោម។
- ការគ្រប់គ្រងបង្ការ៖ គ្រប់គ្រងតាមដានបុគ្គលដែលមានភាពចុះខ្សោយខាងផ្លូវចិត្ត និងពុទ្ធិដើម្បីបង្ការរបួសស្នាម។
- សេវាដឹកជញ្ជូន
- ការជូនទៅកាន់ការណាត់ជួបខាងវេជ្ជសាស្រ្ត
តើបុគ្គលិកសង្គមកិច្ចនៃសេវា IHSS ធ្វើអ្វីខ្លះ?
បុគ្គលិកសង្គមកិច្ចនៃសេវា IHSS របស់អ្នក មានទំនួលខុសត្រូវក្នុងការកំណត់សិទ្ធិទទួលបាន និងតម្រូវការរបស់អ្នកសម្រាប់សេវា IHSS។ បុគ្គលិកសង្គមកិច្ច នៃសេវា IHSS របស់អ្នក នឹងធ្វើកិច្ចការនេះ ដោយផ្ដល់ជូននូវការវាយតម្លៃដល់អ្នក នៅពេលអ្នកដាក់ពាក្យស្នើសុំសេវា IHSS ជាលើកដំបូង និងដោយធ្វើការវាយតម្លៃប្រចាំឆ្នាំជាថ្មីក្រោយពីនោះមក។ គោលបំណងនៃការវាយតម្លៃ និងការវាយតម្លៃជាថ្មី គឺដើម្បីធ្វើការកំណត់ថាតើសេវាកម្មអ្វីខ្លះដែលអ្នកត្រូវការ និងថាតើអ្នកត្រូវការពេលប៉ុន្មានដើម្បីទទួលបានសេវា IHSS ដើម្បីឲ្យអ្នកស្ថិតនៅផ្ទះដោយសុវត្ថិភាព។ នៅពេលបញ្ចប់ការវាយតម្លៃ បុគ្គលិកសង្គមកិច្ចនៃសេវា IHSS របស់អ្នក ត្រូវបានតម្រូវឲ្យផ្ញើការជូនដំណឹងអំពីចំណាត់ការ (NOA) នៃសេវា IHSS ជូនដល់អ្នក។ ចុចនៅទីនេះ ដើម្បីមើលឧទាហរណ៍ថាតើការជូនដំណឹងអំពីចំណាត់ការ (NOA) នៃសេវា IHSS មានទម្រង់ដូចម្ដេច ។
ការជូនដំណឹងអំពីចំណាត់ការនៃសេវា IHSS ដើម្បីអនុម័តយល់ព្រម បដិសេធ ឬផ្លាស់ប្ដូរអត្ថប្រយោជន៍បុគ្គលិកសង្គមកិច្ចសេវា IHSS របស់អ្នក ត្រូវផ្ញើការជូន ដំណឹងអំពីចំណាត់ការ (NOA) នៃសេវា IHSS រាល់ពេលធ្វើសេចក្ដីសម្រេចចិត្តពាក់ព័ន្ធនឹងសិទ្ធិទទួលបានសេវា IHSS។ ឧទាហរណ៍ នៅពេលដែលពាក្យស្នើ សុំសេវា IHSS របស់អ្នក ត្រូវបានវាយតម្លៃរួច នោះបុគ្គលិកសង្គមកិច្ចនៃសេវា IHSS នៅខោនធីរបស់អ្នក នឹងផ្ញើការជូនដំណឹងអំពីចំណាត់ការ (NOA) នៃសេវា IHSS ជូនដល់អ្នក។ បុគ្គលិកសង្គមកិច្ចនៃសេវា IHSS របស់អ្នក ក៏នឹងផ្ញើការជូន ដំណឹងអំពីចំណាត់ការ (NOA) នៃសេវា IHSS ជូនដល់អ្នកផងដែរ ប្រសិនបើម៉ោង របស់អ្នកត្រូវបានបង្កើន កាត់បន្ថយ ឬសេវា IHSS របស់អ្នកត្រូវបានបញ្ចប់។ សេវា IHSS ក៏ត្រូវតម្រូវឲ្យផ្ញើការជូនដំណឹងអំពីចំណាត់ការ (NOA) នៃសេវា IHSS ជូនដល់អ្នកផងដែរ ប្រសិនបើមានការផ្លាស់ប្ដូរដទៃផ្សេងទៀតដែលត្រូវ បានធ្វើឡើងចំពោះសេវា IHSS របស់អ្នក។
តើហេតុអ្វីបានជាការជូនដំណឹងអំពីចំណាត់ការនៃសេវា IHSS មានសារៈ សំខាន់?
ការជូនដំណឹងអំពីចំណាត់ការ (NOA) នៃសេវា IHSS គឺពិតជាមានសារៈសំខាន់ណាស់ ដោយសារការជូនដំណឹងនោះមានព័ត៌មានអំពី៖
- ការផ្លាស់ប្ដូរ ឬចំណាត់ការដែលខោនធីមានបំណងចង់ធ្វើ។
- មូលហេតុនៃការផ្លាស់ប្ដូរ ឬការចាត់វិធានការ។
- បទប្បញ្ញត្តិដែលគាំទ្រដល់សេចក្ដីសម្រេចរបស់ខោនធីនោះ។
- ព័ត៌មានអំពីសិទ្ធិសវនាការរបស់អ្នក និងសិទ្ធិដើម្បីឲ្យសេវា IHSS នៅបន្តទៀត ខណៈសវនាការរបស់អ្នកកំពុងស្ថិតក្នុងការរង់ចាំ។
- ព័ត៌មានអំពីកាលបរិច្ឆេទផុតកំណត់សម្រាប់ការដាក់បណ្ដឹងឧទ្ធរណ៍ ប្រសិនបើអ្នកមិនឯកភាពជាមួយខោនធី។
សេវា IHSS ត្រូវបានតម្រូវឲ្យផ្ញើការជូនដំណឹងអំពីចំណាត់ការ (NOA) នៃសេវា IHSS របស់អ្នក ក្នុងរយៈពេល 10 ថ្ងៃ មុនពេលការផ្លាស់ប្ដូរសេវា IHSS របស់អ្នក ត្រូវរំពឹងថានឹងកើតមានឡើង។ (សៀវភៅណែនាំស្ដីពីគោលនយោបាយ និងនីតិវិធី (MPP) 22-001(t)(1)) របស់នាយកដ្ឋានសេវាកម្មសង្គមរដ្ឋកាលីហ្វ័រញ៉ា។ នេះគឺជាមធ្យោបាយដើម្បីផ្ដល់ពេលវេលាដល់អ្នកដើម្បីស្នើសុំសវនាការមួយនៅមុនពេលដាក់ឲ្យមានការផ្លាស់ប្ដូរ ដើម្បីឲ្យអត្ថប្រយោជន៍របស់អ្នក អាចបន្តនៅក្នុងកម្រិតដូចគ្នាបាន។ ប្រសិនបើខោនធីនោះ មិនផ្ដល់ការជូនដំណឹងជាមុននៅក្នុងអត្ថប្រយោជន៍នៃ IHSS របស់អ្នកទេ ខោនធីនោះ ត្រូវបញ្ជាក់ពីអត្ថប្រយោជន៍ IHSS របស់អ្នកឲ្យបានច្បាស់លាស់។ (MPP 22-049.523)
សំណើសុំសវនាការដើម្បីតវ៉ានឹងសេចក្ដីសម្រេចលើសេវា IHSS
ប្រសិនបើអ្នកមិនឯកភាពនឹងសេចក្ដីសម្រេចរបស់ខោនធីពាក់ព័ន្ធនឹងអត្ថប្រយោជន៍នៃសេវា IHSS របស់អ្នក នោះអ្នកត្រូវមានសិទ្ធិស្នើសុំសវនាការ។ មានកាលបរិច្ឆេទផុតកំណត់ចំនួនពីរ ដែលអ្នកត្រូវដឹង នៅពេលស្នើសុំសវនាការ។
កាលបរិច្ឆេទផុតកំណត់ 90 ថ្ងៃ សម្រាប់ការស្នើសុំសវនាការ
អ្នកមានពេលត្រឹមតែ 90 ថ្ងៃប៉ុណ្ណោះ ដើម្បីស្នើសុំសវនាការពីកាលបរិច្ឆេទនៃការជូនដំណឹងអំពីសេវា IHSS ឬចំណាត់ការ ឬភាពអសកម្មដែលអ្នកមិនឯកភាពជាមួយ។ ខាងក្រោមនេះ គឺជាទីកន្លែងដែលអ្នកអាចស្វែងរកព័ត៌មានបន្ថែមអំពីការស្នើសុំសវនាការ៖ https://www.cdss.ca.gov/hearing-requests។ ប្រសិនបើអ្នកជឿថា អ្នកត្រូវការសវនាការនៅផ្ទះ អ្នកប្រហែលចង់ត្រួតពិនិត្យឯកសារបោះពុម្ពផ្សាយរបស់យើងដែលមានចំណងជើងថា សិទ្ធស្នើសុំសវនាការនៅផ្ទះ (Right to Request a Home Hearing) សម្រាប់ព័ត៌មានបន្ថែមអំពីរបៀបទទួលបានសវនាការនៅផ្ទះ។
ការរង់ចាំជំនួយដែលបានបង់ប្រាក់រួចសម្រាប់សវនាការរបស់អ្នក
ការរង់ចាំជំនួយដែលបានបង់ប្រាក់រួច គឺជាវិធានមួយដែលបង្ការការជូន ដំណឹងអំពីចំណាត់ការ (NOA) នៃសេវា IHSS របស់អ្នកពីការចូលជាធរមាន ខណៈដែលសវនាការរបស់អ្នកកំពុងស្ថិតក្នុងការរង់ចាំ។
ប្រសិនបើអ្នកស្នើសុំសវនាការមួយនៅមុនពេលផ្លាស់ប្ដូរការជូនដំណឹងអំពីចំណាត់ការ (NOA) នៃសេវា IHSS របស់អ្នក ត្រូវរំពឹងថានឹងកើតមាន នោះ សេវា IHSS របស់អ្នក នឹងបន្តនៅកម្រិតដូចគ្នាដដែល រហូតដល់ចេញលទ្ធផល សវនាការរបស់អ្នក។ (MPP 22-072.5) សេវា IHSS រង់ចាំជំនួយដែលបានបង់ប្រាក់រួច គឺមិនត្រូវចាត់ទុកជាការបង់ប្រាក់លើសនោះទេ បើទោះបីជាអ្នកចាញ់ក្ដីក្នុងសវនាការសេវា IHSS របស់អ្នកក្ដី។ (MPP 30-768.111)
ឧទាហរណ៍ ប្រសិនបើអ្នកត្រូវកាត់បន្ថយការជូនដំណឹងអំពីចំណាត់ការ (NOA) នៃសេវា IHSS ឬកាត់បន្ថយអត្ថប្រយោជន៍នៃសេវា IHSS របស់អ្នក ហើយអ្នកស្នើសុំសវនាការមួយនៅមុនពេលការផ្លាស់ប្ដូរការជូនដំណឹងអំពីចំណាត់ការ (NOA) នៃសេវា IHSS ត្រូវរំពឹងថាកើតមានឡើង អត្ថប្រយោជន៍នៃសេវា IHSS របស់អ្នក នឹងមិនផ្លាស់ប្ដូរការរង់ចាំសវនាការរបស់អ្នកឡើយ។ ក៏ប៉ុន្តែ ប្រសិនបើអ្នកមិនស្នើសុំសវនាការនៅមុនពេលការផ្លាស់ប្ដូរនោះត្រូវរំពឹងថាកើតមានឡើង នោះការជូនដំណឹងអំពីចំណាត់ការ (NOA) នៃសេវា IHSS នឹងត្រូវចូលជាធរមាន។
តើហេតុអ្វីបានជាខ្ញុំគប្បីត្រូវស្នើសុំសវនាការ?
វាពិតជាសំខាន់ណាស់ដែលត្រូវចងចាំថា សិទ្ធិទទួលបានសវនាការសេវា IHSS ជាសិទ្ធិរបស់អ្នក។ វាគឺជាសិទ្ធិសំខាន់មួយ ដោយសារវាផ្ដល់ឱកាសឲ្យអ្នកដើម្បីតវ៉ានឹងសេចក្ដីសម្រេចរបស់ខោនធី និងដើម្បីស្នើសុំសេវា IHSS ដែលអ្នកជឿថា អ្នកត្រូវការដើម្បីរក្សាសុវត្ថិភាពនៅផ្ទះ។ ការស្នើសុំសវនាការ ក៏សំខាន់ផងដែរ ដោយសារប្រសិនបើអ្នកមិនយល់ស្របនឹងការជូនដំណឹងអំពីចំណាត់ការ (NOA) នៃសេវា IHSS ឬចំណាត់ការណាមួយ ហើយអ្នកមិនស្នើសុំសវនាការទេនោះចំណាត់ការ និង/ឬការជូនដំណឹងអំពីចំណាត់ការ (NOA) នៃសេវា IHSS នឹងចូលជាធរមាន។ ប្រសិនបើអ្នករង់ចាំយូរពេកដើម្បីស្នើសុំសវនាការ អ្នកក៏អាចបាត់បង់សិទ្ធិរបស់អ្នកក្នុងជំទាស់នឹង NOA របស់អ្នក ឬសេចក្ដីសម្រេចរបស់ខោនធីផងដែរ។
នៅក្នុងសវនាការរបស់អ្នក អ្នកនឹងមានឱកាសបង្ហាញខ្លួននៅចំពោះមុខចៅក្រមច្បាប់រដ្ឋបាល (ALJ) ដែលមានចំណេះដឹងអំពីវិធាន IHSS។ ក្នុងអំឡុងសវនាការរបស់អ្នក ALJ ដែលត្រូវបានតែងតាំងទៅក្នុងសវនាការរបស់អ្នក នឹងស្ដាប់អ្នក និងខោនធី ហើយត្រូវតម្រូវឲ្យធ្វើសេចក្ដីសម្រេចថាតើវិធាន IHSS គប្បីត្រូវបាន អនុវត្តចំពោះអ្នកនៅក្នុងសំណុំរឿងរបស់អ្នកដែរឬទេ។ នេះគឺមិនមែនជាសិទ្ធិដែលអ្នកចង់លះបង់ចោលដោយងាយស្រួលនោះទេ។ សម្រាប់ព័ត៌មានអំពីរបៀបត្រៀមខ្លួនសម្រាប់សវនាការ IHSS របស់អ្នក និងតស៊ូមតិសម្រាប់សេវាកម្ម IHSS បន្ថែម អ្នកអាចចូលទៅកាន់ គេហទំព័រធនធានស្វ័យតស៊ូមតិ IHSS បាន។
បញ្ហាសេវាអតិថិជន និងការស្នើសុំបុគ្គលិកសង្គមកិច្ចនៃសេវា IHSS ថ្មី
ប្រសិនបើអ្នកជឿថា បុគ្គលិកសង្គមកិច្ចនៃសេវា IHSS របស់អ្នក បានសម្ដែងអាកប្បកិរិយាគ្មានវិជ្ជាជីវៈ ឬមិនសមរម្យ អ្នកប្រហែលចង់ទាក់ទងទៅកាន់អ្នកគ្រប់គ្រងបុគ្គលិកសង្គមកិច្ចនៃសេវា IHSS របស់អ្នកសម្រាប់ជំនួយ ឬដើម្បីដាក់ពាក្យបណ្ដឹង។ អ្នកក៏អាចស្នើសុំបុគ្គលិកសង្គមកិច្ចនៃសេវា IHSS ថ្មីផងដែរ។ ប្រសិនបើខោនធីពុំមានបុគ្គលិកសង្គមកិច្ចនៃសេវា IHSS មួយរូបផ្សេងទៀតដែលខោនធីអាចចាត់តាំងសម្រាប់អ្នកបានទេ ខោនធីអាចបដិសេធសំណើសុំរបស់អ្នកបាន។ ប្រសិនបើខោនធីមានបុគ្គលិកសង្គមកិច្ចនៃសេវា IHSS សម្រាប់ធ្វើការ នោះខ្លួនអាចចាត់តាំងបុគ្គលិកសង្គមកិច្ចនៃសេវា IHSS ថ្មីមួយរូបបាន។ ប្រសិនបើខោនធីបដិសេធមិនចាត់តាំងបុគ្គលិកសង្គមកិច្ចសេវា IHSS ថ្មីមួយរូបទេ អ្នកអាចទាក់ទងកម្មវិធីសម្រាប់មនុស្សពេញវ័យនៃនាយកដ្ឋានសេវាកម្ម សង្គមរដ្ឋកាលីហ្វ័រញ៉ា តាមលេខ៖ 916-651-8848។ អ្នកក៏អាចទាក់ទងក្រុមប្រឹក្សាគ្រប់គ្រងក្នុងមូលដ្ឋានរបស់អ្នកសម្រាប់ជំនួយដើម្បីទទួលបានបុគ្គលិកសង្គមកិច្ចនៃសេវា IHSS ថ្មីមួយរូប។
ពាក្យបណ្ដឹងអំពីការរើសអើង
ប្រសិនបើអ្នកជឿថា បុគ្គលិកសង្គមកិច្ចនៃសេវា IHSS របស់អ្នក ឬមន្ទីរសុខុមាលភាព ខោនធីរបស់អ្នក បានរើសអើងប្រឆាំងនឹងអ្នក ដោយសារអ្នកមានពិការភាព អ្នកអាចដាក់ពាក្យបណ្ដឹងអំពីការរើសអើងទៅកាន់ អង្គភាពសិទ្ធិពលរដ្ឋនៃនាយកដ្ឋានសេវាកម្មសង្គមរដ្ឋកាលីហ្វ័រញ៉ា (California Department of Social Services, Civil Rights Division)។ អ្នកមានពេលត្រឹម 180 ថ្ងៃប៉ុណ្ណោះ គិតចាប់ពីថ្ងៃដែលកើតមានការរើសអើងដែលរងការចោទប្រកាន់ ដើម្បីរៀបចំពាក្យបណ្ដឹង ឬស្នើសុំការស៊ើបអង្កេតណាមួយ។ ប្រសិនបើអ្នកមានវិវាទជាមួយនឹងខោនធីអំពីអត្ថប្រយោជន៍នៃសេវា IHSS របស់អ្នកដូចបានពន្យល់ខាងលើ អ្នកគប្បីស្នើសុំសវនាការ IHSS។ អ្នកក៏អាចចូលទៅកាន់ គេហទំព័រធនធានស្វ័យតស៊ូមតិទាក់ទងនឹងការរើសអើងអំពីពិការភាព សម្រាប់ព័ត៌មានបន្ថែមអំពីសិទ្ធិរបស់អ្នកក្នុងនាមជាបុគ្គលម្នាក់ដែលមានពិការភាពផងដែរ។
អ្នកផ្ដល់ដំណើរការពាក្យបណ្ដឹងសារទុក្ខ
ខោនធីនេះ គឺត្រូវតម្រូវឲ្យឆ្លើយតប និងដោះស្រាយសំណើបង់ប្រាក់ពីអ្នកទទួលប្រាក់ ឬអ្នកផ្ដល់សេវា។ (MPP 30-767.6) ខោនធីក៏មាននីតិវិធីបណ្ដឹងសារទុក្ខ ដែលខ្លួនត្រូវអនុវត្តតាម នៅពេលបណ្ដឹងសារទុក្ខ ឬពាក្យបណ្ដឹងត្រូវទទួលបាន ពាក់ព័ន្ធនឹងការផ្ដល់ប្រាក់សម្រាប់សេវា IHSS សម្រាប់អ្នកទទួលប្រាក់ដែលទទួល បានសេវា IHSS ស្ថិតក្រោមកម្មវិធីថែទាំផ្ទាល់ខ្លួន (PCSP)។ (MPP 30-767.6) អ្នកផ្ដល់សេវា ក៏អាចទាក់ទងទៅសហភាពរបស់ពួកគេសម្រាប់ជួយដោះស្រាយបញ្ហាប្រាក់បៀវត្សរ៍ផងដែរ។ អ្នកផ្ដល់សេវាថែទាំនៃសេវា IHSS អាចទាក់ទងការិយាល័យខោនធីនៃសេវា IHSS ឬអាជ្ញាធរសាធារណៈសម្រាប់ព័ត៌មានអំពីរបៀបទាក់ទងទៅកាន់សហភាពរបស់ពួកគេផងដែរ។ នៅទីនេះ គឺជាតំណភ្ជាប់ទៅកាន់ការិយាល័យខោនធីនៃសេវា IHSS៖ https://www.cdss.ca.gov/inforesources/county-ihss-offices។
តើអាចទទួលបានព័ត៌មានបន្ថែមអំពីសិទ្ធិរបស់អ្នកតាមរបៀបណា
ប្រសិនបើអ្នកមានសំណួរអំពីសិទ្ធិផ្លូវច្បាប់របស់អ្នក៖
- សូមហៅទូរសព្ទទៅកាន់ខ្សែហៅចូលរបស់ DRC៖ 1-800-776-5746។
- ហៅទៅកាន់ការិយាល័យការពារសិទ្ធិអតិថិជន (OCRA) តាមលេខ៖
- Northern California 1-800-390-7032 (TTY 877-669-6023)
- Southern California 1-866-833-6712 (TTY 877-669-6023)
ធនធានស្វ័យតស៊ូមតិ IHSS
ឯកសារបោះពុម្ពផ្សាយអំពីស្វ័យតស៊ូមតិ IHSS របស់ DRC៖ https://www.disabilityrightsca.org/publications/in-home-supportive-services-ihss
សេវាគាំពារតាមគេហដ្ឋាន (IHSS)៖ មគ្គទេសក៍សម្រាប់ការតស៊ូមតិ៖ https://www.disabilityrightsca.org/publications/in-home-supportive-services-ihss-advocates-manual
ការបដិសេធ៖ ការបោះពុម្ភផ្សាយនេះគឺជាព័ត៌មានផ្លូវច្បាប់តែប៉ុណ្ណោះ ហើយមិនមែនជាការណែនាំផ្លូវច្បាប់អំពីស្ថានភាពបុគ្គលរបស់អ្នកទេ។ វាគឺជាបច្ចុប្បន្នកាលបរិច្ឆេទបានប្រកាស។ យើងព្យាយាមធ្វើបច្ចុប្បន្នភាពសម្ភារៈរបស់យើងឱ្យបានទៀងទាត់។ ទោះជាយ៉ាងណាក៏ដោយច្បាប់កំពុងផ្លាស់ប្តូរជាទៀងទាត់។ ប្រសិនបើអ្នកចង់ធ្វើឱ្យប្រាកដថាច្បាប់មិនបានផ្លាស់ប្តូរ សូមទាក់ទង DRC ឬការិយាល័យច្បាប់ផ្សេងទៀត។