សិទ្ធិសម្រាប់សិស្សគ្រប់រូប

យើងត្រូវផ្លាស់ទីដោយសារគ្រោះមហន្តរាយ។

បុត្រធីតារបស់អ្នកមានសិទ្ធិចូលរៀននៅសាលាដែលពួកគេបានចូលរៀន ទោះ​បីជាអ្នកកំពុងរស់​នៅក្រៅ​ព្រំ​ដែននៃមណ្ឌលសិក្សាធិការក៏ដោយ។ នេះគេហៅថា "សិទ្ធិទទួលបានការអប់រំនៅសាលាដើម" ក្រោម​ច្បាប់​សហព័ន្ធ (ច្បាប់ McKinney Vento) ដើម្បីជួយរក្សាស្ថិរភាពសាលារៀនសម្រាប់សិស្ស។ ទាក់ទង​សាលា​រៀន​របស់កូនអ្នក ហើយស្នើសុំនិយាយជាមួយទំនាក់ទំនង​ខាង​ផ្នែ​កអប់រំអ្នកគ្មានផ្ទះសម្បែង។

ប្រសិនបើវាមិនមែនជាការអនុវត្តជាក់ស្តែងសម្រាប់កូនរបស់អ្នកក្នុងការចូលរៀននៅសាលាពីមុនរបស់ពួក​គេ ឬអ្នកមិនគិតថាវាជាឧត្ដមប្រយោជន៍​សម្រា​ប់​ពួកគេទេ ច្បាប់សហព័ន្ធក៏ចែងផងដែរថា អ្នក​អាច​ចុះឈ្មោះកូនរបស់អ្នក​នៅ​ក្នុងសាលារៀននៅជិតកន្លែងដែលអ្នកកំពុងស្នាក់នៅបាន។ នេះ​គឺ​ដោយ​សារ​តែច្បាប់សហព័ន្ធ (ច្បាប់ McKinney Vento) ដែលចែងថា កុ​មា​រដែលគ្មានផ្ទះសម្បែង​អាចចុះឈ្មោះ​ចូល​​រៀននៅសាលាក្បែរកន្លែងដែលពួកគេកំពុងរស់នៅបាន។ ទាក់ទងមណ្ឌលសិក្សាធិការក្នុងតំបន់ ហើយ​ប្រាប់ពួកគេថាអ្នកត្រូវតែ​ផ្លាស់ទី​ដោយសារតែគ្រោះមហន្តរាយ ហើយចង់ចុះឈ្មោះកូនរបស់អ្នកចូល​រៀន​។ សម្រាប់ព័ត៌មានបន្ថែម សូមចូលមើលការបោះពុម្ពផ្សាយរបស់ DRC ស្តីពីសិទ្ធិសិស្សគ្មានផ្ទះសម្បែង​។

ហេតុអ្វីខ្ញុំគួរចុះឈ្មោះកូនខ្ញុំចូលរៀន?

ការទៅសាលារៀនបន្ទាប់ពីគ្រោះមហន្តរាយគឺល្អសម្រាប់កុមារជាច្រើន ពីព្រោះ​វា​ជួយពួកគេឱ្យត្រលប់​ទៅ​រក​​ទម្លាប់ធម្មតាវិញ និងអនុញ្ញាតឱ្យពួកគេបន្ត​កិច្ច​ការ​សាលារបស់ពួកគេ។ សិស្សមួយចំនួនក៏​ត្រូវបាន​ផ្តល់អាហារតាមរយៈកម្មវិធីអាហារពេលព្រឹក និង​អា​ហារថ្ងៃត្រង់ផងដែរ ដែលអាចជួយគ្រួសារ​ដែលបាត់​បង់​ស្បៀងអាហារ​ដោយ​សារ​គ្រោះមហន្តរាយ ឬមិនមានលទ្ធភាពទិញអាហារ។ សាលាក៏ទុកពេលឲ្យ​ឪពុកម្ដាយ​ធ្វើការងារដើម្បីជួយគ្រួសារឲ្យងើបឡើងវិញពីគ្រោះ​មហន្តរាយផងដែរ។

តើកូនខ្ញុំអាចទៅរៀនបានទេ បើយើងកំពុងរស់នៅក្នុងទីជម្រក?

បាន វាមិនសំខាន់ថាតើអ្នកកំពុងរស់នៅកន្លែងណាទេ។ អ្នកអាចកំពុងរស់នៅក្នុងជម្រក តង់ ផ្ទះ​សណ្ដោង សណ្ឋាគារ ផ្ទះសំណាក់ កន្លែ​ង​បោះជំរំ រស់នៅក្នុងឡាន សួនកម្សាន្ត ឬរស់នៅជាមួយមិត្តភក្តិ ឬសាច់ញាតិ​រប​ស់អ្នក។ កូនរបស់អ្នកមានសិទ្ធិទៅសាលារៀននៅរដ្ឋកាលីហ្វ័រញ៉ា។

តើកូនរបស់ខ្ញុំត្រូវការឯកសារលិខិតស្នាមអ្វីខ្លះដើម្បីទៅសាលារៀនវិញ?

ប្រសិនបើអ្នកត្រូវផ្លាស់ទីដោយសារតែគ្រោះមហន្តរាយ កូនរបស់អ្នកអាច​ចុះ​ឈ្មោះចូលរៀនបាន​ភ្លាម​ដោយ​មិនបង្ហាញឯកសារលិខិតស្នាមដែលសាលាតែងតែទាមទារ ដូចជាលិខិតបញ្ជាក់កន្លែងស្នាក់នៅ កំណត់​ត្រាសាលា ឬកំណត់​ត្រា​ចាក់វ៉ាក់សាំង (កំណត់ត្រានៃការចាក់ថ្នាំបង្ការរោគ)។ សាលាថ្មីរបស់កូន​អ្នកនឹង​ទាក់ទងទៅសាលាចាស់របស់គេ ដើម្បីទទួលបានកំ​ណ​ត់​ត្រា​ទាំងនេះ។

តើខ្ញុំអាចចូលរួមក្នុងការអប់រំរបស់កូនខ្ញុំដោយរបៀបណាក្នុងអំឡុងពេល ឬ​ក្រោយគ្រោះមហន្តរាយ?

ឪពុកម្តាយមានសិទ្ធិចូលរួមក្នុងការសម្រេចចិត្តអំពីការអប់រំរបស់កូនខ្លួន។ សាលារៀនគួរតែ​ស្វែងរក​មធ្យោបាយ​ប្រកបដោយភាពច្នៃប្រឌិត ដើម្បីធានា​ឱ្យ​មាន ការចូលរួមពីមាតាបិតាសិស្ស រួមទាំងកិច្ច​ប្រជុំ​តាមអនឡាញ ប្រសិន​បើ​ពេល​ទំនេររបស់មាតាបិតាត្រូវបានរងផលប៉ះពាល់ដោយគ្រោះមហន្តរាយ។ លើសពីនេះទៀត សាលារៀនត្រូវតែគោរពភាសា ឬវិធីទំនាក់ទំនងដែល​អ្នក​ចង់​បាន។

សិទ្ធិបន្ថែមសម្រាប់សិស្សមានពិការភាព

ចុះបើកូនខ្ញុំមានពិការភាព?

សាលារៀនត្រូវតែធ្វើឱ្យប្រាកដថា សិស្សទាំងអស់ រួមទាំងសិស្សមានពិការភាព​មា​ន​លទ្ធភាពទទួលបាន​ការ​អប់រំ​របស់ពួកគេ រួមទាំងលទ្ធភាពទទួលបាន​សម្ភារៈ​ និងវេទិកាអនឡាញក្នុងអំឡុងពេលមាន​គ្រោះ​មហន្តរាយ។ ឧទាហរណ៍ ប្រសិនបើសាលារៀនផ្លាស់ទៅការរៀនតាមអ៊ីនធឺណិត ការសម្រប​ស​ម្រួល អាចរួម​មាន​ចំណងជើងបិទ ឧបករណ៍អានអេក្រង់ អក្សរពុម្ពធំ ឬទម្រ​ង់​ជំនួស។ ទាំងនេះគួរតែត្រូវបាន​គូស​បញ្ជាក់​នៅក្នុងផែនការ 504។ ប្រសិនបើកូនរបស់អ្នកមានសិទ្ធិទទួលបានការអប់រំពិសេស វាគួរតែត្រូវ​បាន​ចង​ក្រងជាឯកសារនៅក្នុងផែនការ IEP របស់ពួកគេ ដោយ​ពិភា​ក្សាលម្អិត​ប​ន្ថែ​មខាងក្រោម។

ព័ត៌មានបន្ថែមអំពី ផែនការ 504 មាននៅទីនេះ។

តើកូនរបស់ខ្ញុំនឹងបន្តទទួលបានសេវាអប់រំពិសេសរបស់ពួកគេដែលមានរាយក្នុងកម្មវិធីអប់រំ បុគ្គល (“IEP”) របស់ពួកគេដែរឬទេ បើទោះបីជាសាលា​បាន​បិទ​ទ្វារដោយសារតែគ្រោះ​មហន្ត​រាយ​ក៏ដោយ?

កូនរបស់អ្នកមានសិទ្ធិទទួលបានសេវាអប់រំពិសេសដែលពួកគេត្រូវការនៅសាលាសាធារណៈណាមួយ។ សិទ្ធិនេះត្រូវបានការពារដោយច្បាប់សហព័ន្ធ និងរដ្ឋកាលីហ្វ័រញ៉ា។ សេវាកម្ម IEP ដែលកូនរបស់អ្នក​ត្រូវ​តែទទួលបានក្នុងអំឡុងពេលបិទសា​លា​រៀ​ន​គួរតែត្រូវបានចងក្រងជាឯកសារនៅក្នុងផែនការ IEP របស់​កូន​អ្នកនៅ​ក្នុ​ង​ផ្នែក "ផែនការអាសន្ន"។ ព័ត៌មានបន្ថែមអំពីផែនការអាសន្ន IEP មាននៅទីនេះ។

ប្រសិនបើផែនការ IEP របស់កូនអ្នកមិនរួមបញ្ចូលផ្នែកនេះ ឬអ្នកមិនយល់​ស្រ​ប​នឹងចំណុចនេះ អ្នក​គួរ​តែ​ស្នើសុំកិច្ចប្រជុំ IEP ដើម្បីធ្វើការកែប្រែ។ សាលារៀន​ត្រូវ​​រៀប​ចំ​កិច្ចប្រជុំ​ IEP ​ក្នុង​រយៈ​ពេល​ 30 ថ្ងៃបន្ទាប់​​ការ​​ស្នើសុំរបស់​អ្នក​។ ព័ត៌មានបន្ថែមអំពីរបៀបស្នើសុំកិច្ចប្រជុំ IEP មាននៅទីនេះ។

តើកូនរបស់ខ្ញុំនឹងបន្តទទួលបានសេវាអប់រំពិសេសរបស់ពួកគេទៀតទេ បើ​ទោះ​បីជាយើង​ផ្លាស់​ទៅ​មណ្ឌលសិក្សាធិការថ្មី?

បាន មណ្ឌលសិក្សាធិការថ្មីរបស់កូនអ្នកត្រូវតែផ្តល់សេវាកម្ម និងជំនួយគាំទ្រ​ដូចមានចែងក្នុងផែនការ IEP របស់កូនអ្នក។ ប្រសិនបើមណ្ឌលសិក្សាធិការថ្មីចង់ផ្លាស់ប្តូរផែនការ IEP របស់កូនអ្នក ជាដំបូ​ងពួក​គេ​ត្រូវតែពិភាក្សាអំពីការផ្លាស់ប្តូរដែលបានស្នើជាមួយអ្នកនៅក្នុងកិច្ចប្រជុំ IEP ហើយត្រូវទទួល​បាន​ការយល់ព្រមពីអ្នក។

ទោះបីជាអ្នកមិនមានលិខិតស្នាមរបស់កូនអ្នក ដូចជាផែនការ IEP របស់ពួក​គេ​ក៏ដោយ កូនរបស់អ្នក​ត្រូវតែ​ទទួលបានសេវាអប់រំពិសេស។ ប្រសិនបើសាលាថ្មីរបស់កូនអ្នកមិនអាចទទួលបានកំណត់ត្រា​ពី​សាលាចាស់​របស់ពួកគេទេ អ្នកអាចប្រាប់សាលាថ្មីអំពីតម្រូវការរបស់កូនអ្នក។ សាលា​ត្រូវតែ​ធ្វើការ​ជាមួយ​អ្នក​ដើម្បីផ្តល់សេវាកម្មដូចគ្នាដែលកូនរបស់អ្នកធ្លាប់ទទួលបាន ឬធ្វើការជាមួយអ្នក និងកូន​របស់​អ្នកដើម្បីបង្កើតផែនការថ្មី។

ព័ត៌មានបន្ថែមអំពីដំណើរការផែនការ IEP មាននៅទីនេះ។

ចុះប្រសិនបើកូនរបស់ខ្ញុំមិនទទួលបានសេវាកម្ម IEP របស់ពួកគេក្នុង​អំឡុង​ពេល ឬ​ក្រោយ​គ្រោះមហន្តរាយនោះវិញ?

ប្រសិនបើសាលារៀនមិនអាចផ្តល់សេវាកម្ម IEP របស់កូនអ្នកក្នុងអំឡុងពេល​មានគ្រោះមហន្តរាយ ឬ​ការ​បិទ​សាលារៀនបានទេ សិស្សអាចមានសិទ្ធិទទួល​បាន​​សេវាប៉ះប៉ូវបន្ថែម ("ការរៀនសង") ដើម្បីប៉ះប៉ូវ​សម្រាប់​សេវាកម្មដែល​ពួកគេ​បានខកខាន។

ប្រសិនបើកូនរបស់អ្នកមិនកំពុងទទួលបានសេវាកម្ម IEP របស់ពួកគេទេ អ្នក​គួរតែរក្សាកំណត់ត្រាអំពី​សេវាកម្ម​ដែលពួកគេបានខកខាន និងនៅពេលណា។ បន្ទាប់មក អ្នកគួរស្នើសុំកិច្ចប្រជុំ IEP ដើម្បី​ពិភាក្សា​​អំពីសេវាកម្ម​ដែល​កូនរប​ស់​អ្នកបានខកខាន និងវិធីសាស្រ្តដែលមណ្ឌលសិក្សាធិការនឹងរៀបចំ​សេវាកម្ម​​ទាំងនោះ។

ចុះប្រសិនបើគ្រោះមហន្តរាយប៉ះពាល់ដល់ពិការភាពរបស់កូនខ្ញុំ ហើយ​ពួក​គេ​ត្រូវការជំនួយថ្មី ឬជំនួយខុសពីមុននោះវិញ? 

កូនរបស់អ្នកអាចត្រូវការការសម្របសម្រួល ការគំាទ្រ ឬសេវាកម្មដែលថ្មី ឬ​ខុ​ស​គ្នាក្នុងអំឡុងពេល ឬ​ក្រោយ​គ្រោះមហន្តរាយ។ ឧទាហរណ៍ កូនរបស់អ្នកអាចមានស្ថានភាពវេជ្ជសាស្ត្រដែលកាន់តែធ្ងន់​ធ្ងរទៅ​ៗ​ដោយសារផ្សែងពីភ្លើងឆេះព្រៃ (ឧ. ជំងឺហឺត) ឬអាចមានតម្រូវការសុខភាព​ផ្លូវ​ចិត្តថ្មី បន្ទាប់ពីមានបទ​ពិសោធ​អារម្មណ៍រន្ធត់ដែលទាក់ទងនឹង​គ្រោះមហ​ន្តរាយ។ ប្រសិនបើកូនរបស់អ្នកមានផែនការ 504 ឬ IEP រួចហើយ អ្នកអាចស្នើសុំ​កិច្ច​ប្រជុំដើម្បីពិភាក្សាអំពីតម្រូវការដែលបានផ្លាស់ប្តូររបស់កូនអ្នក។ ប្រសិន​បើកូនរបស់អ្នកមិនទាន់មានផែនការ 504 ឬ IEP ទេ អ្នកអាចស្នើសុំ​កា​រ​វាយ​តម្លៃ ដើម្បីមើល​ថាតើ​កូនរបស់អ្នកមានសិទ្ធិទទួលបានដែរឬទេ។

ព័ត៌មានបន្ថែមអំពីរបៀបស្នើសុំការវាយតម្លៃផែនការ 504 ឬការផ្លាស់ប្តូរផែនការ 504 របស់កូន​អ្នក​មាន​នៅ​ទីនេះ។

ព័ត៌មានបន្ថែមអំពីការស្នើសុំការវាយតម្លៃផែនការ IEP ឬការផ្លាស់ប្តូរផែនការ IEP របស់កូនអ្នកមាន​នៅ​ទីនេះ​។

តើខ្ញុំអាចប្រាកដថាកូនរបស់ខ្ញុំដែលមានពិការភាពមានសុវត្ថិភាពដោយរបៀបណាប្រសិនបើមានគ្រោះអាសន្ន ឬគ្រោះមហន្តរាយកើតឡើងនៅពេល​ពួក​គេ​នៅសាលារៀន?

សាលារៀនត្រូវតែមានផែនការសុវត្ថិភាពសាលាគ្រប់ជ្រុងជ្រោយ ដែលរួមបញ្ចូល​ពី​វិធីរក្សាសុវត្ថិភាពសិស្ស​ក្នុង​អំឡុងពេលមានអាសន្ន ឬគ្រោះមហន្តរាយ។ ផែនការទាំងនេះត្រូវតែរួមបញ្ចូលការសម្របសម្រួល ឬ​ការ​សម្របខ្លួន​សម្រាប់​សិ​ស្សមានពិការភាព។ ឧទាហរណ៍ ផែនការជម្លៀសចេញពីថ្នាក់រៀនដែលរួមបញ្ចូល​ជណ្តើរគួរត្រូវ​បាន​ផ្ត​ល់​សម្រាប់សិស្សដែលប្រើរទេះរុញ។

ប្រសិនបើអ្នកព្រួយបារម្ភអំពីសុវត្ថិភាពរបស់កូនអ្នកនៅសាលារៀនអំឡុងពេលមានគ្រោះមហន្តរាយ ឬ​គ្រា​អាសន្ន អ្នកអាចស្នើសុំកិច្ចប្រជុំផែនការ IEP ឬ 504 ដើ​ម្បីពិភាក្សាអំពីតម្រូវការពិសេសដែលទាក់ទង​នឹង​​ពិការភាពរបស់កូនអ្នក។

សូមអរគុណដល់អង្គការ Neighborhood Legal Services of Los Angeles County, Lone Star Legal Aid និង Nationallessness Law Center សម្រាប់ការប្រើប្រាស់ធនធានរបស់ពួកគេ។