Լանթերմանի օրենքը

Զարգացման հաշմանդամություն ունեցող մարդիկ Կալիֆոռնիայում իրավունք ունեն ստանալու ծառայություններ, որոնք օգնում են նրանց լինել իրենց համայնքների մասը։ Օրենքն ասում է, որ տարածքային կենտրոններից օգտվող մարդիկ իրավունք ունեն որոշումներ կայացնել իրենց անհրաժեշտ ծառայությունների և աջակցության վերաբերյալ, օրինակ՝

• Որտեղ ապրել
• Ում հետ ապրել
• Որտեղ աշխատել կամ դպրոց գնալ
• Ում հետ ընկերություն անել
• Ինչպես զվարճանալ
• Ինչ անել ապագայում
• Ինչ ծառայություններ և աջակցություն եք ուզում և որոնց կարիքն ունեք

Տե՛ս նաև Լանթերմանի օրենքով սահմանվող իրավունքների մասին հրապարակումը 

Ի՞նչ է Անհատական ծրագրի պլանը (IPP)

IPP-ն գործողությունների պլան է, որում նկարագրվում է ձեր նախընտրած ձևով ապրելու համար անհրաժեշտ օգնությունը։

IPP-ում սահմանվում են այն նպատակները, ծառայությունները և աջակցությունը, որոնցով կարող եք ավելի անկախ կյանք վարել և մասնակցել համայնքային կյանքին։

IPP-ն գրավոր համաձայնություն և պայմանագիր է ձեր և տարածքային կենտրոնի միջև։ Այն գրվում է ձեզ հասկանալի ոճով։

Ժամանակացույց IPP-ի համար

Օրենքն ասում է, որ մարդիկ պետք է առնվազն 3 տարին մեկ անգամ IPP-ի հանդիպում ունենան։ Որոշ մարդիկ IPP-ի հանդիպում ունենում են ամեն տարի։ IPP-ի հանդիպում կարող եք խնդրել ցանկացած պահի։ IPP-ի հանդիպում նշանակելու համար զանգահարեք տարածքային կենտրոնի սպասարկման համակարգողին։

IPP-ի հանդիպում խնդրելուց հետո այն պետք է կայանա 30 օրվա ընթացքում։

Ինչու է ձեր IPP-ի հանդիպումը կարևոր

Ձեր IPP-ն կարող է պաշտոնապես քննարկվել և գրվել միայն ձեր IPP-ի հանդիպման ժամանակ։ Եթե տարածքային կենտրոնը ձեզ մատուցվող ծառայությունները փոփոխելու հարցով զանգահարի ձեզ, ասացեք նրանց, որ ցանկանում եք այդ մասին խոսել IPP-ի հանդիպման ժամանակ։

Ձեր իրավունքները IPP-ի հանդիպման ժամանակ

• Դուք ունեք գրավոր IPP ունենալու իրավունք, որում նշվում են ապագայի ձեր նպատակները, և ինչ ծառայությունների ցանկություն ու կարիք ունեք։
• Դուք ունեք այն ծառայություններից օգտվելու իրավունք, որոնք կազմում են ձեր համայնքի, այլ ոչ զուտ հաշմանդամություն ունեցող մարդկանց համար նախատեսված վայրերի կամ խմբերի մասը։
• Դուք իրավունք ունեք օգնելու և միասին կազմելու ձեր IPP-ն։
• Դուք իրավունք ունեք չհամաձայնելու ձեր IPP-ով նախատեսված ծառայությունների ոչ մի փոփոխության, նույնիսկ եթե ձեզ հետ հանդիպում չի անցկացվել։
• Դուք իրավունք ունեք ըստ անհրաժեշտության ունենալու թարգմանիչ կամ օժանդակող (օգնող), և տարածքային կենտրոնը պետք է ապահովի դա ձեզ համար։
• Դուք իրավունք ունեք ներկա լինել ձեր IPP-ի հանդիպմանը և ասել մարդկանց, թե ինչ ծառայությունների ցանկություն և կարիք ունեք։
• Դուք իրավունք ունեք պահանջելու, որ ձեր IPP-ի հանդիպումն անցկացվի ձեր ցանկացած և ձեզ հարմար վայրում։ Տարածքային կենտրոնը չի կարող փոխել ձեր ծառայությունները կամ գրել ձեր IPP-ն՝ առանց հանդիպմանը ձեր մասնակցության։
• Դուք իրավունք ունեք փաստաթղթերը, օրինակ՝ IPP-ները, գնահատման պլանները, IPP-ի իրավունքները, բողոքարկման իրավունքները և պահանջվող գործողության մասին ծանուցումները, ստանալ ձեր մայրենի լեզվով։
• Դուք իրավունք ունեք ստանալ ծառայություններն ու աջակցությունը ամենաքիչ սահմանափակումներով միջավայրում։

Տարածքային կենտրոնը և ծառայությունները տրամադրող գործակալությունները, օրինակ՝ ինտերնատ-տները կամ ծրագրերը, պետք է ձեզ սեփական որոշումներ կայացնելու հնարավորություն տան։

Նրանք ձեր որոշումները կայացնելու համար կարևոր տեղեկությունները պետք է տրամադրեն ձեզ այն եղանակով, որը հասկանալի է ձեզ համար։

Ովքեր են IPP-ի թիմի անդամները

• Դուք ամենակարևոր անդամն եք։
• Ծնողները և օրինական խնամակալները։
• Մարդիկ, որոնք ճանաչում և խնամում են ձեզ։
• Տարածքային կենտրոնի ձեր ծառայության համակարգողը, որը կարող է ձեզ համար ստանալ ձեր նախընտրած և ձեզ անհրաժեշտ ծառայությունները։
• Ըստ անհրաժեշտության՝ բազմադիսցիպլինար թիմը։
• Ցանկացած անձ, ում դուք կցանկանաք տեսնել թիմում։

Ինչ անել նախքան IPP-ի հանդիպումը

• Մտածեք ապագայի ձեր նպատակների մասին։ Մտածեք այն մասին, թե ինչ է ձեզ անհրաժեշտ համայնքում առողջ և անվտանգ կյանք վարելու համար։ Ի՞նչ նոր բաներ կան, որ կցանկանայիք անել։
• Ուսումնասիրեք ձեր հին IPP-ն և տեսեք, թե ինչն է աշխատում, ինչը՝ ոչ։ Որևէ ընկերոջ կամ ընտանիքի անդամի խնդրեք օգնել։ Ի՞նչեր կան, որ կցանկանայիք այլ կերպ անել։
• Թվարկեք ձեր մտահոգություններն ու նպատակները։
• Թվարկեք այն ծառայություններն ու աջակցությունը, որոնք ձեր կարծիքով կօգնեին ձեզ հասնել ձեր նպատակներին։
• Ձեզ համար վստահելի մարդկանց հետ խոսեք, թե ինչ եք ցանկանում ասել ձեր հանդիպման ժամանակ։ Հետո գրեք դա կամ որևէ ընկերոջ կամ ընտանիքի անդամի խնդրեք օգնել ձեզ։
• Ձայնագրող սարքով կամ հեռախոսով ձայնագրեք այն, ինչ ցանկանում եք ասել և ձայնագրությունը բերեք ձեզ հետ հանդիպմանը։
• Փորձեք ելույթը։ Ձեր ցանկացածի ու ձեզ անհրաժեշտի հարցերում ձեր լավագույն պաշտպանը դուք եք։
• Դա շատ կարևոր հանդիպում է։ Եղե՛ք պատրատված։ Բաց մի՛ թողեք այն։

Այս բրոշյուրի վերջում ներկայացված IPP-ի հանդիպման պլանավորման աշխատաթերթը կարող է օգնել ձեզ պատրաստվել ձեր հանդիպմանը։

Տե՛ս նաև 16 հուշում՝ տարածքային կենտրոնից ձեր և ձեր երեխայի համար որակյալ ծառայություններ ստանալու վերաբերյալ։

Ինչ անել ձեր IPP-ի հանդիպման ժամանակ

• Ձեր թիմի հետ խոսեք այն մասին, թե ինչ եք ցանկանում, և ինչ է անհրաժեշտ ձեզ։
• Ներկայացրեք այն, ինչ գրել եք (կամ ձայնագրել եք) ձեր նախընտրած պլանների ու ծառայությունների մասին։
• Եղե՛ք քաղաքավարի ու համոզիչ։
• Կարող եք խնդրել, որ ծառայությունների այլ համակարգող ունենաք:
• Կարող եք խնդրել, որ փոխեն այն ծառայությունները, որոնք ստանում եք։
• Ձեր հանդիպմանը պետք է ներկա լինի այնպիսի անձ, որը կարող է ձեր IPP-ով սահմանվող հարցերին «Այո» կամ «Ոչ» ասել։ Դա կարող է լինել ձեր ծառայությունների համակարգողը կամ տարածքային կենտրոնի այլ աշխատակազմ։
• Հարցրեք, թե արդյոք նոր գնահատումներ, հաշվետվություններ կամ դիտարկումներ կան։
• Խնդրեք խոսել ձեր ուժեղ կողմերի, հետաքրքրությունների, անձնային աճի ոլորտների, կարիքների ոլորտների և ընկերությունների մասին։
• Ձեր առաջընթացի կամ ծառայությունների մասին տվեք ցանկացած այլ հարց։
• Ներկայացրեք ներկայի ու ապագայի ձեր նպատակները։
• Քննարկեք ձեր կոնկրետ մտահոգությունները։
• Ներկայացրեք տան բոլոր այն պայմանները, որոնք կարող են բացասաբար ազդել դպրոցում կամ աշխատանքում ձեր առաջադիմության կամ վարքագծի վրա, ինչպես նաև բոլոր վերջին փաստաթղթերը կամ բժշկական թարմ տեղեկությունները։
• Կատարեք նշումներ խորհուրդների և ժամանակացույցերի վերաբերյալ, օրինակ՝ ավելի շատ ծառայություններ կամ գնահատումներ։
• Հանդիպման ժամանակ բարձրաձայն ասեք, թե ինչպես եք հասկանում կայացրած որոշումները, ձեռնարկվելիք գործողությունները, ժամանակացույցերը և յուրաքանչյուր անձի դերն ու պատասխանատվությունը։
• Կարծիք հայտնեք այն մարդկանց մասին, որոնք ձեզ հետ աշխատում են ձեր կողմից դրական ջանքեր, աճ կամ փոփոխություն արձանագրած ոլորտներում։

Եթե ձեր IPP-ի ծառայությունները հաստատող անձը ներկա չէ ձեր հանդիպմանը, տարածքային կենտրոնը պետք է 15 օրվա ընթացքում մեկ այլ հանդիպում նշանակի։ Տարածքային կենտրոնի անձնակազմի անդամը, որը հաստատում է ծառայությունները, պետք է ներկա լինի։

Ձեր IPP-ում նշված ծառայությունների և աջակցության իրավունքը

Լանթերմանի օրենքն ասում է, որ ձեր ծառայություններն ու աջակցությունը պետք է օգնեն ձեզ լինել անկախ, ձեր համայնքի արդյունավետ անդամ և ապրել այնտեղ, որտեղ ձեզ անվտանգ ու առողջ եք զգում։

Ահա մի քանի (ոչ բոլորը) ծառայություն և աջակցության տեսակներ, որոնք տարածքային կենտրոնը կարող է օգնել ձեզ գտնել ու ստանալ։

• Դպրոց ընդունվելու կամ ուսուցման ծրագրի մասնակցելու օգնություն
• Ադապտիվ սարքավորում․ եթե ձեզ անհրաժեշտ են բաներ, որոնք կարող են օգնել ձեզ ավելի անկախ լինել, օրինակ՝ անվասայլակները կամ խոսացող համակարգիչները։
• Շահերի պաշտպանության թեմայով ուսուցում․ եթե ձեզ անհրաժեշտ է ավելին իմանալ ձեր իրավունքների մասին, որպեսզի պաշտպանեք ձեր շահերը։
• Տե՛ս DDS-ի շահառուների խորհրդատվական հանձնաժողովի հրապարակումները և տեսանյութերը։ 
• Փոխադրման ծառայություններ կամ ուսուցում ավտոբուսներից և այլ փոխադրամիջոցներից ինքնուրույն օգտվելու թեմայով։
• Ճգնաժամային ծառայություններ․ եթե ձեզ անհրաժեշտ է արտակարգ իրավիճակի պլան։
• Ծնողի ուսուցում․ եթե երեխաներ ունեք, և ձեզ անհրաժեշտ է ավելին իմանալ նրանց խնամքի մասին։
• Սեռական կյանք․ եթե հարցեր ունեք սեռական կյանքի մասին, կամ ձեզ անհրաժեշտ է օգնություն ձեր հարաբերություններում։
• Օգնություն աշխատանք գտնելու, այդ թվում՝ աջակցված զբաղվածության և փոքր բիզնես սկսելու հարցերում։
• Կենսական ծառայություններ․ օգնություն տուն գտնելու և տեղափոխվելու, սենյակակիցներ կամ տանը համակեցությամբ ապրողներ գտնելու, տնային տնտեսության կահավորման, առօրյա կյանքի սովորական գործերի և արտակարգ իրավիճակներում գործողություններ ձեռնարկելու, համայնքային կյանքին մասնակցող անդամ դառնալու և անձնական ֆինանսական հարցերը կառավարելու հարցերում, որպեսզի կարողանաք ավելի անկախ լինել։
• Օժանդակողը կարող է օգնել ձեզ, եթե ցանկանաք որևէ հանձնաժողո
• վում ընդգրկվել կամ տնօրենների խորհրդի անդամ դառնալ։
• Ավելի լավ կյանքով ապրելու համար անհրաժեշտ այլ ծառայություններ։ Դրանք կարող են յուրաքանչյուր անձի համար տարբեր լինել։

Ավելի մեծ ցանկը տե՛ս Հավելված C-ում, այստեղ

Հիշե՛ք։ Նորմալ է խնդրել բաներ, որոնք ձեզ անհրաժեշտ են և այս ցանկում ներառված չեն։

Ձեր IPP-ի թիմի օգնությամբ գրեք այն ծառայություններն ու աջակցությունը, որոնք ձեզ անհրաժեշտ է ունենալ ձեր IPP-ում։

Ձեր IPP-ի միջոցով ծառայություններ ստանալու վերաբերյալ մասնրամասները, ինչպես նաև նմուշային նամակները և պլանավորման ձևաթղթերը տե՛ս Լանթերմանի օրենքով սահմանված իրավունքների (RULA) 4-րդ գլխում և RULA-ի հավելվածներում։

Ինքնորոշման ծրագիրը

Տարածքային կենտրոնի կողմից վճարվող ծառայություններն ստանալու մեկ այլ եղանակ է Ինքնորոշման ծրագիրը։ Ինքնորոշման ծրագիրը թույլ կտա ձեզ ավելի մեծ հսկողություն ունենալ ձեր ծառայություններն ու աջակցությունը ընտրելու հարցում։ Դուք ամեն տարի կստանաք ձեզ անհրաժեշտ ծառայություններն ու աջակցությունը գնելու որոշակի բյուջե, որով կկարողանաք ավելի լավ օգտվել ձեր պլանից։ Դուք կարող եք ընտրել ձեր ծառայությունները և սպասարկողներ, որոնք կտրամադրեն այդ ծառայությունները։ Բյուջեն չգերազանցելու համար պատասխանատու եք ինքներդ։ Դուք պարտավոր չեք միանալու Ինքնորոշման ծրագրին․ դա ձեր ընտրությունն է։

Ինչ անել, եթե ոչ ոք չի լսում ձեզ

Դուք պետք է ձեր ասելիքը ունենաք ձեզ տրամադրվող ծառայությունների և աջակցության հարցում։ Եթե մարդիկ ձեզ չեն լսում, ասեք ինչ-որ մեկին։ Ասեք որևէ ընկերոջ, բարեկամի, ձեր ծառայությունների համակարգողին ձեր՝ որպես շահառուի իրավունքների պաշտպանին կամ Զարգացման խանգարումներով պայմանավորված հաշմանդամությունների նահանգային խորհրդի (State Council on Developmental Disabilities, SCDD) ձեր տեղական տարածքային գրասենյակի որևէ ներկայացուցչի։
Տե՛ս տեղական SCDD տարածքային (տարածքային խորհուրդ) գրասենյակների ցանկը։   

Ձեր IPP-ն պայմանագիր է

Օրենքն ասում է, որ ձեր IPP-ն գրելիս տարածքային կենտրոնը պետք է հետևի որոշակի կանոնների։

Նախքան ծառայությունների տրամադրումը սկսելը կամ շարունակելը դուք և տարածքային կենտրոնը պետք է համաձայնեք և ստորագրեք IPP-ն։

Ձեր իրավունքները IPP-ն ստորագրելիս

Նախքան համաձայնագիր ստորագրելը դուք իրավունք ունեք ուսումնասիրելու և մտածելու ձեր IPP-ի շուրջ։

Ձեր ծառայությունների տրամադրումը չի կարող սկսվել, քանի դեռ դուք և տարածքային կենտրոնը չեք համաձայնեցրել, թե ինչ է ներառելու ձեր IPP-ն։ Երբ ստորագրում եք ձեր IPP-ն, ասում եք, որ համաձայն եք ձեր IPP-ում ներառվածի հետ։

Եթե համաձայն չեք ձեր IPP-ում ներառված ոչ մի բանի հետ, չպետք է ստորագրեք այն։ ԲԱՅՑ կարող եք համաձայնել դրա մի մասին։ Գրեք, թե ինչին եք համաձայն և ինչին համաձայն չեք։

Եթե համաձայն եք ձեր IPP-ի միայն մի մասին, ձեր ծառայությունների համակարգողին խնդրեք գրել այն, օրինակ, այսպես․

Ես համաձայն եմ իմ IPP-ի այս մասերի հետ -

1.  
2.  
3.  

Խնդրում եմ անմիջապես սկսել/շարունակել այն ծառայությունների տրամադրումը, որոնց համաձայն եմ։

Ես համաձայն չեմ իմ IPP-ի այս մասերի հետ -

1.  
2.  
3.  

Դա անելուն պես ձեր և տարածքային կենտրոնի համաձայնեցրած ծառայությունների տրամադրումը կարող է սկսվել։

IPP-ի ձեր օրինակը

Անպայման ստացեք IPP-ի ձեր օրինակը։ Եթե ցանկանաք, որ ձեր հանդիպմանը եկած մարդիկ ստանան ձեր IPP-ի օրինակը, տարածքային կենտրոնը կարող է ուղարկել այն այդ մարդկանց։

Ձեր IPP-ն ուսումնասիրեք այն մարդկանց հետ, որոնք հոգ են տանում ձեր մասին։ Համոզվեք, որ այն պարունակում է այն, ինչ ցանկանում եք։

Եթե ծառայությունը ներառված է ձեր IPP-ում, տարածքային կենտրոնը պետք է ձեզ համար ստանա այդ ծառայությունները և աջակցությունը։

Ձեր իրավունքները, եթե համաձայն չեք IPP-ի հետ

Եթե տարածքային կենտրոնը ձեր ցանկացած ծառայություններին ու աջակցությանն ասում է «ՈՉ», պետք է 5 օրվա ընթացքում նամակ ուղարկի ձեզ՝ նշելով «Ոչ» ասելու պատճառը և ինչպես կարող եք բողոքարկել։

Եթե համաձայն չեք տարածքային կենտրոնի հետ ձեր նախընտրած կամ ձեզ անհրաժեշտ ծառայությունների հարցում, իրավունք ունեք բողոքարկել նրանց որոշումը։ Եթե տարածքային կենտրոնն ուշացնում է որոշման կայացումը կամ չափազանց երկար է որոշում կայացնում, պնդեք, որ որոշում կայացնեն։ Կարող եք ուշացումը համարել նաև մերժում և բողոքարկել։

Բողոքարկումը

Բողոքարկումը տարածքային կենտրոնի որոշումը վիճարկելու ձեր իրավունքն է։ Այս ուղեցույցում մենք չենք մանրամասնի բողոքարկման գործընթացը։ Բողոքարկումների և բողոքների գործընթացին տեղեկացե՛ք Լանթերմանի օրենքով սահմանված իրավունքների 10-րդ գլխում։

Բողոքարկման և լսումներ պահանջելու գործընթացին տեղեկացե՛ք Տարածքային կենտրոնի լսումների փաթեթում։ 

Հիշե՛ք, սա ձեր կյանքն է

Տարածքային կենտրոնն օգնում է ձեզ ապրել այն կյանքով, որը ցանկանում եք։ Սովորեք խոսել հօգուտ ձեզ։ Դարձեք սեփական իրավունքների պաշտպանության որևէ խմբի անդամ կամ ստացեք սեփական իրավունքների պաշտպանության ուսուցում։

Օրենքն ասում է, որ ձեր համայնքի անդամ լինելու համար դուք իրավունք ունեք կատարել ընտրություններ ձեր կյանքի վերաբերյալ և ստանալ ձեզ անհրաժեշտ ծառայություններն ու աջակցությունը։ Երբ ձեր կյանքի վրա բացասաբար անդրադարձող որևէ որոշմանը համաձայն չեք, բարձրաձայնեք այդ մասին։

Ստացեք օգնություն բողոքարկման միջոցով

Աջակցության համար խոսեք ձեր SCDD տարածքային (տարածքային խորհրդի) գրասենյակի, ընտանիքի, ընկերների, աջակցման շրջանակի կամ սեփական իրավունքների պաշտպանության խմբի հետ։

Յուրաքանչյուր տարածքային կենտրոն ունի շահառուների իրավունքների պաշտպան։ Տարածքային կենտրոնին հարցրեք նրանց մասին և ստացեք նրանց հեռախոսահամարը։ Շահառուների իրավունքների պաշտպանը կարող է աջակցել ձեզ։

Շահառուների իրավունքների պաշտպանության գրասենյակի (Office of Client Rights’ Advocacy) հետ կարելի է կապվել այս համարով․

1-800-390-7032 կամ այցելեք նրանց կայք։

ԿԱՄ

Կարող եք զանգահարել Կալիֆոռնիայի հաշմանդամություն ունեցող անձանց իրավունքների պաշտպանության կենտրոն՝ 1-800-776-5746

Այլ տեղեկությունների և հրապարակումների համար այցելեք www.disabilityrightsca.org

IPP հանդիպման պլանավորման աշխատաթերթ

Այս աշխատաթերթը կարող է օգնել ձեզ պլանավորել ձեր IPP-ի հանդիպումը։ Այն կօգնի ձեզ մտածել, թե ինչ եք ցանկանում ապագայում։

Ապրելու տեղ

Որտե՞ղ եք ցանկանում ապրել

• Մնալ այնտեղ, որտեղ ապրում եմ
• Ծնողներիս մոտ
• Իմ սեփական տարածքում
• Ժամանակավոր խնամակալող ընտանիքի հետ (Տարեցների ընտանեկան տան գործակալություն)
• Ինտերնատ-տանը
• Աջակցվող ապրելակերպ
• Անկախ ապրելակերպ
• Իմ սեփական տարածքում՝ սենյակակիցների հետ
• Այլ վայրում

Ի՞նչ ծառայություններ են անհրաժեշտ, որոնք կօգնեն ձեզ ապրել այնտեղ, որտեղ ցանկանում եք

• Ավելի շատ ուսուցում
• Օգնություն իմ գումարը կառավարելու հարցում
• Խնամակալ կամ սենյակակից
• Օգնություն ապրելու տեղ գտնելու հարցում
• Մեկը, ով կանոնավոր աջակցություն և օգնություն կտրամադրի
• Օգնություն գնումների, ճաշ պատրաստելու և (կամ) մաքրության հարցերում
• Անվտանգ լինել
• Այլ ծառայություն

Աշխատելու տեղ կամ դպրոց հաճախել

Որտե՞ղ եք ցանկանում աշխատել կամ դպրոց գնալ

• Մնալ այնտեղ, որտեղ այժմ աշխատում եմ
• Համայնքում
• Աշխատանոցում կամ կենտրոնում

Ի՞նչ տեսակի աշխատանք եք ցանկանում կատարել կամ ի՞նչ տեսակի դպրոց եք ցանկանում հաճախել

• Վճարվող աշխատանք
• Կամավորական աշխատանք, ի՞նչն է հետաքրքրում ձեզ
• Այլ տեսակի աշխատանք
• Քոլեջ
• Չափահասների ուսուցման դասընթացներ
• Այլ տեսակի դպրոց

Ի՞նչ ծառայություններ են ձեզ անհրաժեշտ, որոնք կօգնեն աշխատելու կամ դպրոց հաճախելու հարցում

• Ինքնակենսագրության (ռեզյումե) թարմացում
• Դիմել աշխատանքի համար
• Աշխատանքային քոուչ կամ օգնություն աշխատավայրում
• Ուսուցիչ կամ նշումներ կատարող
• Ուսուցում որևէ սեմինարում
• Այլ տեսակի ուսուցում
• Հասանելիություն աշխատավայրին կամ դասարանին (օրինակ՝ թեքահարթակ)
• Փոխադրում
• Այլ ծառայություններ և աջակցություն

Ժամանց

Ի՞նչ եք ցանկանում անել ձեր ազատ ժամանակ

• Այցելել ընկերներին
• Մարզվել
• Գնումներ կատարել
• Գնալ կինոթատրոն կամ թատրոն
• Կամավորական աշխատանք
• Զբաղվել սպորտով
• Երաժշտություն լսել/հեռուստացույց դիտել
• Հոբբի
• Ժամադրություն
• Միանալ սեփական իրավունքների պաշտպանության որևէ խմբի կամ «People First» խմբին
• Օգնել պաշտպանել այլ մարդկանց իրավունքները
• Այլ գործողություն 

Ի՞նչ ծառայություններ են անհրաժեշտ, որոնք կօգնեն ձեզ անել այն բաները, որոնք ցանկանում եք

• Ուսուցում
• Խնամակալ
• Օժանդակող
• Փոխադրում
• Ընկերների շրջանակ
• Այլ ծառայություններ և աջակցություն

Բժշկություն և առողջություն

Բժշկական կամ առողջապահական ի՞նչ ծառայություններ են ձեզ անհրաժեշտ

• Բժշկի ծառայություններ
• Խորհրդատվություն
• Ատամնաբույժի ծառայություններ
• Սեռական կրթություն (ապահով սեռական կյանք, բեղմնականխման միջոցներ)
• Պահպանել կազմվածքը, մարզվել կամ սննդակարգ պահել
• Առողջապահական այլ ծառայություններ

Ի՞նչ այլ տեսակի աջակցություն է ձեզ անհրաժեշտ՝ բժշկական կամ առողջապահական ծառայություններից օգտվելու համար

• Ուսուցում
• Խնամակալ
• Որևէ մեկը, ում կարող եմ հարցեր տալ
• Իրավունքների պաշտպան կամ իրավաբան
• Օժանդակող
• Այլ տեսակի աջակցություն
• Այլ բաներ

Ի՞նչ այլ բաների հետ կապված օգնություն է ձեզ անհրաժեշտ

• Ճաշի պատրաստում
• Փոխադրում
• Գնումներ
• Տարածքիս մաքրություն
• Ավելի շատ մարդկանց հետ հանդիպում/ընկերների ձեռքբերում կամ ժամադրություն
• Ուսուցում սեռական հարաբերությունների և ապահով սեռական կյանք վարելու թեմայով
• Մարդկանց հետ լավ հարաբերությունների հաստատում
• Սեփական իրավունքների պաշտպանություն և իմ իրավունքների իմացություն
• Սոցիալական ապահովության, SSI-ի և այլ նպաստների հետ կապված խնդիրներ
• Ինքնապաշտպանություն
• Ընդգրկվել հանձնաժողովներում կամ տնօրենների խորհրդում
• Այլ տեսակի օգնություն

Ի՞նչ այլ ծառայությունների հետ կապված օգնություն է ձեզ անհրաժեշտ

• Ուսուցում
• Խնամակալ
• Որևէ մեկը, ում կարող եմ հարցեր տալ
• Օգնություն ընկերներ ձեռք բերելու հարցում
• Իրավունքների պաշտպան կամ իրավաբան
• Մենթոր
• Օժանդակող
• Այլ ծառայություններ