Tsab Cai Lanterman

Hauv California, cov neeg xiam oob qhab fab kev loj hlob muaj cai tau kev pab cuam uas pab lawv kom koom tau hauv zej zog. Txoj cai lij choj hais tias cov neeg uas siv Lub Hauv Paus Regional Center muaj cai txiav txim siab txog kev pab cuam thiab kev txhawb nqa uas lawv yuav tsum tau, xws li:

• Yuav nyob qhov twg
• Yuav nyob nrog leej twg
• Yuav mus ua hauj lwm qhov twg los sis mus kawm qhov twg
• Yuav xaiv leej twg ua phooj ywg
• Yuav ua dab tsi rau kev lom zem
• Yuav ua dab tsi yav pem suab
• Cov kev pab cuam thiab kev txhawb nqa dab tsi uas koj xav tau thiab yuav tsum tau muaj

Kuj mus saib tau hauv ntaub ntawv luam tawm txog Kev Muaj Cai Hauv Tsab Cai Lanterman 

Txoj Phiaj Xwm Rau Lub Khoos Kas Pab Ib Tug Zuj Zus yog dab tsi?

IPP yog txoj phiaj xwm kev nqis tes ua uas tham txog kev pab uas koj yuav tsum tau muaj kom ua neej tau raws li koj ntshaw.

IPP txheeb qhia txog koj cov hom phiaj, kev pab cuam, thiab kev txhawb nqa kom koj thiaj li nyob tau ib leeg ntau tuaj thiab koom nrog hauv zej zog tau.

IPP yog daim ntawv pom zoo thiab daim ntawv cog lus ntawm koj thiab Lub Hauv Paus Regional Center. Muab sau raws li txoj hau kev uas koj nkag siab tau.

Ncua Sij Hawm rau IPP

Txoj cai lij choj hais tias cov neeg yuav tsum muaj kev sib ntsib hauv IPP yam tsawg ib zaug hauv txhua 3 lub hlis. Qee cov neeg ua tiav qhov IPP hauv txhua xyoo. Kyeej thov kom muaj rooj sib tham txog IPP thaum twg los tau. Hu rau koj tus neeg lis hauj lwm kev pab cuam ntawm Lub Hauv Paus Regional Center los teem sij hawm rau IPP lub rooj sib tham.

Tom qab koj thov txog IPP lub rooj sib tham lawm, nws yuav tsum pib ua tau tsis pub dhau 30 hnub.

Vim Li Cas Koj Lub Rooj Sib Tham IPP Thiaj Li Tseem Ceeb

Koj lub rooj sib tham IPP tsuas yog tib lub sij hawm uas thiaj li yuav sib tham thiab sau txog koj li IPP tau raws cai. Yog koj Lub Hauv Paus Regional Center hu tuaj rau koj hais txog kev hloov pauv hauv koj cov kev pab cuam, qhia rau lawv tias koj xav tham hais txog qhov ntawd ntawm lub rooj sib tham IPP.

Koj Cov Cai ntawm Lub Rooj Sib Tham IPP

• Koj muaj cai rau IPP daim ntawv uas teev tseg txog koj cov hom phiaj yav pem suab thiab cov kev pab cuam twg uas koj xav tau thiab koj yuav tsum tau muaj.
• Koj muaj ib txoj cai tau cov kev pab cuam uas yog ib feem ntawm koj lub zej zog - tsis yog nyob hauv cov chaw los sis cov pab pawg rau cov neeg xiam oob qhab nkaus xwb.
• Koj muaj cai pab muab koj li IPP los tso ua ke.
• Koj muaj cai yuav tsis pom zoo nrog kev hloov pauv twg huav cov kev pab cuam hauv koj li IPP, txawm yog tias tseem tsis tau teeb tsa lub rooj sib tham nrog koj los xij.
• Koj muaj cai tau tus neeg txhais lus los sis tus neeg pab cuam yooj yim (tus neeg pab) yog koj xav tau ib tug thiab Lub Hauv Paus Regional Center yuav tsum nrhiav ib tug rau koj.
• Koj muaj cai tuaj rau ntawm koj lub rooj sib tham IPP thiab qhia rau cov neeg tias koj yuav tsum tau muaj thiab xav tau cov kev pab cuam twg.
• Koj muaj cai kom teeb tsa koj lub rooj sib tham IPP rau qhov chaw uas koj xav tias yooj yim rau koj. Lub Hauv Paus Regional Center yuav hloov tsis tau koj cov kev pab cuam los sis sau koj li IPP uas tsis muaj koj tuaj koom lub rooj sib tham.
• Koj muaj cai tau cov ntaub ntawv xws li cov IPP, Cov Phiaj Xwm Kev Ntsuam Xyuas, IPP Cov Cai, Cov Cai Thov Rov Txiav Txim Dua, thiab Cov Ntawv Ceeb Toom txog Kev Nqis Tes Ua hauv koj hom lus hais ib txwm ntawm haiv neeg.
• Koj muaj cai tau kev pab cuam thiab kev txhawb nqa hauv chaw puab ncig uas muaj kev txwv tsawg tshaj plaws.

Lub Hauv Paus Regional Center thiab cov chaw hauj lwm uas muab kev pab cuam rau koj, xws li cov tsev uas nyob coob leej los sis cov khoos kas pab cuam, yuav tsum cia koj txiav txim siab ntawm koj tus kheej.

Lawv yuav tsum muab ntaub ntawv qhia paub tseem ceeb uas koj xav tau los txiav txim siab rau koj raws li qhov koj nkag siab tau.

Leej twg yog Ib Feem ntawm Pab Pawg Saib Xyuas IPP?

• Koj yog tus tswv cuab tseem ceeb tshaj plaws.
• Niam thiab Txiv thiab Cov Neeg Saib Xyuas Raws Cai.
• Cov neeg uas paub koj thiab hlub tshua koj.
• Koj tus neeg lis hauj lwm muab kev pab cuam tuaj ntawm Lub Hauv Paus Regional Center uas yuav muab kev pab cuam tau rau koj raws li koj xav tau thiab yuav tsum tau muaj.
• Pab Pawg Uas Paub Kho Ntau Yam Mob, thaum uas tsim nyog.
• Lwm tus neeg twg uas koj xav kom tuaj koom

Yuav ua dab tsi Ua Ntej Lub Rooj Sib Tham IPP

• Xav txog koj cov hom phiaj rau lub neej yav pem suab. Xav txog yam uas koj xav tau kom muaj kev noj qab haus huv thiab nyab xeeb hauv zej zog. Puas muaj qee yam tshiab uas koj xav ua?
• Tshuaj xyuas koj li IPP qhov qub kom pom yam siv tau los sis yam siv tsis tau. Thov phooj ywg los sis tus neeg hauv tsev neeg los pab. Puas muaj qee yam uas koj xav ua sib txawv?
• Sau koj cov kev txhawj xeeb thiab koj cov hom phiaj.
• Sau cov kev pab cuam thiab kev txhawb nqa uas koj xav tias yuav pab koj ua tau raws li koj cov hom phiaj.
• Nrog cov neeg uas koj ntseeg siab tham hais txog yam koj xav hais ntawm koj lub rooj sib tham. Tom qab ntawd sau cia los sis thov phooj ywg los sis tus neeg hauv tsev neeg pab koj.
• Kaw tseg yam uas koj xav hais uas siv lub cuab yeej kaw lus los sis xov tooj thiab nqa tuaj rau ntawm koj lub rooj sib tham.
• Xyaum hais tawm tswv yim. Koj yog koj tus neeg muab tswv yim txhawb nqa zoo tshaj plaws txog yam uas koj xav tau thiab yuav tsum tau muaj.
• Nws yog lub rooj sib tham tseem ceeb heev. Npaj kom txhij. Tuaj kom ncav.

Qhov Cuab Yeej Npaj Lub Rooj Sib Tham IPP nyob tom kawg ntawm phau ntawv me no yuav pab koj npaj rau koj lub rooj sib tham.

Kuj saib tau hauv 16 Cov Lus Qhia Tswv Yim txog Kev Tau Cov Kev Pab Cuam Zoo Tsim Nyog Ntawm Lub Hauv Paus Regional Center rau Koj Tus Kheej los sis Koj Tus Me Nyuam.

Yam Yuav Ua Ntawm Koj Lub Rooj Sib Tham IPP

• Tham nrog koj pab pawg ua hauj lwm hais txog yam uas koj xav tau thiab yuav tsum tau muaj.
• Qhia tawm txog yam uas koj tau sau cia (los sis tau kaw cia) txog cov phiaj thiab cov kev pab cuam uas koj xav tau.
• Ua ib tug neeg paub cai thiab hais kom taus.
• Koj yuav thov kom tau tus neeg lis hauj lwm muab kev pab cuam sib txawv tau.
• Koj yuav thov hloov cov kev pab cuam uas koj tau txais ntawd tau.
• Yuav tsum tau muaj ib tug neeg nyob ntawm koj lub rooj sib tham uas yuav hais tau tias "Yog" los sis "Tsis Yog" rau yam uas nyob rau hauv koj li IPP. Tus no yuav yog koj tus neeg lis hauj lwm muab kev pab cuam los sis lwm tus neeg ua hauj lwm hauv Lub Hauv Paus Regional Center.
• Nug seb puas muaj cov kev ntsuam xyuas, cov ntawv tshaj qhia, los sis cov kev soj ntsuam tshiab.
• Thov tham txog koj qhov ua tau zoo, yam koj nyiam, cheeb tsam kev loj hlob, cheeb tsam ntawm yam yuav tsum tau muaj, thiab kev cog phooj ywg.
• Nug lwm nqe lus nug txog koj li kev nce qib los sis kev pab cuam.
• Qhia txog koj cov hom phiaj tam sim no thiab yav pem suab.
• Sib tham txog cov kev txhawj xeeb xab phaub twg uas koj muaj.
• Qhia txog koj cov xwm txheej hauv tsev uas yuav cuam tshuam rau koj li kev kawm tau zoo los sis tus cwj pwm tom tsev kawm ntawv los sis tom chaw hauj lwm thiab cov ntaub ntawv tsis ntev los no los sis cov ntaub ntawv hloov kho tshiab fab kev kho mob tsis ntev los no.
• Sau cim tseg txog cov lus muab tswv yim qhia thiab cov ncua sij hawm, xws li cov kev pab cuam los sis cov kev ntsuam xyuas ntxiv.
• Hais tawm los kom nrov txog yam uas koj nkag siab txog kev txiav txim siab, kev nqis tes ua uas tau ua, cov ncua sij hawm, thiab cov luag hauj lwm thiab cov kev lav ris ntawm txhua tus neeg ntawm lub rooj sib tham.
• Muab lus pab tswv yim rau cov neeg ua hauj lwm nrog koj hauv cheeb tsam uas koj tau pom tias muaj kev siv zog, muaj kev loj hlob, los sis kev hloov pauv mus rau qhov zoo.

Yog tus neeg uas pom zoo muab tau kev pab cuam hauv koj IPP tsis nyob ntawm koj lub rooj sib tham, Lub Hauv Paus Regional Center yuav tsum teeb lwm lub rooj sib tham IPP dua tsis pub dhau 15 hnub. Lub Hauv Paus Regional Center cov neeg ua hauj lwm uas pom zoo muab cov kev pab cuam yuav tsum tuaj koom kom tau.

Kev Muaj Cai Tau Cov Kev Pab Cuam thiab Kev Txhawb Nqa hauv Koj Li IPP

Tsab Cai Lanterman hais tias koj cov kev pab cuam thiab kev txhawb nqa tsim nyog pab koj nyob kom tau ib leeg, tus tswv cuab uas ua tau zoo ntawm koj lub zej zog, thiab nyob rau qhov uas koj muaj kev nyab xeeb thiab muaj kev noj qab haus huv.

Ntawm no yog qee yam (tab sis tsis yog txhua yam) ntawm cov kev pab cuam thiab kev txhawb nqa uas Lub Hauv Paus Regional Center yuav pab koj nrhiav thiab tau txais.

• Pab kom nkag tau tsev kawm ntawv los sis lub khoos kas kev cob qhia.
• Cuab Yeej Siv Rau Kev Yoog Raws: Yog tias koj xav tau tej yam uas txhawb nqa tau koj kom nyob tau ib leeg xws li lub rooj zaum muaj log los sis lub khoos phis tawj uas tham lus.
• Kev Cob Qhia Txog Kev Muab Kev Pab Tswv Yim: Yog koj xav kawm paub ntau ntxiv txog koj cov cai yuav hais tawm tswv yim rau koj tus kheej.
• Saib hauv DDS cov ntaub ntawv luam tawm thiab cov vib dis aus txog Pab Pawg Neeg Dhia Hauj Lwm Ntsig Txog Feem Kev Tawm Tswv Yim Pab Cov Neeg Siv Khoom. 
• Cov kev pab cuam ntsig txog kev siv tsheb thauj xa mus los-los sis kev cob qhia los kawm paub txog txoj hau kev siv cov tsheb npav los sis lwm yam kev thauj mus los ntawm koj tus kheej.
• Kev Pab Cuam Thaum Muaj Kev Kub Ntxhov: Yog koj xav tau ib txoj phiaj xwm txhawm rau thaum koj muaj xwm txheej ceev.
• Kev Cob Qhia Rau Niam thiab Txiv: Yog koj muaj me nyuam thiab koj xav kawm paub ntxiv txog kev saib xyuas lawv.
• Kev Sib Daj Sib Deev: Yog koj muaj lus nug hais txog kev pw ua ke los sis xav tau kev pab nrog koj txoj kev sib hlub sib raug zoo.
• Pab nrhiav ib txoj hauj lwm, suav nrog Kev Ua Hauj Lwm Uas Muaj Kev Txhawb Nqa thiab kev tsim lub lag luam me.
• Cov Kev Pab Cuam Rau Kev Ua Neej: Kev pab nrhiav thiab tsiv nkag mus rau lub tsev, kev xaiv cov neeg nyob koom chav tsev los sis koom tsev nyob, tej rooj tog hauv tsev, cov dej num ua hauv kev ua neej txhua hnub uas keev pom thiab cov xwm txheej ceev, kev pib ua tus tswv cuab uas koom nrog hauv lub neej hauv zej zog thiab kev tswj fab nyiaj txiag ntiag tug, kom koj thiaj li tuaj yeem nyob tau ib leeg ntau ntxiv.
• Tus kws muab kev pab cuam yooj yim los pab koj yog koj xav ua ib tug hauv pab pawg dhia hauj lwm los sis tswv cuab ntawm Pawg Thawj Coj.
• Lwm cov kev pab cuam uas koj yuav tsum tau muaj kom ua tau lub neej zoo dua qub. Qhov no yuav sib txawv rau txhua tus neeg.

Saib daim ntawv teev npe uas dav zog Khoom Pab Ntxiv C ntawm no  

Nco ntsoov! Nws TSIS UA LI CAS yuav thov txog tej yam uas koj xav tau uas tsis muaj nyob hauv daim ntawv teev npe.

Sau cov kev pab cuam thiab kev txhawb nqa uas koj xav tau hauv koj li IPP nrog kev pab ntawm koj pab pawg saib xyuas IPP.

Yog xav paub ntxaws ntxiv txog txoj hau kev kom tau cov kev pab cuam los ntawm koj li IPP, suav nrog tsab ntawv thiab cov twj tsim phiaj xwm ua qauv, mus saib hauv Cov Cai Nyob Hauv Tsab Cai Lanterman (RULA) tshooj 4 thiab Nqe Lus Txhab Ntxiv rau RULA.

Lub Khoos Kas Txiav Txim Siab Rau Tus Kheej

Lwm txoj hau kev kom tau cov kev pab cuam uas tau txais nyiaj them los ntawm Lub Hauv Paus Regional Center yog Lub Khoos Kas Txiav Txim Siab Rau Tus Kheej. Lub Khoos Kas Txiav Txim Siab Rau Tus Kheej yuav pab kom koj muaj kev tswj hwm tau ntau zog txog kev xaiv koj cov kev pab cuam thiab kev txhawb nqa. Koj yuav tau ib pob nyiaj xab phaub hauv txhua xyoo los yuav kev pab cuam thiab kev txhawb nqa uas koj xav tau los tsim koj txoj phiaj xwm kom ua hauj lwm zoo dua qub rau koj. Tej zaum koj yuav xaiv koj cov kev pab cuam thiab xaiv cov kws muab kev pab cuam los muab cov kev pab cuam ntawd. Koj muaj lub luag hauj lwm yuav siv tau nyob hauv koj pob peev nyiaj nkaus xwb. Koj tsis tas yuav koom Lub Khoos Kas Txiav Txim Siab Rau Tus Kheej los tau - koj yeej xaiv tau yuav ua li cas.

Yuav Ua Dab Tsi yog tias Tsis Muaj Leej Twg Mloog Koj Li

Koj tsim nyog muaj feem xyuam hauv cov kev pab cuam thiab kev txhawb nqa uas koj tau txais. Yog cov neeg tsis mloog koj, qhia rau ib tug neeg twg. Qhia phooj ywg, neeg txheeb ze, koj tus lis hauj lwm saib xyuas kev pab cuam, koj cov neeg qhua uas txais kev pab cuam tus neeg muab tswv yim txhawb nqa txog kev muaj cai, los sis ib tus neeg twg ntawm koj Pawg Xab Phas Hauv Xeev txog Neeg Xiam Oob Qhab Fab Kev Loj Hlob (SCDD) Lub Chaw Ua Hauj Lwm Nyob Rau Cheeb Tsam. Saib daim ntawv teev npe ntawm koj cheeb tsam zej zog SCDD Cov Chaw Hauj Lwm Hauv Cheeb Tsam (Pawg Thawj Coj Hauv Cheeb Tsam).   

Koj li IPP yog Daim Ntawv Cog Lus

Txoj cai lij choj hais tias Lub Hauv Paus Regional Center yuav tsum ua raws li qee cov cai thaum sau txog koj li IPP.

Koj thiab Lub Hauv Paus Regional Center yuav tsum pom zoo thiab kos npe rau IPP ua ntej yuav pib kev pab cuam los sis ua txuas ntxiv mus.

Koj Cov Cai Thaum Kos Npe Rau IPP

Koj muaj cai yuav tshuaj xyuas thiab xav txog koj li IPP ua ntej kos npe rau daim ntawv cog lus.

Koj li kev pab cuam yuav pib tsis tau kom txog thaum koj thiab Lub Hauv Paus Regional Center pom zoo txog yam uas muaj nyob hauv koj li IPP. Thaum koj kos npe rau koj li IPP, koj yuav hais tias koj pom zoo nrog yam uas muaj nyob hauv koj li IPP.

Yog koj tsis pom zoo nrog txhua yam uas nyob hauv koj li IPP, koj tsis tas kos npe rau los tau. TAB SIS, koj yeej pom zoo tau rau ib txhia. Sau txog yam uas koj pom zoo nrog thiab yam uas koj tsis pom zoo.

Yog koj tsuas pom zoo rau ib kuag ntawm koj li IPP xwb, thov koj tus kws lis hauj lwm saib xyuas kev pab cuam kom sau tawm los, xws li:

Kuv pom zoo rau cov feem no ntawm kuv li IPP -

1.  
2.  
3.  

Thov pib/muab kev pab cuam uas kuv pom zoo txuas ntxiv mus kiag tam sim no.

Kuv tsis pom zoo rau cov feem no ntawm kuv li IPP -

1.  
2.  
3.  

Thaum koj ua qhov no, kev pab cuam uas koj thiab Lub Hauv Paus Regional Center tau pom zoo yuav pib tau.

Koj Daim Ntawv Theej ntawm IPP

• Xyuas kom paub tseeb hais tias koj tau ib daim ntawv theej txog koj li IPP. Lub Hauv Paus Regional Center yuav xa ib daim ntawv theej txog koj li IPP mus rau cov neeg uas tuaj rau ntawm koj lub rooj sib tham yog koj xav kom lawv tau ib daim ntawv theej thiab.
• Saib kom thoob txog koj li IPP nrog cov neeg uas saib xyuas kho mob rau koj. Xyuas kom paub tseeb hais tias nws muaj yam uas koj xav tau nyob hauv lawm.
• Yog nws muaj nyob hauv koj li IPP lawm, Lub Hauv Paus Regional Center yuav tsum muab cov kev pab cuam los sis kev txhawb nqa rau koj.

Koj Cov Cai yog Koj Tsis Pom Zoo nrog IPP

Yog Lub Hauv Paus Regional Center hais tias "TSIS TAU" rau cov kev pab cuam los sis cov kev txhawb nqa uas koj xav tau, lawv yuav tsum xa ib tsab ntawv tuaj tsis pub dhau 5 hnub tuaj qhia rau koj paub tias vim li cas lawv thiaj tau hais tias "Tsis Tau," thiab koj yuav thov kom rov txiav txim dua tau li cas.

Yog koj tsis pom zoo nrog Lub Hauv Paus Regional Center txog kev pab cuam uas koj xav tau los sis yuav tsum tau muaj, koj muaj cai yuav thov kom rov txiav txim dua txog lawv li kev txiav txim siab. Yog Lub Hauv Paus Regional Center ua qeeb los sis siv sij hawm ntev dhau los txiav txim siab, yuav tsum hais tiag-tiag kom lawv txiav txim siab. Koj kuj tuaj yeem xam tias kev ua qeeb yog kev tsis pom zoo thiab ua ntawv thov kom rov txiav txim dua tau.

Kev Ua Ntawv Thov Kom Rov Txiav Txim Dua

Kev ua ntawv thov kom rov txiav txim dua yog koj li cai yuav twv txog Lub Hauv Paus Regional Center txoj kev txiav txim siab. Peb yuav tsis hais meej txog kev ua ntawv thov kom rov txiav txim dua hauv phau ntawv qhia no. Txhawm rau kawm paub hais txog kev thov kom rov txiav txim dua thiab cov kev tsis txaus siab, saib hauv Cov Cai Hauv Tsab Cai Lanterman, tshooj 10.

Txhawm rau kawm paub txog txoj hau kev ua daim ntawv thov kom rov txiav txim dua thiab kev txiav txim plaub ntug uas mloog ob tog lus, saib hauv Pob Ntawv Qhia Txog Kev Txiav Txim Plaub Ntug Mloog Ob Tog Lus Ntawm Lub Hauv Paus Regional Center. 

Nco Ntsoov Tias, Nws Yog Koj Lub Neej

Lub Hauv Paus Regional Center yuav nyob ntawd los pab koj kom tau muab tau lub neej uas koj xav tau. Kawm paub txog txoj hau kev tawm tswv yim rau koj tus kheej. Koom nrog hauv pab pawg kev pab tawm tswv yim ntawm tus kheej los sis tau kev cob qhia txog kev pab tawm tswv yim ntawm tus kheej.

Txoj cai lij choj hais tias koj muaj cai yuav xaiv txog koj lub neej thiab kom tau kev pab cuam thiab kev txhawb nqa uas koj xav tau los ua tus tswv cuab ntawm koj lub zej zog. Thaum koj tsis pom zoo nrog kev txiav txim siab uas yuav cuam tshuam rau koj lub neej, hais kiag tawm los.

Tau Kev Pab Nrog Koj Li Kev Thov Kom Rov Txiav Txim Dua

Sib tham nrog koj li SCDD Lub Chaw Hauj Lwm Hauv Cheeb Tsam (Pawg Thawj Coj Hauv Cheeb Tsam), tsev neeg, phooj ywg, lub chaw muab kev txhawb nqa, los sis pab pawg Kev Pab Tawm Tswv Yim Ntawm Tus Kheej rau kev txhawb nqa.

Txhua Lub Hauv Paus Regional Center muaj Tus Neeg Muab Tswv Yim Txhawb Nqa Kev Muaj Cai Ntawm Tus Neeg Qhua Txais Kev Pab. Nug Lub Hauv Paus Regional Center seb lawv yog leej twg thiab thov lawv tus nab npawb xov tooj. Tus Neeg Muab Tswv Yim Txhawb Nqa Kev Muaj Cai Ntawm Tus Neeg Qhua Txais Kev Pab Cuam tuaj yeem txhawb nqa tau koj.

Yuav tiv tauj tau Lub Chaw Hauj Lwm Saib Xyuas Tus Neeg Muab Tswv Yim Txhawb Nqa Kev Muaj Cai Ntawm Tus Neeg Qhua Txais Kev Pab Cuam ntawm tus nab npawb no:

1-800-390-7032 los sis mus rau lawv lub vev xaib. 

LOS SIS

Koj yuav hu tau rau Disability Rights California: 1-800-776-5746

Yog xav paub ntau ntxiv thiab cov ntaub ntawv luam tawm ces mus rau www.disabilityrightsca.org

Lub Tsim Phiaj Xwm Rau Lub Rooj Sib Tham IPP

Daim ntawv ua hauj lwm no tuaj yeem pab koj npaj rau koj lub rooj sib tham IPP. Siv nws los pab koj xav txog yam uas koj xav tau yav pem suab.

Qhov Chaw Yuav Nyob

Koj xav nyob rau qhov twg?

• Nyob rau ntawm qhov kuv nyob tam sim no
• Kuv niam thiab txiv qhov chaw
• Kuv tus kheej qhov chaw
• Nrog tsev neeg coj mus tu (Lub Chaw Hauj Lwm Saib Xyuas Lub Tsev Rau Tsev Neeg Laus)
• Lub tsev nyob coob leej
• Kev ua neej uas muaj kev txhawb nqa
• Kev Ua Neej Nyob Ib Leeg
• Kuv tus kheej qhov chaw uas muaj cov neeg nyob koom
• Lwm qhov chaw

Cov kev pab cuam twg uas koj yuav tsum tau muaj los pab koj nyob tau qhov uas koj xav nyob?

• Kev cob qhia ntxiv
• Pab nrog kev tswj kuv li nyiaj
• Tus neeg saib xyuas los sis tus neeg nyob koom chav
• Pab nrhiav qhov chaw nyob
• Ib tug neeg twg los muab kev txhawb nqa thiab kev pab rau kuv tsis tu ncua
• Pab nrog kev mus yuav khoom, ua noj, thiab/los sis tu vaj tse
• Muaj kev nyab xeeb
• Lwm qhov kev pab cuam

Qhov Chaw Ua Hauj Lwm los sis Mus Kawm Ntawv

Koj xav mus ua hauj lwm los sis mus kawm ntawv rau qhov twg?

• Nyob rau qhov kuv ua hauj lwm tam sim no
• Hauv zej zog
• Hauv lub rooj sib tham cob qhia los sis lub hauv paus pab cuam

Hom hauj lwm los sis tsev kawm ntawv twg uas koj xav ua?

• Hauj lwm tau nyiaj
• Hauj lwm pab dawb, dab tsi uas koj xav ua?
• Lwm hom hauj lwm
• Lub tsev kawm qib siab
• Cov chav kawm ntawv rau neeg laus
• Lwm hom tsev kawm ntawv

Cov kev pab cuam twg uas koj yuav tsum tau muaj los pab nrog kev ua hauj lwm thiab mus kawm ntawv?

• Hloov kho tshiab rau daim ntawv qhia txog tus kheej keeb kwm
• Ua ntawv thov ua hauj lwm
• Kev cob qhia txog kev ua hauj lwm los sis kev pab ntawm txoj hauj lwm
• Tus neeg qhia los sis tus neeg sau cim tseg
• Kev cob qhia hauv lub rooj sib tham cob qhia
• Lwm yam kev cob qhia
• Kev nkag cuag tau rau qhov chaw ua hauj lwm los sis chav kawm (xws li muaj txoj kev tiaj)
• Kev Thauj Mus Los
• Lwm yam kev pab cuam los sis kev txhawb nqa

Muaj Kev Lom Zem

Koj xav ua dab tsi thaum koj muaj sij hawm xyeej?

• Mus saib tej phooj ywg
• Tawm dag zog
• Mus yuav khoom
• Mus saib yeeb yaj kiab los sis ua si
• Ua hauj lwm pab dawb
• Ua si kis las
• Mloog yas suab/saib This Vis
• Yam yus nyiam ua thaum muaj caij nyoog
• Kev sib tham ua nkauj nraug
• Koom nrog hauv pab pawg kev pab tawm tswv yim ntawm tus kheej los sis People First
• Pab muab tswv yim txhawb nqa rau lwm cov neeg
• Lwm yam dej num 

Cov kev pab cuam twg uas koj yuav tsum tau muaj los pab koj ua tej yam uas koj xav ua?

• Kev Cob Qhia
• Tus neeg saib xyuas
• Tus neeg pab cuam yooj yim
• Kev Thauj Mus Los
• Ib pawg phooj ywg
• Lwm yam kev pab cuam los sis kev txhawb nqa

Kev Kho Mob thiab Kev Noj Qab Haus Huv

Cov kev pab cuam kho mob los sis kev noj qab haus huv twg uas koj yuav tsum tau muaj?

• Cov kev pab cuam ntawm tus kws kho mob
• Kev pab sab laj
• Kev pab cuam ntawm kws kho hniav
• Kev kawm txog kev sib daj sib deev (kev sib daj sib deev kom nyab xeeb, kev tswj kom txhob muaj me nyuam)
• Txuag kom lub cev zoo nkauj, tawm dag zog los sis khoom noj
• Lwm yam kev pab cuam kev noj qab haus huv

Lwm yam kev txhawb nqa twg uas koj xav tau kom siv tau kev pab cuam fab kev kho mob los sis kev noj qab haus huv?

• Kev Cob Qhia
• Tus neeg saib xyuas
• Ib tus neeg twg kom yus tau nug lus nug
• Tus neeg muab tswv yim txhawb nqa los sis kws lij choj
• Tus neeg pab cuam yooj yim
• Lwm yam kev txhawb nqa
• Tej Yam Ub No

Lwm yam twg uas koj xav tau kev pab?

• Kev ua noj
• Kev Thauj Mus Los
• Kev mus yuav khoom
• Kev tu kuv qhov chaw nyob
• Mus ntsib neeg coob dua qub/tsim kev phooj ywg los sis kev sib tham nkauj nraug
• Kawm paub txog kev sib raug zoo fab kev sib daj sib deev thiab kev sib daj sib deev yam nyab xeeb
• Nrog lwm tus neeg nyob kom txhob muaj teeb meem
• Kev pab tawm tswv yim ntawm tus kheej thiab kev paub txog kuv txoj cai
• Cov teeb meem nrog Xaus Saus, SSI, los sis lwm cov txiaj ntsig kev pab
• Kev tiv thaiv tus kheej
• Koom nrog pab pawg neeg dhia hauj lwm los sis Pawg Thawj Coj
• Lwm yam kev pab

Lwm yam kev pab cuam twg uas koj xav tau kev pab nrog?

• Kev Cob Qhia
• Tus neeg saib xyuas
• Ib tus neeg twg kom yus tau nug lus nug
• Kev pab teeb tsim ib pawg phooj ywg
• Tus neeg muab tswv yim txhawb nqa los sis kws lij choj
• Tus kws cob qhia
• Tus neeg pab cuam yooj yim
• Lwm cov kev pab cuam