Cov Kev Npaj Rau Thaum Muaj Xwm Txheej Ceev rau cov IEP

Publications
#7181.09

Cov Kev Npaj Rau Thaum Muaj Xwm Txheej Ceev rau cov IEP

Raws li California txoj cai lij choj, cov tub ntxhais kawm uas muaj kev xiam oob khab nrog Kev Kawm Rau Tus Kheej (IEP) yuav tsum muaj Txoj Kev Npaj Kho Mob Kub Ntxhov rau hauv Cal. Ed. Code § 56345(a)(9). Txoj cai lij choj hais kom pab pawg IEP los txiav txim siab seb tus tub ntxhais kawm cov kev xav tau ntawm tus kheej yuav cuam tshuam li cas thaum muaj xwm txheej ceev.

Kev lees paub: Qhov kev tshaj tawm no tsuas yog cov ntaub ntawv raug cai thiab tsis yog lus qhia txog kev cai lij choj ntawm koj tus kheej. Nws yog tam sim no raws li hnub tshaj tawm. Peb sim hloov peb cov ntaub ntawv tsis tu ncua. Txawm li cas los xij, txoj cai hloov tsis tu ncua. Yog tias koj xav paub tseeb tias txoj cai tsis tau hloov, hu rau DRC lossis lwm lub chaw haujlwm raug cai.

Hauv California, Cov yeej muaj tej xwm txheej ceev tshwm sim tas li. Cov xwm txheej ceev tuaj yeem xam muaj xws li kev puas tsuaj los ntawm lub ntuj xws li hluav taws kub, dej nyab, thiab av qeeg tab sis kuj tuaj yeem muaj kev sib kis kab mob thiab, xws li kev sib kis kab mob COVID-19.

Raws li txoj cai lij choj hauv California, cov tub ntxhais kawm uas muaj kev tsis taus thiab muaj ib lub Phiaj Xwm Kev Kawm Rau Ib Leeg Kheej (IEP - Individualized Education Program) yuav tsum muaj ib qhov kev npaj rau thaum muaj xwm txheej ceev nyob rau ntawd1. Txoj cai lij choj yuav tseev kom pab pawg ntawm lub phiaj xwm IEP los txiav txim siab hais tias seb tus tub ntxhais kawm cov kev tsim nyog muaj ntawm tus kheej yuav raug cuam tshuam li cas nyob rau thaum muaj xwm txheej ceev. Raws li txoj cai lij choj hauv lub xeev, cov xwm txheej ceev yuav muaj xws li:

  • Hluav taws kub
  • Dej nyab
  • Cov kev uas dhau mus tsis tau
  • Kev sib kis kab mob
  • Av qeeg
  • Kev phom sij loj txog kev nyab xeeb
  • Kev tawm tsam txog kev thauj mus los ntawm ib qhov chaw pab cuam uas tsis yog tsev kawm
  • Lwm yam xwm txheej ceev hauv lub xeev
  • Tsov rog2

Pab pawg IEP yuav tsum tsim ib qhov Kev Npaj Txog Xwm Txheej Ceev rau txhua tus tub ntxhais kawm uas muaj qhov IEP. Cov niam cov txiv/cov neeg saib xyuas yog cov tswv cuab tseem ceeb ntawm pab pawg IEP. Koj yuav tsum ua haujlwm nrog lwm cov tswv cuab ntawm pab pawg IEP txhawm rau tsim koj tus menyuam qhov Kev Npaj Txog Xwm Txheej Ceev. Qhov Kev Npaj no yuav tsum hais tias yuav muab lus qhia thiab kev pab cuam li cas rau tus tub ntxhais kawm uas muaj kev tsis taus yog tias tsis tuaj yeem muab tau rau tus tub ntxhais kawm ntawm tus kheej kiag los sis nyob rau ntawm tsev kawm ntawv ntev tshaj 10 hnub raws sijhawm kawm ntawv lawm. Qhov Kev Npaj no yuav tsum hais txog tus tub ntxhais kawm

  • Qhov kev kawm tshwj xeeb
  • Cov kev pab cuam uas cuam tshuam txog
  • Cov kev pab thiab lwm yam kev pab cuam txhawb ntxiv
  • Cov kev pab cuam txog kev hloov chaw
  • Cov kev pab cuam rau Xyoo Kawm Txuas Ntxiv

Koj tuaj yeem tso cai rau qee feem ntawm IEP. Qhov no xam muaj qhov Kev Npaj Txog Xwm Txheej Ceev. Thaum koj tso cai rau qee feem ntawm lub phiaj xwm IEP, ces cov kev pab cuam thiab kev tso npe ntawd tuaj yeem muab ua kom tiav sai li sai tau. Yog tias koj tso cai rau lub phiaj xwm IEP ntawd, ces nws tsis tau txhais hais tias koj pom zoo tias lub phiaj xwm IEP yuav muab kev kawm pub dawb ntawm tsoom fwv uas tsim nyog rau koj tus menyuam. Yog tias koj tsis pom zoo nrog qee feem ntawm koj tus menyuam lub phiaj xwm IEP, ces koj tuaj yeem hais tias koj tsis xav kom ua qee feem ntawm qhov IEP . Tsis tuaj yeem coj ua tau cov feem ntawd. Tab sis, lub hauv paus tsev kawm tuaj yeem ua ntawv foob txog kev txheeb xyuas paus ntsis rau koj kom pom tias IEP muab ib txoj kev kawm ntawm tsoom fwv uas pub dawb, tsim nyog rau koj tus tub ntxhais kawm.

Koj lub tsev kawm yuav tsum ua raws li koj tus menyuam qhov Kev Npaj Txog Xwm Txheej Ceev yog tias:

  • Koj tus menyuam muaj ib qhov Kev Npaj Txog Xwm Txheej Ceev uas koj tau pom zoo rau,
  • Koj lub hauv paus tsev kawm/koj raug cuam tshuam los ntawm ib qho twg ntawm cov xwm txheej ceev uas teev tseg saum toj no, thiab
  • Koj tus menyuam tsis tuaj yeem tau txais lus qhia los sis cov kev pab cuam ntawm tus kheej los sis ntawm lub tsev kawm ntau tshaj 10 hnub raws sijhawm kawm ntawv.

Koj tus menyuam muaj cai tau txais kev kawm ntawm tsoom fwv pub dawb uas tsim nyog, los sis FAPE (free appropriate public education), txawm yuav yog thaum muaj xwm txheej ceev los xij. Yog tias koj tus menyuam lub hauv paus tsev kawm tsis ua raws li koj tus menyuam qhov Kev Npaj Txog Xwm Txheej Ceev, ces koj muaj kev xaiv. Koj tuaj yeem tiv tauj rau koj tus menyuam tus thawj tswj hwm case/tus kws tshwj xeeb ntawm lub phiaj xwm los sis lub hauv paus tsev kawm tus thawj coj kev kawm tshwj xeeb thiab thov kom ua raws qhov Kev Npaj Txog Xwm Txheej Ceev.

Yog tias lub hauv paus tsev kawm tsis lees txais, ces koj tuaj yeem ua ntawv foob kev tsis txaus siab txog kev ua raws rau lub Chaw Saib Xyuas Kev Kawm hauv California los sis ua ntawv foob kev tsis txaus siab kom muaj kev txheeb xyuas paus ntsis mus rau lub Chaw Ua Haujlwm Saib Xyuas Rooj Txiav Txim Sab Kev Tswj Hwm. Yog xav paub ntxiv txog ntawm cov kev tsis txaus siab no, ces mus xyuas hauv DRC Phau Ntawv Qhia Txog Cov Cai thiab Cov Luag Haujlwm Txog Kev Kawm Tshwj Xeeb, Zaj 6

Koj yuav tsum tsis txhob tos kom muaj xwm txheej ceev tshwm sim es mam li xav txog qhov uas seb koj tus menyuam uas muaj kev tsis taus yuav tau txais lus qhia thiab cov kev pab cuam li cas nyob rau thaum muaj xwm txheej ceev. Yog tias koj tus menyuam tsis muaj ib qhov Kev Npaj Txog Xwm Txheej Ceev nyob rau ntawd, ces koj tuaj yeem thov kom tau ib lub rooj sib tham ntawm IEP txhawm rau tsim qhov Kev Npaj no nrog pab pawg saib xyuas IEP ntawm koj tus menyuam.

  • 1. Cal. Txoj Cai Kev Kawm Tshooj 56345(a)(9).
  • 2. Cal. Txoj Cai Kev Kawm Tshooj 46392(a), 41422.