ប័ណ្ណ​ព័ត៌មានស្តី​ពី​ការ​រើស​អើង​លើ​ពិ​ការ​ភាព៖ សេវា​ដឹកជញ្ជូន​ពិសេស​សម្រាប់​ជនពិការ​

Publications
#7143.06

ប័ណ្ណ​ព័ត៌មានស្តី​ពី​ការ​រើស​អើង​លើ​ពិ​ការ​ភាព៖ សេវា​ដឹកជញ្ជូន​ពិសេស​សម្រាប់​ជនពិការ​

សេវា​ដឹកជញ្ជូន​ពិសេស​សម្រាប់​ជនពិការ​ គឺ​ជា​សេវាដឹកជញ្ជូន​សាធារណៈ​​មួយ​សម្រាប់​បុគ្គល​​ដែល​មាន​ពិការភាព​ ដែល​មិន​អាច​ប្រើ​ប្រាស់​​សេវា​ដឹកជញ្ជូន​សាធា​រ​ណៈ​បាន​។

ការបដិសេធ៖  ការបោះពុម្ភផ្សាយនេះគឺជាព័ត៌មានផ្លូវច្បាប់តែប៉ុណ្ណោះ ហើយមិនមែនជាការណែនាំផ្លូវច្បាប់អំពីស្ថានភាពបុគ្គលរបស់អ្នកទេ។ វា​គឺ​ជា​បច្ចុប្បន្ន​កាល​បរិច្ឆេទ​បាន​ប្រកាស។ យើងព្យាយាមធ្វើបច្ចុប្បន្នភាពសម្ភារៈរបស់យើងឱ្យបានទៀងទាត់។ ទោះជាយ៉ាងណាក៏ដោយច្បាប់កំពុងផ្លាស់ប្តូរជាទៀងទាត់។ ប្រសិនបើអ្នកចង់ធ្វើឱ្យប្រាកដថាច្បាប់មិនបានផ្លាស់ប្តូរ សូមទាក់ទង DRC ឬការិយាល័យច្បាប់ផ្សេងទៀត។

សេវា​ដឹកជញ្ជូន​ពិសេស​សម្រាប់​ជនពិការ​

សេវា​ដឹកជញ្ជូន​ពិសេស​សម្រាប់​ជនពិការ​ គឺ​ជា​សេវាដឹកជញ្ជូន​សាធារណៈ​​មួយ​សម្រាប់​បុគ្គល​​ដែល​មាន​ពិការភាព​ ដែល​មិន​អាច​ប្រើ​ប្រាស់​​សេវា​ដឹកជញ្ជូន​សាធា​រ​ណៈ​បាន​។​ ភ្នាក់​ងារ​សេវា​ដឹកជញ្ជូន​សាធារណៈ​ ត្រូវ​បាន​តម្រូវ​​ដោយ​ច្បាប់​ស្តីពី​ពលរដ្ឋ​អាមេរិកាំង​ដែល​មាន​ពិការភាព​ (Americans with Disabilities Act, ADA) ឲ្យ​ផ្តល់​ជូន​នូវ​សេវា​ដឹកជញ្ជូន​ពិសេស​សម្រាប់​ជនពិការ​​នេះ​។​

 ភ្នាក់ងារ​​​ដឹកជញ្ជូន​ ​ត្រូវ​ផ្តល់​ជូន​នូវ​សេវា​ដឹកជញ្ជូន​ពិសេស​សម្រាប់​ជនពិការ​​​ក្នុង​រយៈចម្ងាយ​ 3/4 ម៉ាយ​នៃ​ផ្លូវ​រត់​របស់​រថយន្ត​ក្រុង​ ឬ​ស្ថានីយ​ផ្លូវ​ដែក​ណាមួយ​។ សេវា​នេះ​ ត្រូវ​មាន​ផ្តល់​ជូន​ក្នុង​ថ្ងៃ​​ដូច​គ្នា​​ ​និង​ក្នុង​ម៉ោង​​​ដូច​គ្នា​ទៅ​នឹង​សេវា​ដឹកជញ្ជូន​ធម្មតា​ដែរ​។​ ​គេ​​អាច​​គិត​ប្រាក់​បន្ថែមពី​អ្នក​​​​សម្រាប់​សេវា​ដឹកជញ្ជូន​ពិសេស​សម្រា​ប់​​ជនពិការ​​នេះ​ ប៉ុន្តែ​ថ្លៃ​ធ្វើ​ដំណើរ​​​​នេះ​​មិន​អាច​ថ្លៃ​ជាងមួយ​គុណ​នឹង​ពីរ​​នៃ​ថ្លៃ​ធ្វើ​ដំណើរ​ធម្មតា​នោះ​ទេ​។​

សិទ្ធិ​ទទួល​បាន​​​សេវា​ដឹកជញ្ជូន​ពិសេស​សម្រាប់​ជនពិការ​​

អ្នក​មាន​សិទ្ធិ​ទទួល​បាន​សេវា​ដឹកជញ្ជូន​ពិសេស​សម្រាប់​ជនពិការ​ ប្រសិន​បើ​អ្នក​មិន​អាច​ប្រើប្រាស់​សេវា​ដឹកជញ្ជូន​សាធារណៈ​បាន​​ដោយ​សារ​បញ្ហា​ពិការ​ភាព​រប​ស់​​អ្នក។​ ដើម្បី​កំណត់​ថា​តើ​អ្នក​អាច​ប្រើប្រាស់សេវាដឹកជញ្ជូន​សាធារណៈ​​បាន​ដែរ​ឬ​អត់​នោះ​ ភ្នាក់ងារ​​ដឹកជញ្ជូន​​​ ត្រូវ​ធ្វើ​ការ​ពិចារណា​លើ​កត្តា​មួយ​ចំនួន​។ កត្តា​ទាំង​អស់​នោះ​​រួម​មាន ​ពិការភាព​​មិន​អាច​​ដើរបាន​​​ ឬ​ប្រើរទេះ​រុញ​ទៅ​​​មក​ពី​ចំណត​​​​ដឹកជញ្ជូន​ សមត្ថភាព​នៃ​ការ​ចូល​និង​ចេញ​ពី​ស្ថានីយ​ សមត្ថភាព​ក្នុង​ការ​ផ្តល់​សញ្ញា​ដើម្បី​​ឈប់​ និង​សមត្ថភាព​​ក្នុង​ការ​គ្រប់គ្រង​ស្ថានការ​មិន​បាន​ព្រៀង​ទុក​ណាមួយ​។​ The Disability Rights Education & Defense Fund (មូលនិធិ​​ការពារ​និង​​អប់រំ​​សិទ្ធិ​ជនពិការ​) មាន​ព័ត៌មាន​បន្ថែម​អំពី​បញ្ហា​នេះ​៖​ https://dredf.org/ADAtg/elig.shtml#appendix1 

ការ​ស្នើសុំ​​សេវា​កម្ម​

ទាក់​ទង​ទៅ​​ភ្នាក់ងារ​​ដឹកជញ្ជូន​ក្នុង​មូលដ្ឋាន​របស់​អ្នក​ ដើម្បី​​ស្នើសុំ​​ការ​ប្រើប្រាស់​សេវា​ដឹកជញ្ជូន​ពិសេស​សម្រាប់​ជនពិការ​​នៅ​ក្នុង​មូល​ដ្ឋាន​របស់​អ្នក​។​ ទីភ្នាក់ងារ​នីមួយ​ៗ​​ មាន​ទំនួល​ខុស​ត្រូវ​ក្នុង​​​ការ​បង្កើត​​ដំណើរ​ការ​ត្រួត​ពិនិត្យ​ផ្ទាល់​ខ្លួន​ ដូ​ច​នេះ ​លក្ខខណ្ឌ​តម្រូវ​នានា​​អាច​មាន​ការ​ខុស​គ្នា​​​ក្នុងពី​​ភ្នាក់ងារ​ដឹកជញ្ជូន​មួយ​ទៅ​ភ្នាក់ងា​រ​​ដឹកជញ្ជូន​មួយ​ទៀត​​។​ ទីភ្នាក់ងារ​សេវា​ដឹកជញ្ជូន​ភាគ​ច្រើន​ មាន​គេហទំព័រ​មួយ​ដែ​ល​មាន​ទម្រង់​ពាក្យ​ស្នើសុំ​​ដែល​អ្នក​អាច​បំពេញ​និង​ប្រគល់​ជូន​តាម​ប្រព័ន្ធ​អនឡា​ញ​បាន​។​ អ្នក​ក៏​អាច​ប្រគល់​លិខិត​មួយ​ច្បាប់​​ទៅកាន់​ភ្នាក់ងារ​នោះ​ដើម្បី​ធ្វើ​ការ​ស្នើសុំ​​សេវាបាន​ផង​ដែរ​​​។ លិខិតគំរូ ត្រូវ​បាន​​បញ្ចូល​នៅ​ខាង​ចុង​នៃ​ប័ណ្ណ​ព័ត៌មាន​នេះ​។ ​​ភ្នាក់ងារដឹកជញ្ជូន​ មិន​​ត្រូវ​គិត​ប្រាក់​ពី​អ្នក​នោះ​ទេ​ ​សម្រាប់​​ការ​ស្នើសុំ​សេវា​ដឹកជញ្ជូន​ពិសេស​សម្រាប់​ជនពិការ​នេះ​។​

​ភ្នាក់ងារ​ដឹកជញ្ជូន​ អាច​ស្នើសុំ​ឲ្យ​អ្នក​ផ្តល់​អំណះ​អំណាង​គាំ​ទ្រ​​​លើ​​​សំណើ​សុំ​សេវា​ដឹកជញ្ជូន​ពិសេស​សម្រាប់​ជនពិការ​​របស់​អ្នក ​ជាមួយ​នឹង​លិខិត​មួយ​ច្បាប់​ពី​វេជ្ជ បណ្ឌិ​ត​របស់​អ្នក​។​ ​​ភ្នាក់ងារ​នេះ​ ក៏​អាច​ស្នើសុំ​ឲ្យ​អ្នក​​​ចូល​រួម​ក្នុង​ការ​សម្ភាស​ដោយ​ផ្ទាល់​ ឬ​ធ្វើ​​​ការ​វាយតម្លៃ​​ដើម្បី​​​កំណត់​ថា​តើ​អ្នក​មាន​សិទ្ធិ​ទទួល​បាន​សេវា​នេះ​ដែរ​ឬ​ទេ​។​ 

​ភ្នាក់ងារ​ដឹកជញ្ជូន​ ត្រូវ​​​ឆ្លើយ​តប​ទៅ​នឹង​ពាក្យ​ស្នើសុំ​របស់​អ្នក​នៅ​ក្នុង​រយៈ​ពេល​ 21 ថ្ងៃ​។​ ប្រសិន​បើ​ភ្នាក់ងារនោះ ​ពុំ​បាន​ឆ្លើយ​តប​​ឲ្យ​បាន​ទាន់​ពេលវេលា​ទេ ​ភ្នាក់ងា​រ​នោះ​ត្រូវ​ចាប់​ផ្តើម​​សេវា​ដឹកជញ្ជូន​ពិសេស​សម្រាប់​ជនពិការ​​​នេះ។​ គេ​​អា​ច​ត្រូវ​បានបញ្ឈប់​ផ្តល់​សេវា​នានា​បាន​​​ ប្រសិន​បើ​ចុង​ក្រោយ​​​ពាក្យ​ស្នើសុំ​របស់​អ្នក​ត្រូវ​បាន​គេ​បដិសេធ​​ចោល​។​ ​ភ្នាក់ងារ​សេវា​ដឹកជញ្ជូន​ពិសេស​សម្រាប់​ជនពិការ​ ត្រូវ​បញ្ជាក់​ពី​​​មូល​ហេតុ​ជាក់លាក់​​ឲ្យ​អ្នក​បាន​ជ្រាប​ សម្រាប់​ការ​បដិសេធ​ពាក្យ​ស្នើសុំ​របស់​អ្នកនេះ​។​ 

ប្រសិន​បើ​ពាក្យ​ស្នើសុំ​របស់​អ្នកទទួល​បាន​ការ​យល់​ព្រម​ នោះ​ភ្នាក់ងារ​សេវា​ដឹកជញ្ជូន​ពិសេស​សម្រាប់​ជនពិការ​ គប្បី​​ជូន​​ដំណឹង​ជា​លាយលក្ខណ៍​អក្សរ​​​ដល់​អ្នក​ ដោយ​​រួម​បញ្ចូល​នូវ​ព័ត៌មាន​ដូច​ខាង​ក្រោម​៖​

  • ​ឈ្មោះ​របស់​អ្នក​​
  • ឈ្មោះ​របស់​អ្នក​ផ្តល់​សេវា​ដឹកជញ្ជូន​
  • លេខទូរសព្ទ​​សម្រាប់​អ្នក​សម្របសម្រួល​សេវា​ដឹកជញ្ជូន​ពិសេស​សម្រាប់​ជនពិការ​​
  • កាលបរិច្ឆេទ​ផុតកំណត់​​នៃ​​សិទ្ធិ​ទទួល​បាន​សេវា​ (​ជា​ទូទៅ​មាន​​​រយៈពេលពី​​មួយ​​ឆ្នាំ​ទៅ​បី​ឆ្នាំ​ ហើយ​អ្នក​អាច​ដាក់​ពាក្យ​សុំ​​បន្ត​សេវា​របស់​អ្នក​បាន​បន្ទាប់​ពី​រយៈពេល​ផុតកំណត់​នោះ​) និង​
  • លក្ខខណ្ឌ​ ឬ​ដែនកំណត់​ណាមួយ​លើ​សិទ្ធិ​ទទួល​បាន​របស់​អ្នក​។​ ឧទាហរណ៍​ អ្នក​អាច​មាន​សិទ្ធិ​ទទួល​បាន​សេវា​ដឹកជញ្ជូន​ពិសេស​សម្រាប់​ជនពិការ​​សម្រាប់ផ្លូវ​ចរាចរណ៍ណា​​មួយ​ ប៉ុន្តែ​មិន​ទទួល​បាន​សម្រាប់​ផ្លូវ​ដទៃ​​ទៀត​។​

ការកំណត់​ពេលសេវាកម្ម​

នៅ​ពេល​ណា​ដែល​មាន​ការឯកភាព​ អ្នក​អាច​កំណត់​ពេលវេលា​​ធ្វើ​ដំណើរ​បាន​ ដោយ​អនុវត្ត​តាម​ដំណើរ​ការ​នៃ​ការ​កំណត់​ពេល​របស់​​ភ្នាក់ងារ​ដឹកជញ្ជូន​របស់​អ្នក​។​ ​ភ្នាក់ងារ​ដឹកជញ្ជូន​ ត្រូវ​បាន​តម្រូវ​ឲ្យ​ផ្តល់សេវា​នៅ​ថ្ងៃ​បន្ទាប់​​ និង​ត្រូវ​យល់​ព្រម​​ក្នុង​កា​រ​ទៅ​យក​អ្នក​ក្នុង​រយៈ​ពេល​មួយ​ម៉ោងបន្ទាប់​ពី​ពេល​ដែល​អ្នក​បាន​ធ្វើ​ការ​ស្នើសុំ​។​​

​ភ្នាក់ងារ​​​ដឹកជញ្ជូន​​ត្រូវ​អនុញ្ញាត​ឲ្យ​អ្នក​ធ្វើ​ដំណើរ​​ជាមួយ​​​អ្នក​ថែទាំ​​ផ្ទាល់​ខ្លួន​​ម្នាក់​។​ ​អ្នក​ថែទាំ​​ផ្ទាល់​ខ្លួន​ គឺ​ជា​បុគ្គល​ណាម្នាក់​​ដែល​ជួយ​អ្នក​​​ធ្វើ​កិច្ចការ​មួយ​ចំនួន​​​​ក្នុង​អំឡុ​ង​ពេល​ជិះ​​រថយន្ត​ និង​នៅ​កន្លែង​គោលដៅ​។​ ​ភ្នាក់ងារ​ដឹកជញ្ជូន​ អាច​មិន​គិត​ថ្លៃ​ធ្វើ​ដំណើរ​សម្រាប់​អ្នក​ថែទាំ​ផ្ទាល់​ខ្លួន​របស់​​អ្នក​នោះ​ទេ​។​ ប្រសិន​បើ​អ្នក​ត្រូវ​ការ​អ្នក​ថែទាំ​ណាម្នាក់​ ឬ​ជឿជាក់ថា​​ពេលខ្លះ​អ្នក​អាច​ត្រូវ​ការ​អ្នក​ថែទាំ​ម្នាក់នៅ​ក្បែរ​​ ដូច​នេះ​ អ្នក​គប្បី​បញ្ចូល​ព័ត៌មាន​​នោះ​ទៅ​ក្នុង​ពាក្យ​ស្នើសុំ​របស់​អ្នក។

​ភ្នាក់ងារ​ដឹកជញ្ជូន​ ក៏​ត្រូវ​អនុញ្ញាត​ឲ្យ​អ្នក​​មាន​អ្នក​អមដំណើរ​​ជាមួយអ្នក​​​​យ៉ាង​តិច​ម្នាក់​​ផង​ដែរ​។​ អ្នក​​អម​ដំណើរ​ គឺ​ជា​បុគ្គល​ណាម្នាក់​ដែល​នឹង​ត្រូវ​ធ្វើ​ដំណើរ​​ជាមួយ​អ្នក​ដើម្បី​​អម​ដំណើ​រ​​​អ្នក ឬ​ធ្វើ​ជា​មិត្តភក្តិ​​​របស់​អ្នក​។​ អ្នក​ថែទាំ​​​អ្នក​ មិន​ត្រូវបាន​​រាប់​បញ្ចូលថា​​ជា​​អ្នក​អមដំណើរ​នោះ​ទេ​។​ ​ភ្នាក់ងារ​ដឹកជញ្ជូន​ មាន​សិទ្ធិ​ក្នុង​ការ​គិត​ថ្លៃ​ធ្វើដំណើរលើ​​អ្នក​អមដំណើរ​របស់​អ្នក​ ប៉ុន្តែ​ថ្លៃ​ធ្វើ​ដំណើរ​នោះ​ មិន​អាច​ថ្លៃ​ជាង​គុណ​នឹង​ពីរ​​​នៃ​ថ្លៃ​សេវា​ធ្វើដំណើរ​ធម្មតា​នោះ​ទេ។​

ការ​បដិសេធ​ និង​ការ​បាត់​បង់​សេវា​កម្ម​

អ្នកក៏​អាច​ដាក់ពាក្យ​​បណ្តឹង​ឧទ្ធរណ៍​សម្រាប់​​​ការ​បដិសេធ​លើសេវា​ដឹកជញ្ជូន​ពិសេ​ស​សម្រាប់​ជនពិការនេះ​បាន​​​ផង​ដែរ​។​ បណ្តឹង​ឧទ្ធរណ៍​​ត្រូវ​ទទួល​បាន​ក្នុង​រយៈ​ពេល​ 60 ថ្ងៃ​ បន្ទាប់​ពី​ការ​បដិសេធ​លើ​ការ​ស្នើសុំ​​​របស់​អ្នក​។​ ​ភ្នាក់ងារ​ខ្លះ​ អាច​ផ្តល់​ពេលវេលា​​​​បន្ថែម​ដល់​អ្នក​សម្រាប់​ដាក់​បណ្តឹង​ឧទ្ធរណ៍​នេះ​។​ ​អ្នក​អាច​ដាក់​បណ្តឹង​ឧទ្ធរណ៍​ដោយ​ផ្ទាល់​ ឬ​ជា​លាយលក្ខណ៍​អក្សរ​ក៏​បាន​។​

ភ្នាក់ងារ​​ដឹកជញ្ជូន​ មាន​ពេល​ 30 ថ្ងៃ​ ដើម្បី​ធ្វើ​ការ​ឆ្លើយ​តប​នឹង​បណ្តឹង​ឧទ្ធរណ៍​រប​ស់​​អ្នក។​ ការ​ឆ្លើយ​តប​ត្រូវ​ធ្វើ​ឡើង​ជា​លាយលក្ខណ៍​អក្សរ​។​ ប្រសិន​បើ​ភ្នាក់ងារនោះ​​​ ពុំ​បាន​​​ឆ្លើយ​តប​ឲ្យ​បាន​ទាន់​ពេលវេលា​ទេ​​ ​ភ្នាក់ងារ​នោះ ត្រូវ​ផ្តល់​ជូន​នូវ​សេវា​កម្មតែ​ម្តង​ លើកលែង​តែ​ និង​​​ទាល់​តែ​ខ្លួន​បដិសេធ​លើ​បណ្តឹង​ឧទ្ធរណ៍​នោះ​។​

​ភ្នាក់ងារ​​ដឹកជញ្ជូន​ អាច​បញ្ឈប់​ ឬ​ពន្យារ​ពេលសេវាកម្ម​របស់​អ្នកបាន​​​ ប្រសិន​បើ​​អ្នក​ពាក់ព័ន្ធ​នឹង​អំពើហឹង្សា​ ការបង្កការរំខាន​ធ្ងន់ធ្ងរ ឬ​សកម្មភាព​ខុស​ច្បាប់​ ឬ​ប្រសិ​ន​បើ​អ្នក​មាន​ទម្រង់​នៃ​​​ការខកខាន​​​​ការ​ធ្វើ​ដំណើរ​ដែល​បាន​កំណត់​ពេលវេលា​រួច​​ជា​ញឹក​ញាប់​។​ គ្រោះ​ថ្នាក់​ ឬ​ឧបទ្ទវហេតុ​​មួយ​លើក​ មិន​ចាត់​ទុក​ជា​ទម្រង់​នៃ​ការ​ខក​ខាន​​នេះ​ទេ​។​ ​មាន​តែសកម្មភាព​​ដោយ​ចេត​នា ដដែល​ៗ​ ឬ​ជា​ប្រចាំ​ប៉ុណ្ណោះ​ ដែល​គប្បី​ត្រូវ​ចាត់​ទុក​ជា​​ទម្រង់​នៃ​ការ​ខកខាន​ការ​ធ្វើ​ដំណើរ​នេះ​។​

​ភ្នាក់ងារ​​ដឹកជញ្ជូន​ ត្រូវ​​​ជូន​ដំណឹង​​​ដល់​អ្នក​ជា​លាយលក្ខណ៍​អក្សរ​​ ថា​តើ​ខ្លួន​មាន​គម្រោង​ក្នុង​ការ​បញ្ឈប់​ឬ​ពន្យារ​ពេល​សេវា​កម្ម​ដែរ​ឬ​ទេ​។​ ការ​ជូនដំណឹង​នេះ​ ត្រូវ​បញ្ជាក់​ពី​សេវា​ជាក់លាក់ណាមួយ​ដែល​ពួកគេ​គ្រោង​​នឹង​ធ្វើ​ការ​ពន្យារ​ពេល​ និង​ត្រូវ​បញ្ជាក់​ពី​​​មូលហេតុ​នៃ​​​ការ​ពន្យារ​ពេល​នេះ​។​ ការ​ជូនដំណឹងនេះ​​ ក៏​ត្រូវ​​ផ្តល់​ជូន​នូវ​កាលបរិច្ឆេទដែល​​សេវាកម្ម​​នោះ​​​​​នឹង​ត្រូវ​បន្ត​វិញ​ផង​ដែរ​។​ ​ភ្នាក់ងារ​​ដឹកជញ្ជូន​ គប្បី​​ផ្តល់​​ឱកាស​​ដល់​អ្នក​​ក្នុង​ការ​ដាក់​បណ្តឹង​​ឧទ្ធរណ៍​លើ​ការ​ពន្យារ​ពេល​នោះ​​ផង​ដែរ​។​ សេវា​កម្ម​ គប្បី​ត្រូវ​បន្តផ្តល់​ជូន​​​​ក្នុង​អំឡុង​​ដំណើរ​ការនៃ​​បណ្តឹង​ឧទ្ធរណ៍​នេះ​​។​

​ភ្នាក់ងារ​ដឹកជញ្ជូន​ អាច​តម្រូវ​ឲ្យ​​មាន​ការ​បញ្ចាក់​ជា​ថ្មី​ចំពោះ​សិទ្ធិ​ទទួល​បាន​សេវា​ដឹកជញ្ជូន​ពិសេស​សម្រាប់​ជនពិការ​​នេះ​​។​ អ្នក​អាច​បាត់​បង់​សេវា​ដឹកជញ្ជូន​ពិសេ​ស​សម្រាប់​ជនពិការ​ ប្រសិន​បើ​​ភ្នាក់ងារ​កំណត់​​ថា​ អ្នក​លែង​មាន​សិទ្ធិទទួល​បាន​សេវា​កម្ម​នេះ​ទៀត​។​

ធនធាន​បន្ថែម

អ្នក​អាច​ស្វែង​រក​ព័ត៌មាន​​បន្ថែម​អំពី​សេវា​ដឹកជញ្ជូន​ពិសេស​សម្រាប់​ជនពិការ​​ លក្ខខណ្ឌវិនិច្ឆ័យ​នៃ​សិទ្ធិ​ទទួល​បាន​សេវា​ និង​ការ​ដាក់​ពាក្យ​សុំ​នៅ​ទីនេះ​៖

  • គេហទំព័រ​របស់​ Federal Transit Administration (រដ្ឋ​បាល​សេវាដឹកជញ្ជូន​របស់​សហព័ន្ធ​)​៖
  • គេហទំព័រ​ Disability Rights Education & Defense Fund (មូលនិធិ​​ការពារ​និង​​អប់រំ​​សិទ្ធិ​ជនពិការ​)៖
    • ឯកសារ​បោះ​ពុម្ព​ផ្សាយ​ស្តីពី​សិទ្ធិ​ទទួល​បាន​សេវា​ដឹកជញ្ជូន​ពិសេស​សម្រាប់​ជនពិការ​​របស់​ ADA៖ https://dredf.org/news/publications/ada-paratransit-eligibility/
    • មគ្គទេសក៍​​ណែនាំ​​អំពី​ប្រធានបទ​​ទាក់​ទង​នឹង​សេវា​ដឹកជញ្ជូន​ពិសេស​សម្រាប់​ជនពិការ​របស់​ ADA៖ https://dredf.org/ADAtg/elig.shtml

បណ្តឹង​រដ្ឋ​បាល

ការិយាល័យ​សិទ្ធិ​ពលរដ្ឋ​របស់​​រដ្ឋ​បាលសេវាដឹកជញ្ជូន​របស់​សហព័ន្ធ​ (Federal Transit Administration, FTA) ​មាន​ទំនួល​ខុស​ត្រូវ​លើ​ការ​ត្រួ​ត​ពិនិត្យ​​តាម​ការ​អនុវត្ត​បទប្បញ្ញត្តិ​​សេវា​ដឹកជញ្ជូន​ពិសេស​សម្រាប់​ជនពិការ​​របស់​សហព័ន្ធ​នេះ​។​ ប្រសិន​បើ​អ្នក​ជឿ​ជាក់​ថា​ ទីភ្នាក់ងារ​​ដឹកជញ្ជូន​របស់​អ្នក​ ពុំ​បាន​អនុវត្ត​តាម​បទប្បញ្ញត្តិ​ទាំង​នេះ បាន​បដិសេធ​ដោយ​ពុំ​ត្រឹម​ត្រូវ​លើ​សេវា​កម្ម​របស់​អ្នក ឬ​មិន​បាន​ផ្តល់​​ឱកាសដល់​​អ្នក​ក្នុង​ការ​ប្តឹង​ឧទ្ធរណ៍​លើ​សេចក្តី​សម្រេច​របស់​ខ្លួន​ អ្នក​អាច​ដា​ក់​ពាក្យ​បណ្តឹង​ទៅ​កាន់​ FTA បាន​។​ FTA នឹង​ធ្វើ​ការ​ស៊ើប​អង្កេត​​លើ​ពាក្យ​បណ្តឹង​នានា​ និង​​ពិនិត្យ​មើល​​ក្រែង​មាន​ការ​បំពាន​ច្បាប់​​ ADA ណាមួយ​ដោយ​ទីភ្នាក់ងារ​ដឹកជញ្ជូន​។​ បន្ទាប់​មក​ FTA នឹង​ជូន​ដំណឹង​ដល់​អ្នក​​អំពី​ការ​រំលោភ​បំពាន​ច្បាប់​ទាំង​នេះ​ និង​​កំណត់​នូវ​កាលបរិច្ឆេទ​ផុតកំណត់​សម្រាប់​ទីភ្នាក់ងារនោះ​​​ធ្វើ​កា​រ​ដោះ​ស្រាយ​បញ្ហា​។​

ពាក្យ​បណ្តឹង​ FTA៖

Federal Transit Administration
Office of Civil Rights
Attention: Complaint Team
East Building, 5th Floor – TCR
1200 New Jersey Avenue, SE
Washington, DC 20590

ទម្រង់​បែប​បទ​ពាក្យ​បណ្តឹង​៖​

https://www.transit.dot.gov/regulations-and-guidance/civil-rights-ada/fta-civil-rights-complaint-form

ទូរសព្ទ៖ 1-888-446-4511

នាយកដ្ឋាន​លំនៅដ្ឋាន​និង​ការងារ​ស្មើភាព​គ្នា​ (Department of Fair Employment and Housing, DFEH) ពង្រឹង​ការ​អនុវត្ត​ច្បាប់​ស្តីពី​សិទ្ធិ​ពលរដ្ឋ​របស់​រដ្ឋ​។​ ការ​រំ​លោ​ភ​បំពាន​​ណា​មួយ​ទៅលើ​​ច្បាប់ ADA ក៏​ជា​ការ​រំ​លោភ​ទៅ​លើច្បាប់​រដ្ឋផង​ដែរ។  ប្រសិ​​ន​បើ​អ្នក​ជឿ​ជាក់​ថា​ ​ទីភ្នាក់ងារ​​ដឹកជញ្ជូន​​បាន​រើស​អើង​មក​លើ​អ្នក​ អ្នកក៏​អា​ច​​​ដាក់​ពាក្យ​បណ្តឹង​ជាមួយ​ DFEH បាន​ផង​ដែរ​។​ ពាក្យ​បណ្តឹងទៅ​កាន់ DFEH ត្រូវ​តែ​ធ្វើ​ឡើង​ក្នុង​រយៈ​ពេល​មួយ​ឆ្នាំ​បន្ទាប់​ពី​មាន​សកម្មភាព​​​រើស​អើង​នេះ​។ អ្នក​អាច​ដាក់​បណ្តឹង​ឧទ្ធរណ៍​លើ​​សេចក្តី​សម្រេច​របស់ DFEH ទៅ​កាន់​នាយក DFEH ក្នុង​រយៈពេល 10 ថ្ងៃ​​ក្រោយ​ចេញ​​សេចក្តី​សម្រេចនោះ​។ សូម​មើល​ 2 C.C.R. ផ្នែក​ទី​ 10033.

បណ្តឹងទៅ​កាន់ DFEH៖

ការ​ដាក់​ពក្យ​បណ្តឹង​តាម​ប្រ​ព័ន្ធ​អន​ឡាញ៖ https://www.dfeh.ca.gov/filing-a-complaint-online/

ទូរសព្ទ៖ (800) 884-1684
TTY៖ (800) 700-2320
សំបុត្រ​ប្រៃសណីយ៍​៖ សូម​ទូរ​សព្ទ​ទៅ​កាន់លេខ (800) 884-1684 និង​ស្នើ​សុំ​ទម្រង់​ពាក្យ​បណ្តឹង​ដើម្បី​ព្រីន​ចេញ​និង​ផ្ញើ​ត្រឡប់​មក​វិញ​។ សូម​ផ្តល់​ពេល​វេលា​បន្ថែម​សម្រាប់​ការផ្ញើ​តាម​​ប្រៃយ​​ណីយ៍ និង​ការ​ដំ​ណើរ​ការ​និតិ​វិធី​។

បណ្តឹង​វិ​វាទ

ការ​រំ​លោភ​ច្បាប់ដែល​បាន​​ពិ​ភាក្សា​ខាង​លើ ​ក៏​អាច​ពង្រឹង​ការ​អនុវត្ត​ច្បាប់​តាម​​រយៈ​​ពាក្យ​បណ្តឹង​ផ្ទាល់​ខ្លួន​ផង​ដែរ​​។ សូម​មេត្តា​ជ្រាប​ថា​​ អាជ្ញាយុកាល ​កំណត់​ពេលវេលា​សម្រាប់​ការ​ដាក់​បណ្តឹង​វិវាទ​នេះ​ ​​ហេតុ​នេះ​ អ្នក​អាច​បាត់​បង់ឱកាស​​ក្នុង​ការ​ទាម​ទារ​ ប្រសិន​បើ​អ្នក​ពុំ​បាន​​ចាត់​វិធានការ​ក្នុងពេល​នៃ​​​អាជ្ញាយុកាល​ដែល​មាន​ជាធរមាន​នេះ​។​ កាល​បរិច្ឆេទ​ទាំង​នេះ​អាច​មាន​រយៈ​ពេល​ខ្លី​ត្រឹម​ពីរ​ឆ្នាំ​រាប់​ចាប់​ពី​កាលបរិច្ឆេទ​នៃ​សកម្ម​ភាព​រើស​អើង​ត្រូវ​បាន​ប្រ​ព្រឹត្តិ​ឡើង​។ ប្រសិន​បើ​អ្នក​​ចង់​បន្ត​​​ដាក់​បណ្តឹង​វិវាទ​ អ្នកគប្បី​​ប្រឹក្សាយោបល់​ជាមួយ​មេធាវី​ណាម្នាក់​ឲ្យ​បាន​ឆាប់​តាម​ដែល​អាច​ធ្វើ​ទៅ​បាន​។​

ប្រ​សិន​បើ​អ្ន​ក​ស្វែង​រក​សំ​ណង​ខូច​ខាត​ក្នុង​តម្លៃ​ជា​ទឹក​ប្រាក់​តិច​ជាង $10,000 នោះ ជម្រើស​មួយ​ទៀត​គឺ​ត្រូវ​ដាក់​ពាក្យ​បណ្តឹង​ករណី​រើស​អើង​ទៅ​កាន់​តុលា​សម្រាប់​បណ្តឹង​តូច​តាច​ក្នុង​មូល​ដ្ឋាន។ អាជ្ញាយុកាល​ដែល​បាន​​​ពិ​ភាក្សា​ខាង​លើ​នឹងត្រូវ​យកមក​​​អនុវត្ត​។ អ្នក​មិន​អាច​ប្រើ​មេ​ធា​វីបាន​ទេ​ក្នុង​ករណី​អ្នក​ទៅ​ប្តឹង​នៅ​តុលា​ការ​សម្រាប់​បណ្តឹង​តូច​តាចក្នុង​មូល​ដ្ឋាននោះ​។ នេះ​គឺ​ដំ​ណភ្ជាប់​ទៅ​កាន់​ឯក​សារ​បោះ​​​ពុម្ព​ផ្សាយ​របស់ Disability Rights California (អង្គការ​សិទ្ធិ​ជនពិ​ការ​​រដ្ឋ ​កាលី​ហ្វ​​ញ៉ា) ដែល​ពន្យល់​ពី​ដំ​ណើរ​ការ​នៃនី​តិ​វិធីសម្រាប់​​​​បណ្តឹង​តូច​តាច​ពាក់ព័ន្ធ​នឹង​​ករណី​រើស​អើង​៖​ https://www.disabilityrightsca.org/publications/a-guide-to-small-claims-court-how-to-sue-if-a-business-or-landlord-discriminates

 

 

គំរូ​លិខិត​ដើម្បី​ស្នើសុំសេវា​ដឹកជញ្ជូន​ពិសេស​សម្រាប់​ជនពិការ​

[កាល​បរិ​ច្ឆេទ]

 

ជូនចំពោះ​ [​ភ្នាក់ងារ​ដឹកជញ្ជូន​]៖

ខ្ញុំ​សរសេរ​លិខិត​នេះ​ដើម្បី​ស្នើសុំ​សេវា​ដឹកជញ្ជូន​ពិសេស​សម្រាប់​ជនពិការ​​ ដោយសារ​បញ្ហា ​[ពិការភាព]/ របស់​ខ្ញុំ​។ ខ្ញុំ​ពុំ​អាច​ប្រើប្រាស់​ប្រព័ន្ធផ្លូវ​រត់​ដែល​បាន​កំណត់​រួច​​ស្រេច​​នោះ​ទេ​ ដោយសារ​ [រៀប​រាប់​អំពី​​ឧបសគ្គ​នៃ​ការ​ប្រើប្រាស់​សេវា​ដឹកជញ្ជូន​សាធារណៈ​ ឧ.ទា. ចំណត​រថ​យន្ត​មិន​អាច​ចេញ​ចូល​បាន​]។

[គ្រូពេទ្យ / គ្រូ​​ពេទ្យ​ផ្នែក​​វិ​កល​ចរិត / ចិត្ត​វិទូ / គ្រូ​ពេទ្យ​​ព្យា​បាល​ដោយ​ចលនា / បុគ្គលិក​សង្គម​កិច្ច / គ្រូ​ពេទ្យ​​ព្យា​បាល​សប្បទាវិជ្ជាជីវៈ​​ / បុគ្គល​ដទៃ​ផ្សេង​ទៀត (សូម​រៀប​រាប់)] ​របស់​ខ្ញុំ​ ​បាន​ចាត់​ទុក​សេវា​ដឹកជញ្ជូន​ពិសេស​សម្រាប់​ជនពិការ​​នេះ​​ថា​ចាំ​បាច់​ដោយ​ផ្អែក​លើ​ពិ​ការ​ភាព​របស់​ខ្ញុំ​។ សូម​មេត្តា​ពិ​និត្យ​លិខិត​ដូច​បាន​ភ្ជាប់​មក​ជា​មួយ​ពី [ឈ្មោះ​វេជ្ជ​បណ្ឌិត ឬ​អ្នក​ជំ​នាញ]។

ខ្ញុំ​ចង់​ប្រើ​សេវា​ដឹកជញ្ជូន​ពិសេស​សម្រាប់​ជនពិការ​​សម្រាប់​​ការ​ធ្វើ​ដំណើរ​ខាង​ក្រោម​​ជា​ប្រចាំ​៖​ [សរសេរ​បញ្ចូល​នូវ​កាលបរិច្ឆេទ/ពេលវេលា​ធ្វើ​ដំណើរ​ ទីតាំង​ទៅ​យក និង​ដាក់​ចុះ​]។

[ខ្ញុំ​នឹង​ត្រូវ​ការ​ជំនួយ​ពី​អ្នក​ថែទាំ​ម្នាក់​​សម្រាប់​ការ​ធ្វើ​ដំណើរ​ (មួយ​ចំនួន/ទាំង​អស់) ដើម្បី​ជួយ​ខ្ញុំ​ (​ក្នុង​អំឡុង​ពេល​ជិះ​រថយន្ត​/នៅ​កន្លែង​គោលដៅ​របស់​ខ្ញុំ)​។ (សូម​រៀប​រាប់​​ពី​តម្រូវ​ការ​អ្នក​ថែទាំ​)។]

ច្បាប់​របស់​សហព័ន្ធ​និង​ច្បាប់​រដ្ឋ​​តម្រូវ​ឲ្យ​​ភ្នាក់ងារ​ដឹកជញ្ជូន​​​ផ្តល់​សេវា​ដឹកជញ្ជូន​ពិសេស​សម្រាប់​ជនពិការ​​ជូន​ដល់​បុគ្គល​ដែល​មាន​ពិការភាព​ដែល​​មិន​អាច​ប្រើប្រា​ស់​​ប្រព័ន្ធ​ផ្លូវ​រត់​ដែលកំណត់​ជា​ស្រេច​បាន​។​ សូម​ធ្វើ​ការ​ឆ្លើយ​តប​​ទៅ​នឹង​សំណើ​​សុំ​នេះ​ ក្នុង​រយៈ​ពេល​ 21 ថ្ងៃ​ ​​ទៅ​តាម​ការ​តម្រូវ​ដោយ​ច្បាប់​។​ សូម​មេត្តា​កុំ​ស្ទាក់​ស្ទើ​រក្នុង​ការ​ទាក់​ទង​មក​ខ្ញុំ​តាម​រយៈ [លេខ​ទូរ​សព្ទ​របស់​អ្នក និង / ឬ អ៊ី​ម៉ែល​] ប្រ​សិន​បើ​អ្នក​​មាន​ជា​សំ​ណួរណាមួយ​នោះ​។ សូម​អរគុណ។

ដោយសេច​ក្តី​គោ​រពអំពី​ខ្ញុំ​

[ឈ្មោះ​របស់​អ្នក​]
[អាសយដ្ឋាន​របស់​អ្នក​]

 

 

គំ​រូ​លិខិត​គាំ​ទ្រ​

[កាល​បរិ​ច្ឆេទ]

 

គោ​រព​ជូន​ [ក្រុ​ម​ហ៊ុន]៖

ខ្ញុំ​​ជា [គ្រូ​ពេទ្យ / គ្រូ​ពេទ្យផ្នែក​​​វិ​កល​ចរិត / អ្នក​ចិត្ត​វិទូ / គ្រូ​ពេទ្យ​ព្យា​បាល​ដោយ​ចល​នា​ / ​បុគ្គលិក​​​សង្គម​កិច្ច / គ្រូ​ពេទ្យ​ព្យា​បាលស​ម្ប​ទា​វិជ្ជាជីវៈ/ ផ្សេង​ទៀត​] សម្រាប់ [ឈ្មោះ​] ហើយ​ខ្ញុំ​​ដឹង​ច្បាស់​ពី​លក្ខ​ខណ្ឌ​ស្ថាន​ភាព​ [របស់​គាត់/នាង​]។ [គាត់/នាង​] មាន​ពិ​ការ​ភាពដែល​បណ្តាល​ឲ្យ​មាន​​បញ្ហា​មិន​អាច​បំពេញ​មុខងារ​មួយ​ចំនួន​បាន​។ បញ្ហា​ទាំង​នេះ​ រួមមាន​ [រៀប​រាប់​ពី​បញ្ហាមិនអាច​បំពេញ​មុខងារ​បាន​ ដែល​តម្រូវ​ឲ្យ​មាន​សេវា​ដឹកជញ្ជូន​ពិសេស​សម្រាប់​ជនពិការ​​ដែល​បាន​ស្នើសុំ​​នេះ​]។

[ឈ្មោះ​] ពុំ​អាច​ប្រើប្រាស់​​ប្រព័ន្ធ​ផ្លូវ​រត់​​ដែល​បាន​កំណត់​ជា​ស្រេច​នោះ​ទេ​។​ [រៀប​រាប់​​ថា​តើ​​ឧបសគ្គទាំង​​នោះ​​រារាំង​ដល់​ការ​ប្រើប្រាស់​​សេវាដឹកជញ្ជូន​សាធារណៈ​យ៉ាង​ដូច​ម្តេច​ខ្លះ​​។ ប្រសិន​បើ​ត្រូវ​ការ​អ្នក​ថែទាំ​​ណា​ម្នាក់​ សូម​រៀប​រាប់​អំពី​តម្រូវ​ការ​សម្រាប់​អ្នក​ថែទាំ​នោះ​]។

សូម​អរគុណ​សម្រាប់​ការ​ផ្តល់សេវា​ដឹកជញ្ជូន​ពិសេស​សម្រាប់​ជនពិការ​​នេះ​ជូន​ដល់​​ [ឈ្មោះ]។

 

ដោយសេច​ក្តី​គោ​រពអំពី​ខ្ញុំ​

[ឈ្មោះ​និង​មុខ​តំណែង​]