17 គន្លឹះ​នៃ​ការ​តស៊ូមតិ​សម្រាប់​ការ​អប់រំ​ពិសេស​

Publications
#5130.06

17 គន្លឹះ​នៃ​ការ​តស៊ូមតិ​សម្រាប់​ការ​អប់រំ​ពិសេស​

ឯកសារ​នេះ​ នឹ​ង​ផ្ដល់​​​នូវ​​គន្លឹះ​សម្រាប់​អ្នក​ ​​នៅ​​មុន​ពេល​ អំឡុង​ពេល​ និង​ក្រោយ​ពេ​ល​កិច្ចប្រជុំ​ IEP ដើម្បី​​ជួយ​ដល់​អ្នក​ក្នុងការ​តស៊ូមតិ​សម្រាប់​​កូន​របស់​អ្នក​។

ឯកសារ​នេះ​ នឹ​ង​ផ្ដល់​​​នូវ​​គន្លឹះ​សម្រាប់​អ្នក​ ​​នៅ​​មុន​ពេល​ អំឡុង​ពេល​ និង​ក្រោយ​ពេ​ល​កិច្ចប្រជុំ​ IEP1 ដើម្បី​​ជួយ​ដល់​អ្នក​ក្នុងការ​តស៊ូមតិ​សម្រាប់​​កូន​របស់​អ្នក​។

នៅ​មុន​កិច្ច​ប្រជុំ​ IEP

1.   ​​រៀប​ចំ​កំណត់ត្រា IEP របស់​កូន​អ្នក​

នៅ​មុន​ពេល​កិច្ចប្រជុំ​ IEP របស់​កូន​អ្នក​​​ ត្រូវ​រៀប​ចំ​កំណត់​ត្រា​ IEP របស់​កូន​​អ្នក​​។​ ជ្រើស​រើស​​វិធី​រៀប​ចំមួយ​ដែល​​អ្នក​អាច​ធ្វើ​បាន​។​ នេះ​នឹង​ជួយ​អ្នក​ក្នុង​ការ​ត្រៀម​រៀបចំ​​សម្រាប់​កិច្ច​ប្រជុំ​នោះ​។​ ត្រូវប្រាក​ថា ​អ្នក​មានកំណត់​ត្រា​ថ្មី​បំផុត​​អំពី​ការ​ទំនាក់ទំនង​ទាំង​អស់​អំពី​កូន​​របស់​អ្នក​ ដូច​ជា​ អ៊ីម៉ែល​​ជា​មួយ​បុគ្គលិក​សាលារៀន​អំពី​កូន​របស់​អ្នក​ គ្រប់​សំណើសុំ​​ការ​វាយ​តម្លៃ​ទាំង​អស់ ផែន​ការ​វាយ​តម្លៃ​ និង​របាយការណ៍​វាយ​តម្លៃ​ សំណៅ​ថត​ចម្លង​នៃ​ IEP របស់​កូន​អ្នក​ និង​សេចក្ដីជូន​ដំណឹ​ង​ជា​លាយ​លក្ខណ៍​អក្សរ​ពី​មុន2 ដែល​អ្នក​អាច​ទទួល​បាន​ សំណៅ​ថត​ចម្លង​នៃ​ការការពារ​តាម​នីតិវិធី​ តារាង​រាយការណ៍ និងរបាយការណ៍​វឌ្ឍនភាព​​ គំរូ​កិច្ច​កា​រ​​ ហើយ​ប្រសិន​បើ​អាច​ ផែន​ការ​អន្តរាគមន៍​ផ្នែក​អាកប្បកិរិយា​ និង​របាយការណ៍​អំពី​គ្រោះ​ថ្នាក់​ខាង​អាកប្បកិរិយា​។​

2.   ស្នើសុំ​​ការ​វាយ​តម្លៃ​​

មណ្ឌលសិក្សាធិការ ត្រូវ​ធ្វើ​ការ​វាយ​តម្លៃ​​សិស្ស​ម្នាក់​លើ​​គ្រប់​ទិដ្ឋភាព​ទាំងអស់​ដែ​ល​​សង្ស័យ​ថា​មាន​ពិការ​ភាព​។​ អ្នក​ក៏​អាច​​ស្នើ​សុំ​មណ្ឌលសិក្សា​ធិការ​របស់​កូន​អ្នក​ឲ្យ​ធ្វើ​ការ​វាយ​តម្លៃ​លើ​កូន​​​អ្នក​នៅ​ផ្នែក​ណាមួយ​ដែល​សង្ស័យ​ថា​មាន​ពិការភាព​ផង​ដែរ​។​ អ្នក​ក៏​អាច​​ស្នើ​សុំ​មណ្ឌលសិក្សា​ធិការ​របស់​កូន​អ្នក​​ឲ្យ​ធ្វើ​ការ​វាយ​តម្លៃ​លើ​កូន​របស់​អ្នក​​សម្រាប់​សេវាកម្ម​ណាមួយ​ដែល​គេ​អាច​ត្រូវ​ការ​ ដូច​ជា​ការ​ព្យាបាល ​សម្ដី​​ជា​ដើម​។​ ​អ្នក​គួរ​​ធ្វើ​​ការ​ស្នើសុំ​ការ​វាយ​តម្លៃ​ទាំង​អស់​ជា​លាយលក្ខណ៍​អក្សរ​​ទៅកាន់​មណ្ឌល​សិក្សា​ធិការ​។​

នៅ​ពេល​ដែល​អ្នក​ធ្វើ​ការ​ស្នើសុំ​រួច​ មណ្ឌលសិក្សាធិការ​ គប្បី​ផ្តល់​ជូន​អ្នក​​នូវ​ផែន​ការ​វាយតម្លៃ​​មួយ​​ក្នុង​រយៈ​ពេល​ 15 ថ្ងៃ​។​ នៅ​ពេល​ដែល​អ្នក​ចុះ​ហត្ថលេខា​ និង​ប្រគល់​ផែនការ​នេះ​ត្រលប់​ទៅ​មណ្ឌលសិក្សា​ធិការ​វិញ​ នោះ​មណ្ឌលសិក្សាធិការ ​មាន​ពេល​ 60 ថ្ងៃ​ ដើម្បី​បញ្ចប់​​​ការ​វាយតម្លៃ​ និង​ដើម្បី​បើក​កិច្ចប្រជុំ​ IEP។

ប្រសិនបើអ្នក​មិន​យល់ស្រប​​​ចំពោះ​ការវាយតម្លៃ​របស់​មណ្ឌលសិក្សាធិការ អ្នក​​អា​ច​ស្នើ​​ឲ្យ​មណ្ឌលសិក្សាធិការ​បង់ប្រាក់​សម្រាប់ការ​វាយតម្លៃ​ឯករាជ្យ​​ ឬ IEE​ បាន​។ មណ្ឌលសិក្សាធិការ​ ត្រូវ​ធ្វើ​ការ​បង់​ប្រាក់​សម្រាប់​ការ​វាយតម្លៃ​ឯករាជ្យ​ ឬ​ដាក់​ពាក្យ​បណ្ដឹង​សម្រាប់​សវនាការ​ត្រឹម​ត្រូវ​តាម​ផ្លូវ​ច្បាប់​ (មណ្ឌល​សិក្សា​ធិការ​នឹង​ត្រូវ​បង្ហាញ​ថា​ ការ​វាយ​តម្លៃ​របស់​ខ្លួន​គឺ​សមស្រប​)។​

3.   ​​ស្នើសុំ​​របាយការណ៍​វាយ​តម្លៃ​ទាំង​អស់​​ក្នុង​ពេល​មួយ​សប្ដាហ៍​មុន​កិច្ចប្រជុំ IEP

មណ្ឌលសិក្សាធិការ ​ត្រូវ​បាន​តម្រូវ​​​ដោយ​ច្បាប់​សហព័ន្ធ និង​រដ្ឋ ​ដើម្បី​​​​ផ្តល់​សេចក្តី​ចម្លង​នៃ​របាយការណ៍រង្វាយតម្លៃ​​ នៅមុនកិច្ច​ប្រជុំកម្មវិធី​ IEP។ ប៉ុន្តែ​ គ្មាន​​ពេល​វេ​លា​​​​​កំណត់ដែល​ចែង​ថា ​​មណ្ឌល​សិក្សា​ធិការ ​​​​ត្រូវ​ផ្ដល់​សំណៅ​ថត​ចម្លង​នៃ​របាយការ​ណ៍​​​រង្វាយ​តម្លៃ​នោះ​ចំនួន​ប៉ុន្មាន​ថ្ងៃ ​មុន​កិច្ចប្រជុំ​ឡើយ​។​ ស្នើសុំឲ្យ​​មណ្ឌលសិក្សាធិ​កា​រ​​​ឲ្យ​ផ្តល់​សំណៅ​ថត​ចម្លង​នៃ​របាយការណ៍​រង្វាយ​តម្លៃ​​នោះ​​មួយ​សប្ដាហ៍ ​មុន​កិច្ចប្រ​ជុំ​ IEP។ នេះ​គឺ​ជា​ការ​សំខាន់​​ខ្លាំង​ណាស់​ ដើម្បី​ឲ្យ​អ្នក​អាច​អាន​របាយការណ៍​នោះ​បាន​ សរសេរ​សំណួរ​​ដែល​អ្នក​មាន​ចម្ងល់​អំពី​របាយការណ៍​នោះ​ និង​ធ្វើ​ផែន​ការ​សម្រាប់​កិច្ចប្រជុំ​ IEP។

4.   ​ធ្វើ​ផែន​ការ​សម្រាប់​កិច្ចប្រជុំ IEP ជា​មួយ​មិត្ត​ភក្តិ​ និង​អ្នក​តស៊ូ​មតិ​

ការ​ធ្វើ​ផែន​ការ​សម្រាប់​កិច្ចប្រជុំ​ IEP ជា​មួយ​មិត្ត​ភក្តិ​ និង​អ្នក​​តស៊ូ​មតិ អាច​ជួយ​អ្នក​​​​ត្រៀម​ខ្លួន​បាន​ល្អ​នៅ​ក្នុង​កិច្ចប្រជុំ IEP។

ក្រុម​ឪពុកម្ដាយ​ ដូច​ជា​មណ្ឌល​ធនធាន​គ្រួសារ​ និង​មណ្ឌល​ព័ត៌មាន​និង​បណ្ដុះ​បណ្ដា​ល​ឪពុក​ម្ដាយ​ អាច​មាន​អ្នក​តស៊ូ​មតិ​ដែល​អាច​ជួយ​អ្នក​ធ្វើ​ផែន​ការ​សម្រាប់​កិច្ចប្រជុំ IEP ឬ​ទៅ​ចូល​រួម​កិច្ចប្រជុំ IEP ជា​មួយ​អ្នក​បាន​។​ ឬ​អ្នកសហការ​​ជា​មួយ​គ្រួសារ​ដទៃ​ និង​ជួយ​គ្នា​ទៅ​វិញ​ទៅ​មក​។​ ប្រសិន​បើ​កូន​របស់​អ្នក ​គឺ​ជាអ្នកប្រើ​សេ​វា​មជ្ឈមណ្ឌលក្នុងតំបន់ នោះ​អ្នក​សម្រប​សម្រួល​សេវាមជ្ឈមណ្ឌល​ក្នុង​តំបន់​របស់​កូន​អ្នក​ គប្បី​ជួយ​អ្នក​ក្នុង​ការ​ធ្វើ​ផែន​ការ​កិច្ចប្រជុំ​ IEP នេះ។ 

​ជាមួយ​មិត្តភក្តិ​ ឬ​អ្នក​តស៊ូ​មតិ​​

  • ​អាន​របាយការណ៍​វាយ​តម្លៃ​ទាំង​អស់​
  • កំណត់​គោលដៅ​របស់​អ្នក​សម្រាប់​កិច្ចប្រជុំ​ IEP
  • ត្រួត​ពិនិត្យ​គោលដៅ IEP បច្ចុប្បន្ន​របស់​កូន​អ្នក​ និង​របាយការណ៍​វឌ្ឍនភាព​​ ទាំង​អស់​ដែល​ពាក់​ព័ន្ធ​នឹង​គោលដៅ IEP
  • កំណត់​ពី​ចំណុច​ត្រូវ​ការ​​ដែល​កូន​របស់​អ្នក​មាន​ រួម​ទាំង​បញ្ហា​ជា​ពិសេស​ដែល​កូន​របស់​អ្នក​មាន​ និង​ដែល​អ្នក​ចង់ឲ្យ​មណ្ឌលសិក្សាធិការ​យក​ចិត្ត​ទុក​ដាក់​ និង​
  • ​កំណត់​ពី​អ្វី​ដែល​កូន​របស់​អ្នក​អាច​សម្រេច​ទៅ​បាន​ ​ចាប់តាំង​ពីកិច្ចប្រជុំ​ IEP ចុងក្រោយ​ និង​អ្វី​ដែល​អ្នក​ចង់​ឲ្យ​ពួកគេ​រៀន​សូត្រ​។

ពិភាក្សា​អំពី​គោលដៅ IEP ណាមួយ​ដែល​​អ្នក​ចង់​ស្នើទៅកាន់​ក្រុមការងារ IEP ជា​មួយ​មិត្តភក្តិ​ ឬ​អ្នក​តស៊ូ​មតិ​។​

បន្ថែម​លើ​នេះ​ ត្រូវ​និយាយ​អំពី​ជម្រើស​​​​បរិយាបន្ន​ពេ​ញ​លេញ​ ឬ​ការ​រួម​បញ្ចូល​បន្ថែម​​។ ច្បាប់​ចែង​ថា​ ​ក្នុង​​​វិសាលភាព​អតិបរមា​សមស្រប​ ដូច​​បាន​សម្រេច​ដោយ​ក្រុមងារ​ IEP ​កុមារ​ដែល​មាន​ពិការភាព​ ត្រូវ​តែ​ទទួល​បាន​ការ​អប់រំ​នៅ​ក្នុង​សាលា​រៀន​ក្នុង​សង្កាត់​របស់​ពួកគេ​ និង​ចូល​រៀន​​ក្នុង​ថ្នាក់​រៀន​ធម្មតា​ (​ដែល​​មាន​ជំនួយ​និង​​សេវា​កម្ម​បន្ថែម​ តាម​តម្រូវ​ការ​)។​ ប្រសិន​បើ​អ្នក​កំពុង​ស្វែង​រក​បរិយាបន្នពេញ​លេញ​ ឬ​ការ​រួម​បញ្ចូ​ល​បន្ថែម​ ដូច​ជា​​ការ​ចូល​រួម​​នៅ​ក្នុង​ដំណើរ​ទស្សនកិច្ចសិក្សា​ ឬ​សកម្ម​ភាព​ក្រៅ​ម៉ោង​សិក្សា​ ដូច​ជា​ក្លឹបសិក្សា​ និង​កីឡាជា​ដើម​​ ត្រូវ​​កំណត់​​ថា​តើ​កូន​រប​ស់​អ្នក​ប្រាស្រ័យ​ទាក់ទង​ជាមួយ​កុមារ​ដែល​គ្មាន​ពិការភាព​​នៅ​សាលារៀន​ដោយ​របៀប​ណា​ និង​កំណត់​ពី​​អ្វី​ដែល​ធ្វើ​ឲ្យ​កូន​របស់​អ្នក​ទទួល​បាន​ជោគជ័យ​។​

5.   ធ្វើ​បញ្ជី​​អំពី​ចំណុច​ដែល​អ្នក​ចង់​ពិភាក្សា​​នៅ​ក្នុង​កិច្ចប្រជុំ​ IEP

​មិន​ថា​​អ្នក​បាន​ត្រៀម​ខ្លួន​ល្អ​ប៉ុនណា​​សម្រាប់​កិច្ចប្រជុំ IEP នោះ​ទេ​ អ្នក​អាច​មាន​​ការភ័យ​ខ្លាច​ ឬ​រំខាន​នៅ​ក្នុង​អំឡុង​ពេល​នៃ​​​កិច្ច​ប្រជុំ​​នោះ​។​ ​ការ​ត្រៀម​​បញ្ជី​ចំណុច​​​ដែល​អ្នក​ចង់​ពិភាក្សា​ជា​លាយលក្ខណ៍​អក្សរ​ និង​កត់​សំណួរ​ដែល​អ្នក​មាន​ នឹង​ជួយ​ឲ្យ​អ្នក​មិន​ភ្លេច​​នៅ​ក្នុង​អំឡុង​កិច្ចប្រជុំ​ IEP។ ​ក្នុង​អំឡុង​កិច្ច​ប្រជុំ IEP ​អ្នក​អាច​ត្រួត​ពិនិត្យ​មើល​ចំណុច​ពិភាក្សា​ និង​កត់​ត្រា​ចម្លើយ​​សម្រាប់​​​សំណួរ​របស់​អ្នក​។​

6.   ប្រគល់​ការជូនដំណឹង​ជា​លាយលក្ខណ៍​អក្សរ​​ដើម្បី​ថត​ខ្សែ​អាត់សំឡេង​​​​​កិច្ចប្រជុំ​ IEP

ប្រសិន​បើ​​អ្នក​​ចង់​ថត​ខ្សែ​អាត់​សំឡេង​នៃ​កិច្ច​ប្រជុំ IEP អ្នក​អាច​ប្រើ​ប្រាស់​​ម៉ាស៊ីន​ថត​សំឡេង​ ឬ​កម្មវិធី​ថត​សំឡេង​នៅ​លើ​ទូរសព្ទ​ដៃ​របស់​អ្នកបាន ​ដើម្បី​ថត​ខ្សែ​អាត់​សំឡេង​នៃ​កិច្ច​ប្រជុំ IEP។ ប៉ុន្តែ​ អ្នក​អាច​​​ថត​​ខ្សែ​អាត់​សំឡេង​កិច្ចប្រជុំ​នេះ​បាន​ តែ​ក្នុងករណី​ដែល​​​​​អ្នកបាន​ជូនដំណឹងជាលាយលក្ខណ៍​អក្សរ​​​ដល់​​​មណ្ឌល​សិក្សា​ធិការ​​ចំនួន 24 ម៉ោង​ ​ដោយ​បញ្ជាក់​ថា​អ្នក​ចង់​ថត​​ខ្សែ​អាត់​សំឡេង​កិច្ចប្រជុំ​នេះ​ប៉ុណ្ណោះ​។ ​ប្រសិន​បើ​អ្នក​ថត​​ខ្សែ​អាត់​សំឡេង​កិច្ចប្រជុំ IEP នោះ​មណ្ឌល​សិក្សា​​ធិការ​ក៏​ធ្វើ​ការ​ថត​ដែរ​។​

អំឡុង​ពេល​នៃ​​​កិច្ច​ប្រជុំ​ IEP

7.   នាំ​មិត្តភក្តិ​ ​អ្នក​តស៊ូ​មតិ​ និង​/ឬ​បុគ្គល​ដែល​ស្គាល់​កូន​របស់​អ្នក​ទៅ​ជាមួយ​

អ្នក​អាច​អញ្ជើញ​​នរណា​ម្នាក់​ដែលអ្នក​​​ចង់ឲ្យ​​​ចូល​រួម​ក្នុង​កិច្ចប្រជុំ IEP របស់​កូន​អ្ន​ក​​​បាន​។​ ការ​ដែល​មាន​នរណា​ម្នាក់​ទៅ​ជាមួយ ​គឺ​ជា​រឿង​​​ល្អ​។​ គិត​នាំ​យក​នរណា​ម្នា​ក់​ទៅ​ជាមួយ​ ដូច​ជា​ អ្នក​ផ្ដល់សេវា​ថែទាំ​ពេល​ថ្ងៃ​ ជីដូនជីតា​ គ្រូបង្រៀន​ ឬ​​បុគ្គល​ផ្សេ​​​ង​ទៀត​ដែល​ស្គាល់​កូន​របស់​អ្នក​ និង​របៀប​រៀន​សូត្រ​របស់​ពួកគេ​។ ប្រសិន​បើ​​អ្នក​មាន​គម្រោង​នាំ​យក​អ្នក​តស៊ូ​មតិ​ រួម​ទាំង​​អ្នក​សម្រប​សម្រួល​ក្នុង​​សេវា​មជ្ឈ​មណ្ឌ​ល​​ក្នុង​តំបន់​ អ្នក​អាច​ត្រូវ​ការ​កំណត់​កាលបរិច្ឆេទ​ជា​មុន​ជាមួយ​ពួកគេ​។​

8.   កុំខ្លាច​នឹង​សួរ​សំណួរ​ និង​ត្រូវ​ប្រាកដ​ថា​ អ្នក​យល់​ដឹង​ពី​  “ពាក្យ​ពិបាក​យល់”​ ណាមួយ​

កិច្ចប្រជុំ IEP ​អាច​មាន​លក្ខណៈ​ច្រើន​ខ្លាំង​ និង​​ពេល​ខ្លះ​អាច​មាន​ការ​ភាន់​ច្រឡំ​ បើ​ទោះ​បី​ជា​អ្នក​ធ្លាប់​បាន​ចូល​រួម​ក្នុង​កិច្ចប្រជុំ IEP កាល​ពី​​មុន​ក៏​ដោយ​។​ ​ការ​សួរ​សំណួរ​ គឺ​វិធី​ល្អ​បំផុត​​ដើម្បី​ឲ្យ​អ្នក​ទទួល​បាន​ព័ត៌មាន​ និង​បាន​ត្រៀម​ខ្លួន​​ដើម្បី​ឲ្យ​អ្នក​អាច​ធ្វើការ​តស៊ូមតិ​សម្រាប់​​កូន​របស់​អ្នក​​បាន​។​

​មណ្ឌលសិក្សា​ធិការ​ ក៏​ត្រូ​វ​តម្រូវ​ឲ្យ​ពន្យល់​ពី​លទ្ធផល​រក​ឃើញ​ទាំង​អស់​ និង​អនុសាស​ន៍​នានា​ជា​ភាសា​ដែល​ងាយ​ស្រួល​យល់​ផង​ដែរ​។​ បុគ្គលិក​​មណ្ឌល​សិក្សា​ធិការ​ ប្រើ​ពាក្យ​​ដូច​​គ្នា​ជា​រៀង​រាល់​ថ្ងៃ​ និង​អាច​ភ្លេច​គិត​ថា​ ​អ្នក​ដទៃ​ពុំ​យល់​ថា​ពួកគេ​ចង់​មាន​ន័យ​​ដូចម្ដេច​ឡើយ​។​ ប្រសិន​បើ​អ្នក​មិន​យល់​អ្វី​ដែល​បាន​និយា​យ​​នៅ​ក្នុង​កិច្ច​ប្រជុំ IEP សូម​កុំ​ខ្លាច​នឹង​សួរ​សំណួរ​ និង​សាកសួរ​ព័ត៌មាន​បន្ថែម​។​

9.   ពិភាក្សា​​អំពី​កម្រិត​បច្ចុប្បន្ន​នៃ​ការ​សិក្សា​របស់​កូន​អ្នក​

ក្រុមការងារ IEP ​នឹង​ពិភាក្សា​អំពី​សកម្មភាព​​​សិក្សា​បច្ចុប្បន្ន​របស់​កូន​​អ្នក​​នៅ​ក្នុង​ផ្នែក​ខុស​ៗ​គ្នា​។​ ​នេះក៏​នឹង​រួម​បញ្ចូល​នូវ​ការ​ត្រួត​ពិនិត្យ​រាល់​របាយការណ៍ ​និង​ការ​វាយតម្លៃ­­­­­­​ទាំង​អស់​ផង​ដែរ​។​ ​​គ្រូបង្រៀន​ និង​អ្នក​ផ្ដល់សេវា​របស់​កូន​អ្នក​ នឹង​ពិភាក្សា ​​លើ​ការ​អង្កេត​របស់​ពួកគេ​អំពី​សកម្មភាព​សិក្សា​របស់​កូន​អ្នក​ផង​ដែរ​។​ ​ត្រូវ​ប្រាកដ ​ថា​ អ្នក​បាន​ពិភាក្សា​អំពី​ការ​អង្កេត​របស់​អ្នក​លើ​សកម្មភាព​សិក្សា​របស់​កូន​អ្នក​ រួម​បញ្ចូល​ទាំង​ចំណុច​ខ្លាំង​របស់​កូន​អ្នក និង​/ឬ​ ​​ក្ដី​កង្វល់​​ណាមួយ​ដែល​អ្នក​មាន​អំពី​កូន​អ្នក​​​។​

10.  បង្កើត​គោលដៅ IEP ប្រចាំ​ឆ្នាំ​ និង​ត្រូវ​ប្រាកដ​ថា​​បាន​កំណត់​ការ​តាម​ដាន​វឌ្ឍនភាព​សមស្រប​នៃ​គោលដៅ​ IEP

ក្រុមការងារ​ IEP ​នឹង​ធ្វើ​ការ​ត្រួត​ពិនិត្យ​វឌ្ឍនភាព​កូន​របស់​អ្នក​​នៅ​ក្នុង​គោលដៅ​ប្រចាំ​ឆ្នាំ​ពីមុន​ បន្ទាប់​មក​បង្កើត​គោលដៅ​ប្រចាំ​ឆ្នាំ​ថ្មី​។​ ប្រសិន​បើកូន​របស់​អ្នក​មិន​បំពេញ​តាម​គោលដៅ​ប្រចាំ​ឆ្នាំ​នោះ​ទេ នោះ​ក្រុម​ការងារ IEP គប្បី​ធ្វើ​ការ​ត្រួត​ពិនិ​ត្យ​​គោលដៅ​នេះ​។​ ​ក្រុមការងារ​ IEP ​គប្បី​ធ្វើ​ការ​ផ្លាស់ប្ដូរ​គោលដៅ​នេះ​ ដើម្បី​ឲ្យ​វា​សមស្រប​ទៅ​នឹង​​កូន​របស់​អ្នក​ និង/ឬ​ផ្ដល់​សេវា​កម្ម​និង​ការ​គាំ​ទ្រ​បន្ថែម ​​ដើម្បី​ជួយ​កូន​របស់​អ្នក​ឲ្យ​មាន​ការ​រីកចម្រើន​ទៅ​តាម​គោលដៅ​នេះ​។​ ក្រុមការងារ​ IEP គប្បី​បង្កើត​​គោលដៅ​ដែល​​ធំ​ និង​លំបាក​ដោយ​ផ្អែក​លើ​​កាលៈទេសៈ​​រ​បស់​កូន​អ្នក​។​

នៅ​ពេល​ដែល​ក្រុម​ IEP បង្កើត​គោលដៅ​ប្រចាំ​ថ្មី​​​សម្រាប់​កូន​របស់​អ្នក​ ក្រុមការ​ងា​រ IEP ត្រូវ​ប្រាប់​ឲ្យ​អ្នក​បាន​ដឹង​​ថា​តើ​​ខ្លួន​ផ្ដល់​សេវាកម្ម​ដល់​អ្នក​ញឹកញាប់​ប៉ុនណា​ ជាមួយ​នឹង​របាយការណ៍​ស្ដី​ពី​​វឌ្ឍនភាព​របស់​កូន​អ្នក​ជាមួយ​នឹង​គោលដៅ​របស់​ពួកគេ។​ ប្រសិន​បើ​កូន​របស់​អ្នក​ត្រូវ​បាន​វាយ​តម្លៃ​ដោយ​ប្រើ​ស្ដង់ដា​លទ្ធផល​សិ​ក្សា​​ជំនួស​ ជា​ជាង​​ស្ដង់​ដា​ការ​អប់រំ​ចំណេះ​​ទូទៅ​របស់​មណ្ឌល​សិក្សា​ធិការ​ (ដូច​ជា​ ​ការ​​វាយ​តម្លៃ​របស់​រដ្ឋកាលីហ្វ័រញ៉ា​លើ​សកម្មភាព​សិក្សា​ និង​វឌ្ឍនភាព​ ឬ​ហៅ​កាត់ថា​ CAASPP) នោះ​ក្រុមការងារ​ IEP ត្រូ​វ​បំបែក​​គោលដៅ​ប្រចាំ​ឆ្នាំ​នោះ​ជា​កម្មវត្ថុ​រយៈ​ពេល​ខ្លី​ ​ដែល​ត្រូវ​ធ្វើ​ការ​ត្រួត​ពិនិត្យ​លើ​ចំណុច​ជាក់លាក់​មួយ​ចំនួន​ក្នុង​អំឡុង​​ឆ្នាំ​​នោះ ​ដើម្បី​ប្រាកដ​ថា​ កុមារ​នោះ​កំពុង​រីក​ចម្រើន​ទៅ​តាម​គោលដៅ​ប្រចាំ​ឆ្នាំ​។​ ​ត្រូវ​ប្រាកដ​ថា​ កម្មវត្ថុ​រយៈ​ពេល​ខ្លី​ មានលក្ខណៈ​ច្បាស់​លាស់​ ​និង​មាន​កាល​បរិច្ឆេទ​​ដែល​បានចុះ​ហត្ថលេខា​សម្រាប់​ឲ្យ​ពួកគេ​ត្រួត​ពិនិត្យ​វឌ្ឍនភាព​​នោះ​ដែរ​។​ ​ប្រសិន​​បើ​កូន​របស់​អ្នក​នឹង​ត្រូវ​បាន​គេ​វាយ​តម្លៃ​តាមតេស្ត​​​ស្ដង់ដា​ការ​អប់រំ​ចំណេះ​​ទូទៅ​ នោះ​ក្រុម IEP ​នឹង​មិន​រួម​បញ្ចូល​នូវ​កម្មវត្ថុ​រយៈ​ពេ​ល​ខ្លី​នោះ​ទេ​។​

11.  កំណត់​ពីឱកាស​​​បរិយាបន្ន​​ពេញ​លេញ​ និង​​ការ​រួម​បញ្ចូល​គ្នា​ និង​គាំ​ទ្រ​ដែល​ត្រូវ​​ការ​ចាំ​បាច់​សម្រាប់​ជោគ​ជ័យ​

មណ្ឌលសិក្សាធិការ ត្រូវតែផ្ដល់នូវជំនួយ និងសេវាកម្មបំពេញ​បន្ថែម​ដើម្បី​បំពេញ​​​នូវតម្រូវការ​របស់​សិស្សដែលមាន​ពិការភាព​នៅក្នុង​មជ្ឈដ្ឋាន​រួមបញ្ចូល​គ្នា។ ​នេះ​អាច​រួម​បញ្ចូល​នូវ​ជំនួយ​បណ្ដុះ​បណ្ដាល​ ប្រើ​ម៉ាស៊ីន​​ថត​សំឡេង​ ឬ​ផែន​ការ​អន្តរាគមន៍​ផ្នែក​អាកប្បកិរិយា​ ដើម្បី​ដោះ​ស្រាយ​បញ្ហា​អាកប្បកិរិយា​។​

12.  រៀប​រាប់​អំពី​ការ​ដាក់​កូន​របស់​អ្នក​​ទៅ​ក្នុង​កម្មវិធី​​​សិក្សា​ និងកំណត់​ពី​សេវា​ពាក់​ព័ន្ធ​ និង​ការ​គាំ​ទ្រ​​ជាក់​លាក់​ណាមួយ​​

នៅ​ពេល​ដែល​ក្រុម​ការងារ​ IEP បាន​បង្កើត​គោលដៅ​ប្រចាំ​ឆ្នាំ​សម្រាប់​​កូន​របស់​អ្ន​ក​ នោះ​ក្រុមការងារ IEP ​គប្បី​ជជែក​អំពី​សេវាកម្ម​ ការ​គាំ​ទ្រ​ និង​ការ​ដាក់​បញ្ចូល​ ដែ​ល​​នឹង​គាំ​ទ្រ​ដល់​វឌ្ឍនភាព​​​របស់​កូន​អ្នក​ទៅ​តាម​គោលដៅ​ប្រចាំ​ឆ្នាំ​។​ ​រាល់​សេវា​កម្ម​ដែល​ពាក់​ព័ន្ធ​ទាំង​អស់​ ដូច​ជា​ការ​ព្យាបាល​សម្ដី​ជា​ដើម គប្បី​កំណត់​ដោយ​រួម​បញ្ចូល​​ថា​តើ​ត្រូវ​​ការ​ពេល​ប៉ុន្មាន​នាទី និង​ថា​តើ​ញឹកញាប់​ប៉ុនណា​ (​ក្នុង​មួយ​ថ្ងៃ​ មួយ​សប្ដាហ៍ មួយ​ខែ​ មួយ​ឆ្នាំ) ​ដែល​កូន​របស់​អ្នក​នឹង​ទទួល​បាន​សេវាកម្ម​ទាំង​​អស់​នេះ​។​

​នៅ​ក្នុង​ IEP របស់​កូន​អ្នក​ ការ​ដាក់​បញ្ចូល​ក្នុង​កម្មវិធី​សិក្សា​ ត្រូវ​កំណត់​ឲ្យ​បាន​ច្បាស់​។​ ឧទាហរណ៍ “Natasha ​នឹង​ត្រូវ​​ដាក់​បញ្ចូល​ដោយ​ពេញលេញ​ទៅ​ក្នុង​ថ្នាក់​ទីពីរ​ដោយ​មាន​ជំនួយ​ពេញ​ម៉ោង​ ហើយ​អ្នក​ជំនាញ​បរិយាបន្ន​ ​នឹង​គាំ​ទ្រ​ដល់​ Natasha ​ចំនួន​ប្រាំ​ម៉ោង​ក្នុង​មួយ​សប្ដាហ៍​។”​ ​អ្នក​ពុំ​មាន​សិទ្ធិ​ឲ្យ​មណ្ឌល​សិក្សា​ធិកា​រ​​​​ផ្ដល់សេវាកម្ម​ពី​បុគ្គល​ជាក់លាក់​ណា​មួយ​​​នៅ​​ក្នុង​បន្ទប់​រៀន​ឡើយ​ ប៉ុន្តែ​ ជម្រើស​នៃ​​ការ​ដាក់​បញ្ចូល​ជាក់លាក់​ណាមួយ​ គប្បី​ធ្វើ​ការ​ពិភាក្សា​ជាមួយ​ក្រុមការងារ IEP​។

13.  ចុះ​ហត្ថលេខា​លើ​ IEP តែ​ក្នុង​ករណី​ដែល​អ្នក​ពេញ​ចិត្ត​តែ​ប៉ុណ្ណោះ​

​អ្នក​មិន​ចាំ​បាច់​ចុះ​ហត្ថលេខា​នៅ​ក្នុង​កិច្ចប្រជុំ IEP នោះ​ទេ​ - ​អ្នក​អាច​​យក​វា​មក​ផ្ទះ​ និង​គិត​​អំពី​វា​ និង​ពិភាក្សា​ជា​មួយ​អ្នក​ដទៃ​។​ អ្នក​អាច​យល់​ស្រប​លើ​ផ្នែក​ណាមួយ​​នៃផែនការ​ IEP ​ដើម្បី​ឲ្យ​សេវា​កម្ម​ទាំង​អស់​ដែល​អ្នក​ឯកភាព​តាម អាច​ចាប់​ផ្ដើម​បាន​។​ ​ប្រសិន​បើ​អ្នក​ចុះ​ហត្ថលេខា​លើ​ IEP ហើយ​មាន​កា​រផ្លាស់ប្ដូរ​គំនិត​​នៅ​ពេ​ល​​ក្រោយ​ អ្នក​អាច​សាកល្បង​ដក​ការ​យល់​ព្រម​របស់​អ្នក ​ដោយ​សរសេរ​លិខិត​ទៅ​កាន់​មន្ដ្រី​រដ្ឋបាល​ការ​អប់រំ​ពិសេស​បាន​។​ ក៏​ប៉ុន្តែ ការ​ដាក់​ការ​យល់​ព្រម​របស់​អ្នក​ នឹង​មិន​បង្អាក់​​ការ​អប់រំ​ និង​សេវាកម្ម​​​ដែល​កើត​មាន​ក្រោយ​ពេល​អ្នក​បាន​ផ្តល់​ការ​យល់​ព្រម​នោះ​ ប៉ុន្តែ​នឹង​​ត្រូវ​ផ្អាក​នៅ​ក្រោយ​ពេល​អ្នក​ដក​​ការ​យល់​ព្រម​របស់​​អ្នក​​។​ ប្រសិន​បើ​អ្នក​ និង​មណ្ឌលសិក្សាធិការ​ ពុំ​ឯកភាព​គ្នា​លើ​សំណើ IEP នោះ​ IEP ចុ​ង​​ក្រោយបង្អស់​ដែល​អ្នក​ឯកភាព​​​ ​នៅ​បន្ត​មាន​សុពលភាព​ដដែល​ ចំណែក​ឯវិវា​ទ​របស់​អ្នក ​​ត្រូវ​ធ្វើ​ការ​ដោះ​ស្រាយ​នៅ​ក្នុ​ង​កិច្ចប្រជុំ​នា​ពេល​ខាង​មុខ​ ​តាម​ការ​សម្រប​សម្រួល​ ឬ​សវនាការ​ស្រប​តាម​ច្បាប់​។​

ក្រោយ​​​កិច្ចប្រជុំ​​ IEP

14.  ប្រសិន​បើ​អាច​ ត្រូវ​ចូល​រួមពាក់ព័ន្ធ​នឹង​​​ថ្នាក់​រៀន​/​សាលារៀន​របស់​កូន​អ្នក​

ឪពុកម្ដាយ​មាន​ពេលវេលា​ និង​ចំនួន​ថវិកា​ខុស​ៗ​គ្នា​។​ ​អ្នក​អាច​ទាក់​ទង​គ្រូបង្រៀ​ន​ ឬ​សាលារៀន​របស់​កូន​អ្នក​ដើម្បី​សាកសួរ​ថា​តើ​អ្ន​កអាច​ជួយ​​​ដល់​ថ្នាក់​រៀន​ ឬ​សាលារៀន​របស់​កូន​អ្នក​ដោយ​របៀប​ណា​។​ ​អ្នក​អាច​ស្ម័គ្រ​ចិត្ត​នៅ​ក្នុង​បន្ទប់​រៀន​ក្នុង​អំឡុង​ថ្ងៃ​សិក្សា​ ស្ម័គ្រចិត្ត​​ចូល​រួម​ក្នុង​សកម្មភាព​សាលារៀន​ ឬ​ប្រសិន​បើ​អ្នក​ធ្វើ​ការ​ក្នុង​អំឡុង​ពេល​ថ្ងៃ​ អ្នក​អាច​រៀបចំ​​សម្ភារៈ​​នៅ​ក្នុង​ពេល​ល្ងាច​នៅ​ផ្ទះ​របស់​អ្នក​បាន។​ ការសកម្មនៅ​ក្នុង​បន្ទប់​រៀន/​សាលារៀន​របស់​កូន​អ្នក​ អាច​ជួយ​ឲ្យ​អ្នក​​មាន​​ភាព​ស៊ាំ​បាន​ច្រើន​ជាមួយ​នឹង​សាលារៀន​ និង​បុគ្គលិកសាលារៀន​ ​និង​ជួយ​ឲ្យ​កូន​អ្នក​មាន​អារម្មណ៍​ពិសេស​។​

15.  គាំ​ទ្រ​កូន​របស់​អ្នក​នៅ​ក្នុង​ការ​បង្កើត​មិត្តភាព​ជា​មួយ​មិត្តរួម​ថ្នាក់​

ជួយ​កូន​របស់​អ្នកឲ្យ​បង្កើត​មិត្តភាព​ជា​មួយ​មិត្តរួម​ថ្នាក់​ តាម​រយៈ​ការ​​សម្រប​​​សម្រួ​ល​​ថ្ងៃ​លេង​កម្សាន្ត​នៅ​ក្រៅ​សាលារៀន​។​ ​ការ​បង្កើត​មិត្តភាព​ជា​មួយ​មិត្តរួម​ថ្នាក់​ នឹង​ជួយ​កូន​របស់​អ្នក​​ឲ្យក្លាយ​ជា​ផ្នែក​មួយ​របស់​សហគមន៍​ពួកគេ​។​

16.  ​គ្រប់​គ្រង​តាម​ដាន​វឌ្ឍនភាព​របស់​កូន​អ្នក​

អ្នក​អាច​ចង់​បង្កើត​ប្រព័ន្ធ​ទំនាក់ទំនង​ជា​ប្រចាំ​មួយ​ជាមួយ​គ្រូ​បង្រៀន​​កូន​​របស់​អ្នក​ ដូច​ជា​កូន​សៀវភៅ​កត់ត្រា​​ដែល​ផ្ញើ​ទៅ​មក​ជាមួយ​សាលារៀន​។​ កូន​សៀវភៅ​កត់​ត្រា អាច​ជួយ​អ្នក​តាម​ដាន​ថា​តើ​កូន​របស់​អ្នក​ទទួល​សេវា​កម្ម​ និង​កា​រគាំ​ទ្រ​ដែរ​ឬ​ទេ​។​ ​អ្នកក៏​អាច​ចង់​បង្កើត​ប្រព័ន្ធ​ទំនាក់​ទំនង​មួយ​ជាមួយ​អ្ន​ក​ផ្ដល់សេវា​ពាក់ព័ន្ធ​របស់​កូន​អ្នក​ផង​ដែរ​ ដូច​ជា​គ្រូ​ពេទ្យ​ព្យាបាល​សម្ដី​ ដើម្បី​ធ្វើ​ការ​ត្រួត​​ពិនិត្យ​​លើ​វឌ្ឍនភា​ព​នៃ​កូន​របស់​អ្នក​។​

អ្នក​គប្បី​សរសេរ​ចូល​នូវ​កាលបរិច្ឆេទ​គោលដៅ​ដែល​បាន​កំណត់​សម្រាប់កូន​របស់​​អ្នក​ដើម្បី​រៀន​សូត្រ​ជំនាញ​ណាមួយ​ ដូច​ជា​កាលបរិច្ឆេទ​នៃ​​កម្មវត្ថុ​រយៈ​ពេល​ខ្លី​នៅ​ក្នុង​គោលដៅ​ IEP របស់​កូន​អ្នក​។​

17.  ជម្រើសប្រសិន​បើ​​អ្វី​ៗ​មិន​ដូច​ការ​គិត​

​ប្រសិន​បើ​អ្នក​ជឿ​ថា​មណ្ឌល​សិក្សា​​មិន​បាន​អនុវត្ត​តាម​ច្បាប់​ស្ដី​ពី​ការ​អប់រំ​ពិសេស​ ឬ​នីតិវិធី និង​/ឬ​មិន​បាន​ផ្ដល់​សេវា​​ដែល​តម្រូវ​ឲ្យ​ផ្ដល់​ជូន​នៅ​ក្នុង​ IEP ដែល​បាន​ចុះ​ហត្ថលេខា​ អ្នក​អាច​ដាក់​ពាក្យ​បណ្ដឹងការ​អនុវត្ត​តាម​ច្បាប់​ទៅ​កាន់​​នាយកដ្ឋាន​អប់រំ​រដ្ឋកាលីហ្វ័រញ៉ា (“CDE”)។ ពាក្យ​បណ្ដឹង​នេះ​ ​ត្រូវ​ធ្វើ​ការ​ស៊ើប​អង្កេត​ដោយ​មណ្ឌលសិក្សា​ធិការ​ ឬ​ CDE ហើយ​ត្រូវ​ធ្វើ​​​ការ​កំណត់​ជា​លាយលក្ខណ៍​អក្សរ​មួយ​​ថា​តើ​មណ្ឌល​​​បាន​  “​ប្រព្រឹត្តខុស​ពី​ការ​អនុវត្ត​តាម​ច្បាប់​”​ ដែរ​ឬ​អត់​។​ សូម​មើល​​សិ​ទ្ធិ​ និង​​ទំនួល​ខុស​ត្រូវ​ចំពោះ​ការ​អប់រំ​ពិសេស​ ជំពូក 6 សម្រាប់​សេចក្ដី​លម្អិត​។​

​ប្រសិន​បើ​អ្នក​ និង​មណ្ឌលសិក្សា​ធិការ​ ពុំ​ឯកភាព​គ្នា​លើ​​សិទ្ធិទទួល​បាន​របស់​កូន​អ្នក​ កា​រដាក់​បញ្ចូល​ក្នុង​កម្មវិធីសិក្សា​ តម្រូវ​ការ​កម្មវិធី ការ​រួម​បញ្ចូល​គ្នា​ ឬ​សេវាក​ម្ម​ដែល​ពាក់ព័ន្ធ​ណាមួយ​ អ្នក​​​អាចនឹង​​ស្នើសុំ​ដំណើរ​​ការ​សវនាការ​ត្រឹម​ត្រូវ​តាម​ច្បា​ប់​​បាន​។ ប្រសិន​បើ​អ្នកសម្រេច​​​ដាក់​ការ​ស្នើសុំ​ដំណើរការ​សវនាការ​ត្រឹម​ត្រូវ​តាម​ច្បាប់​ អ្នក​ត្រូវ​​ដាក់​សំណើ​សុំ​​ក្នុងរយៈពេលពីរឆ្នាំ​ គិត​ចាប់ពីថ្ងៃដែលអ្នកបានដឹង (ឬមូលហេតុដែលអ្នកបានដឹង) អំពី​អង្គហេតុនៃពាក្យ​បណ្តឹង​របស់អ្នក។ ​នៅ​ក្នុង​សវនាការ​ គូភាគី​ត្រូវ​បង្ហាញ​ភស្តុតាង​​ដល់​មន្ដ្រី​សវនាការ​ឯករាជ្យ​ ដែល​រ​ដ្ឋ​កាលីហ្វ័រ​ញ៉ា​បាន​ជួល​។ មន្រ្តី​សវនាការ​ នឹង​ធ្វើ​ការ​សម្រេច​​លើ​អង្គហេតុ​ និង​អង្គច្បាប់​ រួច​ចេញ​សេចក្ដី​​សម្រេច​ជា​លាយលក្ខណ៍​អក្សរ​។​ សូម​មើល​​សិទ្ធិ​ និង​​ទំនួល​ខុស​ត្រូវ​ចំពោះ​ការ​អប់រំ​ពិសេស​ ជំពូក 6 សម្រាប់​សេចក្ដី​លម្អិត​។​

 

 

ការបដិសេធ៖  ការបោះពុម្ភផ្សាយនេះគឺជាព័ត៌មានផ្លូវច្បាប់តែប៉ុណ្ណោះ ហើយមិនមែនជាការណែនាំផ្លូវច្បាប់អំពីស្ថានភាពបុគ្គលរបស់អ្នកទេ។ វា​គឺ​ជា​បច្ចុប្បន្ន​កាល​បរិច្ឆេទ​បាន​ប្រកាស។ យើងព្យាយាមធ្វើបច្ចុប្បន្នភាពសម្ភារៈរបស់យើងឱ្យបានទៀងទាត់។ ទោះជាយ៉ាងណាក៏ដោយច្បាប់កំពុងផ្លាស់ប្តូរជាទៀងទាត់។ ប្រសិនបើអ្នកចង់ធ្វើឱ្យប្រាកដថាច្បាប់មិនបានផ្លាស់ប្តូរ សូមទាក់ទង DRC ឬការិយាល័យច្បាប់ផ្សេងទៀត។

  • 1. កម្មវិធី​អប់រំ​សម្រាប់​បុគ្គល។ ​ត្រូវ​បាន​បង្កើត​ឡើង​នៅ​​ក្នុង​កិច្ចប្រជុំ​មួយដែល​ចូល​រួម​យ៉ាងហោចណាស់​​ពី​​ឪពុក​​ម្ដាយ​ គ្រូបង្រៀន​​របស់​កុមារ​ និង​មន្រ្តី​រដ្ឋបាល​របស់​មណ្ឌល​សិក្សា​ធិការ​​។
  • 2. មណ្ឌលសិក្សាធិការ តម្រូវ​ឲ្យ​ផ្តល់ជូនអ្នកនូវ​ការជូនដំណឹងជា​លាយលក្ខណ៍ អក្សរ​ជា​មុន​ ​“ក្នុង​ពេល​​វេលាមួយសមស្រប​មុនពេល​”  មណ្ឌលបដិសេធ​ការផ្តួច ផ្តើម​ ឬ​​ការ​ផ្លាស់​ប្តូរ​ការកំណត់អត្តសញ្ញាណ ការវាយតម្លៃ ការ​ដាក់​បញ្ចូល​ក្នុង​ការ​សិក្សា ឬ​ការ​ផ្តល់​ការអប់រំសាធារណៈ​សមស្រប​ដោយឥតគិតថ្លៃ​ (FAPE)។​ ពាក្យថា ​“ពេលវេលាសមស្រប” ត្រូវបានកំណត់និយមន័យ​នៅក្នុងច្បាប់​លក្ខន្តិក។ ការ​ជូនដំណឹង​ ត្រូវមានបញ្ជាក់​អំពីសេវាកម្ម​ ឬការដាក់បញ្ចូល​ទៅក្នុង​ការ​​សិក្សា​​ដែលបានបដិសេធដោយមណ្ឌលសិក្សាធិការ​ ការបកស្រាយ​ពន្យល់​សម្រាប់​​ការបដិសេធ និង​ការពិពណ៌នា​អំពីនីតិវិធីនៃ​​​ការវាយតម្លៃ​នីមួយៗ​ រង្វាយតម្លៃ កំណត់ត្រា រ​បាយការណ៍​ដែល​បានប្រើប្រាស់​ដោយ​មណ្ឌល​សិក្សា​ធិការ​​ដើម្បី​ធ្វើការសម្រេចចិត្ត​នេះ​។ ការជូនដំណឹង​នេះ​ ត្រូវតែ​ផ្តល់ដំណឹង​ដល់អ្នក​ផងដែរ​អំពី​សិទ្ធិ​របស់អ្នក​ក្នុង​​ការ​តវ៉ាជំទាស់ទៅនឹង​ការសម្រេចចិត្ត​នោះ​​។ 34 C.F.R. Sec. 300.503; Cal. Ed. Code Sec. 56500.4.

 

 

Click links below for a downloadable version.