Paratransit yog ib qho kev pab cuam tsheb thauj mus los rau cov neeg uas tsis tuaj yeem siv cov kev pab cuam tsheb thauj mus los rau pej xeem vim lawv muaj kev xiam oob qhab.Txoj Cai Tswj Hwm Cov Neeg Meskas Uas Muaj Kev Xiam Oob Qhab (ADA) xav kom cov tsoom fwv hauv cheeb tsam uas muab kev pab cuam tsheb thauj mus los uas tsis hloov pauv (xws li lub tsheb npav hauv nroog) kuj tseem muab cov kev pab cuam tsheb thauj mus los kom cov neeg uas muaj kev xiam oob qhab ntawd muaj kev nkag mus siv tau rau kev thauj mus los yam muaj vaj huam sib luag.Daim ntawv qhia qhov tseeb no yog ib qho kev qhia yooj yim txog kev thauj mus los rau cov neeg muaj kev xiam oob qhab.Yog xav paub ntau ntxiv txog cov kev pab cuam tsheb thauj mus los rau neeg xiam oob qhab, mus saib Cov Lus Qhia Txog Lub Ncauj Lus nrog ADA Txoj Cai Fab Kev Thauj Mus Los Ntawm Cov Nyiaj Pab Rau Kev Kawm Txog Cov Cai thiab Kev Tiv Thaiv Cov Neeg Xiam Oob Qhab Txoj Cai.

Lub chaw hauj lwm tseb thauj neeg mus los yuav tsum muab kev pab cuam kev thauj mus los rau cov neeg xiam oob qhab hauv 3/4 mais ntawm txoj kev tsheb npav los sis chaw nres tsheb ciav hlau.Qhov kev pab cuam no yuav tsum muaj rau tib hnub thiab tib lub sij hawm ib yam li cov kev pab cuam tsheb thauj mus los li ib txwm muaj.Tej zaum koj yuav raug them tus nqi ntxiv rau cov kev pab cuam thauj mus los rau neeg xiam oob qhab, tab sis tus nqi no yuav tsum tsis txhob ntau tshaj ob npaug ntawm tus nqi li ib txwm.

Kev Tsim Nyog Tau Txais Cov Kev Pab Cuam Thauj Mus Los Rau Neeg Xiam Oob Qhab

Koj tsim nyog tau txais kev pab cuam tsheb thauj mus los rau neeg xiam oob qhab yog tias koj siv tsis tau cov tsheb thauj mus los rau pej xeem vim koj qhov kev xiam oob qhab.Txhawm rau txiav txim siab seb koj puas siv tau tsheb thauj mus los rau pej xeem, cov chaw hauj lwm tsheb thauj mus los yuav xav txog ntau yam laj thawj.Cov laj thawj no suav nrog lub peev xwm taug kev los sis rooj zaum muaj log mus rau qhov chaw nres tsheb thiab rov los, lub peev xwm nkag thiab tawm ntawm qhov chaw nres tsheb, lub peev xwm pom lub teeb liab kom nres, thiab lub peev xwm daws cov xwm txheej uas tsis tau xav txog.

Kev Thov Qhov Kev Pab Cuam

Tiv tauj rau koj lub chaw hauj lwm tsheb thauj mus los hauv cheeb tsam kom thov kev nkag mus cuag rau koj qhov kev pab cuam thauj mus los rau neeg xiam oob qhab hauv cheeb tsam.Txhua lub chaw hauj lwm muaj lub luag hauj lwm los tsim nws tus kheej cov txheej txheem tshuaj xyuas, yog li ntawd cov kev cai tseev kom muaj yuav txawv ntawm cov chaw hauj lwm tsheb thauj mus los.Feem ntau cov chaw hauj lwm tsheb thauj mus los yuav muaj lub vev xaib nrog daim ntawv thov uas koj tuaj yeem ua tiav thiab xa tau hauv oos lais.Koj tuaj yeem xa ib tsab ntawv mus rau lub chaw hauj lwm ntawd los thov kev pab cuam.Tsab ntawv piv txwv muaj nyob rau thaum kawg ntawm daim ntawv qhia no.Lub chaw hauj lwm tsheb thauj mus los yuav tsum tsis txhob them nqi rau koj rau kev thov cov kev pab cuam thauj mus los rau tus neeg xiam oob qhab.

Tej zaum lub chaw hauj lwm tsheb thauj mus los tuaj yeem thov kom koj txhawb nqa koj qhov kev thov rau cov kev pab cuam kev thauj mus los rau neeg xiam oob qhab nrog tsab ntawv los ntawm koj tus kws kho mob los sis lwm kho mob tshaj lij.Tsis tas li ntawd, lub chaw hauj lwm kuj tseem yuav hais kom koj tuaj koom qhov kev xam phaj los sis kev ntsuam xyuas tim ntsej tim muag kom paub seb koj puas tsim nyog tau txais.

Lub chaw hauj lwm tsheb thauj mus los yuav tsum teb koj daim ntawv thov tsis pub dhau 21 hnub.Yog tias lub chaw hauj lwm tsis teb raws sij hawm, nws yuav tsum pib cov kev pab cuam kev thauj mus los rau cov neeg xiam oob qhab.Tej zaum cov kev pab cuam yuav raug tso tseg yog tias koj daim ntawv thov raug tsis lees paub thaum kawg.Lub chaw hauj lwm tsheb thauj mus los rau neeg xiam oob qhab yuav tsum muab cov laj thawj tshwj xeeb rau koj rau qhov tsis kam lees koj daim ntawv thov.

Yog tias koj daim ntawv thov tau txais kev pom zoo, lub chaw hauj lwm tsheb thauj mus los yuav tsum muab tsab ntawv ceeb toom rau koj uas muaj tsawg kawg yog cov hauv qab no:

• koj lub npe;
• lub npe ntawm tus neeg muab kev pab cuam tsheb thauj mus los;
• tus nab npawb xov tooj rau tus neeg lis hauj lwm kev thauj mus los rau neeg xiam oob qhab;
• hnub tas sij hawm rau kev tsim nyog tau txais (feem ntau yog ib txog peb xyoos, thiab koj tuaj yeem thov kom txuas koj cov kev pab cuam ntxiv mus tom qab ntawd); thiab
• tej yam mob los sis cov kev txwv rau koj txoj cai kev tsim nyog.Piv txwv li, tej zaum koj yuav tsim nyog tau txais rau kev thauj mus los rau neeg xiam oob qhab rau ib txoj kev tab sis tsis yog rau lwm txoj kev.

Cov Kev Pab Cuam Teem Sij Hawm

Thaum tau txais kev pom zoo lawm, koj tuaj yeem teem sij hawm mus ncig los ntawm kev ua raws li koj lub chaw hauj lwm tsheb thauj mus los qhov txheej txheem teem sij hawm.Cov chaw hauj lwm tsheb thauj mus los yuav tsum muab kev pab cuam rau hnub tom qab, thiab yuav tsum pom zoo tuaj tos koj hauv ib teev ntawm lub sij hawm uas koj tau thov.

Cov chaw hauj lwm tsheb thauj mus los yuav tsum tso cai rau koj caij tsheb nrog tus neeg pab.Tus neeg pab yog ib tus neeg uas pab koj ua hauj lwm thaum koj caij tsheb los sis thaum koj mus txog.Cov chaw kev thauj mus los yuav tsis them tus nqi rau koj tus neeg pab.Yog tias koj xav tau tus neeg pab los sis ntseeg tias qee zaum koj xav tau tus neeg pab, ces koj yuav tsum muab cov ntaub ntawv ntawd tso rau hauv koj daim ntawv thov.

Cov chaw muab kev thauj mus los yuav tsum tso cai rau koj muaj tsawg kawg ib tus neeg nrog koj mus.Ib tug neeg uas nrog koj mus yog ib tug neeg uas nrog koj caij tsheb kom koj tau nrog koj mus ua phooj ywg los sis ua koj tus khub.Koj tus neeg pab tsis suav tias yog tus khub taug kev.Lub chaw hauj lwm tsheb thauj mus los muaj cai them tus nqi rau koj tus neeg nrog koj mus, tab sis tus nqi ntawd yuav tsum tsis pub ntau tshaj ob npaug ntawm tus nqi pab cuam li ib txwm muaj.

Kev Tsis Kam Lees Txais thiab Kev Poob Rau Qhov Kev Pab Cuam

Koj tuaj yeem thov kom rov txiav txim dua rau qhov kev tsis kam lees txais kev pab cuam thauj mus los rau neeg xiam oob qhab.Yuav tsum txais cov lus thov rov txiav txim dua txog li 60 hnub tom qab koj tsis kam lees txais.Qee lub chaw hauj lwm yuav muab sij hawm ntxiv rau koj los thov rov txiav txim dua.Koj tuaj yeem ua daim ntawv thov rov txiav txim dua ntawm tus kheej los sis sau ntawv.

Lub chaw hauj lwm tsheb thauj mus los muaj sij hawm 30 hnub los teb koj qhov kev thov rov txiav txim dua.Cov lus teb yuav tsum yog ua ntawv sau.Yog tias lub chaw hauj lwm tsis teb raws sij hawm, nws yuav tsum muab kev pab cuam tshwj tsis yog thiab kom txog thaum nws tsis lees txais qhov kev thov rov txiav txim dua.

Lub chaw hauj lwm tsheb thauj mus los tuaj yeem nres los sis ncua koj cov kev pab cuam yog tias koj koom nrog kev ua phem, kev cuam tshuam loj heev, los sis kev coj cwj pwm tsis raws cai, los sis yog tias koj muaj tus cwj pwm tsis mus caij tsheb raws sij hawm teem tseg.Cov xwm txheej los sis cov xwm txheej ib zaug xwb tsis yog ib qho qauv.Tsuas yog kev txhob txwm ua, kev rov ua dua, los sis kev ua yam tsis tu ncua xwb thiaj li yuav raug suav hais tias yog tus qauv ntawm kev tsis mus caij tsheb.

Lub chaw hauj lwm tsheb thauj mus los yuav tsum ceeb toom rau koj ua ntawv sau yog tias nws npaj yuav tsum nres los sis ncua cov kev pab cuam.Daim ntawv ceeb toom yuav tsum qhia txog cov kev pab cuam tshwj xeeb uas lawv tab tom ncua thiab muab cov laj thawj rau qhov kev ncua.Tsis tas li ntawd, daim ntawv ceeb toom yuav tsum sau hnub tim uas kev pab cuam yuav rov pib dua.Lub chaw hauj lwm tsheb thauj mus los yuav tsum muab lub cib fim rau koj thov rov txiav txim dua rau qhov kev ncua.Cov kev pab cuam yuav tsum muaj txuas ntxiv mus thaum lub sij hawm thov rov txiav txim dua.

Cov chaw hauj lwm tsheb thauj mus los yuav xav tau kev rov lees paub dua rau ntawm kev tsim nyog tau txais kev thauj mus los rau neeg xiam oob qhab.Tej zaum koj yuav plam cov kev pab cuam thauj mus los rau neeg xiam oob qhab yog tias lub chaw hauj lwm txiav txim siab tias koj yuav tsis tsim nyog tau txais ntxiv lawm.

Cov Kev Pab Tsim Nyog

Cov chaw hauj lwm tsheb thauj mus los rau cov neeg xiam oob qhab yuav tsum ua qhov kev hloov kho tsim nyog (tseem hu ua kev pab cuam tsim nyog) thaum tsim nyog kom tsis txhob muaj kev ntxub ntxaug raws li kev xiam oob qhab.Qhov kev pab cuam tsim nyog yog kev hloov pauv los sis kev zam rau txoj cai, kev coj ua, los sis txoj cai uas tsim nyog rau tus neeg xiam oob qhab kom muaj kev nkag cuag tau yam muaj vaj huam sib luag.Nov yog qee qhov piv txwv ntawm kev pab cuam tsim nyog hauv kev thauj mus los rau neeg xiam oob qhab:

• Yog tias koj qhov chaw tos ib txwm tsis tuaj yeem mus txog vim muaj kev tsim kho, yuav muaj neeg tuaj tos koj ntawm lwm qhov chaw.
• Thov kev pab kom ua tiav daim ntawv thov kev thauj rau neeg xiam oob qhab yog tias koj tsis tuaj yeem sau ntawv los sis siv khoos phis tawj.

Lub chaw hauj lwm tsheb thauj mus los rau neeg xiam oob qhab yuav tsum muab kev pab cuam tsim nyog tshwj tsis yog tias nws yuav yog kev hloov pauv tseem ceeb ntawm cov kev pab cuam.Ib qho piv txwv ntawm kev hloov pauv tseem ceeb yuav yog thov qhov kev thauj mus los rau neeg xiam oob qhab tsav koj mus rau qhov chaw sab nraud ntawm thaj chaw muab kev pab cuam.

Kev daws cov teeb meem nrog cov chaw hauj lwm tsheb thauj mus los rau cov neeg xiam oob qhab

Yog tias koj muaj teeb meem nrog lub chaw hauj lwm tsheb thauj mus los rau cov neeg xiam oob qhab, koj tuaj yeem xa daim ntawv tsis txaus siab los sis hais kev tsis txaus siab.Yog tias lub chaw hauj lwm tsheb thauj mus los rau neeg xiam oob qhab ntxub ntxaug koj, koj muaj cai xa daim ntawv tsis txaus siab rau lub chaw hauj lwm hauv tsoom fwv los sis xa ib daim ntawv foob.

Kev Tsis Txaus Siab Txog Kev Pab Cuam Rau Tus Neeg Caij Tsheb

Kev tsis txaus siab txog qhov kev pab cuam rau tus neeg caij tsheb yog ib txoj hauv kev tsis raws cai los qhia txog kev tsis txaus siab feem dav nrog kev pab cuam los sis tus cwj pwm uas tej zaum yuav tsis cuam tshuam ncaj qha rau kev ntxub ntxaug los sis ua txhaum rau ADA.Piv txwv li, yog koj tau tias tsis muaj kev nyab xeeb thaum caij tsheb vim tus tsav tsheb tsav lub teeb liab los sis tsav tsheb ceev tshaj qhov txwv, koj tuaj yeem xa daim ntawv tsis txaus siab txog kev pab cuam rau tus neeg caij tseb.Muaj qee lub cheeb tsam nroog teev ib tsab email tshwj xeeb rau kev pab cuam rau cov neeg caij tsheb rau ntawm lawv lub vev xaib.Thov nco ntsoov tias koj yuav tsis tau txais lus teb los sis kev daws teeb meem rau cov lus tsis txaus siab txog kev pab cuam rau cov neeg caij tsheb.

Kev Hais Kev Tsis Txaus Siab

Raws li ADA, txhua lub chaw hauj lwm pab cuam rau pej xeem uas ntiav ntau dua 50 tus neeg yuav tsum ua qhov txheej txheem kev tsis txaus siab thiab xaiv ib tus neeg saib xyuas ADA los tshawb nrhiav thiab daws cov kev tsis txaus siab.Cov chaw hauj lwm pab cuam rau pej xeem uas tau txais nyiaj txiag los ntawm tsoom fwv kuj raug suav nrog los ntawm Tshooj 504 ntawm Txoj Cai Kev Kho Kom Zoo Rov Los xyoo 1973 thiab yuav tsum muaj Tus Neeg Lis Hauj Lwm Saib Xyuas 504.

Yog tias koj daim ntawv thov kev pab cuam tsim nyog raug tsis quav ntsej los sis tsis kam lees yam yuam kev, los sis koj tau ntsib lwm hom kev ntxub ntxaug rau kev xiam oob qhab, koj muaj cai foob ib daim ntawv hais kev tsis txaus siab.Lub chaw hauj lwm thauj mus los rau neeg xiam oob qhab yuav tsum muaj txoj cai ua ntawv tsis txaus siab uas piav qhia txog txoj hauj kev xa daim ntawv tsis txaus siab, xa mus rau leej twg, thiab lub sij hawm kawg rau kev xa daim ntawv tsis txaus siab.Qee lub cheeb tsam nroog muaj daim ntawv nyob rau hauv lawv lub vev xaib uas koj siv tau los ua ntaub ntawv tsis txaus siab tau.Yog tias koj lub cheeb tsam nroog tsis muaj daim foos, koj tuaj yeem siv daim qauv nyob qhov kawg ntawm daim ntawv qhia no.Txoj cai ntawm lub cheeb tsam nroog yuav tsum qhia rau koj tias yuav tsum xa koj daim ntawv tsis txaus siab mus rau leej twg.Yog tias nws tsis ua li ntawd, koj tuaj yeem xa koj daim ntawv tsis txaus siab mus rau ADA Tus Kws Lis Hauj Lwm Saib Xyuas.Yog tias lub chaw hauj lwm ntiav tsawg dua 50 tus neeg thiab tsis muaj Tus Kws Lis Hauj Lwm Saib Xyuas ADA, koj tuaj yeem xa daim ntawv tsis txaus siab mus rau tus thawj coj los sis tus thawj saib xyuas ntawm lub chaw hauj lwm pab cuam rau pej xeem.

Cov lus qhia rau kev ua daim ntawv tsis txaus siab:

Yuav tsum sau koj lub npe, koj cov ntaub ntawv tiv tauj, hnub tim ntawm qhov xwm txheej, piav qhia txog qhov tau tshwm sim, thiab koj xav kom cov tsheb thauj mus los rau neeg xiam oob qhab ua dab tsi los kho qhov teeb meem.

Ntau lub cheeb tsam nroog thov kom muaj cov ntaub ntawv qhia ntxiv xws li lub sij hawm thiab qhov chaw ntawm qhov xwm txheej thiab lub npe ntawm tus neeg ua hauj lwm uas koom nrog, yog tias muaj.Ob peb lub cheeb tsam nroog thov cov ntaub ntawv xws li daim npav ID tus neeg ua hauj lwm, daim npav ID tsheb los sis tus lej txoj kev, los sis qhov chaw nres tsheb uas lub tsheb npav tab tom mus rau thaum qhov xwm txheej tshwm sim.

Yog tias koj tsis muaj txhua yam ntaub ntawv uas lub cheeb tsam nroog thov, koj tseem yuav tsum xa koj daim ntawv tsis txaus siab - tsuas yog sim piav qhia txhua yam kom meej li meej tau nrog cov ntaub ntawv uas muaj rau koj xwb.Koj yuav tsum sau cov ntaub ntawv los ntawm qhov xwm txheej sai li sai tau kom koj muaj cov ntaub ntawv thaum koj npaj txhij los ua ntawv tsis txaus siab.

Cov Lus Tsis Txaus Siab Txog Kev Tswj Hwm

Cov Lus Tsis Txaus Siab ntawm CRD:

Lub Chaw Hauj Lwm Saib Xyuas Pej Xeem Txoj Cai (CRD) yog ib lub chaw hauj lwm hauv xeev California uas ua raws li cov cai lij choj rau pej xeem ntawm lub xeev.Tsis tas li ntawd, txhua qhov kev ua txhaum cai ADA kuj yog kev ua txhaum rau Unruh Txoj Cai, uas txwv tsis pub muaj kev ntxub ntxaug los ntawm cov chaw ua lag luam.Tsis tas li ntawd, qhov kev thauj mus los rau neeg xiam oob qhab kuj tseem nyob rau qhov lwm cov kev cai lij choj tiv thaiv kev ntxub ntxaug xws li Txoj Cai Tswj Hwm Cov Neeg Muaj Kev Xiam Oob Qhab thiab Txoj Cai ntawm Tsoom Fwv 11135.Yog koj ntseeg tias ib lub chaw hauj lwm tsheb thauj mus los tau ua kev ntxub ntxaug rau koj, koj tuaj yeem xa daim ntawv tsis txaus siab rau CRD.Cov lus tsis txaus siab rau CRD yuav tsum xa tuaj tsis pub dhau ib xyoos txij li thaum muaj kev ntxub ntxaug tshwm sim.

Nyem rau qhov no kom paub ntau ntxiv txog txoj hau kev xa daim ntawv tsis txaus siab CRD.

Los sis, koj tuaj yeem hu rau CRD Lub Chaw Tiv Tauj ntawm (800) 884-1684 los sis (800) 700-2320 (TTY).Tsis tas li ntawd, koj tuaj yeem mus ntsib chaw ua hauj lwm CRD hauv cheeb tsam ntawm tus kheej.Nyem rau qhov no rau txhua qhov kev hloov pauv ntawm CRD cov ntaub ntawv tiv tauj.

Cov Lus Tsis Txaus Siab Txog FTA:

Lub Chaw Hauj Lwm Tshwj Hwm Kev Thauj Mus Los Hauv Teb Chaws Meskas (FTA) Lib Chaw Hauj Lwm Saib Xyuas Pej Xeem Txoj Cai yog lub chaw hauj lwm tsoom fwv uas muaj lub luag hauj lwm los txhawb nqa txoj kev cai lij choj txog pej xeem txoj cai hauv kev thauj mus los rau pej xeem.Yog koj ntseeg tias koj lub chaw hauj lwm tsheb thauj mus los tau ua txhaum rau koj cov cai, koj tuaj yeem xa daim ntawv tsis txaus siab rau FTA.FTA yuav tshawb xyuas qhov kev tsis txaus siab kom pom tias seb lub chaw hauj lwm tsheb thauj mus los puas tau ua txhaum cai.Yog tias FTA txiav txim siab tias lub chaw hauj lwm tsheb thauj mus los tau ua txhaum cai, nws yuav qhia rau lub chaw hauj lwm tsheb thauj mus los txog kev ua txhaum cai thiab teem sij hawm kawg rau lub chaw hauj lwm los kho qhov teeb meem.

Lub sij hawm kawg rau kev xa daim ntawv tsis txaus siab mus rau FTA yog 180 hnub txij li hnub uas muaj kev ntxub ntxaug tshwm sim.FTA xav kom cov neeg sib txuas lus ncaj qha nrog lub chaw hauj lwm tsheb thauj mus los rau neeg xiam oob qhab txog qhov teeb meem ua ntej xa daim ntawv tsis txaus siab.

FTA Daim Ntawv Thov Kev Tsis Txaus Siab:

Nyem rau qhov no rau FTA Daim Foos Tsis Txaus Siab Rau Pej Xeem Txoj Cai.

Koj tuaj yeem xa email daim ntawv uas ua tiav lawm mus rau FTACivilRightsCommunications@dot.gov los sis xa ntawv mus rau:

Federal Transit Administration
Office of Civil Rights
Txog Rau: Pab Pawg Saib Xyuas Kev Tsis Txaus Siab
East Building, 5th Floor – TCR
1200 New Jersey Avenue, SE
Washington, DC 20590

FTA Tus Xov Tooj Xwm Ceev Txog Pej Xeem Txoj Cai: 1-888-446-4511

Kev Foob

Kev ua txhaum cai lij choj uas tau sib tham saum toj no kuj tseem yuav raug siv los ntawm kev foob ntiag tug.Thov nco ntsoov tias cov cai lij choj txwv tsis pub lub sij hawm rau kev foob thiab koj yuav sawb rau cov lus thov yog tias koj tsis ua raws li cov cai lij choj.Cov sij hawm kawg no tuaj yeem luv li ob xyoos txij li hnub uas muaj kev ntxub ntxaug.Yog tias koj xav foob, koj yuav tsum sab laj nrog kws lij choj kom sai li sai tau.

Yog tias koj tab tom nrhiav kev them nyiaj tsawg dua $12,500, lwm txoj kev xaiv yog foob rooj plaub kev ntxub ntxaug hauv Tsev Hais Plaub Me.Cov cai lij choj ntawm kev txwv uas tau sib tham saum toj no yuav siv tau.Koj siv tsis tau kws lij choj yog tias koj mus thov rau lub tsev hais plaub me.Nyem rau qhov no rau California Lub Tsev Hais Plaub Phau Ntawv Qhia Txog Kev Pab Tus Kheej rau Cov Kev Thov Me hauv California.

Cov Ntaub Ntawv Pov Thawj thiab Cov Ntaub Ntawv Ntxiv

28 C.F.R. § 35.107

28 C.F.R. § 35.130

Cov Kev Hloov Kho Tsim Nyog Rau Txoj Cai, Kev Coj Ua thiab Cov Txheej Txheem Hauv Kev Thauj Mus Los Rau Pej Xeem, ADA Lub Chaw Koom Tes Hauv Teb Chaws (2017).

Lub Luag Hauj Lwm ntawm ADA Tus Neeg Lis Hauj Lwm Saib Xyuas, ADA Lub Chaw Koom Tes Hauv Teb Chaws  (2023).

Tsab Ntawv Piv Txwv rau Kev Thov Cov Kev Pab Cuam Kev Thauj Mus Los Rau Cov Neeg Xiam Oob Qhab

[Hnub Tim]

Nyob Zoo [Lub Koom Haum Kev Thauj Mus Los]:

Kuv tab tom sau ntawv thov cov kev pab cuam kev thauj mus los rau cov neeg xiam oob qhab vim kuv [qhov kev xiam oob qhab/cov kev tsis taus]/ kuv tsis muaj peev xwm siv tau txoj kev ruaj khov vim [piav qhia txog cov teeb meem rau kev siv kev thauj mus los rau pej xeem piv txwv li chaw nres tsheb uas tsis tuaj yeem nkag tau].

Kuv [tus kws kho mob / kws kho mob fab puas siab puas ntsws / kws kho mob hlwb / kws kho mob / tus neeg ua hauj lwm pab cuam zej tsoom / tus kws kho rau fab kev ua hauj lwm / lwm tus neeg (piav qhia)] tau pom tias kev pab cuam thauj mus los tsim nyog vim kuv qhov kev tsis taus.Thov saib tsab ntawv uas muab txuas nrog los ntawm [tus kws kho mob los sis tus kws tshaj lij lub npe].

Kuv xav siv cov kev pab cuam kev thauj mus los rau cov kev mus ncig ua si hauv qab no tas li: [Sau cov hnub/lub sij hawm caij tsheb, qhov chaw tos thiab qhov chaw xa rov qab].

Kuv yuav xav tau kev pab los ntawm ib tus neeg pab thaum (qee qho/txhua qho) kev mus ncig los pab kuv (thaum lub sij hawm caij tsheb/ntawm kuv qhov chaw yuav mus).(Piav qhia txog qhov xav tau tus neeg pab.)

Txoj cai lij choj hauv teb chaws thiab lub xeev xav kom cov chaw hauj lwm tsheb thauj mus los muab kev pab cuam thauj mus los rau cov neeg xiam oob qhab uas tsis tuaj yeem siv txoj kev ruaj khov tau.Thov teb rau qhov kev thov no tsis pub dhau 21 hnub, raws li txoj cai lij choj xav tau.Thov txhob ua siab deb los tiv tauj rau kuv ntawm [koj tus xov tooj thiab / los sis email chaw nyob] yog tias koj muaj lus nug.Ua Tsaug.

Sau npe,

[Koj lub npe]

[Koj qhov chaw nyob]

Tsab Ntawv Txhawb Nqa Ua Piv Txwv

[Hnub Tim]

Nyob Zoo [Qhov Lag Luam]:

Kuv yog [tus kws kho mob / tus kws kho mob puas siab puas ntsws / tus kws kho mob hlwb / tus kws kho mob / tus neeg ua hauj lwm pab cuam zej tsoom / tus kws kho rau fab kev ua haujlwm / lwm tus] rau [Lub Npe], thiab kuv paub txog [nws] tus mob.Nws muaj kev xiam oob qhab uas ua rau muaj qee yam kev txwv tsis ua hauj lwm.Cov kev txwv no suav nrog [sau cov kev txwv kev ua hauj lwm uas xav tau kev pab cuam thauj lus los rau neeg xiam oob qhab uas tau thov].

[Lub Npe] siv tsis tau txoj kev ruaj khov.Piav qhia txog cov teeb meem uas tiv thaiv kev siv tsheb thauj mus los rau pej xeem li cas.Yog xav tau tus neeg pab, thov piav qhia txog qhov xav tau tus neeg pab].

Ua tsaug rau koj qhov kev muab kev pab cuam thauj mus los rau neeg xiam oob qhab no rau [Lub Npe].

Sau npe,

[Lub Npe thiab Txog Luag Hauj Lwm]

Daim Qauv Ntawv Qhia Txog Kev Tsis Txaus Siab

Hnub Tim: [Hnub No Yog Hnub Tim]

Txog Rau: [Lub chaw hauj lwm tsheb thauj mus los]

Los Ntawm: [Koj Lub Npe]

Chaw Nyob: [Koj qhov chaw nyob lub tsev]

Chaw Nyob Email: [Koj qhov chaw nyob email]

Tus Lej Xov Tooj: [Koj tus nab npawb xov tooj]

Tus neeg caij tsheb tus ID: [Koj tus neeg caij tsheb tus ID]

Nyob zoo txog [ADA Tus Kws Lis Hauj Lwm Saib Xyuas los sis lub chaw hauj lwm Tsheb Thauj Mus Los]:

Kuv xa daim ntawv tsis txaus siab no los tshaj qhia tias kuv tau txais kev ntxub ntxaug los ntawm [Lub npe ntawm lub chaw hauj lwm tsheb thauj mus los] rau [hnub tim ntawm qhov xwm txheej] nyob ib puag ncig [lub sij hawm ntawm qhov xwm txheej] vim kuv qhov kev xiam oob qhab/cov kev tsis taus uas ua txhaum Txoj Cai Tshwj Hwm Cov Neeg Meskas Uas Muaj Kev Xiam Oob Qhab.

[Piav Qhia Luv-Luv Txog Qhov Xwm Txheej]

Hom Kev Ua Kev Thov: 

Tshawb nrhiav qhov teeb meem

Muab kev cob qhia rau cov neeg ua hauj lwm/cov neeg tsav tsheb

Txhim kho cov txheej txheem nkag cuag tau

Tiv thaiv kom qhov teeb meem no kom tsis txhob tshwm sim dua

[Lwm yam]

Ua tsaug rau koj qhov kev tshuaj xyuas qhov kev tsis txaus siab no thiab rau kev txhawb nqa kev nkag cuag tau kom muaj vaj huam sib luag rau kev thauj mus los rau cov neeg xiam oob qhab.Kuv xav kom tiv tauj rov qab rau tus xov tooj/email, uas tau teev tseg saum toj no.

[Kos Npe]

[Sau Lub Npe]