Hauv qee cov xwm txheej, Lub Thawj Fab Hauj Lwm Saib Xyuas Kev Rov Kho Kom Zoo Li Qub Tuaj (DOR) tuaj yeem pab cov neeg them rau lawv cov nqi vaj tse yog tias lawv yuav tsum tau mus kawm ntawv uas tsis nyob ze rau lawv lub tsev.

Hauv yav dhau los, DOR pheej nyiam tsis pom zoo rau cov kev thov txog kev pab vaj tse nyob rau kev mus kawm cob qhia hauv tsev kawm ntawv qib siab vim tias DOR tau xam pom tias kev pab vaj tse nyob rau tub ntxhais kawm ntawv yog qhov nuj nqis ncua sij hawm ntev. Raws li tau piav qhia nyob hauv qhov kev txiav txim siab tsis ntev los no ntawm California Lub Tsev Hais Plaub txog Kev Thov Rov Txiav Txim Dua, yuav tsis tuaj yeem tsis pom zoo rau kev thov txog kev pab vaj tse nyob vim tias DOR saib tias yog qhov nuj nqis ncua sij hawm ntev. Pauv rau qhov ntawd, DOR yuav tsum tau muab kev tsom xam ib tug zuj zus thaum ua kev thov txog vaj tse nyob, los txiav txim siab:

• Yog tias qhov kev thov txog kev cob qhia ntawm ib lub tsev kawm ntawv xab phaub twg yog qhov tsim nyog rau tus neeg qhua lub hom phiaj ntawm kev ua hauj lwm los sis lawv puas tuaj yeem mus rau ib qho twg nyob hauv ncua kev uas yuav siv tsheb mus los tau ntawm lawv lub tsev?
• Puas yuav tsum tau muaj vaj tse nyob rau tus neeg qhua kom nkag cuag tau rau kev cob qhia ntawm lub tsev kawm ntawv xab phaub ntawd?
• Yog tias yuav tsum tau muaj vaj tse nyob kom thiaj mus kawm tau, tus nqi ntawm vaj tse nyob puas yuav ntau dua lawv cov nuj nqis kev siv noj haus li ib txwm?

Cov nqi vaj tsev nyob twg uas DOR tuaj yeem pab tau?

Cov nqi vaj tsev nyob yuav poob rau hauv pawg kev pab cuam ntawm DOR uas hu tias yog "kev saib xyuas txhim kho". Hauv Nqe 9 ntawm California Tsab Cai hais txog Kev Tswj Hwm (C.C.R.) Nqe 7019, yuav sau npe ua tswv cuab rau cov kev pab cuam saib xyuas txhim kho tias yog kev txhawb nqa fab nyiaj txiag rau cov neeg uas yuav tsum tau lav them tej nuj nqis tshiab rau khoom noj khoom haus, vaj tse nyob, los sis tej khaub ncaws hnav, uas muaj ntau tshaj lawv cov nuj nqis kev siv noj haus li ib txwm, thiab tias yog qhov tsim nyog rau tus neeg tuaj koom nrog hauv DOR cov kev pab cuam los sis kev ntsuam xyuas.

Yuav muab tsis tau cov kev pab cuam saib xyuas txhim kho los txhawb nqa tus neeg cov nuj nqis siv yuav noj yuav haus huav txhua hnub. Pauv rau qhov ntawd, yuav xam tias yog cov kev pab cuam ib nyuag ntu los txhawb nqa kev koom nrog hauv DOR qhov kev pab cuam xab phaub ntawm tus neeg ntawd. Piv txwv li, tus nqi ntxiv rau ntawm chav nyob uas yuav tsum tau muaj rau tus neeg kom thiaj kawm tiav lawv qhov kev kawm nyob rau tsev kawm qib siab, ntawm qhov chaw uas tsis nyob rau ncua uas siv tsheb khiav mus los tau ntawm lawv lub tsev, qee zaum yuav tau txais kev tso cai nyob hauv kev saib xyuas txhim kho.

Kev txiav txim ntawm lub tsev hais plaub thov rov txiav txim dua tsis ntev los no qhia meej txog dab tsi?

Hauv Lub Yim Hlis Ntuj Tim 5, 2024, Pab Pawg Neeg Tswj Xyuas Tsev Hais Plaub Ntug Theem Siab thib 4 ntawm California Lub Tsev Hais Plaub txog Kev Thov Rov Txiav Txim Dua tau txiav txim tias DOR qhov kev tsom xam yuav tsis pom zoo muab kev pab vaj tse nyob rau ib tug neeg uas tau mus kawm hauv tsev kawm kev cai lij choj yog qhov tsis ua mus raws kev cai lij choj lawm. John Doe v. Lub Thawj Fab Hauj Lwm Saib Xyuas Kev Rov Kho Kom Zoo Li Qub Tuaj (2024) 103 Cal.App.5th 1327, 324 Cal.Rptr.3d 150, Ntawv Xov Xwm Txhua Hnub Xyoo 2024 D.A.R. 7412. Qhov kev txiav txim no tau qhia meej tias DOR qhov kev tsom xam tau saib raws li kev txhais ntsiab lus ntawm "ncua sij hawm luv" piv rau "ncua sij hawm ntev" tsis raug lawm, thau DOR tau hais tias vaj tse nyob rau tsev kawm kev cai lij choj yog qhov nuj nqis uas muaj tsis tu ncua, muaj ncua sij hawm ntev.

Lub tsev hais plaub tau hais tias rau cov neeg uas yuav tsum tau mus kawm hauv kev cob qhia uas tsis nyob hauv ncua kev taug kev mus los tau ntawm lawv lub tsev, ces DOR yuav tsum ntsuam xyuas seb tus neeg puas yuav muaj cov nqi yuav tau them rau vaj tsev qhov tshiab tuaj, uas ntau tshaj tus nqi uas lawv yuav them li ib txwm yog tias lawv ho yuav mus kawm hauv kev cob qhia uas nyob ze rau ntawm lawv lub tsev.Hauv qhov teeb meem no, DOR tsis teb tshwj xeeb rau cov nqe lus nug ntawd, yog li ntawd lub tsev hais plaub thiaj li tau xaj kom DOR rov ntsuas xyuas dua txog tus neeg qhua qhov kev xav tau txog kev pab vaj tse nyob.

Vim li cas qhov kev txiav txim no thiaj li yog qhov tseem ceeb?

Qhov kev txiav txim no yog qhov tseem ceeb vim tias qee cov neeg qhua ntawm DOR uas tsis tau txais kev pom zoo muab kev pab them rau cov nqi vaj tse nyob qhov tiag lawm yuav muaj cai tau txais kev pab txog cov nqi vaj tsev nyob. Yog li ntawd, tej zaum cov neeg yuav xav thov kom DOR rov txiav txim siab txog lawv qhov kev txiav txim yog tias:

• lawv tsis tau txais kev pom zoo tau kev txhawb nqa nrog kev pab them cov nqi vaj tsev nyob los ntawm DOR rau lub hom phiaj kev mus kawm ntawv los sis lwm yam kev cob qhia; thiab
• lub tsev kawm ntawv xab phaub los sis lub khoos kas pab txog kev cob qhia yog qhov tsim nyog yuav ua kom tau raws li lawv cov kev xav tau (feem ntau vim yog muaj cov lav xuj kawm uas paub zoo txog ib fab twg thiab/los sis cov kev pab cuam uas lub tsev kawm ntawv muab); thiab
• lub tsev kawm ntawv tsis nyob hauv ncua kev uas siv tsheb khiav mus los tau ntawm lawv lub tsev.

Yog tias koj ntseeg tias qhov xwm txheej no tej zaum yuav siv tau rau koj, ces koj yuav sib tham txog nws tau nrog koj tus kws sab laj pab tswv yim uas saib raws li qhov kev txiav txim zaum tshiab ntawm lub tsev hais plaub no. Yog tias DOR tseem tsis pom zoo yuav pab them cov nqi vaj tsev nyob uas siab tshaj koj cov nuj nqis kev noj nyob li ib txwm, tej zaum koj yuav xav txog kev thov txiav txim dua los ntawm Kev Tshuaj Xyuas Fab Kev Tswj Hwm thiab/los sis ua daim ntawv thov txog kev sib kho/lub rooj sib hais txog kev ncaj ncees. Koj tuaj yeem kawm paub ntau ntxiv hais txog tus txheej txheem ntawd hauv daim ntawv luam tawm no: California Lub Thawj Fab Hauj Lwm Saib Xyuas Kev Rov Kho Kom Zoo Li Qub Tuaj Daim Ntawv Qhia Qhov Tseeb Txog Cov Kev Xaiv thiab Tus Txheej Txheem Kev Thov Rov Txiav Txim Dua

Kev Xaus Lus

Tam sim no uas kev txiav txim ntawm lub tsev hais plaub txog kev thov rov txiav txim dua tau qhia meej txog tus txheej txheem txog kev muab kev pab them tus nqi vaj tse nyob, nws yog lub luag hauj lwm ntawm DOR yuav xyuas kom paub tseeb tias muaj kev txhais ntsiab lus ntawm cov cai tswj hwm no kom raug.Yog tias koj ntseeg tias tej zaum koj yuav muaj cai tau txais cov kev pab cuam saib xyuas txhim kho vaj tse nyob, los sis yog tias yav dhau los koj tsis tau txais kev pom zoo txog kev thov kev pab them tus nqi vaj tse nyob, ces koj tuaj yeem tiv tauj tau Lub Khoos Kas Muab Kev Pab Tus Neeg Qhua (Client Assistance Program, CAP) ntawm 1-800-776-5746 yog xav paub ntxiv.