គន្លឹះ 15 យ៉ាង សម្រាប់ស្វ័យតស៊ូមតិ
គន្លឹះ 15 យ៉ាង សម្រាប់ស្វ័យតស៊ូមតិ
អ្នកអាចត្រូវការសេវាកម្មនិងការគាំទ្រមួយចំនួន ដើម្បីសម្រេចបានគោលដៅរបស់អ្នក។ នេះមានន័យថា អ្នកអាចប្រាស្រ័យទាក់ទងជាមួយទីភ្នាក់ងារ និងប្រព័ន្ធមួយចំនួនដែលផ្តល់សេវាដល់បុគ្គលដែលមានពិការភាពបាន។ នេះក៏អាចមានន័យថា[អ្នកត្រូវ]ចូលរួមក្នុងកិច្ចប្រជុំ និងការតស៊ូមតិសម្រាប់ខ្លួនឯងផងដែរ។ ស្វ័យតស៊ូមតិ អាចចាប់ផ្តើមបាននូវគ្រប់វ័យទាំងអស់។
ការបដិសេធ៖ ការបោះពុម្ភផ្សាយនេះគឺជាព័ត៌មានផ្លូវច្បាប់តែប៉ុណ្ណោះ ហើយមិនមែនជាការណែនាំផ្លូវច្បាប់អំពីស្ថានភាពបុគ្គលរបស់អ្នកទេ។ វាគឺជាបច្ចុប្បន្នកាលបរិច្ឆេទបានប្រកាស។ យើងព្យាយាមធ្វើបច្ចុប្បន្នភាពសម្ភារៈរបស់យើងឱ្យបានទៀងទាត់។ ទោះជាយ៉ាងណាក៏ដោយច្បាប់កំពុងផ្លាស់ប្តូរជាទៀងទាត់។ ប្រសិនបើអ្នកចង់ធ្វើឱ្យប្រាកដថាច្បាប់មិនបានផ្លាស់ប្តូរ សូមទាក់ទង DRC ឬការិយាល័យច្បាប់ផ្សេងទៀត។
អ្នកអាចត្រូវការសេវាកម្មនិងការគាំទ្រមួយចំនួន ដើម្បីសម្រេចបានគោលដៅរបស់អ្នក។ នេះមានន័យថា អ្នកអាចប្រាស្រ័យទាក់ទងជាមួយទីភ្នាក់ងារ និងប្រព័ន្ធមួយចំនួនដែលផ្តល់សេវាដល់បុគ្គលដែលមានពិការភាពបាន។ នេះក៏អាចមានន័យថា[អ្នកត្រូវ]ចូលរួមក្នុងកិច្ចប្រជុំ និងការតស៊ូមតិសម្រាប់ខ្លួនឯងផងដែរ។ ស្វ័យតស៊ូមតិ អាចចាប់ផ្តើមបាននូវគ្រប់វ័យទាំងអស់។
ខិត្តប័ណ្ណព័ត៌មាននេះ រួមបញ្ចូលនូវគន្លឹះសំខាន់ៗសម្រាប់ជួយអ្នកត្រៀមរៀបចំខ្លួនសម្រាប់កិច្ចប្រជុំ បង្កើតផែនការសេវាកម្ម និងដោះស្រាយវិវាទដែលអាចកើតមានឡើងក្នុងកិច្ចដំណើរការនេះ។
1. អ្នកគឺជាបុគ្គលសំខាន់ជាងគេនៅក្នុងកិច្ចដំណើរការនេះ
សំឡេងរបស់អ្នក និងជម្រើសរបស់អ្នកគឺជាបញ្ហាសំខាន់។ គិតអំពីអ្វីដែលអ្នកត្រូវការ។ តើអ្នកមានគោលដៅអ្វីខ្លះ? តើអ្នកស្ថិតនៅកន្លែងណានាពេលនេះ? តើអ្នកត្រូវការអ្វីខ្លះដើម្បីអាចសម្រេចគោលដៅទាំងអស់នេះបាន? នៅពេលដែលអ្នកអាចឆ្លើយនឹងសំណួរទាំងអស់នេះបាន អ្នកនឹងអាចយល់ដឹងបានប្រសើរជាងមុនថាតើសេវាកម្ម ទីភ្នាក់ងារ និងអង្គការអ្វីខ្លះដែលគប្បីត្រូវរួមបញ្ចូលទៅក្នុងកិច្ចដំណើរការនៃការធ្វើផែនការរបស់អ្នក។
2. រក្សាទុកកំណត់ត្រា
រក្សាទុកសំណៅថតចម្លងនៃឯកសារ ការវាយតម្លៃ លិខិត និងការជូនដំណឹងនានា។ អ្នកអាចរក្សាទុកឯកសារទាំងអស់នេះបាននៅក្នុងសំណុំឯកសារ ឬក្នុងសៀវភៅកំណត់ត្រាក៏បាន។ អ្នកក៏អាចស្កែន ឬថតរូបឯកសារទាំងអស់នោះទុក ដើម្បីបង្ការកុំឲ្យឯកសារសំខាន់ៗរបស់អ្នកត្រូវបាត់បង់។
ទីភ្នាក់ងារភាគច្រើន ជាទូទៅត្រូវបានតម្រូវឲ្យផ្តល់សំណៅថតចម្លងនៃកំណត់ត្រារបស់អ្នកជូនដល់អ្នក។ ប្រសិនបើអ្នកត្រូវការកំណត់ត្រាណាមួយដែលអ្នកពុំទាន់មាននៅឡើយ អ្នកអាចស្នើសុំសំណៅថតចម្លងនៃកំណត់ត្រារបស់អ្នកនោះបានគ្រប់ពេលវេលាទាំងអស់។
ប្រសិនបើអ្នកត្រូវការជជែកជាមួយអ្នកណាម្នាក់តាមទូរសព្ទ សូមសរសេរឈ្មោះនិងតួនាទីរបស់បុគ្គលដែលអ្នកចង់និយាយជាមួយនោះ និងទីភ្នាក់ងារដែលពួកធ្វើការឲ្យ។ អ្នកអាចផ្ញើលិខិតមួយច្បាប់ ឬអ៊ីម៉ែលមួយដែលនិយាយអំពីកិច្ចសន្ទនាដែលអ្នកបាននិយាយ និងព័ត៌មានដែលពួកគេបានចែករំលែកជាមួយអ្នក។ អ្នកក៏អាចស្នើសុំឲ្យពួកគេផ្ញើព័ត៌មាននៅក្នុងលិខិតនោះមកអ្នក ឬផ្ញើអ៊ីម៉ែលមកអ្នកក៏បាន។
ប្រសិនបើអ្នកពុំច្បាស់ថាតើកំណត់ត្រាមួយដែលមានសារៈសំខាន់សម្រាប់ចែករំលែកជាមួយទីភ្នាក់ងារណាមួយ សូមគិតអំពី៖ តើអ្នកឯកភាពនឹងអ្វីដែលកំណត់ត្រានោះបាននិយាយអំពីអ្នកដែរឬទេ? តើកំណត់ត្រានោះពិតជួយបង្ហាញថាតើអ្នកត្រូវការសេវាដែលអ្នកកំពុងស្នើសុំនោះដែរឬទេ? ប្រសិនបើកំណត់ត្រារបស់អ្នកជួយអ្នកនៅក្នុងកិច្ចខិតខំប្រែងស្វ័យតស៊ូមតិនេះ សូមយកឯកសារទាំងនោះទៅជាមួយនៅក្នុងកិច្ចប្រជុំ ឬភ្ជាប់ឯកសារទាំងនោះជាមួយសំណើសុំបើកកិច្ចប្រជុំរបស់អ្នក។ វាក៏មានសារៈសំខាន់ផងដែរក្នុងការរក្សាទុកកំណត់ត្រាអំពីបុគ្គលដែលអ្នកបានផ្តល់ជូនទៅឲ្យ និងពេលវេលានិងព័ត៌មានអ្វីខ្លះដែលអ្នកបានផ្តល់ជូនទៅពួកគេ។
3. ស្នើសុំអ្វីដែលអ្នកត្រូវការ
បើទោះបីជាទីភ្នាក់ងារមួយចំនួនមានរៀបចំកិច្ចប្រជុំធ្វើផែនការជារៀងរាល់ឆ្នាំក៏ដោយ អ្នកអាចស្នើសុំបើកកិច្ចប្រជុំមួយឬស្នើសុំសេវាកម្មណាមួយបានគ្រប់ពេលវេលាទាំងអស់។ យើងសូមណែនាំឲ្យអ្នកដាក់សំណើសុំជាលាយលក្ខណ៍អក្សរ និងរៀបរាប់អំពីអ្វីដែលអ្នកចង់និយាយនៅក្នុងកិច្ចប្រជុំនោះ។ វាជាការចាំបាច់ដែលត្រូវដាក់សំណើសុំរបស់អ្នកនៅពេលណាដែលអាចចូលរួមប្រជុំបាន។ អ្នកគប្បីផ្ញើសំណើសុំនោះទៅកាន់បុគ្គលដែលអ្នកនឹងចង់អញ្ជើញឲ្យមកចូលរួមក្នុងកិច្ចប្រជុំរបស់អ្នក។ អ្នកក៏អាចរួមបញ្ចូលនូវកាលបរិច្ឆេទផុតកំណត់ដែលអ្នកចង់ឲ្យទីភ្នាក់ងារនោះធ្វើការឆ្លើយតបនឹងសំណើសុំរបស់អ្នកផងដែរ។ កាលបរិច្ឆេទផុតកំណត់ដែលសមស្រប គប្បីអនុញ្ញាតឲ្យទីភ្នាក់ងារនោះមានពេលវេលាគ្រប់គ្រាន់ដើម្បីពិចារណាអំពីសំណើរបស់អ្នក និងគប្បីបំពេញតាមតម្រូវការរបស់អ្នក។
4. ភាសាចម្បង
អ្នកមានសិទ្ធិទទួលបានពត៌មានជាភាសាដែលអ្នកប្រើប្រាស់ជាចម្បងបាន។ អ្នកមានសិទ្ធិស្នើសុំអ្នកបកប្រែភាសាម្នាក់ទៅជាភាសាដែលអ្នកប្រើជាចម្បង រួមបញ្ចូលទាំងភាសាសញ្ញាអាមេរិក (American Sign Language, ASL) ផងដែរ។ ប្រសិនបើអ្នកមានពិការភាព អ្នកមានសិទ្ធិទទួលបានព័ត៌មានក្នុងជម្រើសផ្សេងទៀត ដូចជា ឯកសារព្រីនជាអក្សរធំៗ អក្សរស្ទាប ឬទម្រង់ដទៃផ្សេងទៀត។ អ្នកអាចស្នើសុំទីភ្នាក់ងារណាមួយឲ្យផ្តល់ជូននូវអ្នកបកប្រែម្នាក់នៅក្នុងកិច្ចប្រជុំ និង/ឬការបកប្រែសម្រាប់ឯកសារជាភាសាដែលអ្នកប្រើជាចម្បង ឬនៅក្នុងទម្រង់ណាមួយផ្សេងទៀត។
5. ដឹងពីសិទ្ធិរបស់អ្នក
ទីភ្នាក់ងារមានប្រភេទខុសៗគ្នាជាច្រើន ដែលជួយដល់បុគ្គលដែលមានពិការភាព។ មនុស្សខ្លះត្រូវការសេវាណាមួយពីទីភ្នាក់ងារខុសៗគ្នាៗ។ មនុស្សខ្លះទៀត អាចត្រូវការសេវាតែពីទីភ្នាក់ងារមួយឬពីរតែប៉ុណ្ណោះ។
ទីភ្នាក់ងារនីមួយៗ អាចមានច្បាប់ គោលនយោបាយ និងនីតិវិធីខុសៗគ្នាដែលគ្រប់គ្រងលើពលរដ្ឋដែលពួកគេផ្តល់សេវាជូន ប្រភេទនៃសេវាកម្មដែលពួកគេផ្តល់ជូន និងដំណើរការអ្វីខ្លះដែលពួកប្រើសម្រាប់ការផ្តល់សេវាជូនដល់បុគ្គលដែលមានពិការភាពនោះ។ Disability Rights California (អង្គការសិទ្ធិជនពិការរដ្ឋកាលីហ្វ័រញ៉ា) ផ្តល់ការគាំទ្រនិងព័ត៌មានអំពីទីភ្នាក់ងារនានាដែលផ្តល់សេវាដល់បុគ្គលដែលមានពិការភាពនៅក្នុងរដ្ឋកាលីហ្វ័រញ៉ា។ ដើម្បីពិនិត្យមើលឯកសារបោះពុម្ពផ្សាយរបស់យើង ឬស្នើសុំជំនួយ សូមចូលទៅកាន់ www.disabilityrightsca.org ឬទូរសព្ទទៅលេខ (800) 776-5746។
ទីភ្នាក់ងារជាច្រើនបង្ហោះតំណភ្ជាប់ទៅកាន់ច្បាប់ដែលពាក់ព័ន្ធនានានៅលើគេហទំព័ររបស់ពួកគេ។ សម្រាប់ព័ត៌មានបន្ថែមអំពីការអប់រំពិសេស សូមមើល នាយកដ្ឋានអប់រំរដ្ឋកាលីហ្វ័រញ៉ា (California Department of Education)៖ www.cde.ca.gov។ សម្រាប់ព័ត៌មានបន្ថែមអំពីសេវាកម្មសម្រាប់បុគ្គលដែលមានពិការភាពផ្នែកប្រាជ្ញាស្មារតីឬពិការភាពផ្នែកលូតលាស់/សេវាកម្មរបស់មជ្ឈមណ្ឌលក្នុងតំបន់ សូមមើលនាយកដ្ឋានសេវាបញ្ហាការអភិវឌ្ឍលូតលាស់រដ្ឋកាលីហ្វ័រញ៉ា (California Department of Developmental Services)៖ www.dds.ca.gov។ សម្រាប់ព័ត៌មានអំពីសេវាកម្មជំនួយមុនពេលមានការងារធ្វើ និងកម្មវិធីស្តារនីតិសប្បទាវិជ្ជាជីវៈ សូមមើល នាយកដ្ឋានស្តារនីតិសម្បទារដ្ឋកាលីហ្វ័រញ៉ា (California Department of Rehabilitation)៖ www.dor.ca.gov។
6. ត្រៀមរៀបចំខ្លួន
នៅមុនពេលកិច្ចប្រជុំ ត្រូវទុកពេលខ្លះសម្រាប់ខ្លួនឯងដើម្បីពិនិត្យមើលឯកសារ ការវាយតម្លៃ និងកំណត់ត្រាផ្សេងៗ។ ប្រសិនបើទីភ្នាក់ងារដែលអ្នកនឹងត្រូវទៅជួបជាមួយនោះ នឹងចែករំលែកនូវការវាយតម្លៃឬរបាយការណ៍ថ្មីណាមួយជាមួយអ្នកនៅក្នុងកិច្ចប្រជុំខាងមុខនោះ អ្នកអាចស្នើសុំសំណៅថតចម្លងមួយច្បាប់នៅមុនកិច្ចប្រជុំនោះបាន។ អ្នកអាចជ្រើសរើសជជែកជាមួយសមាជិកគ្រួសារ មិត្តភក្តិ គ្រូបង្រៀន និងអ្នកជំនាញដើម្បីជួយអ្នកធ្វើការត្រៀមរៀបចំខ្លួន។ ត្រូវប្រាកថា បុគ្គលដែលអ្នកចង់ឲ្យមានវត្តមាននៅក្នុងកិច្ចប្រជុំរបស់អ្នក នឹងមានវត្តមាននៅទីនោះ ហើយពួកគាត់មានសមត្ថភាពក្នុងការធ្វើសេចក្តីសម្រេចអំពីសេវាកម្មរបស់អ្នក។
7. ធ្វើផែនការ
នៅមុនពេលកិច្ចប្រជុំ គិតអំពីគោលដៅ តម្រូវការ និងចំណង់ចំណូលចិត្តរបស់អ្នក។ ធ្វើគ្រោងអំពីអ្វីដែលអ្នកចង់និយាយនៅក្នុងកិច្ចប្រជុំនោះ។ ប្រសិនបើអ្នកស្នើសុំសេវាកម្មណាមួយ វាជាការល្អដែលអ្នកត្រូវធ្វើការកត់ត្រាទុកនូវមូលហេតុដែលអ្នកគិតថាអ្នកត្រូវការសេវាកម្មនោះ។ អ្នកអាចយកមកជាមួយនូវឯកសារនានាដែលអាចជួយផ្តល់ជាអំណះអំណាគាំទ្រដល់សំណើសុំរបស់អ្នក។ ឧទាហរណ៍៖ កំណត់ត្រាវេជ្ជសាស្រ្ត ការវាយតម្លៃ កំណត់ត្រាពីទីភ្នាក់ងារណាមួយ ព័ត៌មានអំពីទីផ្សារការងារ និងការស្រាវជ្រាវតាមអនឡាញ។ អ្នកក៏អាចសរសេរចូលនូវសំណួរនានាដែលអ្នកមាន ដើម្បីប្រាកដថា អ្នកមិនភ្លេចសួរសំណួរទាំងនោះនៅក្នុងកិច្ចប្រជុំ។
8. ចូលរួម
អ្នកគឺជាមនុស្សសំខាន់នៅក្នុងកិច្ចប្រជុំនេះ។ វាជាការសំខាន់ដែលអ្នកត្រូវចែករំលែកឲ្យគេបានដឹងអំពីគោលដៅ សមត្ថភាព ចំណាប់អារម្មណ៍ លទ្ធភាព និងបញ្ហាប្រឈមនានារបស់អ្នក។ នៅក្នុងកិច្ចប្រជុំ សូមកុំភ្លេចសួរសំណួរនានា ចែករំលែកព័ត៌មាន និងផ្តល់ជាគំនិតយោបល់។ ប្រសិនបើអ្នកមិនយល់អំពីអ្វីដែលបានកំពុងលើកឡើងទេ ឬអ្វីដែលបានផ្តល់ជូនមកអ្នកជាលាយលក្ខណ៍អក្សរទេ សូមសាកសួរអំពីបញ្ហានេះ។ អ្នកមានសិទ្ធិក្នុងការសាកសួរសំណួរជាច្រើនតាមដែលអ្នកចង់ដើម្បីយល់ដឹងឲ្យបានច្បាស់អំពីអ្វីដែលកំពុងកើតមាន។ ប្រសិនបើអ្នកមានសំណួរ របាយការណ៍ ការវាយតម្លៃ ឬកំណត់ត្រាដែលជួយជាអំណះអំណាងគាំទ្រដល់សំណើសុំរបស់អ្នក វាជាការចាំបាច់ដែលអ្នកត្រូវចែករំលែកព័ត៌មានទាំងនោះជាមួយបុគ្គល ឬទីភ្នាក់ងារដែលពាក់ព័ន្ធ។
ប្រសិនបើអ្នកបានស្នើសុំសេវាកម្មណាមួយ ឬបានសួរសំណួរណាមួយ សូមស្តាប់ការឆ្លើយតបពីភាគីដទៃ និងអ្វីដែលពួកគេចង់និយាយ។ ត្រូវប្រាកដថាពួកគេឆ្លើយតបនឹងសំណួររបស់អ្នក។ សាកសួរពួកគេអំពីមូលហេតុនៃការសម្រេចរបស់ពួកគេ។ អ្នកអាចស្នើសុំឲ្យពួកគេពន្យល់អំពីសេចក្តីសម្រេចរបស់ពួកគេជាលាយលក្ខណ៍អក្សរបាន។ ប្រសិនបើសេចក្តីសម្រេចនោះធ្វើឡើងតាមច្បាប់ គោលនយោបាយ ឬនីតិវិធីណាមួយ អ្នកអាចស្នើសុំសំណៅថតចម្លងមួយច្បាប់បាន។
ប្រសិនបើអ្នកត្រូវការជំនួយ ឬសេវាជំនួយគាំទ្រដើម្បីចែករំលែកគំនិតរបស់អ្នក និងសាកសួរសំណួរណាមួយ អ្នកអាចស្នើសុំជំនួយនៅពេលមុនកិច្ចប្រជុំ ឬនៅឯកិច្ចប្រជុំ។ អ្នកក៏អាចនាំនរណាម្នាក់ពីក្រុមអ្នកគាំទ្ររបស់អ្នកឲ្យទៅចូលរួមកិច្ចប្រជុំជាមួយអ្នកក៏បាន ប្រសិនបើពួកគេត្រូវការជួយចែករំលែកគំនិតទស្សនៈរបស់អ្នក។
9. មានការច្នៃប្រឌិត
កិច្ចដំណើរការនៃការធ្វើផែនការ គប្បីធ្វើឡើងទៅតាមតម្រូវការបុគ្គល។ នេះមានន័យថា សេវាកម្មរបស់អ្នកគប្បីតម្រូវទៅតាមការចង់បានរបស់អ្នក។ លើកទឹកចិត្តដល់មនុស្សដទៃឲ្យស្វែងយល់ពីរបៀបខុសៗគ្នាក្នុងការបំពេញការងារអ្វីមួយ ជាពិសេសប្រសិនបើវិធីបច្ចុប្បន្ននេះមិនមានប្រសិទ្ធភាពសម្រាប់អ្នក។
10. ធ្វើការរួមគ្នា
ទីភ្នាក់ងារនីមួយៗ និងបុគ្គលិកម្នាក់ៗ មានជំនាញ និងចំណេះដឹងខុសៗគ្នាក្នុងការចែករំលែក។ ត្រូវស្តាប់ទស្សនៈយល់ឃើញ និងគំនិតរបស់ពួកគេ។ សាកសួរអំពីធនធាន សេវាកម្ម និងសាច់រឿងជោគជ័យរបស់មនុស្សដទៃ។ ត្រង់ចំណុចណាដែលមានការខ្វែងគំនិតគ្នា ត្រូវរំឮកដល់ក្រុមការងារអំពីគោលដៅរួមគ្នា គឺការគាំទ្រដល់ការសម្រេចបានជោគជ័យរបស់អ្នក។
11. ចូលរួមជាមតិយោបល់ជាជាងជជែកយកតែឈ្នះ
មនុស្សគ្រប់គ្នា ជាពិសេសរូបអ្នកផ្ទាល់ ទទួលបានជំនួយនៅក្នុងកិច្ចដំណើរការនៃការធ្វើផែនការនេះ។ ត្រូវដឹងឲ្យច្បាស់អំពីអ្វីដែលចង់បាន។ សួរបញ្ជាក់អំពីអ្វីដែលទីភ្នាក់ងាររបស់អ្នកអាចធ្វើបាន និងអ្វីដែលពួកគេមិនអាចធ្វើបាន។
ពេលខ្លះ គំនិតសមស្របមួយចំនួន មិនអាចយល់ស្របតាមបាន។ ក្នុងការធ្វើសេចក្តីសម្រេចថាតើអ្នកចង់ដោះស្រាយការខ្វែងគំនិតគ្នានោះ ត្រូវចងចាំទុកក្នុងចិត្តថា អ្នកនឹងត្រូវធ្វើការជាមួយគ្នារយៈពេលយូរអង្វែងជាមួយទីភ្នាក់ងារដែលកំពុងផ្តល់សេវានោះ។ ចាំបាច់ត្រូវលើកឡើងពីបញ្ហានេះនៅពេលណាដែលអ្នកមិនយល់ស្រប។ ប្រសិនបើអ្នកគិតថា ការជជែកអំពីការខ្វែងគំនិតគ្នានេះ គឺមិនបានជួយអ្វីដល់ការដោះស្រាយបញ្ហានេះ ឬទីភ្នាក់ងារពុំបានផ្លាស់ប្តូរគំនិតរបស់ពួកគេទេ អ្នកអាចសម្រេចចិត្តជជែកដេញដោលលើការសម្រេចរបស់ពួកគេ ជាជាងបន្តការពិភាក្សា។
ករណីភាគច្រើន អ្នកមានសិទ្ធិក្នុងការទទួលបានសេចក្តីជូនដំណឹងជាលាយលក្ខណ៍អក្សរ ឬលិខិតមួយច្បាប់ដែលពន្យល់អំពីមូលហេតុដែលសំណើសុំណាមួយត្រូវបានបដិសេធ។ ប្រសិនបើអ្វីដែលអ្នកស្នើសុំត្រូវបានគេបដិសេធ ឬប្រសិនបើព័ត៌មានដែលបានចែករំលែកនៅក្នុងកិច្ចប្រជុំនោះហាក់ដូចជាពុំត្រូវនឹងរឿងរបស់អ្នក សូមស្នើសុំសំណៅថតចម្លងនៃច្បាប់ ឬគោលនយោបាយដែលទីភ្នាក់ងារនោះកំពុងប្រើដើម្បីធ្វើជាអំណះអំណាងលើសេចក្តីសម្រេចរបស់ពួកគេ។ អ្នកមានសិទ្ធិក្នុងការដឹងអំពីអំពីមូលហេតុដែលគេបដិសេធលើសេវាកម្មរបស់អ្នក មូលហេតុដែលមានការផ្លាស់ប្តូរនៅក្នុងសេវាកម្មរបស់អ្នក ឬមូលហេតុដែលគេបញ្ចប់សេវាកម្មរបស់អ្នក។
12. សិទ្ធិក្នុងការប្តឹងឧទ្ធរណ៍របស់អ្នក
អ្នកមានសិទ្ធិក្នុងការប្តឹងឧទ្ធរណ៍ដើម្បីតវ៉ាចំពោះការសម្រេចណាមួយ ប្រសិនបើអ្នកមិនឯកភាព។ អ្នកមានសិទ្ធិក្នុងការសាកសួរអំពីដំណើរការអ្វីខ្លះដែលអ្នកអាចប្រើដើម្បីតវ៉ាចំពោះការសម្រេចណាមួយដែលអ្នកមិនយល់ស្របជាមួយ។ អ្នកមានសិទ្ធិឲ្យគេផ្តល់ព័ត៌មានជាលាយលក្ខណ៍អក្សរជូនអ្នកបាន។ ដំណើរការបណ្តឹងឧទ្ធរណ៍ជាច្រើនមានកាលវេលាកំណត់ដែលពាក់ព័ន្ធនឹងថាតើអ្នកមានពេលវេលាយូរប៉ុណ្ណាសម្រាប់ការតវ៉ាលើសេចក្តីសម្រេចណាមួយ។ ត្រូវប្រាកដថា អ្នកយល់ដឹងអំពីដំណើរការ និងកាលវេលាច្បាស់លាស់ ប្រសិនបើអ្នកមានគម្រោងធ្វើការតវ៉ាលើការសម្រេចណាមួយ។
13. ដំណោះស្រាយបណ្តោះអាសន្ន
អ្នកអាចមានបញ្ហា ឬសំណើសុំណាមួយដែលមិនអាចដោះស្រាយបាននៅក្នុងកិច្ចប្រជុំ។ ប្រសិនមានបញ្ហាបែបនេះមែន សូមជជែកអំពីការធ្វើផែនការសកម្មភាពរយៈពេលខ្លី ដែលធានាថាអ្នកនឹងមានសេវាកម្មដែលអ្នកត្រូវការនៅពេលដែលបញ្ហានោះកំពុងត្រូវបានដោះស្រាយ។
14. បញ្ជាក់ពីកិច្ចព្រមព្រៀង និងចំណុចសកម្មភាព
នៅមុនពេលបញ្ចប់កិច្ចប្រជុំ សូមអានកំណត់របស់អ្នកសាឡើងវិញអំពីកិច្ចព្រមព្រៀងនានា និងចំណុចសកម្មភាព ដែលអ្នកបានពិភាក្សា ដើម្បីប្រាកដថាអ្នកគ្រប់គ្នាមានការយល់ដឹងដូចគ្នាអំពីកិច្ចប្រជុំនេះ។ អ្នកក៏អាចស្នើសុំឲ្យទីភ្នាក់ងារនោះអានកំណត់ត្រាជូនអ្នកស្តាប់ផងដែរ។ អ្នកអាចផ្ញើអ៊ីម៉ែលដើម្បីតាមដាន ឬលិខិតមួយច្បាប់ទៅក្រុមការងារអំពីអ្វីដែលបានពិភាក្សាគ្នានៅក្នុងកិច្ចប្រជុំនោះ។ ការធ្វើបែបនេះ នឹងជួយដល់អ្នកក្នុងការបង្កើតកំណត់ត្រានៃកិច្ចប្រជុំរបស់អ្នក ដែលអ្នកអាចរក្សាទុកបាន ប្រសិនបើអ្នកមានសំណួរណាមួយនៅពេលក្រោយ។
15. ការចុះហត្ថលេខាលើឯកសារនានា
ត្រូវប្រាកដថា អ្នកបានអានឯកសារនានា នៅមុនពេលអ្នកចុះហត្ថលេខាលើឯកសារទាំងនោះ។ អ្នកមានសិទ្ធិក្នុងការត្រួតពិនិត្យឡើងវិញលើឯកសារទាំងមូលនៅមុនពេលអ្នកចុះហេត្ថលេខា។ អ្នកមិនចាំបាច់ត្រូវតែចុះហត្ថលេខានៅផែនការ ឬឯកសារដទៃផ្សេងទៀតនៅក្នុងកិច្ចប្រជុំនោះទេ។ អ្នកអាចស្នើសុំយកសំណៅថតចម្លងមួយច្បាប់មកផ្ទះបាន។ អ្នកប្រហែលជាចង់ពិភាក្សាអំពីឯកសារនោះជាមួយគ្រួសារ មិត្តភក្តិ ឬអ្នកជំនាញរបស់អ្នកនៅមុនពេលអ្នកចុះហត្ថលេខា។ ប្រសិនបើអ្នកមិនឯកភាពជាមួយឯកសារណាមួយ ឬចង់ធ្វើការកែប្រែលើឯកសារនោះ អ្នកអាចស្នើសុំទីភ្នាក់ងារនោះឲ្យធ្វើការកែប្រែនៅមុនពេលអ្នកចុះហត្ថលេខា។ ចុះហត្ថលេខាតែលើចំណុចដែលអ្នកយល់ស្របតែប៉ុណ្ណោះ និងត្រូវកត់ត្រាទុកអំពីអ្វីដែលអ្នកមិនយល់ស្របនៅលើឯកសារតែមួយនោះ ឬនៅលើលិខិតអមដែលអ្នកភ្ចាប់ជូនជាមួយឯកសារនោះទេ។