1. រៀនពីរបៀបទាក់ទងទៅកាន់មជ្ឈមណ្ឌលថ្នាក់តំបន់។

រក្សាទុកលេខទូរសព្ទរបស់អ្នកសម្របសម្រួលសេវាកម្មរបស់អ្នកនៅកន្លែងដែលមានសុវត្ថិភាព។ ប្រសិនបើអ្នកប្រើប្រាស់អ៊ីមែល ចូរសុំអាសយដ្ឋានអ៊ីមែលរបស់ពួកគេ។ សុំឈ្មោះ និងលេខទូរសព្ទរបស់ប្រធានពួកគេ។ ហៅទូរសព្ទទៅកាន់លេខទូរសព្ទចម្បងរបស់មជ្ឈមណ្ឌលថ្នាក់តំបន់ ប្រសិនបើអ្នកមិនអាចទាក់ទងអ្នកសម្របសម្រួលសេវាកម្មរបស់អ្នក ឬប្រធានរបស់ពួកគេបាននោះទេ។

2. ជួយឱ្យអ្នកសម្របសម្រួលសេវាកម្មរបស់អ្នកអាចស្គាល់ពីអ្នក។

និយាយជាមួយអ្នកសម្របសម្រួលសេវាកម្មរបស់អ្នក ដើម្បីអាចជួយធ្វើឱ្យពួកគេស្គាល់ពីអ្នក។ ប្រាប់ពួកគេអំពីមធ្យោបាយដែលអ្នកចង់ប្រើដើម្បីនិយាយទាក់ទងគ្នា ដូចជាតាមរយៈអ៊ីមែល ទូរសព្ទ ឬសារ។ ប្រាប់ពួកគេអំពីអ្វីៗដែលទាក់ទងនឹងរូបអ្នក ដើម្បីធ្វើឱ្យពួកគេចងចាំអ្នកនៅពេលរៀបចំធ្វើផែនការផ្តល់សេវាកម្មសម្រាប់អ្នក។

3. រក្សាទុកឯកសារទាំងឡាយរបស់អ្នកដែលចេញដោយមជ្ឈមណ្ឌលថ្នាក់តំបន់ ឱ្យមានរបៀបតាមលំដាប់លំដោយ។

រៀបឱ្យមានជាសឺមី ឬសឺមីកងដែលមានឯកសារទាំងឡាយដែលចេញដោយមជ្ឈមណ្ឌលថ្នាក់តំបន់។ នៅរាល់ពេលដែលអ្នកទទួលបានឯកសារ ចូររៀបដាក់វាពីខាងលើ។ ធ្វើដូច្នេះ ពួកវាទាំងអស់នឹងមានរបៀបរៀបរយ។ ប្រសិនបើអ្នកប្រើកំព្យូរទ័រ ចូររក្សាទុកឯកសារចេញដោយមជ្ឈមណ្ឌលថ្នាក់តំបន់នៅក្នុងថតផ្ទុកឯកសារមួយ ក្នុងកំព្យូរទ័ររបស់អ្នក។ ការរៀបចំទុកដាក់ឯកសាររបស់អ្នកឱ្យមានរបៀបមានប្រយោជន៍ដល់អ្នកនៅពេលដែលអ្នកនិយាយជាមួយមជ្ឈមណ្ឌលថ្នាក់តំបន់ឬជាមួយអ្នកដទៃទៀត អំពីតម្រូវការរបស់អ្នក។

4. គិតអំពីតម្រូវការរបស់អ្នក។

គិតអំពីអ្វីដែលអ្នកត្រូវការក្នុងជីវិតរបស់អ្នក។ សរសេរវាទុកសម្រាប់និយាយជាមួយអ្នកសម្របសម្រួលសេវាកម្មរបស់អ្នក។ តម្រូវការរបស់អ្នកនឹងជួយឱ្យអ្នកគ្រប់គ្នាធ្វើការសម្រេចអំពីសេវាកម្មដែលអ្នកត្រូវទទួល។ អ្នកអាចស្នើសុំ “ការប៉ាន់ប្រមាណ” មួយ ដើម្បីជួយឲ្យឃើញនូវអ្វីខ្លះដែលជាតម្រូវការរបស់អ្នក។

5. រៀបចំផែនការនូវសេវាកម្មអ្វីរបស់មជ្ឈមណ្ឌលថ្នាក់តំបន់ ដែលអ្នកនឹងធ្វើការស្នើសុំ។

នៅមុនពេលអ្នកជួបជាមួយមជ្ឈមណ្ឌលថ្នាក់តំបន់ ចូរគិតទុកជាមុនទៅលើសេវាកម្ម និងការជួយគាំទ្រនានាដែលអ្នកចង់បាននិងត្រូវការពីពួកគេ។ ជជែកជាមួយគ្រួសារ មិត្តភក្តិ​ និងអ្នកតស៊ូមតិដើម្បីជួយអ្នក។ ប្រើប្រាស់ សៀវភៅណែនាំស្តីពីការរៀបចំផែនការ IPP ដើម្បីសរសេរវាចូលទាំងអស់។

6. ផ្ញើលិខិតស្នើសុំទៅមជ្ឈមណ្ឌលថ្នាក់តំបន់ដើម្បីរៀបចំកិច្ចប្រជុំ IPP មួយ។

នៅពេលដែលអ្នកស្នើទៅមជ្ឈមណ្ឌលថ្នាក់តំបន់ដើម្បីសុំកិច្ចប្រជុំ IPP ចូរប្រាប់ពួកគេអំពីអ្វីដែលអ្នកនឹងធ្វើការស្នើសុំ។ ការធ្វើដូច្នេះអាចធ្វើឱ្យមជ្ឈមណ្ឌលថ្នាក់តំបន់អាចត្រៀមខ្លួនជាស្រេចក្នុងការសម្រេចចិត្តនៅក្នុងពេលប្រជុំថាតើនឹងត្រូវផ្តល់សេវាកម្មនិងការជួយគាំទ្រនានាដែលអ្នកស្នើសុំដែរឬទេ។ ចូរប្រើលិខិតគំរូនៅក្នុង RULA នៃ H បំពេញបន្ថែម ដើម្បីជួយអ្នកក្នុងការស្នើសុំកិច្ចប្រជុំ IPP មួយ។ នៅពេលដែលអ្នកស្នើសុំកិច្ចប្រជុំមួយ មជ្ឈមណ្ឌលថ្នាក់តំបន់ត្រូវរៀបចំកិច្ចប្រជុំនៅក្នុងអំឡុងពេល 30 ថ្ងៃ រាប់ចាប់តាំងពីពេលដែលពួកគេទទួលលិខិតរបស់អ្នក។ ប្រសិនបើអ្នកត្រូវការកិច្ចប្រជុំ IPP បន្ទាន់មួយ ពួកគេត្រូវរៀបចំកិច្ចប្រជុំនោះនៅក្នុងអំឡុងពេល 7 ថ្ងៃ។

7. ស្នើសុំ និងធ្វើការបញ្ជាក់ថាអ្នកធ្វើសេចក្តីសម្រេចត្រូវតែមានវត្តមានក្នុងកិច្ចប្រជុំរបស់អ្នក។

ច្បាប់បានចែងថារាល់សេចក្ដីសម្រេចទាក់ទងនឹងសេវាកម្ម និងជំនួយគាំទ្រសម្រាប់រូបអ្នកត្រូវធ្វើឡើងក្នុងកិច្ចប្រជុំ ដោយក្រុមអ្នករៀបចំផែនការ។ នេះមានន័យថាមានអ្នកដែលមកពីមជ្ឈមណ្ឌលថ្នាក់តំបន់ ដែលត្រូវបានអនុញ្ញាតឲ្យនិយាយថា “បាន” ឬក៏ “ទេ” តបទៅនឹងការស្នើសុំរបស់អ្នក (“អ្នកធ្វើសេចក្តីសម្រេច”) ត្រូវតែមានវត្តមានក្នុងពេលប្រជុំ។ ជារឿយៗ អ្នកធ្វើសេចក្តីសម្រេចនឹងមិនចូលរួមក្នុងកិច្ចប្រជុំឡើយ លើកលែងតែអ្នកបានស្នើសុំឱ្យគេចូលរួមប្រជុំ។

ពេលខ្លះ ក្រុមអ្នករៀបចំផែនការអាចនឹងគ្រាន់តែ “ផ្តល់អនុសាសន៍លើការផ្តល់មូលនិធិ” សម្រាប់ទទួលសេវាកម្ម និងជំនួយគាំទ្រប៉ុណ្ណោះ។ ឬ មជ្ឈមណ្ឌលថ្នាក់តំបន់អាចនឹងនិយាយថា អ្នកដែលត្រូវធ្វើការសម្រេចចិត្តមិនមានវត្តមានក្នុងកិច្ចប្រជុំ។ ឬមជ្ឈមណ្ឌលថ្នាក់តំបន់អាចនឹងនិយាយថា “គណៈកម្មាធិការ POS” ឬ គណៈកម្មាធិការមួយផ្សេងទៀតត្រូវតែអនុម័តសំណើសុំអ្នក។ ការធ្វើដូចនេះគឺខុសទៅនឹងច្បាប់ ហើយវាអាចមានន័យថាអ្នកនឹងមិនទទួលបានសេវាកម្ម និងជំនួយគាំទ្រទាំងឡាយដែលក្រុមរបស់អ្នកយល់ស្របថាអ្នកគួរតែទទួលបានឡើយ។ ការមានវត្តមានអ្នកធ្វើសេចក្តីសម្រេចក្នុងអង្គប្រជុំមានន័យថាអ្នកអាចទទួលបានសេចក្តីសម្រេចចុងក្រោយទាក់ទងនឹងសេវាកម្ម និងជំនួយគាំទ្រទាំងឡាយដែលអ្នកស្នើសុំក្នុងពេលប្រជុំនោះ។

8. នាំមិត្តភក្តិ អ្នកតស៊ូមតិ ឬអ្នកណាម្នាក់ដែលស្គាល់អ្នក មកជាមួយ។

អ្នកអាចអញ្ជើញអ្នកណាម្នាក់ដែលអ្នកចង់ឱ្យគេចូលរួមក្នុងកិច្ចប្រជុំ IPP របស់អ្នក។ ចូរមានអ្នកណាម្នាក់មកជាមួយអ្នក ដែលគេអាចជួយធ្វើការតស៊ូមតិឱ្យអ្នក។ អ្នកអាចអញ្ជើញអ្នកណាម្នាក់ពីផ្ទះរបស់អ្នក ពីកម្មវិធីពេលថ្ងៃរបស់អ្នក ពីសាលារៀនរបស់កូនអ្នក ឬអ្នកផ្តល់សេវាកម្មណាម្នាក់ផ្សេងទៀត។ អ្នកខ្លះចាប់ផ្តើមអនុវត្តកម្មវិធី “ពួកម៉ាក” ដែលក្នុងនោះពួកគេព្រមព្រៀងគ្នាចូលរួមក្នុងកិច្ចប្រជុំ IPP របស់ពួកគេម្តងម្នាក់ ដើម្បីផ្តល់ការគាំទ្រដល់គ្នា។

9. ចូរប្រាកដថាកិច្ចប្រជុំនោះធ្វើឡើង “ដោយផ្តោតលើបុគ្គល”។

ការផ្តោតលើបុគ្គលមានន័យថាអ្នកចូលរួមយ៉ាងសកម្មក្នុងកិច្ចប្រជុំនោះ។ វាត្រូវតែជាជម្រើស ការពេញចិត្ត និងតម្រូវការផ្សងៗរបស់អ្នក ដែលត្រូវនាំមុខក្នុងការពិភាក្សានិងការរៀបចំផែនការនោះ។ វាមិនគួរផ្តោតទៅលើប្រភេទសេវាកម្មដែលអាចមាន ឬសេវាកម្មដែលត្រូវបានគេផ្តល់ឱ្យ “ជាធម្មតា” នោះឡើយ។ ពិភាក្សាអ្វីដែលអ្នកពេញចិត្ត និងអ្វីដែលអ្នកមិនពេញចិត្ត ការជួយគាំទ្រដែលអ្នកត្រូវការ និង “អ្វីដែលអ្នកត្រូវការចាំបាច់” នាពេលប្រជុំ IPP ។ អ្នកទាំងអស់គ្នាគួរនិយាយពាក្យពេចន៍ដែលអ្នកយល់បាន។ អ្នកអាចសរសេរវាចូលក្នុងក្រដាសធំៗដែលដាក់តាមជញ្ជាំង ដើម្បីឱ្យអ្នកគ្រប់គ្នាអាចបន្តពិភាក្សាលើវា។ អ្នកដែលមានវត្តមានក្នុងកិច្ចប្រជុំគួរធ្វើការងារជាក្រុមដើម្បីគិតចេញនូវរបៀបប្រកបដោយភាពច្នៃប្រឌិតក្នុងការបំពេញតាមគោលបំណង និងក្តីសុបិនរបស់អ្នក។ កុំខ្លាចក្នុងការសួរសំណួរ។ គ្មានសំណួរណាដែលងាយស្រួលពេកនោះទេ។

10. ចូរប្រាកដថាអ្នកយល់អំពីអ្វីដែលគេនិយាយ បើទោះបីជាអ្នកមិនចេះនិយាយភាសាអង់គ្លេសក៏ដោយ។

កិច្ចប្រជុំ IPP គឺស្តីអំពីរូបអ្នក (ឬកូនរបស់អ្នក)។ វាជារឿងសំខាន់ណាស់ដែលអ្នកត្រូវយល់ពីអ្វីដែលគេនិយាយ។ ប្រសិនបើអ្នកមិនចេះនិយាយភាសាអង់គ្លេសបានល្អទេ មជ្ឈមណ្ឌលថ្នាក់តំបន់ត្រូវមានអ្នកបកប្រែភាសាមួយនៅទីនោះ ហើយគេបកប្រែឯកសារសំខាន់ៗសម្រាប់អ្នក។

11. កត់ត្រានូវការព្រមព្រៀងទាំងឡាយនិងការមិនបានព្រមព្រៀងគ្នានានា។

នៅមុនពេលបញ្ចប់កិច្ចប្រជុំ ចូរពិនិត្យឡើងវិញលើអ្វីដែលអ្នកបានព្រមព្រៀងនិងមិនបានព្រមព្រៀង។ ធ្វើដូច្នេះ អ្នកនឹងមិនភ្លេចវាទេ។ អ្នកឬអ្នកណាម្នាក់ផ្សេងទៀតគួរកត់ត្រាវាទុក។ នាពេលបញ្ចប់កិច្ចប្រជុំ មជ្ឈមណ្ឌលថ្នាក់តំបន់ត្រូវផ្តល់នូវបញ្ជីនៃសេវាកម្មទាំងឡាយដែលអ្នកទាំងពីរភាគីបានព្រមព្រៀងគ្នា។ បញ្ជីនោះត្រូវតែផ្តល់នូវសេចក្តីលម្អិតអំពីសេវាកម្មនានាដែលមជ្ឈមណ្ឌលថ្នាក់តំបន់នឹងបង់ថ្លៃឱ្យ។

12. បំពេញឯកសារ IPP។

ចូរប្រាកដថាឯកសារ IPP មានបង្ហាញនូវ៖ (1) សេវាកម្ម និងជំនួយគាំទ្រអ្វីខ្លះដែលអ្នកនឹងទទួលបាន (ប្រភេទ និងចំនួន) (2) នរណានឹងផ្តល់សេវាកម្មទាំងនោះ និង (3) ពេលវេលាដែលសេវាកម្មទាំងនោះនឹងចាប់ផ្តើម។ ប្រសិនបើសេវាកម្មទាំងនោះមិនអាចចាប់ផ្តើមភ្លាមៗទេ នោះ ឯកសារ IPP ត្រូវតែនិយាយអំពីជំហានអ្វីខ្លះដែលនឹងត្រូវធ្វើ អ្នកដែលត្រូវទទួលខុសត្រូវអនុវត្តជំហាននីមួយៗ និងតារាងពេលវេលាសម្រាប់បញ្ចប់ជំហាននីមួយៗ។ ច្បាប់ចែងថាកិច្ចការទាំងនេះត្រូវតែមានក្នុង IPP។

13. ចុះហត្ថលេខាលើឯកសារ IPP (ឬបញ្ជីនៃសេវាកម្មទាំងឡាយដែលបានព្រមព្រៀងគ្នា) ក្នុងពេលប្រជុំ។

ឯកសារ IPP ដែលអ្នកចុះហេត្ថលេខា គួររាយនូវគោលបំណង និងវត្ថុបំណងជាក់លាក់ និងសេវាកម្មទាំងឡាយដែលអ្នកនឹងទទួលបាន។ កុំចុះហត្ថលេខាលើឯកសារណាដែលគ្រាន់តែសរសេរថាអ្នកយល់ព្រមទៅនឹង“ផែនការដែលបានស្នើឡើង”។ មជ្ឈមណ្ឌលថ្នាក់តំបន់អាចមិនសរសេរឯកសារ IPP ទាំងស្រុងនៅពេលប្រជុំនោះទេ។ ប៉ុន្តែពួកគេត្រូវផ្តល់ដល់អ្នកនូវបញ្ជីមួយស្តីពីសេវាកម្មដែលបានព្រមព្រៀងគ្នា។ បន្ទាប់មក មជ្ឈមណ្ឌលថ្នាក់តំបន់អាចវាយបញ្ចូល IPP នៅលើទម្រង់បែបបទដែលខ្លួនប្រើប្រាស់ និងផ្ញើវាឱ្យទៅអ្នក។ ចូរចងចាំថាអ្នកអាចយល់ព្រមទៅលើផ្នែកខ្លះនៃ IPP និងអាចសរសេរបញ្ជាក់ថាអ្នកមិនយល់ព្រមទៅលើផ្នែកដទៃផ្សេងទៀតបាន។ អ្នកអាចយល់ព្រមទៅលើសេវាកម្មមួយចំនួននិងអាចសរសេរ ថាអ្នកមិនយល់ព្រមជាមួយនឹងការមិនទទួលសេវាកម្មដទៃផ្សេងទៀតដែលអ្នកបានស្នើសុំក្នុង IPP បាន។

ប្រសិនបើអ្នកនិងមជ្ឈមណ្ឌលថ្នាក់តំបន់មិនអាចឈានដល់ការព្រមព្រៀងគ្នាលើសេចក្តីសម្រេចចុងក្រោយទាក់ទងនឹងបញ្ហាណាមួយទេ នោះអ្នកអាចសុំឱ្យមានកិច្ចប្រជុំ IPP ជាលើកទីពីរនៅក្នុងអំឡុងពេល 15 ថ្ងៃ។ នៅក្នុងពេលប្រជុំជាលើកទីពីរនេះ អ្នកមិនគួររង់ចាំគណៈកម្មាធិការ ឬប្រធានឲ្យធ្វើសេចក្តីសម្រេចឡើយ។ អ្នកគួរតែអាចនិយាយដោយផ្ទាល់ទៅកាន់អ្នកធ្វើសេចក្តីសម្រេចនៅក្នុងកិច្ចប្រជុំជាលើកទីពីរនេះ។ ប្រសិនបើមានចម្លើយថា “ទេ” នៅក្នុងកិច្ចប្រជុំលើកទីមួយ នោះអ្នកមិនចាំបាច់ត្រូវទៅកាន់កិច្ចប្រជុំជាលើកទីពីរទេ ប៉ុន្តែអ្នកអាចសុំឱ្យមានការជូនដំណឹងជាលាយលក្ខណ៍អក្សរនិងអំពីរបៀបប្តឹងតវ៉ា។

14. ទទួលសេចក្តីជូនដំណឹងជាលាយលក្ខណ៍អក្សរចំពោះការបដិសេធណាមួយ។

ប្រសិនបើមជ្ឈមណ្ឌលថ្នាក់តំបន់ឆ្លើយថា “ទេ” ទៅនឹងសេវាកម្មថ្មីណាមួយដែលអ្នកបានស្នើសុំ គេត្រូវប្រគល់លិខិត (សេចក្តីជូនដំណឹងជាលាយលក្ខណ៍អក្សរ) ស្តីពីការបដិសេធនៅក្នុងអំឡុងពេល 5 ថ្ងៃ។ ប្រសិនបើមជ្ឈមណ្ឌលថ្នាក់តំបន់ឆ្លើយថាគេចង់ផ្លាស់ប្តូរឬបញ្ចប់សេវាកម្មដែលអ្នកកំពុងទទួលបាន នោះគេត្រូវជូនដំណឹងអ្នកជាលាយលក្ខណ៍អក្សរក្នុងអំឡុងពេល 30 ថ្ងៃ នៅមុនការផ្លាស់ប្តូរឬការកាត់ផ្តាច់សេវាកម្ម។

ប្រសិនបើមជ្ឈមណ្ឌលថ្នាក់តំបន់គិតថាវាមាន “ការយល់ព្រមទៅវិញទៅមក” នៅពេលគេបដិសេធមិនផ្តល់សេវាកម្មថ្មីណាមួយ ឬការផ្លាស់ប្តូរ កាត់បន្ថយ ឬបញ្ឈប់ សេវាកម្មណាមួយដែលអ្នកកំពុងទទួលបានរួចហើយ នោះពួកគេអាចមិនចាំបាច់ផ្ញើលិខិតឡើយ។ “ការយល់ព្រមទៅវិញទៅមក” មានន័យថាអ្នកបានសរសេរឬចុះហត្ថលេខាទៅលើអ្វីមួយដែលនិយាយថាអ្នកយល់ព្រម។ ប្រសិនបើអ្នកមិនបានសរសេរឬចុះហត្ថលេខាលើអ្វីមួយដែលនិយាយថាអ្នកយល់ព្រមទេ នោះមជ្ឈមណ្ឌលថ្នាក់តំបន់ត្រូវផ្ញើលិខិតមួយទៅអ្នកដោយនិយាយថាគេបានជឿជាក់ដោយសុទ្ធចិត្តថាអ្នកយល់ព្រម។ លិខិតនោះត្រូវនិយាយពីមូលហេតុដែលធ្វើឱ្យមជ្ឈមណ្ឌលថ្នាក់តំបន់ជឿជាក់ថាអ្នកយល់ព្រម ចំណាត់ការអ្វីដែលគេកំពុងធ្វើ និងមូលហេតុរបស់វា និងរបៀបដែលអ្នកអាចសំដែងការមិនយល់ព្រមនិងការប្តឹងតវ៉ា។

15. ប្តឹងតវ៉ាក្នុងករណីមានអ្វីមួយមិនដំណើរការ។

ប្រសិនបើអ្នកមិនយល់ព្រម ចូរធ្វើការប្តឹងតវ៉ាឱ្យបានលឿនក្នុងករណីដែលអ្នកចង់ជំទាស់ជាមួយនឹងសេចក្តីសម្រេចរបស់មជ្ឈមណ្ឌលថ្នាក់តំបន់។ អ្នកត្រូវប្តឹងតវ៉ានៅក្នុងអំឡុងពេល 30 ថ្ងៃ ប្រសិនបើអ្នកចង់ឱ្យសេវាកម្មទាំងឡាយដែលអ្នកកំពុងទទួលបានស្ថិតនៅដដែលក្នុងអំឡុងពេលនៃការប្តឹងតវ៉ានេះ។ នេះត្រូវបានគេហៅថា “ការបង្អង់សម្រាប់ការទទួលបានជំនួយដែលត្រូវបានបង់ថ្លៃ”។ ប្រសិនបើវាជាការបដិសេធមិនផ្តល់សេវាកម្មថ្មីមួយ ឬប្រសិនបើអ្នកមិនត្រូវការការបង្អង់សម្រាប់ការទទួលបានជំនួយដែលត្រូវបានបង់ថ្លៃនោះទេ នោះអ្នកមានរយៈពេល 60 ថ្ងៃ ក្នុងការប្តឹងឧទ្ធរណ៍។ ប្រសិនបើមជ្ឈមណ្ឌលថ្នាក់តំបន់ពន្យារពេលមិនធ្វើសេចក្តីសម្រេចទេ ចូរទទូចសុំឱ្យគេធ្វើសេចក្តីសម្រេច ឬធ្វើការចាត់ទុកការពន្យារពេលនេះជាករណីបដិសេធ ដើម្បីឱ្យអ្នកធ្វើការប្តឹងតវ៉ា។

16. ដាក់ពាក្យបណ្តឹងក្នុងករណីមានអ្វីមួយមិនដំណើរការ។

ប្រសិនបើអ្នកមិនទទួលបានសេចក្តីជូនដំណឹងឬលិខិតបដិសេធណាមួយនោះទេ ចូរទាក់ទងទៅអ្នកសម្របសម្រួលសេវាកម្មរបស់អ្នក។ ប្រសិនបើអ្នកនៅតែមិនទទួលបានការជូនដំណឹងឬលិខិតទៀត ចូរដាក់ពាក្យបណ្តឹងរដ្ឋបាល (ដែលគេហៅថា “បណ្តឹង 4731”) សម្រាប់ការមិនបានទទួលសេចក្តីជូនដំណឹងឬលិខិត។ ប្រសិនបើមជ្ឈមណ្ឌលថ្នាក់តំបន់មិនផ្តល់សេវាកម្មដែលបានព្រមព្រៀងគ្នានោះទេ ចូរដាក់ពាក្យបណ្តឹង “4731”។អានបន្ថែមអំពីបណ្តឹងតវ៉ា និងពាក្យបណ្តឹងផ្សេងៗក្នុង ជំពូកទី 10 ស្តីពីសិទ្ធិនៅក្នុងច្បាប់ Lanterman