Txoj Cai CARE yog dab tsi?

California muaj qee txoj cai lij choj tshiab txog mob puas siab puas ntsws. Ib txoj ntawm cov cai lij choj tshiab hu ua Txoj Cai Pab Cuam Rau Zej Tsoom, Kev Kho Kom Zoo Rov Los, thiab Kev Txhawb Zog (CARE, Community Assistance, Recovery and Empowerment Court)

Txoj Cai CARE muaj ntau kauj ruam. Koj yuav tsum mus rau tom hauv ntej ntawm tus kws txiav txim ntau-ntau zaus. Koj lub cheeb tsam nroog lub tsev hauj lwm saib xyuas mob nkeeg raws tus cwj pwm yuav tsum tau kuaj xyuas seb koj puas muaj qee yam kev xiam oob qhab rau fab kev mob nkeeg puas siab puas ntsws.

1. Muaj ib daim foos uas pib tus txheej txheem ntawm Txoj Cai CARE. Muaj coob leej, xws li koj tsev neeg, ib tug neeg uas koj nrog nyob, los sis tub ceev xwm tuaj yeem sau tau daim foos.
2. Thaum lawv xa daim foos tuaj, lub cheeb tsam nroog yuav kuaj xyuas seb koj puas tsim nyog. Tsuas yog qee leej thiaj li tsim nyog xwb.
   • Koj yuav tsum muaj qee yam mob mas thiaj li tsim nyog rau: Txawm tias tus mob puas siab puas ntsws schizophrenia, tus kab ob tog hom I uas muaj cov tsos mob ntawm kev puas siab puas ntsws, los sis lwm hom mob puas hlwb.
   • Muaj ntau yam tsis tsim nyog rau, xws li kev ruam qauj los sis teeb meem ob sab uas tsis muaj cov yam ntxwv ntawm kev puas siab puas ntsws.
3. Tus kws txiav txim hais tias seb koj puas tsim nyog rau.
4. Yog tias tus kws txiav txim xav hais tias koj tsim nyog rau, ces muaj ob txoj hauv kev uas ua tau:
   • Kev Pom Zoo Ntawm CARE: Ua ntej tshaj, koj thiab koj tus kws lij choj tuaj yeem ua kom muaj kev pom zoo nrog lub cheeb nroog thiab tus kws txiav txim. Qhov kev pom zoo no yuav yog ib qhov kev npaj ntev ib xyoos rau tus mob puas siab puas ntsws. Tus kws txiav txim plaub yuav tsum pom zoo rau qhov kev pom zoo ntawd.
   • Kev Npaj Ntawm CARE: Yog tias txhua tus tsis pom zoo, ces lub tsev hais plaub tuaj yeem tsim ib qhov kev npaj rau koj.
5. Txoj kev npaj no tuaj yeem muaj kev kho mob, tsev nyob, thiab tshuaj nyob rau haud.
   • Tej zaum koj yuav tau tos ib pliag ua ntej koj thiaj li tau txais vaj tse nyob los sis lwm yam kev txhawb nqa.
   • Tus kws txiav txim plaub ntug yuav hais kom koj noj tshuaj. Yog tias koj tsis noj cov tshuaj, ces lawv yuav tsis yuam kom koj noj thiab. Tab sis, yog tias koj tsis noj cov tshuaj, ces lub tsev hais plaub tuaj yeem hais tias koj tsis ua raws li lawv qhov kev npaj.
6. Yog tias koj tsis ua raws li txoj phiaj xwm thiab koj muaj lub rooj txiav txim txog kev xaiv tus neeg saib xyuas, tsoom fwv yuav pom zoo kom xaiv tus neeg saib xyuas rau koj. Ib qhov kev ceev chaw nyob txhais hais tias lwm tus neeg yuav tau tsim kev xaiv txog koj qhov kev kho mob puas siab puas ntsws thiab qhov chaw uas koj nyob. Piv txwv li, lawv tuaj yeem xa koj mus nyob rau hauv ib qhov chaw xauv cia thiab yuav tseev kom koj noj cov tshuaj kho mob puas hlwb.

Txoj Cai CARE yog ib txoj hauv kev rau lwm tus, xws li tus kws txiav txim, yuav qhia koj txog yam yuav ua. Tej zaum koj yuav tsis muaj peev xwm xaiv thiab tswj tau tag nrho koj lub neej.

SB 43 yog dab tsi?

Qauv Txoj Cai Hauv Xab Phas (SB, Senate Bill) 43 yog ib txoj cai lij choj hais txog mob nkeeg puas siab puas ntsws hauv California. Txoj cai lij choj yuav hloov lub ntsiab lus ntawm “Kev Tsis Taus Qib Hnyav.”

“Kev Tsis Taus Qib Hnyav” yog ib ntawm cov hauv kev uas koj tuaj yeem raug tso rau hauv kev tuav los sis kev saib xyuas yam tsis xav tau.

Ib qho kev kuav cia tsis raws kev yeem yog qhov 5150. Qhov 5150 tso cai rau lub cheeb nroog kuav koj cia tawm tsam rau qhov uas koj lub siab nyiam hauv ib qhov chaw xauv tseg ntev txog 72 teev (3 hnub). Tom qab lub sijhawm ntawd, muaj qee leej kuj raug tso tawm. Qee leej yuav xaiv qhov nyob hauv tsev kho mob. Qee leej kuj raug kuav cia ntev dua nyob rau lwm yam kev kuav cia.

Yog tias koj muaj raws li tus qauv rau Kev Tsis Taus Qib Hnyav, ces koj yuav tuaj yeem raug muab tso rau ntawm qhov kev tuav tseg 5150. Ib tug tub ceev xwm los sis ib tug neeg sawv cev hauv cheeb nroog tuaj yeem muab koj tso rau qhov kev kuav cia ntawd.

SB 43 hloov tus qauv rau Kev Tsis Taus Qib Hnyav nyob rau ob txoj kev:

1. Nws yuav ntxiv teeb meem kev siv yeeb tshuaj hnyav heev. Tam sim no yog tias koj muaj teeb meem kev siv yeeb tshuaj hnyav heev, ces koj tuaj yeem muaj raws li tus qauv ntawm Kev Tsis Taus Qib Hnyav.
2. Nws kuj hais tias yog koj tsis tuaj yeem saib xyuas tau koj tus kheej qhov kev kho mob lossis kev nyab xeeb ntawm tus kheej, ces koj tuaj yeem muaj raws li tus qauv ntawm Kev Tsis Taus Qib Hnyav.

Kev Tsis Taus Qib Hnyav muaj ob feem:

1. Koj yuav tsum muaj teeb meem kev puas siab puas ntsws los sis teeb meem kev siv yeeb tshuaj hnyav.
2. Thiab, vim muaj tus xwm txheej ntawd, koj thiaj li tsis tuaj yeem ua tau qee yam:
   • Saib xyuas koj tus kheej tej kev xav tau sab zaub mov, khaub ncaws hnav los sis chaw nyob, los sis
   • Saib xyuas koj tus kheej txoj kev nyab xeeb thiab kev kho mob.

Txoj cai lij choj no txhais tau hais tias muaj ntau leej yuav raug muab tso rau hauv cov kev kuav tseg thiab kev ceev chaw nyob. Txoj cai lij choj no txhais tau hais tias muaj ntau leej dua yuav muaj kev xaiv tsawg dua rau lawv lub neej.