I. ការយល់អំពីកម្មវិធីបុគ្គល និងគ្រួសារ

តើ FEMA អាចជួយខ្ញុំយ៉ាងដូចម្តេចបន្ទាប់ពីគ្រោះមហន្តរាយ?

ផ្ទះរបស់អ្នកត្រូវបានធ្វើឲ្យខូចខាតដោយគ្រោះធម្មជាតិ ហើយអ្នកឆ្ងល់ថា​តើមានអ្វី​បន្ទា​ប់​ទៀត។ ទីភ្នាក់ងារ​រដ្ឋា​ភិបាល​ដែលអាចជួយអ្នកបន្ទាប់ពីគ្រោះមហន្តរាយគឺទីភ្នាក់ងារគ្រប់គ្រងអាសន្នសហព័ន្ធ (Federal Emergency Management Agency, FEMA)។ ប្រាក់សម្រាប់បុគ្គល និងគ្រួសារប្រែជា​មាននៅ​ពេល​ដែល​ការ​ប្រកាសរបស់​ប្រ​ធា​នា​ធិប​តី​ត្រូវបានធ្វើឡើងសម្រាប់តំបន់របស់អ្នក។ បញ្ជីនៃ​ការប្រកាស​អំពីគ្រោះមហន្តរាយទាំងអស់។

កម្មវិធីបុគ្គល និងគ្រួសារ (Individuals and Households Program, IHP) ជួយ​អ្នករស់រានមានជីវិតងើបឡើង​វិញពី​គ្រោះ​មហន្តរាយដោយផ្តល់សេវាកម្មផ្ទាល់ និង​ប្រាក់ដើម្បីធ្វើការជួសជុលក្រោយគ្រោះមហន្តរាយ។ ទោះជាយ៉ាងណាក៏​ដោយ វាជារឿងសំខាន់ដែលត្រូវយល់ថា ជំនួយ IHP មាន​ស​ម្រាប់តែបំពេញតម្រូវការមូលដ្ឋានរបស់អ្នកប៉ុណ្ណោះ។ គោល​ដៅនៃមូលនិធិ FEMA គឺដើម្បីធ្វើឱ្យផ្ទះរបស់អ្នកមានសុវត្ថិភាពក្នុងការរ​ស់នៅ មិនមែនដើម្បីស្ដារផ្ទះ​របស់អ្នក​ឱ្យ​ដូចស្ថានភាពដើមដូ​ចមុនគ្រោះ​ម​ហ​ន្ត​រា​យ​នោះទេ។

ប្រសិនបើអ្នកទទួលបានជំនួយប្រាក់ចំណូលដូចជា ប្រាក់ចំណូលរបបសន្តិ​សុខ​សង្គម (SSI/SSDI) មូលនិធិ FEMA មិន​ត្រូវបានចាត់ទុកថាជាប្រា​ក់ចំណូល​នោះទេ។ ការទទួលជំនួយហិរញ្ញវត្ថុ FEMA នឹងមិនប៉ះពាល់ដល់ភាពមាន​សិទ្ធិទទួល​បាន​ជំនួយពី​សហ​ព័ន្ធ​ផ្សេងទៀតទេ។

តើជំនួយ IHP គ្របដណ្តប់លើអ្វីខ្លះ?

ជំនួយ IHP ចែកចេញជាពីរប្រភេទ៖ ជំនួយលំនៅឋាន និងជំនួយតម្រូវការផ្សេងៗ។

1. ជំនួយលំនៅឋាន

ជំនួយលំនៅឋានអាចត្រូវបានប្រើប្រាស់សម្រាប់៖

• ការជួសជុលផ្ទះ
• ការជួល បើអ្នកត្រូវជួលកន្លែងមួយផ្សេងទៀត ព្រោះផ្ទះរបស់អ្នក​មិនមាន​សុវត្ថិ​ភាពប​ន្ទា​ប់​ពីគ្រោះ​មហន្តរាយ
• សណ្ឋាគារ ឬកន្លែងស្នាក់នៅបណ្តោះអាសន្ន ប្រសិនបើផ្ទះរបស់អ្នកមិន​មានសុ​វត្ថិ​ភាពក្នុងការស្នាក់នៅ​ក្នុង​​​នោះ។ FEMA ក៏អាចផ្តល់ឱ្យអ្នកនូវលំនៅឋាន​បណ្តោះ​អា​សន្ន​នៅក្នុងរថយន្តសណ្តោង ឬផ្ទះចល័តក្នុងអំឡុង​ពេលនេះ​ផង​ដែរ​។
• ការប្ដូរផ្ទះរបស់អ្នក ប្រសិនបើវាត្រូវបានបំផ្លាញនៅក្នុងគ្រោះមហន្តរាយ។

2. ជំនួយតម្រូវការផ្សេងៗ

ជំនួយតម្រូវការផ្សេងៗ (Other Needs Assistance, ONA) អាចជួយរ៉ាប់​រង​លើ​តម្រូវការផ្សេងទៀតដែលមិនមែន​ជា​ការ​ជួសជុលផ្ទះ។ ប្រភេទនេះផ្តល់នូវភាពបត់បែន ដែលអនុញ្ញាតឱ្យអ្នកទទួលបានប្រាក់ដើម្បី​ជួយ​ផ្គត់ផ្គង់តម្រូវការ​ហិរញ្ញ​វត្ថុលើសពីការចំណាយលើផ្ទះបន្ទាប់​ពីគ្រោះមហន្ត​រាយ។ ជំនួយតម្រូវការផ្សេងៗមួយចំនួនត្រូវបានផ្តល់ជាប្រាក់​កម្ចី​រយៈ​ពេល​វែង​ដែលមានការប្រាក់ទាបពីរដ្ឋបាលអាជីវកម្មខ្នាតតូច។ ប្រាក់កម្ចីទាំងនេះអាចត្រូវបានប្រើសម្រាប់​ការចំណាយលើការរើចេញ និងការរ​ក្សា​ទុកដាក់ ជំនួយក្នុងការដឹកជញ្ជូន ការធានារ៉ាប់រងទឹកជំនន់ ឬការប្តូរថ្មី ឬជួស​ជុល​ទ្រព្យសម្បត្តិផ្ទាល់ខ្លួនចាំបាច់។

មានប្រភេទផ្សេងទៀតនៃជំនួយតម្រូវការផ្សេងៗដែលមិនអាស្រ័យលើរដ្ឋបាលអាជីវកម្មខ្នាតតូច ឧទាហរណ៍ ការ​ចំណាយ​សម្រាប់ពិធីបុណ្យសព វិក្កយបត្រ​វេជ្ជ​សាស្ត្រ និងទន្តសាស្ត្រ ជំនួយតម្រូវការសំខាន់ចាំបាច់ខ្លាំង (តម្រូវ​ការ​ប្រចាំថ្ងៃ​ជា​​មូលដ្ឋាននៃទឹក អាហារ ឱសថ របស់របរសម្រាប់រក្សាអនាម័យ) ជំនួយក្នុង​ការសម្អាត និង/ឬដកចេញ ការថែទាំកុមារ។

II. ភាពមានសិទ្ធិទទួលបាន

កម្មវិធីបុគ្គល និងគ្រួសារ (IHP) មានលក្ខខណ្ឌតម្រូវនៃភាពមាន​សិទ្ធិទទួល​បាន​​ជាក់​លាក់​។ លក្ខខណ្ឌតម្រូវទូទៅ​ដើម្បីទទួល​បានជំនួយ IHP គឺ៖

1. ស្ថានភាពសញ្ជាតិ៖

អ្នកដាក់ពាក្យត្រូវតែជាពលរដ្ឋអាមេរិក ជនជាតិមិនមែនជាពលរដ្ឋ ឬអ្នកមិ​ន​មែនជាពលរដ្ឋដែលមានលក្ខណៈ​សម្បតិ្ត​​គ្រប់គ្រាន់។ អ្នកមិនមែនជាពលរដ្ឋដែលមានលក្ខណៈសម្បតិ្តគ្រប់គ្រាន់រួមមាន​និវេសនជនអចិន្ត្រៃយ៍​ស្រប​ច្បាប់ (អ្នកកាន់ប័ណ្ណបៃតង) ជនសុំសិទ្ធិជ្រកកោន ជនភៀស​ខ្លួ​ន ជនមិនមែនជាពលរដ្ឋដែលការនិរទេសកំពុងត្រូវ​បាន​តម្កល់ទុក ឬជន​មិន​មែនជាពលរដ្ឋដែលត្រូវបានដោះលែងមុនកំណត់ដោយមានលក្ខខណ្ឌឱ្យចូលទៅនៅក្នុង​សហរដ្ឋអាមេរិកយ៉ាងហោចណាស់មួយឆ្នាំ។

ជនដែលមិនមែនជាពលរដ្ឋអាចនឹងនៅតែអាចទទួលបានជំនួយប្រសិនបើពួកគេជាមាតាបិតា ឬអាណាព្យាបាល​ដែល​ដាក់​ពាក្យសុំជំនួសកូនជាអនីតិជន ដែលជា​ពលរដ្ឋអាមេរិក ហើយរស់នៅក្នុងគ្រួសារតែមួយ។

2. ការផ្ទៀងផ្ទាត់អត្តសញ្ញាណ៖

FEMA ត្រូវតែផ្ទៀងផ្ទាត់អត្តសញ្ញាណរបស់អ្នកដាក់​ពាក្យសុំជាមួយនឹង​លេខរ​បប​សន្តិសុខសង្គម (SSN) ដែលមាន​សុពល​ភាព​មុនពេលពួក​គេអាច​ផ្តល់​ជំ​នួយជូនបាន។ ប្រសិនបើកំពុងដាក់ពាក្យជំនួសឱ្យកូនជាអនីតិជន FEMA នឹងត្រូវការច្បាប់​ចម្លងនៃ​សំបុត្រកំណើតរបស់កូន និងច្បាប់ចម្លងនៃប័ណ្ណរបបសន្តិសុខ​សង្គម​របស់​កូន ឬសំណុំ​ឯកសារពីរដ្ឋបាលរបបសន្តិសុខសង្គម (SSA)។

3. ការធានារ៉ាប់រង

FEMA មានបំណងជួយដល់អ្នកដែលមិនមានការធានារ៉ាប់រង ឬមានការធា​នា​រ៉ាប់រងមិនគ្រប់គ្រាន់។ ប្រសិនបើ​អ្នក​មិនមានការធានារ៉ាប់រងផ្ទះ ឬការធានារ៉ាប់រងរបស់អ្នកជួលទេ នោះអ្នកមិនមានធានារ៉ាប់រងទេ។ ប្រសិនបើ​អ្នក​មានការធានារ៉ាប់រងផ្ទះ ឬការធានារ៉ាប់រងរបស់អ្នកជួលខ្លះ ប៉ុ​ន្តែ​​មិនបានទទួលគ្រប់គ្រាន់ពីការទាមទារសំណង​របស់អ្នកដើម្បីរ៉ាប់រង​លើកា​រ​ចំណាយ និងតម្រូវការច្រើនដែលបណ្តាលមកពីគ្រោះមហន្តរាយទេ នោះអ្នក​មាន​ការ​ធានា​រ៉ាប់រងមិនគ្រប់គ្រាន់។ អ្នកត្រូវតែជូនដំណឹងដល់ FEMA អំពីការរ៉ាប់រងរបស់ក្រុមហ៊ុនធានារ៉ាប់រង​ទាំ​ង​អស់​ដែលមានសម្រាប់អ្នក ហើយផ្តល់សំណុំឯកសារនៃការទូទាត់​ធានារ៉ាប់រង​របស់អ្នក ឬប្រាក់ដែលអ្នកបាន​ទទួល​សម្រាប់​ការជួសជុល។

4. ភស្តុតាងនៃការចូលតាំងនៅ – ម្ចាស់ផ្ទះ និងអ្នកជួលផ្ទះ

អ្នកត្រូវតែបង្ហាញភស្តុតាងថា អ្នកកាន់កាប់ជាកម្មសិទ្ធិ ឬរស់នៅក្នុងផ្ទះ ឬ​អា​ផាតមិនដែលបានខូចខាត ហើយ​បញ្ជាក់ថាវាជាផ្ទះ ឬអាផាតមិនតែ​មួយគត់​របស់អ្នក។ FEMA នឹងមិនជួយជាមួយនឹងសម្រាប់ផ្ទះលំហែវិស្សមកាល ឬអចលនទ្រព្យ​ជួ​ល​រយៈពេលខ្លីឡើយ។ ភស្តុតាងនេះមិនត្រូវបានទាមទារសម្រាប់អ្នកដែលកំពុងស្វែងរកជំនួយ​ជាមួយ​​នឹង​ការដឹកជញ្ជូន ថ្លៃចំណាយបុណ្យសព ថ្លៃវេជ្ជសាស្រ្ត និង/ឬថ្លៃទន្តសាស្ត្រ កា​រ​ថែទាំកូន និងជំនួយលើតម្រូវ​ការ​សំខាន់បំផុតទេ។

ប្រសិនបើ FEMA មិនអាចផ្ទៀងផ្ទាត់ភាពជាកម្មសិទ្ធិករ ឬការចូលតាំងនៅ​ក្នុង​ផ្ទះរបស់អ្នកបានទេ វាអាចនឹង​ទាមទារ​ឯកសារ​បន្ថែមពីអ្នក។

អ្នកជួលផ្ទះ៖ ដើម្បីបង្ហាញភស្តុតាងនៃ​ការកាន់​កាប់ FEMA អាចស្នើសុំឯកសារមួយក្នុង​ ចំណោ​មឯកសារខាងក្រោម៖

ម្ចាស់ផ្ទះ៖ ដើម្បីបង្ហាញភស្តុតាងនៃភាពជាកម្មសិទ្ធិករ FEMA អាចនឹងស្នើសុំឯកសារមួយក្នុងចំណោមឯកសារខាងក្រោម៖

កិច្ចព្រមព្រៀងជួល ឬកិច្ចព្រមព្រៀង​លំនៅ​ឋានរបស់អ្នក បង្កាន់ដៃថ្លៃជួលផ្ទះ វិក្កយបត្រសេវាសាធារណៈ ចុងសន្លឹកប័ណ្ណបើកប្រាក់ខែ របាយការណ៍ធនាគារ ឬកាតឥណទាន ប័ណ្ណបើកបរ អត្តសញ្ញាណប័ណ្ណរដ្ឋ ឬលេខ​សម្គាល់អ្នកបោះឆ្នោតរបស់អ្នក សេចក្តីថ្លែងការណ៍របស់មន្ត្រីសាធារណៈ វិក្កយបត្ររបស់អ្នកផ្តល់សេវាកម្មវេជ្ជសាស្រ្ត ឯកសារអង្គការសេវាសង្គមកិច្ច ការចុះបញ្ជីយានយន្ត លិខិត ឬបញ្ញើប្រៃសណីយ៍ដែល​បានដឹក​ជូនទៅកាន់អាសយដ្ឋាន​របស់អ្នក​ពី ​និ​យោជក មន្ត្រីសាធារណៈ អង្គការ​សេវាសង្គមកិច្ច សាលារៀនក្នុងតំបន់ ឬមណ្ឌ​ល​សិក្សាធិការ ម្ចាស់កម្មសិទ្ធិ ឬអ្នកគ្រប់គ្រងទីចំណតផ្ទះចល័ត

លិខិតផ្ទេរកម្មសិទ្ធិ ឬប្លង់កម្មសិទ្ធរបស់អ្នក ឯកសារបញ្ចាំ ឯកសារធានារ៉ាប់រងរបស់ម្ចាស់ផ្ទះ បង្កាន់ដៃ ឬវិក្កយបត្របង់ពន្ធលើអចលនទ្រព្យ វិញ្ញាបនបត្រសម្គាល់ម្ចាស់អចលនវត្ថុ ឬប្លង់​កម្មសិទ្ធិផ្ទះ​ដែលបានផលិត កិច្ចសន្យាទិញផ្ទះ លិខិតបណ្តាំមរតក និងមរតកសាសន៍ចុងក្រោយ (ជាមួយ​សំបុត្រ​មរណៈភាព) ដាក់ឈ្មោះអ្នកជាទាយាទស្នងទ្រព្យសម្បត្តិ បង្កាន់ដៃសម្រាប់ថ្លៃជួសជុល ឬថែទាំក្នុងទ្រង់ទ្រាយធំដែល​ចុះកាលបរិច្ឆេទ​ក្នុង​រយៈពេល 5 ឆ្នាំមុនពេលមាន​គ្រោះ​មហន្តរាយ លិខិតដែលបានរៀបចំបន្ទាប់ពីគ្រោះមហន្តរាយពីទីចំណតផ្ទះចល័ត ឬអ្នក​គ្រប់​គ្រង ឬមន្ត្រីសាធារណៈដែលបំពេញបាន​តាមលក្ខខណ្ឌតម្រូវរបស់ FEMA

ប្រសិនបើអ្នកមិនអាចផ្តល់ឱ្យ FEMA នូវឯកសារណាមួយខាងលើបានទេ FEMA អាចទទួលយកសេចក្តីថ្លែង​ការណ៍​ជា​លាយលក្ខណ៍អក្សរ​ដែលពន្យល់​ពីកាលៈ​ទេសៈរបស់អ្នកបាន។ សេចក្តីថ្លែងការណ៍ត្រូវតែរួមបញ្ចូលនូវ៖

1. អាសយដ្ឋានផ្ទះរបស់អ្នកដែលត្រូវបានធ្វើឲ្យខូចខាតដោយសារគ្រោះមហន្តរាយ
2. រយៈពេលដែលអ្នករស់នៅក្នុងផ្ទះដែលរងការខូចខាតដោយគ្រោះមហន្តរាយ ជាលំនៅឋានចម្បងរបស់អ្នក មុន​ពេលប្រកាសគ្រោះមហន្តរាយដោយ​ប្រធានា​ធិ​បតី
3. អ្នក ឬឈ្មោះ និងហត្ថលេខារបស់អ្នកដាក់ពាក្យរួមគ្នារបស់អ្នក និង
4. សេចក្តីថ្លែងការណ៍ទាក់ទងនឹងការខិតខំប្រឹងប្រែងដោយសុទ្ធចិត្តដើម្បីទទួលបានឯកសារ និងមូលហេតុ​ដែល​អ្នកមិនអាចទទួលបានឯកសារតាមបែប​ធម្មតា។

5. សិស្សនិស្សិត

សិស្សនិស្សិតដែលរស់នៅក្នុងលំនៅឋានសាកលវិទ្យាល័យដែលខូចខាតដោយគ្រោះមហន្តរាយអាចនឹងមានសិទ្ធិ
ទទួលបាន IHP។ សិស្សនិស្សិតដែលជាអ្នកនៅក្នុងបន្ទុករបស់មាតាបិតា ឬអាណាព្យាបាលរបស់​ពួកគេ មិនមាន​លក្ខណៈសម្បត្តិគ្រប់គ្រាន់ក្នុងការទទួលបាន​ជំនួយលំនៅ​ឋាន​ពី FEMA ទេ។ ទោះជាយ៉ាងណាក៏ដោយ សិស្សនិស្សិត​ទាំងអស់ដែលរស់នៅក្នុងលំនៅឋានរ​បស់​សាកលវិទ្យាល័យដែលរងការខូចខាតដោយគ្រោះមហន្តរាយ អាចស្នើសុំ​ជំនួយ​ផ្នែក​ទ្រព្យសម្បត្តិផ្ទាល់ខ្លួន ដើម្បីប្តូរជំនួសសម្ភារក្នុងអគារអន្តេវាសិកដ្ឋាន ឬប​ន្ទប់របស់ពួកគេបាន។

6. អ្នករស់នៅក្នុងមណ្ឌលការរស់នៅដោយមានជំនួយ

សម្រាប់អ្នកដែលរស់នៅក្នុងមណ្ឌលការរស់នៅដោយមានជំនួយ តម្រូវការ​ជា​ច្រើ​នរបស់អ្នកក្រោយគ្រោះមហន្តរាយ (ឧទាហរណ៍ លំនៅឋាន​បណ្តោះអាសន្ន​ក្រោយ​គ្រោះមហន្តរាយ) គួរតែត្រូវបានចាត់ចែងដោយមណ្ឌលរបស់អ្នក។ ទោះ​ជាយ៉ាងណាក៏ដោយ សម្រាប់រឿងទាំងនោះដែលមណ្ឌលរបស់អ្នកមិនធានា​រ៉ាប់រង អ្នកអាចទទួលបានជំនួយពី FEMA។ នេះអាចជាជំនួយជាមួយនឹងការជួសជុល/ការប្តូរជំនួសថ្មីលំនៅឋាន ការជួស​ជុ​ល/កា​រប្តូរ​ជំនួស​ថ្មីទ្រព្យ​សម្បត្តិ​ផ្ទាល់ខ្លួន ឬតម្រូវការសំខាន់ៗចាំបាច់ផ្សេង​ទៀត​ដែលមិនត្រូវបានចាត់ចែងដោយមណ្ឌលរបស់អ្នក។

III. ការយល់អំពីការដាក់ពាក្យ

កាលដល់កំណត់ដាក់ពាក្យសុំជំនួយ FEMA គឺ 18 ខែគិតចាប់ពីកាលបរិច្ឆេទ​នៃ​ការប្រកាសគ្រោះមហន្តរាយ​ដោយ​ប្រធានាធិបតី។

អ្នកអាចដាក់ពាក្យសុំជំនួយ FEMA តាមបីវិធី៖

1. ដាក់ពាក្យតាម​អនឡាញ​
2. ហៅទូរសព្ទ ហើយដាក់ពាក្យជាមួយភ្នាក់ងារតាមលេខ 1(800) 621-3362 ឬ
3. ស្វែងរក និងអញ្ជើញទៅ ទីតាំងការិយាល័យ FEMA ក្នុងតំបន់មូលដ្ឋាន។

ប្រសិនបើអ្នកត្រូវការសេវាកម្មបកប្រែដើម្បីបំពេញពាក្យសុំរបស់អ្នក FEMA ផ្តល់សេវាបកប្រែដោយមិនគិតថ្លៃ។ ប្រសិនបើអ្នកត្រូវការអ្នកបកប្រែភាសា ASL សូមផ្ញើសារជាអក្សរទៅខ្សែ​បណ្ដា​ញ​​​ទូរសព្ទផ្នែកស្នើសុំអ្នកបក​ប្រែ​ភាសាសញ្ញារបស់ FEMA តាមលេខ 1(202)372-7717 ដើម្បីទទួលបានជំនួយជាមួយនឹងការដាក់ពាក្យ។ ចំពោះ​ព័ត៌មានបន្ថែមអំពីអ្នកបកប្រែផ្ទាល់មាត់ ឬសេវាកម្មភាសាផ្សេងទៀត សូមហៅទៅខ្សែទូរសព្ទផ្នែកជំនួយចុះឈ្មោះ FEMA ដោយឥតគិតថ្លៃតាមលេខ 1(800)621-3362។

ក្នុងរយៈពេលពីរសប្តាហ៍នៃការដាក់ពាក្យសុំ IHP, FEMA នឹងទាក់ទងដើម្បី​កំ​ណ​ត់​ពេលធ្វើអធិការកិច្ច ដូច្នេះពួក​គេ​អាច​ផ្ទៀងផ្ទាត់ការខូចខាតណាមួយ​ដែលអ្នកបានរាយការណ៍នៅក្នុងពាក្យសុំរបស់អ្នក។ ក្នុងអំឡុងពេលធ្វើ​អធិការ​កិច្ច មន្រ្តីអធិការកិច្ច FEMA នឹងវាយតម្លៃ​ទ្រព្យ​ស​ម្ប​ត្តិ ឬសំណង់ដែលខូចខាតដោយគ្រោះមហន្តរាយណាមួយ ហើយ​ថតរូប​សម្រា​ប់ FEMA វាយតម្លៃ។ មុនពេលការធ្វើអធិការកិច្ចបញ្ចប់ មន្រ្តីអធិការកិច្ចរបស់អ្នកគួរបញ្ជាក់ជាមួយ​អ្នកថា ពួកគេបានឃើញការខូចខាតទាំងអស់ដែលពួកគេត្រូវការបញ្ជាក់ និង​ពណ៌នាជំហានបន្ទាប់​នៅក្នុង​ដំណើរ​ការ​ប្រាប់អ្នក។ ប្រសិនបើអ្នកមិនអាចជួបមន្រ្តីអធិការកិច្ចដោយផ្ទាល់សម្រាប់ការចុះពិនិត្យនេះ អ្នកអាច​សរសេរ​ទៅ​កាន់ FEMA ដើម្បីអនុញ្ញាតឱ្យមនុស្សពេញវ័យម្នាក់​ទៀត​ចូលរួមក្នុងការធ្វើអធិការកិច្ចជំនួសអ្នក។

ពេលដាក់ពាក្យរបស់អ្នករួចហើយ អ្នកអាចទាក់ទងទៅខ្សែទូរសព្ទជំនួយរបស់ FEMA (800-621-3362) ដើម្បី​ស្នើសុំ​ព័ត៌មានអំពីពាក្យសុំរបស់អ្នក រួមទាំង ប៉ុ​ន្តែមិនកំណត់ត្រឹមចំពោះបច្ចុប្បន្នភាពស្ថានភាពអំពីពេលដែលអ្នកអាច​រំពឹង​ថា​នឹងទទួលបានការសម្រេចចិត្ត ប្រភេទ និងចំនួនជំនួយដែល​បានផ្តល់ជូន​អ្នក ឬឯកសារចាំបាច់​ណាមួយ​ដែល FEMA ត្រូវការដើម្បីបញ្ចប់ការកំណត់​រប​ស់​ពួកគេប៉ុណ្ណោះទេ។

ការបដិសេធ និងបណ្តឹងឧទ្ធរណ៍

ប្រសិនបើពាក្យសុំរបស់អ្នកត្រូវបានបដិសេធ ការសម្រេចចិត្តរបស់ FEMA អាចត្រូវបានប្តឹងឧទ្ធរណ៍។ អ្នកអាចប្តឹង​ឧទ្ធរណ៍ដោយដាក់លិខិតមានចុះហត្ថលេខាដែលពន្យល់ពីមូលហេតុដែលអ្នកជឿថាការសម្រេចចិត្តរបស់ FEMA មិន​ត្រឹម​ត្រូវ និងច្បាប់ចម្លង​នៃ​ឯកសារគាំទ្រណាមួយ។ អ្នកមានពេល 60 ថ្ងៃគិតចាប់ពីកាលបរិច្ឆេទដែលអ្នកទទួល​បាន​​លិខិត​សម្រេ​ច​ចិត្តរបស់អ្នកដើម្បីដាក់បណ្តឹងឧទ្ធរណ៍របស់អ្នក។ ពេលដែលអ្នកដាក់បណ្តឹងឧទ្ធរណ៍របស់អ្នក FEMA នឹងវាយតម្លៃ​ករណីរ​បស់​អ្ន​ក​ឡើងវិញ ហើយប្រាប់អ្នកថាតើពួកគេត្រូវការឯកសារគាំទ្របន្ថែម​ណាមួយឬ​អត់។

ហេតុផលទូទៅនៃការបដិសេធពាក្យសុំ៖:

• អ្នកមានការធានារ៉ាប់រងផ្ទះ ឬការធានារ៉ាប់រងរបស់អ្នកជួល៖ ពាក្យសុំរបស់អ្នកនឹងត្រូវបានបដិសេធ ប្រសិនបើអ្នកមានការធានារ៉ាប់រងផ្ទះ ឬការធានារ៉ាប់រងរបស់អ្នកជួលដែលធានារ៉ាប់រងលើថ្លៃជួស​ជុល​ទាំងអស់របស់អ្នក។ អ្នកអាចប្តឹងឧទ្ធរណ៍ ប្រសិនបើការទូទាត់ធានារ៉ាប់រងរបស់អ្នកមិនបានផ្តល់​ឱ្យ​អ្នក​នូវប្រាក់គ្រប់គ្រាន់ដើម្បីបំពេញតម្រូវការរបស់អ្នក ឬអ្នកអស់ប្រាក់​សម្រា​ប់​ចំណាយបន្ថែមលើការរស់នៅ ដែលពួកគេបានផ្តល់។
  • ប្រសិនបើក្រុមហ៊ុនធានារ៉ាប់រងរបស់អ្នកបានបដិសេធការទាមទារសំណងរបស់អ្នក អ្នកអាច​ប្តឹងឧទ្ធរណ៍ និងផ្តល់លិខិតបដិសេធ ដើម្បីបង្ហាញភស្តុតាង​ដែល​អ្នកត្រូវការជំនួយ FEMA។
• អ្នកបានរាយការណ៍ថាមិនមានការខូចខាតផ្ទះទេ នៅពេលអ្នក​បា​ន​ចុះឈ្មោះជាមួយ FEMA។ អ្នកអាចនឹងត្រូវការជំនួយហិរញ្ញវត្ថុដែលមិនត្រូវបានធានារ៉ាប់រងដោយ IHP ប៉ុ​ន្តែអាចត្រូវ​បាន​ធានា​រ៉ាប់រង​ក្រោមប្រភេទនៃជំនួយ FEMA ផ្សេងទៀត។
• ផ្ទះរបស់អ្នកមានសុវត្ថិភាពក្នុងការចូលតាំងនៅ៖ ប្រសិនបើ FEMA រកឃើញថា ផ្ទះរបស់អ្នកមាន​សុវត្ថិភាព​ក្នុងការរស់នៅ ពួក​គេ​នឹងមិនផ្តល់ជំនួយទេ។ ក្នុងករណីខុស សូមពន្យល់ពីមូលហេតុនៅក្នុង​បណ្តឹងឧទ្ធរណ៍​របស់អ្នក។
• មានបញ្ហាក្នុងការផ្ទៀងផ្ទាត់អត្តសញ្ញាណ ឬការចូលតាំងនៅ៖ ប្រសិនបើ FEMA មិនអាចបញ្ជាក់អត្ត​សញ្ញាណ​​របស់អ្នកបានទេ ពួកគេអាច​បដិ​សេធពាក្យសុំរបស់អ្នក។ អ្នកអាចនឹងប្តឹងឧទ្ធរណ៍ និងដាក់​ឯកសារ​បន្ថែមទៀតដើម្បីជួយបង្ហាញភស្តុ​តាង​នៃអត្តសញ្ញាណ ឬការចូលតាំងនៅរបស់អ្នក។

IV. ការព្រាងលិខិតបណ្តឹងឧទ្ធរណ៍របស់ FEMA

រាល់ទំព័រនៃលិខិត និងឯកសារណាមួយដែលអ្នកដាក់ក្នុងបណ្តឹង​ឧទ្ធរណ៍​របស់​អ្នក​គួរតែមានព័ត៌មានដូចតទៅ​នេះនៅខាងលើ៖

1. ឈ្មោះពេញរបស់អ្នក
2. លេខពាក្យសុំរបស់ FEMA និងលេខសម្គាល់គ្រោះមហន្តរាយរបស់អ្នក (អ្នកអា​ច​រក​ឃើញលេខពាក្យសុំ និង​លេខ​សម្គាល់គ្រោះមហន្តរាយរបស់អ្នកនៅទំព័រ 1 នៃលិខិតកំណត់របស់អ្នក)
3. អាសយដ្ឋានផ្ទះរងគ្រោះមហន្តរាយរបស់អ្នក
4. លេខទូរសព្ទបច្ចុប្បន្នរបស់អ្នក

លិខិតបណ្តឹងឧទ្ធរណ៍គំរូរបស់ FEMA៖

[ឈ្មោះអ្នកដាក់ពាក្យ]

[លេខរបស់អ្នកដាក់ពាក្យ]

[លេខសម្គាល់គ្រោះមហន្ដរាយ]

[អាសយដ្ឋានផ្លូវ]

[ទីក្រុង រដ្ឋ ហ្ស៊ីបកូដ]

[លេខទូរសព្ទ]

ជូនចំពោះ FEMA

នៅថ្ងៃទី 17 ខែកុម្ភៈ ឆ្នាំ 2016 ខ្ញុំបានទទួលិខិតពីអ្នកដែលបញ្ជាក់ថា ខ្ញុំមិន​មា​ន​សិទ្ធិទទួលបានជំនួយទេ ដោយសារ​ខ្ញុំ​មានការធានារ៉ាប់រង។ ខ្ញុំចង់ប្តឹងឧទ្ធរណ៍នឹងការសម្រេចចិត្តរបស់អ្នក ដោយសារក្រុមហ៊ុនធានា​រ៉ាប់​រង​របស់ខ្ញុំ​នឹង​មិនរ៉ាប់រងលើការខូចខាតនោះទេ។

សូមស្វែងរកលិខិតបដិសេធការធានារ៉ាប់រងរបស់ខ្ញុំដែលភ្ជាប់មកជាមួយនេះ ដែលបង្ហាញថាខ្ញុំមិនមានការធានា​រ៉ាប់រង​លើការខូចខាតផ្ទះ និងទ្រព្យសម្បត្តិ​ផ្ទាល់ខ្លួនរបស់ខ្ញុំ ដែលមានទីតាំងនៅ 123 Main Street, Everytown, Virginia។

សូមពិនិត្យមើលព័ត៌មានដែលភ្ជាប់មកជាមួយ ហើយពិចារណាឡើងវិញនូវការ​សម្រេចចិត្តរបស់អ្នក។

សូមអរគុណ

[ឈ្មោះអ្នកដាក់ពាក្យ]

[ហត្ថលេខា]

អ្នកអាចដាក់បណ្តឹងឧទ្ធរណ៍តាមវិធី 4 ផ្សេងគ្នា៖

1. ផ្ញើលិខិតតាមប្រៃសណីយ៍ និងឯកសារភ្ជាប់មកជាមួយទៅកាន់៖
   FEMA National Processing Service Center
   P.O. Box 10055
   Hyattsville, MD
   20782-7055
2. ផ្ញើទូរសារនូវលិខិតបណ្តឹងឧទ្ធរណ៍ និងឯកសារភ្ជាប់មកកាន់លេខ 800-827-7055។
3. អ្នកអាចអាប់ឡូដ​ប​ណ្ដឹង​ឧទ្ធរណ៍​របស់អ្នកតាមអនឡាញ។
4. អញ្ជើញទៅកាន់មជ្ឈមណ្ឌលស្ដារគ្រោះមហន្តរាយដោយមិនបាច់ណាត់របស់ FEMA។ រកមើល​មជ្ឈមណ្ឌល​ដែល​​នៅជិតអ្នកបំផុតដោយហៅទៅខ្សែទូរសព្ទផ្នែកជំនួយរបស់ FEMA តាមរយៈលេខ 800-621-3362 ឬ TTY 800-462-7585 ឬតាមតាមអនឡាញ។

អ្នកដាក់ពាក្យអាចស្នើសុំសវនាការផ្ទាល់ជាផ្នែកនៃបណ្តឹងឧទ្ធរណ៍របស់ពួកគេ នៅពេលដែលមានបញ្ហានៃ​ការលួច​អត្ត​សញ្ញាណ ភាពជឿជាក់ សេចក្តីពិត ឬប្រ​សិនបើ FEMA រកឃើញថា ពួកគេមិនអាចសម្រេចចិត្ត​ថាតើត្រូវយល់​ព្រម ឬ​បដិសេធពាក្យសុំរបស់អ្នកដោយគ្រាន់តែពិនិត្យមើលឯកសាររបស់អ្នកប៉ុណ្ណោះ។ ប្រសិនបើ FEMA បដិសេធ​សំណើរបស់អ្នកសុំសវនាការដោយបន្តផ្ទាល់ ការ​ស​ម្រេ​​ច​ចិត្តរបស់ពួកគេគឺជាការសម្រេចចុងក្រោយ ហើយអ្នកមិន​អាចប្តឹង​ឧទ្ធ​រណ៍​បានទេ។ ពួកគេនឹងនៅតែវាយតម្លៃករណីរបស់អ្នកដោយប្រើឯកសារ និងលិខិត​ជា​លា​យ​លក្ខណ៍​អក្សររបស់អ្នក។

FEMA នឹងផ្តល់ការសម្រេចចិត្តចុងក្រោយលើបណ្តឹងឧទ្ធរណ៍របស់អ្នក​ក្នុងរយៈ​ពេល 90 ថ្ងៃបន្ទាប់ពីទទួលបាន​បណ្តឹង​ឧទ្ធរណ៍​ជាលាយលក្ខណ៍អក្សររបស់អ្នក ឬក្នុងរយៈពេល 45 ថ្ងៃ ប្រសិនបើអ្នកមានសវនាការដោយបន្តផ្ទាល់។

V. បន្ទាប់ពីបានទទួលជំនួយរបស់អ្នក

ពេលដែលពាក្យសុំរបស់អ្នកត្រូវបានអនុម័ត អ្នកគួរតែទទួលបានប្រាក់របស់​អ្នកក្នុងរយៈពេលពីរសប្តាហ៍។ ប្រសិន​បើអ្នករៀបចំដាក់ប្រាក់ផ្ទាល់លើទម្រង់អនឡាញ FEMA របស់អ្នក ប្រា​ក់​គួរតែចូលគណនីរបស់អ្នកក្នុងរយៈពេល 10 ថ្ងៃ។ ប្រសិនបើអ្នកជ្រើសរើសទទួលមូលប្បទានបត្រជាក្រដាស វាអាចចំណាយ​ពេល​ដល់ទៅពីរសប្តាហ៍។

នៅក្នុងលិខិតសម្រេចរបស់អ្នក នឹងមានការណែនាំអំពីរបៀបដែលអ្នកគួរ​ចំ​ណា​យប្រាក់ IHP របស់អ្នក។ ប្រាក់​ជំនួយ​គ្រោះមហន្តរាយមិនគួរប្រើប្រាស់សម្រាប់ការធ្វើដំណើរ ការកម្សាន្ត ការចំណាយលើការរស់នៅជាប្រចាំ ឬការ​ចំណាយណាមួយដែលមិនទាក់​ទងនឹង​គ្រោះមហន្តរាយនោះទេ។ ប្រសិនបើ FEMA រកឃើញថា ប្រាក់ជំនួយត្រូវ​បានប្រើ​ប្រាស់មិនត្រឹមត្រូវ អ្នក​ប្រ​ហែលជាត្រូវសង FEMA ហើយអ្នកអាចបាត់បង់សិទ្ធិទទួលបានជំនួយពី​សហ​ព័ន្ធ​បន្ថែមទៀតនាពេលអនាគត។ ដើម្បីការពារខ្លួនអ្នក សូមរក្សាបង្កាន់ដៃរយៈពេលបីឆ្នាំដើម្បីបង្ហាញថា​តើអ្នក​បានចំណាយជំនួយ FEMA របស់អ្នកយ៉ាងដូចម្តេច។

ប្រសិនបើអ្នកទទួលបានជំនួយលំនៅឋានដោយផ្ទាល់ពី FEMA សូមយកចិត្ត​ទុកដាក់ចំពោះពេលដែល​ជំនួយផុត​កំណត់។ បន្ទាប់ពីអ្នកបានទទួលលំនៅឋានបណ្តោះអាសន្ន ប្រសិនបើអ្នកត្រូវការ​បន្ត​ការ​ស្នាក់នៅក្នុងលំនៅឋាន​បណ្តោះអាសន្ន អ្នកអាចដាក់ពាក្យសុំបន្ត/ពន្យារ​ពេលជំនួយលំនៅឋានបណ្តោះអាសន្នរបស់អ្នក។ ដើម្បីដាក់​ពាក្យសុំ​បន្តជំនួយលំនៅឋានបណ្តោះអាសន្ន សូមបំពេញ “ទម្រង់ FEMA FF-104-FY-21-115៖ ពាក្យសុំបន្តជំនួយ​លំនៅឋាន​បណ្តោះអាសន្ន” ហើយ​ប្រគ​ល់​វាឲ្យ FEMA វិញរួមជាមួយនឹងឯកសារគាំទ្រចាំបាច់​ណាមួយ។

VI. ធនធាន

• គេហទំព័រ FEMA៖
  https://www.disasterassistance.gov/
• ទីតាំង FEMA៖
  https://www.fema.gov/locations
• ពាក្យសុំបន្តជំនួយលំនៅឋានបណ្តោះអាសន្ន
  ទម្រង់ FEMA FF-104-FY-21-115៖ ពាក្យសុំបន្តជំនួយលំនៅឋានបណ្តោះអាសន្ន
• សេវាសង្គ្រោះ និងស្តារគ្រោះមហន្តរាយរបស់កាក​បាទ​ក្រហម
  https://www.redcross.org/get-help/disaster-relief-and-recovery-services.html