Lub phiaj xwm Early Start yuav pab cov menyuam mos thiab cov menyuam me txij thaum yug los mus txog rau thaum muaj hnub nyoog 36 hli rau cov uas muaj kev tsis taus.  Cov chaw pab cuam hauv cheeb tsam thiab cov cheeb tsam tsev kawm yuav muab kev pab cuam txog kev pab kho thaum ntxov raws lub phiaj xwm Early Start, txog ntua thaum tus menyuam muaj hnub yug 3 xyoos.

Kev Txheeb Xyuas

Leej twg los yeej tuaj yeem xa tus menyuam mos lossis tus menyuam me mus rau lub phiaj xwm Early Start ntawm lub chaw pab cuam hauv cheeb tsam lossis ib lub cheeb tsam tsev kawm twg.  Txhua tus menyuam mos thiab menyuam me uas ntxim li yuav tsim nyog muaj kev pab cuam txog kev pab kho thaum ntxov yuav tsum tau txais kev ntsuam xyuas thiab kev txheeb xyuas ntau-ntau yam uas muaj txhij txhua kom sai.

Kev Tsim Nyog

Cov menyuam mos thiab cov menyuam me tsim nyog tau txais cov kev pab cuam ntawm Early Start yog tias lawv muaj:

• Kev paub tab qeeb
• Cov kev pheej hmoo uas muaj nyob, lossis
• Muaj kev pheej hmoo siab txog ntawm kev tsis taus sab kev paub tab.

Kev paub tab qeeb tshab txhais txog qhov sib txawv ntawm qib uas xav tseg txog ntawm kev paub tab rau koj tus menyuam lub hnub nyoog thiab nws qib kev ua tau haujlwm tam sim no.  Suav txij lub Rau Hli tim 30, 2022, qhov no txhais tau hais tias 25% ntawm qhov qeeb hauv ib lossis ntau dua ntawm rau (6) yam kev paub tab no:

1. Sab tswv yim
2. Lub cev (uas xam muaj kev txav chaw theem pib thiab txhua yam, kev ntsia pom kev, thiab kev hnov suab)
3. Kev sib txuas lus rau lwm tus
4. Kev sib txuas lus txais nkag
5. Sab zej tsoom lossis kev coj ntawm lub siab, lossis
6. Sab kev hloov pauv tus kheej.

Cov kev pheej hmoo uas muaj nyob yog cov xwm txheej mob uas paub txog lub hauv paus lossis yam ua rau muaj kev paub tab phom sij tuaj.  Yuav tsum tau kuaj xyuas tus xwm txheej mob los ntawm ib tug kws uas txawj txaus.  Nws yuav tsum muaj feem ntau heev uas yuav ua rau muaj kev paub tab qeeb, yog tias tsis paub meej thaum kuaj tus mob.

Kev pheej hmoo siab txog ntawm kev muaj ib qho kev tsis taus sab kev paub tab loj tshab txhais txog kev sib xyaws ua ke (ob lossis ntau dua) ntawm cov kev pheej hmoo sab kev kho mob xis vab uas tau txais kev taw qhia los ntawm ib tug kws uas muaj kev txawj txaus.  Tej no xam muaj:

• Kev yug thaum tsis tau txog caij lossis yug tau tus menyuam hnyav tsis txaus
• Cov qhab nia Apgar qis
• Muaj qhov qaug dab peg thaum nyuam qhuav yug tau
• Nphav txog yeeb tshuaj thaum tsis tau yug
• Kev huam yuaj lossis kev muaj mob uas yuav cuam tshuam loj lossis tag lub neej rau tus menyuam txoj kev paub tab, lossis
• Lwm yam sab nraud

Tsis dhau 45 hnub tom qab xa mus, lub chaw pab cuam hauv cheeb tsam lossis lub cheeb tsam tsev kawm yuav tsum ua cov kev txheeb xyuas thiab kev sib ntsib txhawm rau tham txog kev tsim nyog.  Yog tias koj tus menyuam tsim nyog rau, ces lawv kuj tseem yuav tau tsim cov kev pab cuam nyob rau hauv qhov Kev Npaj Txog Kev Pab Cuam Tsev Neeg Ib Leeg Zus (IFSP, Individual Family Service Plan) tsis dhau hauv 45 hnub ntawd.

Muaj Ntawv Ceeb Toom Yog Tias Koj Tus Menyuam Tsis Tsim Nyog Rau

Yog tias koj thiab lub chaw pab cuam hauv cheeb tsam lossis lub cheeb tsam tsev kawm tsis pom zoo rau qhov koj tus menyuam mos lossis tus menyuam me tsim nyog tau txais cov kev pab cuam, ces lawv yuav tau muab ib tsab ntawv ceeb toom rau koj.  Tsab ntawv ceeb toom yuav tsum:

• Nyob rau yam lus uas ib txwm siv ntawm koj tsev neeg,
• Siv cov lus uas neeg feem coob nkag siab tau,
• Hais qhov kev txiav txim uas lub chaw pab cuam hauv cheeb tsam qhia tawm lossis tsis lees txais,
• Hais qhov laj thawj rau qhov kev txiav txim,
• Piav txog kev sib kho, thiab
• Hais tias yuav ua li cas thiaj li foob tau kev tsis txaus siab qib xeev, kev tsis txaus siab rau tus txheej txheem, thiab muab lub ncua sijhawm qhia rau haud.

Rooj Sib Kho

Koj tuaj yeem thov txog lub rooj sib kho yog tias lub chaw pab cuam hauv cheeb tsam lossis lub cheeb tsam tsev kawm hais tias koj tus menyuam tsis tsim nyog rau lossis koj tsis pom zoo txog ntawm qhov kev txheeb xyuas.  Lub Rooj Sib Tham Txog Kev Sib Kho Ntawm Early Start yog ib txoj hauv kev los daws qhov tsis sib pom zoo yam tsis mus raws cai.  Koj muaj txoj kev xaiv txog qhov uas seb puas ua kom muaj lub rooj sib kho los yog tsis ua.  Koj tuaj yeem ua kom muaj lub rooj sib kho ua thawj kauj ruam los mus daws qhov teeb meem.  Koj kuj tseem tuaj yeem thov kom muaj lub rooj sib kho nyob rau thaum muaj qhov kev tsis txaus siab lossis qhov kev thov kom rov txiav txim dua raws txheej txheem thiab tus txheej txheem ntawm lub rooj txiav txim, yog koj xav tias nws yuav muaj qhov tsim nyog dua.  Koj tuaj yeem coj ib tug neeg tuaj pab koj ntawm lub rooj sib kho.  Txhua yam uas koj tham ntawm lub rooj sib kho txhawm kom daws tau qhov teeb meem yog yam npog cia tsis pub lwm tus sab nraud paub txog thiab tsis tuaj yeem muab siv ua pov thawj ntawm lub rooj txiav txim raws txheej txheem.

Mus rau lub page hais txog lub Rooj Sib Kho Ntawm Early Start kom paub ntau ntxiv.  Koj yuav pom daim foos thov txog lub rooj sib kho ua lus Askiv thiab lus Xab Pes Niv, thiab qhov yuav xa mus rau qhov twg.

Lub Rooj Txiav Txim Raws Txheej Txheem

Koj tuaj yeem thov lub Rooj Txiav Txim Raws Txheej Txheem ntawm Early Start yog tias lub chaw pab cuam hauv cheeb tsam lossis lub cheeb tsam tsev kawm hais tias koj tus menyuam tsis tsim nyog rau lossis koj tsis pom zoo txog ntawm qhov kev txheeb xyuas.  Lub rooj txiav txim yog yam raws cai tshaj lub rooj sib kho, thiab tus kws txiav txim yuav txiav txim siab ua zaum kawg.

Mus rau lub page hais txog kev txiav txim Raws Txheej Ntawm Early Start kom paub ntau ntxiv.  Koj yuav pom daim foos thov raws txheej txheem ua lus Askiv thiab lus Xab Pes Niv, thiab qhov yuav xa mus rau qhov twg.

Yog xav npaj rau koj lub rooj txiav txim, ces sau cov xov xwm uas qhia tau hais tias koj tus menyuam muaj raws li qhov yuav tsum tau muaj ntawm kev tsim nyog.  Xyuas kom meej hais tias cov xov xwm uas koj siv ntawd muaj tseeb thiab piav qhia koj tus menyuam cov kev tsim nyog muaj kom txhij txhua.  Thiab, nrhiav cov neeg uas xav mus rau ntawm koj lub rooj txiav txim thiab qhia rau tus neeg txiav txim hais tias vim li cas koj tus menyuam thiaj li tsim nyog muaj cov kev pab cuam ntawd.

Thaum nyob rau tus txheej txheem ntawm lub rooj txiav txim ntawm Early Start, koj muaj cai rau cov nram qab no:

• Kev npog cia,
• Saib koj cov ntaub ntawv thiab txwv tsis pub siv cov ntaub ntawv uas koj tseem tsis tau pom 5 hnub ua ntej yuav muaj lub rooj txiav txim ntawd,
• Tuaj mus koom thiab muab pov thawj ua lus hais lossis ua ntawv sau,
• Hais kom tsev neeg, phooj ywg, kws daws mob, lossis kws kho mob tuaj ua pov thawj,
• Siv ib tug kws lij choj lossis ib tug kws pab tswv yim,
• Muaj ib tug neeg txhais lus yog tias koj yam lus xub thawj tsis yog lus Askiv, thiab
• Tau txais qhov kev txiav txim siab 30 hnub tom qab xa ntawv foob txog kev ua raws txheej txheem.

Kev Tsis Txaus Siab Qib Xeev

Yog tias koj ntseeg tias lub chaw pab cuam hauv cheeb tsam lossis lub cheeb tsam tsev kawm tau ua txhaum lub xeev lossis tsoomfwv txoj cai lij choj hais txog lub phiaj xwm Early Start, uas xam muaj kev tsim nyog, ces koj tuaj yeem ua ntawv foob kev tsis txaus siab.  Txhua tus neeg lossis txhua lub koom haum tuaj yeem ua ntawv foob kev tsis txaus siab.  Koj yuav tsum ua ntawv foob kev tsis txaus siab tsis dhau ib xyoos tom qab uas muaj qhov kev ua txhaum cai.  Yog tias koj tab tom thov txog kev them nyiaj rov qab lossis kev kho kom yog, koj yuav tsum xa tsab ntawv foob kev tsis txaus siab tsis dhau 3 xyoos tom qab uas muaj qhov kev ua txhaum cai. 

Mus rau lub page hais txog Kev Tsis Txaus Siab Qib Xeev Ntawm Early Start kom paub ntau ntxiv.  Koj yuav pom daim foos kev tsis txaus siab ua lus Askiv thiab lus Xab Pes Niv, thiab qhov yuav xa mus rau qhov twg.  Lub Tsev Haujlwm Saib Xyuas Cov Kev Pab Cuam Txog Kev Paub Tab yuav tshuaj ntsuam koj qhov kev tsis txaus siab thiab xa tsab ntawv qhia txog kev txiav txim siab tsis dhau 60 hnub.

Yog tias koj xav tau xov xwm ntau ntxiv txog qhov yuav ua li cas thiaj li tau txais cov kev pab cuam ntawm lub phiaj xwm Early Start, ces hu rau (800) 515-BABY (2229) lossis xa e-mail rau earlystart@dds.ca.gov.

Yog xav tau cov xov xwm hais txog cov kev pab cuam txog kev pab kho thaum ntxov thiab Cov Kev Npaj Txog Kev Txhawb Nqa Tsev Neeg Ib Leeg Zus (IFSPs), ces mus saib DRC phau ntawv hais txog Cov Cai thiab Cov Luag Haujlwm Sab Kev Kawm Tshwj Xeeb Zaj 12 (Special Education Rights and Responsibilities Chapter 12).