Ntu 1 – Lus Nthuav Qhia

Koj muaj ib txoj cai los ua ntawv thov kom rov sib hais dua yog hais tias:

1. Koj yog ib tus neeg thov kev pab ntawm lub chaw muab kev pab hauv cheeb tsam uas tau thov kev pab tshiab thiab lub chaw muab kev pab hauv cheeb tsam tau hais tias "tsis muaj";
2. Lub chaw muab kev pab hauv cheeb tsam xav txo los sis tshem ib qho kev pab cuam uas koj twb tau txais lawm tawm mus; los yog
3. Lub chaw muab kev pab hauv cheeb tsam hais tias koj tsis tsim nyog tau txais cov kev pab cuam.

Phau ntawv qhia no muab cov lus qhia rau koj hais txog txoj kev thov kom rov hais dua thiab yam uas cia siab tias yuav tau thaum lub sij hawm thov kom rov hais dua. Yog hais tias koj tab tom thov kom rov hais dua ntawm qhov kev muaj cai tsim nyog tau txais kev pab ntawd, naj npawb 3, thov mus saib peb Regional Center Eligibility Hearing Packet (Pob Ntawv Hais Txog Kev Muaj Cai Tsim Nyog Rau Lub Rooj Sib Hais Ntawm Lub Chaw Muab Kev Pab Hauv Cheeb Tsam).

Tej zaum koj yuav xav los thov kom muaj lub rooj sib hais mloog ob tog lus yog hais tias koj tsis pom zoo rau qhov kev txo, kev hloov, los sis tsis kam lees txais ib qho kev pab cuam uas koj xav tias koj xav tau los ntawm lub chaw muab kev pab hauv cheeb tsam. Lub rooj sib hais fab kev tswj hwm tsis zoo ib yam li mus rau hauv tsev hais plaub, thiab tsis muaj dab tsi yuav txaus ntshai li. Lub rooj sib hais fab kev tswj hwm qee zaus hu ua “kev sib hais kom muaj kev ncaj ncees.” Cov rooj sib hais no feem ntau kheev tsa muaj nyob rau hauv ib chav sab hauv los sis ze ntawm lub chaw muab kev pab hauv cheeb tsam. Tus kws txiav txim plaub ntug rau lub rooj sib hais yog hu ua “tus kws txiav txim plaub ntug kev cai lij choj hais txog fab kev tswj hwm.”

Tshooj lus hais txog cov kev sib hais hauv qab no piav qhia koj kev yuav thov kom muaj ib lub rooj sib hais thiab cov txheej txheem sib hais li cas.

Ntu 2 – Cov Txheej Txheem Sib Hais

Daim Ntawv Ceeb Toom Kom Tsim Nyog

Yog hais tias lub chaw muab kev pab hauv cheeb tsam xav tsis kam lees, txo, los sis xaus ib qho kev pab cuam, ces lub chaw muab kev pab hauv cheeb tsam yuav tsum teem sij hawm tsa lub rooj sib tham qhov Kev Npaj Khoos Kas Pab Raws Leej Neeg (Individual Program Plan (IPP)). Koj muaj cai tau txais ib tsab ntawv ceeb toom txog kev nqis tes ua (notice of action (NOA)) yog tias lub chaw muab kev pab hauv cheeb tsam hais tias "tsis muaj" rau yam uas koj xav tau. Daim ntawv ceeb toom ntawm lub chaw muab kev pab hauv cheeb tsam yuav tsum qhia koj tias nws npaj yuav ua dab tsi thiab cov kev cai lij choj twg tso cai rau nws txiav txim siab. Cov ntaub ntawv qhia no yuav pab rau koj txiav txim siab seb koj puas yuav tsum thov kom rov sib hais dua, thiab nws yuav pab koj npaj kom txhij rau koj lub rooj sib hais. Daim ntawv ceeb toom yuav tsum hais txog:

• Yam uas lub chaw muab kev pab hauv cheeb tsam yuav ua;
• Vim li cas lub chaw muab kev pab hauv cheeb tsam thiaj ua qhov ntawd;
• Thaum twg lub chaw muab kev pab hauv cheeb tsam thiaj mam ua qhov ntawd;
• Kev cai lij choj, txoj cai, los sis txoj cai tswj uas tso cai rau lawv ua tau;
• Yuav xa ib daim ntawv thov kom rov sib hais dua tau li cas thiab nyob rau qhov twg;
• Cov hnub tag sij hawm rau kev xa daim ntawv thov kom rov sib hais dua;
• Cov ntaub ntawv qhia hais txog yam tshwm sim hauv qhov txheej txheem thov kom rov sib hais dua;
• Txoj kev los tshuaj xyuas koj cov ntaub ntawv teev tseg hauv lub chaw muab kev pab hauv cheeb tsam, thiab
• Qhov Chaw twg thiaj tau txais kev pab tswv yim.

Thaum koj tau txais daim ntawv NOA, koj tuaj yeem ua ntawv thov lub rooj sib hais tau yog hais tias koj tsis pom zoo. Yog tias lub chaw muab kev pab hauv cheeb tsam tsis kam lees, txo los sis txiav tawm qhov kev pab cuam yam tsis tau qhia rau koj paub, koj tseem tuaj yeem thov kom rov sib hais dua - koj tsis tas yuav muaj daim ntawv NOA txhawm rau thov kom rov sib hais dua. Koj tsuas yog yuav tsum tau sau Daim Ntawv Foos Thov Lub Rooj Sib Hais Kev Ncaj Ncees, uas tuaj yeem nrhiav tau ntawm http://www.dds.ca.gov/Forms/FairHearing/DS1805.pdf.

Kev Ua Ntawv Thov rau Lub Rooj Sib Hais

Txhawm rau ua ntawv thov lub rooj sib hais, kom sau thiab xa hauv Daim Ntawv Foos Thov Lub Rooj Sib Hais Kev Ncaj Ncees uas lub chaw muab kev pab hauv cheeb tsam xa tuaj nrog koj daim ntawv NOA. Xa koj daim ntawv thov rau kev thov lub rooj sib hais mus rau DDS. Yog hais tias koj tsis paub meej tias yuav xa mus rau leej twg, kom xa mus rau DDS thiab Lub Chaw Hauj Lwm Saib Xyuas Kev Ncaj Ncees (Office of Administrative Hearings) ob qho tib si ntawm 2349 Gateway Oaks Drive, Suite 200, Sacramento, CA 95833 los sis fax mus rau (916) 376-6318.

Kev Ceev koj Cov Kev Pab Cuam Cia Thaum koj Thov Kom Rov Sib Hais Dua (“Kev Pab Nyiaj Thaum Tseem Tab Tom Tos”)

Yog hais tias lub chaw muab kev pab hauv cheeb tsam sim los hloov cov kev pab cuam uas koj twb tau txais lawm, ces koj muaj cai los ceev cov kev pab cuam ntawd cia ib yam li qub thaum koj thov kom rov sib hais dua. Koj yuav tsum thov kom rov sib hais dua tsis pub dhau 30 hnub txij li hnub uas koj tau txais koj daim ntawv NOA txhawm rau ceev kom koj cov kev pab cuam tsis txhob hloov pauv. Qhov no yog hu ua “kev pab nyiaj thaum tseem tab tom tos.” Yog hais tias koj thov ib qho kev pab cuam tshiab thiab lub chaw muab kev pab hauv cheeb tsam hais tias “tsis muaj,” koj yuav tsis muaj cai tau txais kev pab nyiaj thaum tseem tab tom tos.

Lub Rooj Sib Tham Tsis Raws Cai

Thaum koj ua Daim Ntawv Thov Lub Rooj Sib Hais Kev Ncaj Ncees, koj tuaj yeem thov kom muaj lub rooj sib tham tsis raws cai thiab/los sis kev sib kho kom haum xeeb ua ntej yuav muaj lub rooj sib hais. Lub rooj sib tham tsis raws cai yog lub rooj sib tham ntawm koj (thiab koj tus neeg sawv cev, yog tias koj muaj) thiab ib tus neeg sawv cev hauv lub chaw muab kev pab hauv cheeb tsam. Lub hom phiaj yog los daws qhov teeb meem los sis yam tsawg kawg yog kom txo cov teeb meem kom me rau lub rooj sib hais. Nov yog koj lub hwv tsam yuav tau ntsib nrog tus thawj coj ntawm lub chaw muab kev pab hauv cheeb tsam thiab yaum nws kom los muab qhov kev pab cuam uas koj xav tau. Koj tsis tas yuav muaj lub rooj sib tham tsis raws cai los tau. Yog hais tias koj thov ib qho kev pab, ces lub chaw muab kev pab hauv cheeb tsam yuav tsum muab ib qho kev pab rau koj.

Tsis pub dhau 5 hnub ua hauj lwm tom qab lub rooj sib tham tsis raws cai tiav, lub chaw muab kev pab hauv cheeb tsam yuav tsum xa ib tsab ntawv hais txog qhov kev txiav txim tuaj rau koj. Daim ntawv sau kev txiav txim siab yuav tsum teev cov teeb meem uas tau sib sab laj nyob hauv lub rooj sib tham. Qhov kev txiav txim siab yuav tsum hais txog lub chaw muab kev pab hauv cheeb tsam qhov kev txiav txim siab ntawm txhua qhov teeb meem, qhov tseeb uas txhawb nqa txhua qhov kev txiav txim siab, thiab cov kev cai lij choj, cov cai yuav tsum tau ua thiab cov cai tswj uas lub chaw muab kev pab hauv cheeb tsam tau siv los txiav txim siab. Dua li nod lawm nws kuj yuav tsum qhia koj tias koj yuav thov kom rov sib hais dua qhov kev txiav txim tau li cas.

Yog hais tias koj pom zoo nrog lub chaw muab kev pab hauv cheeb tsam qhov kev txiav txim siab tom qab koj lub rooj sib tham tsis raws cai lawm, koj tuaj yeem thim koj daim ntawv thov rau lub rooj sib hais tau. Qhov no ua tau los ntawm kev sau daim ntawv "Kev Ceeb Toom Txog Kev Txiav Txim" uas lub chaw muab kev pab hauv cheeb tsam npaj cia. Qhov kev txiav txim ntawd yuav siv tau txij li 10 hnub tom qab lub chaw muab kev pab hauv cheeb tsam tau txais daim ntawv "Kev Ceeb Toom Txog Kev Txiav Txim" lawm.

Yog hais tias koj tsis pom zoo nrog lub chaw muab kev pab hauv cheeb tsam qhov kev txiav txim siab tom qab koj lub rooj sib tham tsis raws cai lawm, koj tuaj yeem ua qhov kev kho kom haum xeeb los sis lub rooj sib hais raws li lub sij hawm teem tseg txuas ntxiv mus. Koj tsis tas yuav lees txais lub chaw muab kev pab hauv cheeb tsam qhov kev txiav txim siab.

Kev Sib Kho Kom Haum Xeeb

Koj tseem tuaj yeem thov kom muaj kev sib kho kom haum xeeb, lub rooj sib tham nyob ntawm qhov chaw uas muaj tus kws pab kho kom sib haum xeeb ywj pheej, tau txais kev cob qhia uas ntsib nrog koj thiab ib tus neeg sawv cev ntawm lub chaw muab kev pab hauv cheeb tsam. Nws yuav siv li ntawm 30 hnub ntawm koj qhov kev thov rau lub rooj sib hais. Tus kws kho kom haum xeeb sim nrhiav cov hauv paus ntsiab lus thiab cov kev daws teeb meem tshiab. Tus kws kho kom sib haum xeeb tsis muaj hwj chim los yuam kom muaj kev pom zoo. Yog tias koj ua tiav qhov kev pom zoo, koj kos npe rau daim ntawv cog lus thiab cov txheej txheem thov kom rov sib hais dua yuav tso tseg. Yog hais tias koj ua tsis tiav qhov kev pom zoo, ces koj mus rau lub rooj sib hais kev ncaj ncees.

Yog koj thov kom muaj kev kho kom sib haum xeeb, ces lub chaw muab kev pab hauv cheeb tsam yuav tsum koom nrog hauv kev sib kho kom haum xeeb. Koj tsis tas yuav muaj lub rooj sib tham tsis raws cai ua ntej yog tias koj tsis xav tau lub rooj sib tham tsis raws cai.

Txhua leej yuav tsum xav txog kev siv kev sib kho kom haum xeeb. Kev sib kho kom haum xeeb feem ntau yog ib lub tswv yim zoo vim nws muab lub hwv tsam rau koj thiab lub chaw muab kev pab hauv cheeb tsam kom ua tiav qhov kev pom zoo. Txawm li cas los xij, nws yuav siv qee lub sij hawm. Tus kws pab kho kom haum xeeb muaj kev ywj pheej thiab yuav sim pab koj kom ua tiav qhov kev pom zoo. Tab txawm hais tias kev kho kom sib haum xeeb ua tsis tau hauj lwm rau koj, tiam sis koj yuav muaj cov ntaub ntawv qhia ntxiv txog lub chaw muab kev pab hauv cheeb tsam qhov teeb meem. Cov ntaub ntawv ntawd yuav pab koj ntawm koj lub rooj sib hais kev ncaj ncees. Yog hais tias koj xav tias tsis muaj kev cia siab rau qhov kev pom zoo, koj tuaj yeem txiav txim TSIS TXHOB sib kho kom haum xeeb.Qhov no yog hu ua “kev zam kev sib kho kom haum xeeb.” Tab sis, muaj coob leej neeg uas xav tias tsis muaj kev cia siab rau qhov kev pom zoo thaum kawg kuj xaus mus rau qhov kev pom zoo hauv kev sib kho kom haum xeeb lawm. Yog hais tias koj los sis lub chaw muab kev pab hauv cheeb tsam zam kev sib kho kom haum xeeb, ces xyuas kom koj npaj txhij rau koj lub rooj sib hais. Tej zaum koj lub rooj sib hais yuav teem caij sai dua yog tias koj mus rau kev sib kho kom haum xeeb.

Cov Lus Tsa Suab Thov

Qhov lus tsa suab thov yog ib qho kev thov rau tus kws txiav txim plaub ntug raws kev cai lij choj fab kev tswj hwm txiav txim ib yam twg ua ntej lub rooj sib hais. Piv txwv ntawm cov lus tsa suab muaj xws li cov lus tsa suab kom tso tseg raws li cov cai siv tau ntawm cov kev txwv los sis cov lus tsa suab kom tsis muaj ntawv pov thawj. Koj tuaj yeem xa ib cov lus tsa suab. Lub chaw muab kev pab hauv cheeb tsam kuj tuaj yeem xa cov lus tsa suab.

Tsab Cai Lij Choj Hais Txog Txheej Txheem Kev Hais Plaub Fab Kev Tswj Hwm (Administrative Procedure Act ("APA")) siv tsis tau rau lub rooj sib hais ntawm lub chaw muab kev pab hauv cheeb tsam, tab sis nws yuav yog ib qho kev qhia muaj txiaj ntsig rau kev teb cov lus tsa suab. Qhov APA tuaj yeem nrhiav tau nyob ntawm https://www.dgs.ca.gov/OAH/Case-Types/General-Jurisdiction/About/Page-Content/About-APA

Qee lub chaw muab kev pab hauv cheeb tsam tau xa cov lus tsa suab los foob rooj plaub. Ib tsab lus tsa suab hais kom tshem tawm thov kom tus kws txiav txim plaub tsis txhob tso cai rau lub rooj sib hais vim tias koj tsis muaj cai rau lub rooj sib hais. Hom lus tsa suab no tsis tshua muaj. Dua li ntawd lawm nws kuj yog qhov yuam rau txoj cai lij choj, uas lav koj txoj cai rau lub rooj sib hais. Qhov kev zam ib qho nkaus xwb yog thaum tsis muaj qhov tseeb ntawm qhov teeb meem tag nrho, piv txwv li, yog tias txoj cai hais tias tsis muaj leej twg tsim nyog rau qee yam kev pab cuam ntxiv lawm, yam tsis xav txog lawv cov kev xav tau.

Rooj Sib Hais Kev Ncaj Ncees

Qhov kauj ruam kawg nkaus ntawm qhov txheej txheem thov kom rov sib hais dua yog lub rooj sib hais kev ncaj ncees. Nws yuav tshwm sim nyob rau hauv 50 hnub ntawm koj qhov kev thov lub rooj sib hais tshwj tsis yog muaj ib tug neeg thov kom ncua sij hawm rau qhov laj thawj zoo. Lub rooj sib hais no yuav tau tsa nyob rau ntawm hauv ntej Tus Kws Txiav Txim Plaub Ntug Raws Kev Cai Lij Choj Fab Kev Tswj Hwm (Administrative Law Judge (ALJ)) los ntawm Lub Chaw Hauj Lwm Saib Xyuas Kev Ncaj Ncees (Office of Administrative Hearings (OAH)). Nyob rau ntawm lub rooj sib hais, lub chaw muab kev pab hauv cheeb tsam yuav tsum tau nthuav tawm nws rooj plaub ua ntej tso. Tus kws ALJ yuav tshaj tawm qhov kev txiav txim siab sau ua ntaub ntawv tsis pub dhau 10 hnub tom qab lub rooj sib hais.

Txuas Ntxiv Mus (Kev Ncua Mus Ntxiv)

Koj los sis lub chaw muab kev pab hauv cheeb tsam yuav thov kom hloov hnub tsa lub rooj sib hais los sis kev kho kom sib haum xeeb. Yog xav ncua hnub tsa lub rooj sib hais, koj yuav tsum tau ua tsab ntawv “Kev Tsa Suab Thov Rau Kev Sib Hais Txuas Ntxiv thiab Kev zam Lub Sij Hawm.” Ntawm no yog kab ntawv txuas (link) mus rau daim ntawv tsa suab thov: https://www.dgs.ca.gov/-/media/Divisions/OAH/Forms/GJ-Forms/OAH24.pdf?la=en&hash=BEB591E13540FF3FC99D4B5238528704384F7546

Koj tsis tas yuav tsum muaj qhov laj thawj zoo los thov kom txuas ntxiv rau thawj zaug uas koj tau thov. Tab sis rau ib qho kev thov ntxiv, koj yuav tsum muaj "qhov laj thawj zoo" txhawm rau OAH ua raws li koj qhov kev thov. “Qhov laj thawj zoo” txhais tau tias ib qho laj thawj zoo. “Qhov laj thawj zoo” tej zaum yuav yog ib tus tim khawv tseem ceeb uas tsis muaj nyob rau hnub tsa lub rooj sib hais kev ncaj ncees, muaj mob, xwm txheej kub ceev, los sis kev tuag ntawm ib tus txheeb ze. Daim ntawv qhia koj kom hu rau tus neeg sawv cev ntawm lub chaw muab kev pab hauv cheeb tsam thiab nug seb nws puas yuav pom zoo los muab lub rooj sib hais txuas ntxiv mus. Nyob hauv qhov chaw seem uas tau muab, koj yuav tsum sau lub npe thiab tus xov tooj ntawm lub chaw muab kev pab hauv cheeb tsam tus neeg uas koj tau tham nrog. Tom qab ntawd, xaiv seb tus neeg ntawd puas tau pom zoo los sis tawm tsam qhov txuas ntxiv. Koj yuav tsum thov tus neeg nyob ntawm lub chaw muab kev pab hauv cheeb tsam tus naj npawb fax los sis chaw nyob email los xa daim ntawv ua tiav mus rau nws kos npe.

Koj los sis koj tus neeg sawv cev yuav tsum kos npe tshooj lus uas muaj nqe lus hais tias, "Kev Zam Raws Lub Sij Hawm Uas Teev los ntawm Txoj Cai Lij Choj rau Rooj Sib Hais Kev Ncaj Ncees thiab Kev Txiav Txim Siab ntawm Tsab Cai Lanterman (Waiver of the Time Set by Law for Lanterman Act Fair Hearing and Decision)." Yuav kom tau txais kev tso cai txuas ntxiv, koj yuav tsum pom zoo rau "kev tso tseg" lub rooj sib hais raws sij hawm. Qhov no txhais tau hais tias koj tau pom zoo kom muaj lub rooj sib hais tshwm sim tom qab 50 hnub tom qab koj qhov kev thov lub rooj sib hais kev ncaj ncees.

Nco ntsoov fax los sis email daim ntawv mus rau lub chaw muab kev pab hauv cheeb tsam tus neeg sawv cev thiab hais kom nws kos npe rau. Tom qab tau kos npe rau hauv daim ntawv lawm, koj yuav tsum muab daim ntawv ntawd fax mus rau OAH.Siv tus naj npawb fax rau thaj chaw uas yuav muaj rooj sib hais:

• OAH Sacramento: 916-376-6318
• OAH Los Angeles: 916-376-6395
• OAH San Diego: 916-376-6325
• OAH Oakland: 916-376-6323

Yog hais tias koj tsis muaj sij hawm txaus los xa ib tsab ntawv tsa suab thov, ces koj tuaj yeem hu xov tooj mus rau OAH thiab thov kom txuas ntxiv hauv xov tooj tau. Kev sib sau ua ke

Kev sib sau ua ke yog thaum ob rooj plaub los sis ntau rooj plaub muaj cov teeb meem los sis qhov tseeb sib xws ib yam tau muab coj los sib hais nyob rau tib lub sij hawm los ntawm tib tus kws txiav txim plaub ntug xwb. Koj tuaj yeem thov kom muaj kev sib sau ua ke. OAH kuj tseem tuaj yeem thov kom muab ob rooj plaub los sis ntau rooj plaub coj los ua ke. Yog hais tias koj tsis txaus siab yuav pom zoo rau kev sib sau ua ke ntawd, koj tuaj yeem hais tias "tsis kam." Tus kws txiav txim plaub yuav txiav txim siab seb puas yuav sib sau cov rooj plaub raws li Txoj Cai Lanterman thiab cov xwm txheej ntawm rooj plaub.

Cov Neeg Txhais Lus

Yog hais tias koj los sis tus neeg tim khawv xav tau ib tus neeg txhais lus, ces hu rau OAH kiag tam sim ntawd. OAH yuav muab ib tug neeg txhais lus uas muaj ntawv pov thawj yam tsis muaj nqi rau koj them.

Kev Muaj Peev Xwm Nkag Tau Mus Rau Qhov Chaw Ntawm Lub Rooj Sib Hais

Cov chaw ntawm lub rooj sib hais yuav tsum yog qhov chaw uas cov neeg cov kev tsis taus ntawm lub cev muaj peev xwm nkag mus tau.Koj yuav tsum kuaj xyuas nrog OAH ua ntej kom paub tseeb tias qhov chaw ntawd koj muaj peev xwm nkag mus tau. Yog hais tias ib tus neeg muaj ib qho kev tsis taus ntawm lub cev xav tau qhov chaw so kom tsim nyog los mus koom lub rooj sib hais, ces thov hu rau OAH kom sai li sai tau kom OAH thiaj tuaj yeem npaj tau.

Kev Tau Txais ib tus Kws Txiav Txim Plaub Ntug Txawv

Tsis yog txhua tus kws txiav txim plaub ntug yuav zoo ib yam. Koj yuav tsum paub txog koj tus kws txiav txim plaub ntug ua ntej lub rooj sib hais. Tej zaum koj yuav tuaj yeem tau txais lwm tus kws txiav txim plaub ntug yog hais tias tus kws txiav txim plaub ntug uas tau muab rau koj muaj keeb kwm ntawm kev tsis ncaj ncees los yog kev xaiv neeg. Koj ua qhov no los ntawm kev ua tsab ntawv tsa suab thov tsis kam lees tus kws txiav txim plaub ntug. Daim qauv ntawv thov los hloov cov kws txiav txim plaub ntug yog muaj nyob hauv Cov Ntawv Ntxiv B.

Yog xav nrhiav cov ntaub ntawv hais txog tus kws txiav txim plaub ntug uas tau muab rau koj rooj plaub, ces nkag mus rau lub vev xaib ntawm OAH tau ntawm http://www.dgs.ca.gov/oah/GeneralJurisdiction/Calendar.aspx (daim ntawv qhia hnub hli ntawm kev txiav txim plaub ntug thuaj pais) thiab sau tus naj npawb ntawm koj rooj plaub rau.Tus kws txiav txim plaub ntug yuav raug muab rau koj thaum ze yuav txog hnub tsa lub rooj sib hais. Tom qab ntawd, mus rau kab ntawv txuas ntawm https://www.dgs.ca.gov/OAH/Case-Types/General-Jurisdiction/Resources/DDS-Decisions thiab sau tus kws txiav txim plaub ntug lub npe rau.Koj yuav pom ib daim ntawv teev cov rooj plaub uas tus kws txiav txim plaub ntug tau txiav txim tiav lawm. Nyeem qee rooj plaub kom pom tias qhov no yog tus kws txiav txim plaub ntug uas koj xav kom txiav txim rau koj rooj plaub. Yog hais tias tsis yog, ces ua tsab ntawv tsa suab thov tsis kam lees tus kws txiav txim plaub ntug. Tsuas yog xa los sis fax daim ntawv tsa suab thov txhawm rau tsis kam lees mus rau OAH. Muab koj tej ntaub ntawv siv sib txuas lus qhia.Yog hais tias koj tsis hnov ​​kev teb rov qab los ntawm OAH, ces hu rau OAH ua ntej lub rooj sib hais kom paub seb koj qhov kev thov puas tau tso cai. Feem ntau lawm, qhov kev thov yuav raug tso cai.

Ntu 3 – Kev Npaj Kom Txhij rau Lub Rooj Sib Hais

Kev Txiav Txim Siab Txog Koj Qhov Kev Sib Cav Fab Kev Cai Lij Choj

Koj qhov kev sib cav fab kev cai lij choj yog txoj cai uas koj siv los qhia tias koj tsim nyog tau txais kev pab cuam uas koj thiab lub chaw muab kev pab hauv cheeb tsam tsis pom zoo txog, thiab qhov tseeb uas pab txhawb koj qhov kev thov. Txhawm rau npaj koj qhov kev sib cav fab kev cai lij choj:

Tshawb xyuas txoj cai lij choj uas txhawb nqa koj txoj hauj lwm.

Tshawb nrhiav thiab nyeem cov kev txiav txim plaub ntug hauv Rooj Plaub Sib Hais Kev Ncaj Ncees yav dhau los ntawm kab ntawv txuas nram qab no: https://www.dgs.ca.gov/OAH/Case-Types/General-Jurisdiction/Resources/DDS-Decisions

Kev Npaj Koj Qhov Pov Thawj

Cov pov thawj yog qhov tseeb uas txhawb nqa koj qhov kev thov. Cov pov thawj muaj xam nrog cov ntaub ntawv thiab cov lus pov thawj los ntawm cov neeg tim khawv. Koj yuav tsum siv cov pov thawj uas muaj feem cuam tshuam nrog nkaus xwb. Cov pov thawj muaj feem cuam tshuam yog tias nws pab ua pov thawj tias koj tsim nyog tau txais kev pab cuam uas lub chaw muab kev pab hauv cheeb tsam tsis kam lees, sim txo, los sis sim muab tshem tawm.

Kev Suav Sau Cov Pov Thawj Uas Sau Ua Ntaub Ntawv Tseg (Cov Ntaub Ntawv Sau Tseg)

Koj yuav tsum sau cov pov thawj uas txhawb nqa koj cov lus sib cav fab kev cai lij choj. Qee cov piv txwv ntawm cov pov thawj muaj xws li:

• Ib qho kev piav qhia ntawm qhov kev pab cuam;
• Koj qhov IPP uas piav qhia txog cov hom phiaj ntawm qhov kev pab cuam;
• Cov ntawv tshaj qhia los sis cov kev ntsuam xyuas fab kev puas siab puas ntsws uas qhia tias koj xav tau kev pab cuam;
• Cov ntaub ntawv qhia meej txog ntawm cov neeg ua hauj lwm muaj kev cob qhia tshwj xeeb;
• Cov ntawv tshaj qhia txog vam meej los ntawm tus kws muab kev pab kho mob; thiab
• Cov lus tshaj tawm los ntawm cov neeg ua hauj lwm los sis lwm tus neeg hais txog qhov kev pab cuam.

Koj tuaj yeem thov cov ntaub ntawv los ntawm cov tsev kawm ntawv, cov kws kho mob, thiab cov khoom haum tsoom fwv uas tej zaum yuav muaj cov ntaub ntawv tseem ceeb. Tsis txhob tos yuav thov cov ntaub ntawv teev tseg. Kev sau cov ntaub ntawv feem ntau yuav siv sij hawm ntev dua li qhov koj xav.

Dua li ntawm lwm cov ntaub ntawv uas twb muaj lawm, koj yuav tsum tau txais cov ntaub ntawv pov thawj ntxiv los txhawb pab koj rooj plaub, xws li daim ntawv tshaj qhia kev ntsuam xyuas los ntawm tus kws kho mob tshaj lij. Koj tuaj yeem thov kom cov neeg uas paub zoo txog koj sau cov tsab ntawv los sis ntawv tshaj tawm. Tus kws txiav txim plaub ntug yuav muab kev ntaus nqi hnyav dua rau cov ntaub ntawv los ntawm tus neeg uas nyob hauv lub rooj sib hais los ua ib tus tim khawv dua li tus neeg sau tsab ntawv los sis kev tshaj tawm.

Koj muaj cai pom cov ntaub ntawv hauv koj lub chaw muab kev pab hauv cheeb tsam cov ntaub ntawv, muaj xam nrog cov ntaub ntawv teev tseg uas lub chaw muab kev pab hauv cheeb tsam tau txais los ntawm cov koom haum los sis cov tib neeg sab nraud. Lub chaw muab kev pab hauv cheeb tsam yuav tsum cia rau koj nkag mus saib tau koj cov ntaub ntawv teev tseg tsis pub dhau peb hnub ua hauj lwm tom qab koj thov kom pom cov ntawd ntawd. Yog hais tias koj xav tau, lub chaw muab kev pab hauv cheeb tsam yuav tsum pab kom koj nkag siab koj cov ntaub ntawv teev tseg thiab. Yog hais tias cov ntaub ntawv hauv lub chaw muab kev pab hauv cheeb tsam muaj cov ntaub ntawv uas pab ua pov thawj rau koj rooj plaub, koj yuav tsum muab cov ntaub ntawv ntawd tso rau hauv koj cov pov thawj. Tsis txhob xav tias tus ALJ yuav muaj cov ntaub ntawv ntawd vim lub chaw muab kev pab hauv cheeb tsam muaj cov ntaub ntawv ntawd lawm. Tus ALJ tsuas yog pom cov pov thawj uas koj thiab lub chaw muab kev pab hauv cheeb tsam xaiv los muab nkaus xwb.

Koj yuav tsum tau saib cov kev cai tswj los sis cov lus taw qhia txog Kev Yuav Cov Kev Pab Cuam (Purchase of Service (POS)) ntawm lub chaw muab kev pab hauv cheeb tsam. Cov no feem ntau lawm tau muab tshaj tawm tso rau hauv koj lub chaw muab kev pab hauv cheeb tsam lub vev xaib. Yog hais tias koj nrhiav tsis tau cov cai tswj hais txog POS hauv online, ces hu mus rau lub chaw muab kev pab hauv cheeb tsam thiab thov luam theej ib daim ntawv. Yog tias cov lus tshab txhais ntawm cov kev pab cuam muaj txiaj ntsig zoo rau koj rooj plaub, muaj cov lus tshab txhais ntawd nyob hauv koj cov pov thawj.

Tej zaum koj yuav xav xa daim ntawv foob rau lub koom haum lis hauj lwm los tsim cov ntaub ntawv rau koj lub rooj sib hais. Ib tsab ntawv hu ntawm tsev hais plaub yuam lub koom haum coj cov ntaub ntawv uas lawv muaj thiab xyuas rau lub tsev hais plaub tias cov ntaub ntawv los sis cov ntaub ntawv teev tseg ntawd tsis raug kho. Koj tuaj yeem thov kom lub koom haum ua qhov no los ntawm kev tshaj tawm los sis los ntawm cov lus tim khawv ncaj qha. Daim ntawv foob rau lub rooj sib hais kev ncaj ncees ntawm lub chaw muab kev pab hauv cheeb tsam tuaj yeem nrhiav tau ntawm no: https://www.dgs.ca.gov/OAH/Case-Types/General-Jurisdiction/Forms/Page-Content/DDS-Forms Kev Npaj Cov Neeg Ua Tim Khawv

Cov lus pov thawj ntawm ib tug tim khawv kuj yog ib hom pov thawj tau ib yam nkaus. Qee zaus cov neeg tim khawv yuav tsum tau txais tsab ntawv caw ntawm tsev hais plaub.Ib tsab ntawv caw ntawm lub tsev hais plaub yog ib daim ntawv txib raug cai yuam kom lawv tuaj koom lub rooj sib hais los ua tim khawv. Koj yuav tsum tau thov daim ntawv caw cov neeg tim khawv thiab thov kom cov neeg tim khawv tuaj ua pov thawj sai li sai tau thaum koj tau txais hnub sib hais plaub lawm txhawm rau cov neeg thiaj npaj tau.

Koj yuav tsum sau cov lus nug rau koj cov neeg tim khawv paub ua ntej. Tshuaj xyuas cov lus nug no nrog cov neeg tim khawv kom paub tseeb tias cov neeg tim khawv nkag siab qhov koj nug thiab cov lus teb ntawd yuav pab tau koj rooj plaub li cas. Yog hais tias tus neeg tim khawv cov lus teb pab tsis tau koj, tsis txhob nug cov lus nug hauv lub rooj sib hais. Kev hloov txoj hau kev nug cov lus nug yog lo lus yuav pab tau.

Koj yuav tsum tau npaj ua tim khawv, vim koj yog ib tug tim khawv zoo tshaj plaws rau koj tus kheej los sis koj tus me nyuam. Npaj los tham txog tias vim li cas koj thiaj xav tau kev pab cuam. Tej zaum koj yuav xav hais tias vim li cas lwm cov kev pab cuam thiaj ua tsis tiav. Cov no tuaj yeem yog cov piv txwv tseem ceeb ntawm qhov tias vim li cas koj thiaj xav tau qhov kev pab cuam uas koj tau thov.

Kev Sib Pauv ntawm Daim Ntawv Teev Npe Cov Tim Khawv thiab Cov Khoom Ua Si

Yam tsawg kawg yog 2 hnub ua hauj lwm ua ntej lub rooj sib hais yuav pib, koj thiab lub chaw muab kev pab hauv cheeb tsam yuav tsum sib pauv cov ntaub ntawv qhia txog cov pov thawj uas koj yuav siv thaum lub rooj sib hais.

Lub chaw muab kev pab hauv cheeb tsam yuav tsum muab yam uas hu ua tsab ntawv tshaj tawm rau koj thiab OAH tsis pub dhau 2 hnub ua hauj lwm ua ntej lub rooj sib hais. Daim ntawv tshaj tawm txoj hauj lwm yuav tsum muab qhov tseeb hais txog qhov kev txiav txim thiab cov laj thawj rau qhov kev txiav txim ntawm lub chaw muab kev pab hauv cheeb tsam rau koj, muaj xam nrog cov ntaub ntawv hais txog cov neeg tim khawv uas nws yuav siv thaum lub rooj sib hais, thiab suav nrog tag nrho cov ntaub ntawv nws yuav siv thaum lub rooj sib hais. Daim ntawv tshaj tawm txoj hauj lwm tseem yuav tsum yog nyob rau hauv koj los sis koj tus neeg sawv cev tau txais kev tso cai hom lus uas nyiam.

Koj yuav tsis tas yuav npaj daim ntawv qhia txoj hauj lwm yog tias koj tsis xav tau. Tab sis 2 hnub ua hauj lwm ua ntej lub rooj sib hais, koj yuav tsum tau muab daim ntawv teev npe cov neeg tim khawv rau lub chaw muab kev pab hauv cheeb tsam thiab txoj hau kev uas lawv paub koj tau li cas thiab ib daim ntawv theej ntawm cov kev ntsuam xyuas kev tshaj lij los sis cov ntawv tshaj qhia uas koj npaj yuav siv los ua pov thawj koj rooj plaub. Yog hais tias koj xav siv lwm cov ntaub ntawv los ua pov thawj rau koj rooj plaub, koj tuaj yeem muab cov ntaub ntawv ntawd rau OAH thiab lub chaw muab kev pab hauv cheeb tsam tau txhua lub sij hawm ua ntej lub rooj sib hais yuav pib los sis thaum pib lub rooj sib hais lawm.

Tus ALJ tuaj yeem tiv thaiv koj los sis lub chaw muab kev pab hauv cheeb tsam los ntawm kev qhia cov ntaub ntawv thiab cov neeg tim khawv uas tsis tau muab rau txhua leeg 2 hnub ua hauj lwm ua ntej lub rooj sib hais.

Ntu 4 – Thaum Lub Sij Hawm Lub Rooj Sib Hais thiab Tom Qab Lub Rooj Sib Hais Tiav

Tuaj txog ntawm lub rooj sib hais ua ntej kom tseem muaj lub sij hawm ntau.Lub rooj sib hais yuav yog ib qho txheej txheem ntev, yog li koj yuav tsum tau nqa dej thiab khoom noj txom ncauj. Nqa ib tug cwj mem thiab phau ntawv tuaj sau thaum sij hawm lub rooj sib hais.

Nqe Lus Qhib

Koj yuav tsum muab ib nqe lus qhib.Tsis tas yuav tsum muaj nqe lus qhib, tab sis nws yuav pab piav qhia rau tus ALJ paub tias seb lub rooj sib hais ntawd yuav hais txog dab tsi. Koj nqe lus qhib yuav tsum piav qhia txog qhov kev pab cuam uas koj thov thiab vim li cas. Nws yuav tsum muaj nrog rau txoj cai lij choj uas txhawb nqa koj txoj hauj lwm. Nco ntsoov piav qhia txog koj tus kheej los sis koj tus me nyuam kom tus ALJ nkag siab txog yam koj los sis koj tus me nyuam xav tau. Koj cov nqe lus qhib yuav tsum yog cov ntsiab lus suav sau luv luv ntawm koj rooj plaub. Lub chaw muab kev pab hauv cheeb tsam yuav muab nws cov nqe lus qhib ua ntej tso. Tom qab ntawd koj mam li muab koj cov lus qhib.

Kev Nug Cov Neeg Tim Khawv

Chaw Muab Kev Pab Hauv Cheeb Tsam Cov Neeg Tim Khawv

Lub chaw muab kev pab hauv cheeb tsam yuav qhia nws cov neeg tim khawv ua ntej tso. Koj tuaj yeem nug cov lus nug tus neeg tim khawv ntawm lub chaw muab kev pab hauv cheeb tsam tom qab lub chaw muab kev pab hauv cheeb tsam nug cov lus nug tiav lawm. Qhov no yog hu ua "kev tshuaj ntsuam xyuas hla." Koj cov lus nug yuav tsum pab qhia tias tus neeg tim khawv tsis nkag siab qee yam los sis tsis nco qab qhov tseeb lawm. Tej zaum koj kuj tseem yuav nug cov lus nug uas qhia tias tus neeg tim khawv tab tom koom nrog, tab tom hloov qhov nws tau hais ua ntej, los sis tej zaum tsis qhia qhov tseeb.

Ua tib zoo mloog thaum lub chaw muab kev pab hauv cheeb tsam cov neeg tim khawv muab pov thawj. Tej zaum koj yuav pom tias muaj qhov tsis zoo coj los tom qab thaum sij hawm koj qhov kev tshuaj ntsuam xyuas hla. Tsis tas li ntawd, koj yuav tsum tau ua raws li cov lus nug kev tshuaj ntsuam xyuas hla uas koj tau sau ua ntej lub rooj sib hais. Nws tsis yog ib lub tswv yim zoo los nug ib lo lus nug yog tias koj tsis tau paub cov lus teb, tshwj tsis yog koj xav tias cov lus teb yuav pab tau koj cov lus sib cav tau zoo heev.

Koj Tus Kheej Cov Tim Khawv

Tom ntej no, koj yuav nug cov nqe lus nug koj tus kheej cov tim khawv. Qhov no yog hu ua "kev tshuaj ntsuam xyuas ncaj nraim." Cov neeg tim khawv yuav tsum tham txog tej yam uas lawv tau ua los sis tau pom los sis tau hnov los ntawm lawv tus kheej nkaus xwb. Koj yuav tsum nug cov nqe lus nug uas luv luv, yooj yim, meej.

Dua li ntawm kev nthuav qhia koj cov lus sib cav tseem ceeb, koj tuaj yeem nug cov nqe lus nug txog koj cov neeg tim khawv kom tsis lees paub tej yam uas cov neeg tim khawv hauv lub chaw muab kev pab hauv cheeb tsam tau hais. Tsis tas li ntawd, koj yuav tsum tau ua raws li cov lus nug uas koj tau npaj ua ntej lub rooj sib hais. Koj tuaj yeem nug cov lus nug tom qab yog tias koj tus tim khawv cov lus teb tsis meej.

Lub chaw muab kev pab hauv cheeb tsam yuav muaj lub hwv tsam los tshuaj ntsuam xyuas hla rau koj cov neeg tim khawv. Tus ALJ tseem tuaj yeem nug cov lus nug ntawm cov neeg tim khawv. Tom qab lub chaw muab kev pab hauv cheeb tsam tau tshuaj ntsuam xyuas hla rau koj tus neeg tim khawv, koj yuav muaj ib lub hwv tsam los nug cov nqe lus nug ntxiv txog koj tus neeg tim khawv. Qhov no yog hu ua "kev tshuaj ntsuam xyuas hloov kev." Nyob rau qhov chaw no, koj tuaj yeem hais kom koj tus neeg tim khawv qhia meej los sis rov hais dua tej yam dab tsi tsis zoo uas tuaj yeem tshwm sim thaum lub sij hawm kev tshuaj ntsuam xyuas hla.

Cov Nqe Lus Kaw/Ntsiab Lus Kaw Sau Luv Luv

Thaum koj dhau los ntawm lub rooj sib hais, tej zaum koj yuav paub tias tus kws txiav txim plaub ntug tsis muaj txhua yam ntaub ntawv los ua kev txiav txim zoo. Yog tias muaj li ntawd, koj tuaj yeem hais tus kws txiav txim plaub ntug "khaws cov ntaub ntawv qhib." Tus kws txiav txim plaub tuaj yeem hais tias "yog" los sis "tsis yog" rau qhov no. Yog tias tus kws txiav txim siab pom zoo khaws cov ntaub ntawv qhib, nws yuav tso cai rau ob tog muab cov ntaub ntawv thiab cov ntaub ntawv ntxiv rau tus kws txiav txim plaug ntug tom qab lub rooj sib hais.

Feem ntau lawm tus ALJ yuav hais kom kaw lus thaum kawg ntawm lub rooj sib hais los sau cov pov thawj. Qhov no yog lub hwv tsam zoo los hais txog qhov koj tau nthuav tawm ntawm lub rooj sib hais thiab rov hais dua koj txoj hauj lwm uas koj muaj cai tau txais kev pab cuam. Qee zaus, ob tog pom zoo sau ib daim ntawv ua lus kaw luv luv es tsis txhob lo muab nqe lus kaw uas hais ntawm qhov ncauj. Qhov kev xaiv no tso cai rau koj los xav txog tag nrho cov lus tim khawv ua ntej koj sau koj cov lus sib cav. Ib tsab ntawv sau ua lus kaw yuav tsum muab cov ntaub ntawv thiab qhov tseeb uas koj tau nthuav tawm thiab teeb tsa txoj cai lij choj uas txhawb nqa koj rooj plaub. Yog tias tus ALJ khaws cov ntaub ntawv qhib tom qab lub rooj sib hais thiab tso cai kom muaj pov thawj ntxiv, koj tuaj yeem suav nrog hauv koj daim ntawv kaw rooj plaub tau. Ib Daim Qauv Ntawv Kaw Uas Sau Luv Luv yog suav nrog hauv Daim Ntawv Ntxiv D. Nplooj 16 ntawm 39

Tom Qab Lub Rooj Sib Hais

Tom qab koj lub rooj sib hais, tus ALJ muaj sij hawm 10 hnub los sau qhov kev txiav txim. Qhov kev txiav txim yuav tsum muab lis tsis pub dhau 80 hnub tom qab koj tau thov koj qhov kev thov kom rov sib hais dua. Ib daim qauv ntawv ntawm kev txiav txim plaub ntug suav nrog hauv Daim Ntawv Ntxiv E. Tus ALJ qhov kev txiav txim siab yuav tsum:

• Sau ua hom lus yooj yim, txhua hnub;
• Tau muab txhais ua hom lus uas koj nyiam;
• Muaj xam nrog cov ntsiab lus suav sau ntawm qhov tseeb;
• Suav nrog ib nqe lus hais txog cov pov thawj uas tus ALJ tau siv los txiav txim siab;
• Suav nrog kev txiav txim siab ntawm txhua qhov teeb meem los sis cov lus nug uas muaj nyob rau hauv daim ntawv thov rooj sib hais thiab nthuav tawm thaum lub rooj sib hais; thiab
• Qhia cov kev cai lij choj, cov kev cai tseev kom ua raws, thiab cov cai tswj uas txhawb nqa tus ALJ qhov kev txiav txim siab.

Yog tias koj tsis pom zoo nrog qhov kev txiav txim plaub ntug, koj muaj ob txoj kev xaiv.

Qhov thib ib, koj tuaj yeem thov kom rov txiav txim dua yog hais tias koj xav tias qhov kev txiav txim siab tsis raug qhov tseeb los sis raug cai. Koj tuaj yeem thov kom rov txiav txim dua tsis pub dhau 15 hnub ntawm qhov kev txiav txim.Lwm tus neeg ua hauj lwm hauv lub rooj sib hais yuav tshuaj xyuas koj qhov kev thov. Qhov kev txiav txim siab tso cai los sis tsis kam lees koj qhov kev thov rov txiav txim siab dua yuav raug txiav txim tsis pub dhau 15 hnub.

Qhov thib ob, koj muaj txoj cai los thov kom rov sib hais dua mus rau Lub Tsev Txiav Txim Plaub Ntug Txheej Siab (Superior Court). Koj yuav tsum thov kom rov sib hais dua tsis pub dhau 180 hnub tom qab koj tau txais qhov kev txiav txim plaub ntug lawm. Yog xav paub ntxiv txog qhov txheej txheem no, mus saib Cov Cai Raws Li Tsab Cai Lanterman, Ntu 12: https://rula.disabilityrightsca.org/rula-book/chapter-10-appeals-and-complaints-disagreements-with-regional-centers-developmental-centers-or-service-providers/